Kajitõk ko jen Ro Rej Riit

Etke Moses ear illu ibben lõmaro nejin Aron, Iliezar im Itamar, elikin an kar mij lõmaro jeir etair Nedab im Ebaihu? Im ta eo ear kamed buruen Moses?—Liv. 10:16-20.

Jejjo ien elikin air kar kabit ro renaj bõk jerbal in pris ilo imõn kabed eo, Jeova ear mõn lõmaro nejin Aron etair Nedab im Ebaihu kin air kar katok iman mejen kin kijeek wan. (Liv. 10:1, 2) Moses ear jiroñ lõmaro jet nejin Aron bwe ren jab buromõj kake lõmaro jeir me rar mij. Ejjabto tokelik, Moses ear kanuij illu ibben Iliezar im Itamar kinke rar jab kañe kanniekin got eo rar katok kin jerawiwi ko kake. Men in ear mõttan men in katok ko pris ro rej kõmmani. (Liv. 9:3) Etke Moses ear illu?

Ilo kien ko Jeova ear lilok ñan Moses, ear kalikar bwe pris eo me ej katok kin jerawiwi ko en kañ mõttan kanniekin menin mour eo kar katok kake ilo inabwijen imõn kabed eo. An kõmmane men in ear kalikar bwe emwij jeorlok jerawiwi ko an ro im rar bõktok menin katok eo. Bõtab, elañe ej bõk bõtõktõkin menin mour eo ñan jikin eo Ekwojarjar, rum eo jinointata ilo imõn kabed eo, innem en jab mõñã jen e. Jen an eindrein, ej aikwij tile.—Liv. 6:24-26, 30.

Bwelen elikin wõt men eo ekaburomõjmõj im nana ear walok ilo ran eo, Moses ear kile joñan aurõkin air aikwij lor aolep kien ko an Jeova. Ke ear jelã bwe rar tile got eo kar katok kake kin jerawiwi ko, ear kanuij illu im ear kajitõk ibben Iliezar im Itamar etke rar jab mõñã einwõt kar kakien ir. Elaptata kinke rar jab ajelok bõtõktõkin got eo ñan Jeova ilo Jikin eo Ekwojarjar.—Liv. 10:17, 18.

Aron ear uake Moses kinke e eo ear kamelim airro jab mõñã. Kin an kar mij lõmaro ruo nejin, bwelen Aron ear lemnak bwe ejjab jimwe ñan an jabrewõt pris mõñã jen menin katok in ilo ran eo. Bwelen ear lemnak bwe Jeova eban kar mõnõnõ ibbeir elañe rar mõñã meñe ejelok rueir kin jerawiwi eo an Nedab im Ebaihu.—Liv. 10:19.

Aron emaroñ kar lemnak bwe ro nejin ren kar lukkun kate ir ñan kabuñburen Jeova ilo men ko otemjej ekoba men ko redrik, elaptata ilo ran eo jinointata me rej kap kõmmani jerbal ko an pris. Bõtab, Nedab im Ebaihu rar katton etan Jeova. Kin men in Anij ear bwil an illu nae ir. Innem, kinke jerawiwi eo ear itok jen ro uan baamle eo an me rej pris, bwelen Aron ear lemnak bwe ejakkar air mõñã jen men in katok eo.

Uak eo an Aron ear kamed buruen Moses kinke eon in ej wõnmanlok im ba: “Im ke Moses e ar roñ nan eo, e ar buñburuen kake.” (Liv. 10:20) Ejelok berre bwe Jeova bareinwõt ear buñburuen kin uak eo an Aron.