Kwoj Drike Ke Nana?

“Kw’ar [Jisõs] drike nana.”—HIB. 1:9.

1. Ta eo Jisõs ear ba kin yokwe?

 JISÕS ear kalikar kin aurõkin yokwe ke ear jiroñ dri kalor ro an: “Kien ekãl Ij lewoj ñõn kom, Komin yokwe dron; einwõt I ar yokwe kom, komin bareinwõt yokwe dron. Ilo men in armij otemjej re naj jela bwe komij dri kalora, elañe komij yokwe dron.” (Jon 13:34, 35) Jisõs ear kakien dri kalor ro an bwe ren yokwe dron im lemnak kake dron. Eñin ej kakõlen ro im rej mol in Kristian. Jisõs ear bareinwõt rejañ ir: “Komin yokwe ro dri kijirãte kom, im jar kin ro rej matõrtõr kom.”—Matu 5:44.

2. Ta eo ro dri kaloran Jisõs rej aikwij drike?

² Meñe Jisõs ear katakin dri kalor ro an kin yokwe, ear bareinwõt katakin ir kin ta ko rej aikwij driki. Baibel eo ej ba kin Jisõs: ‘Kw’ar yokwe wãnik im Kw’ar drike nana’ ak jerawiwi. (Hib. 1:9; Sam 45:7) Men in ej kwalok bwe jen jab baj yokwe wõt wãnik, ak jej aikwij bareinwõt drike jerawiwi ak nana. Jen kememej nan kein raurõk an dri jilik Jon ke ear ba: “Ro otemjej rej kõmõn jerawiwi rej kõtõrei kien eo: bwe jerawiwi ej men in kõtõrei kien.”—1 Jon 3:4.

3. Ta men ko jenaj etali ilo katak in?

 ³ Innem kij dri Kristian ro jej aikwij kajitõkin kij make, ‘Ij ke drike nana?’ Jen etale ewi wãwen jemaroñ kwalok ad drike men ko renana ilo wãwen ad lemnak kin men kein emen: (1) le jen joñan idrak drenin arkool, (2) anijnij, (3) mour etton, im (4) ro rej yokwe men ko renana.

Jab Idrak Arkool Le jen Joñan

4. Etke Jisõs ear jab ãliklik in ba bwe enana kadek?

⁴ Jet ien Jisõs ear idrak wain kinke ear kile bwe wain ej juõn menin letok jen Anij. (Sam 104:14, 15) Bõtab ear jab idrak ñan ñe ekadek. (Ken. 23:29-33) Eñin unin Jisõs ear jab ãliklik in ba bwe enana kadek. (Riit Luk 21:34.) Le jen joñan idrak drenin arkool emaroñ tellok kij ñan kõmmani men ko renana. Eñin unin dri jilik Paul ear je: “Komin jab karek kin wain, ijo eor dõr.” (Ep. 5:18) Ear bareinwõt rejañ lilap ro ilo congregation ko bwe ren jab “dri karek kin wain.”—Tait. 2:3.

5. Ta kajitõk ko ro im rej idrak drenin arkool rej aikwij kajitõkin ir make kaki?

⁵ Elañe emmõn ibbam idrak drenin arkool, kwon kajitõkin yuk make: ‘Ij ke bõk ejja lemnak eo wõt an Jisõs kin le jen joñan idrak im kadek? Elañe ij aikwij jibañ ro jet kin men in, inaj ke ãliklik in kakabilek ir ñe ijjab lore ejja kakabilek eo wõt? Ij ke idrak ñan jolok aõ inebata? Ewi joñan aõ idrak ilo kajjojo wik? Ta eo ij kõmmane ñe juõn ej jiroñtok iõ bwe elap aõ idrak? Ij ke kajeoñ in jojomare iõ make im illu ibben?’ Elañe ele jen joñan ad idrak dren in arkool men in emaroñ jelet lemnak ko ad im bõpraeik ad kõmmani bebe ko remmõn. Ro im rej dri kaloran Kraist, rej kate ir ñan kejbãrok lemnak ko air.—Ken. 3:21, 22.

Kejbãrok jen Menin Anijnij Ko

6, 7. (a) Ta eo Jisõs ear kõmmane ñan Setan im enjel ro renana? (b) Etke menin anijnij ko rebuñbuñ ilo ran kein?

⁶ Ke Jisõs ear bed ijin ion lal, ear jumaik Setan im enjel ro renana. Jisõs ear jumae Setan ke ear kajeoñ rupe tiljek eo an. (Luk 4:1-13) Ear bareinwõt kile lemnak ko rejjab jimwe im jab kõtlok bwe ren jelet lemnak im kõmman ko an. (Matu 16:21-23) Jisõs ear jibañ armij ro me enjel ro renana rar miok na ilo enbwinir im kaiñtan ir.—Mark 5:2, 8, 12-15; 9:20, 25-27.

⁷ Elikin kar kairoij Jisõs bwe en Kiñ ilo 1914, ear karreoik ilañ jen aolep wãwen ko renana an Setan im enjel ro renana. Kin men in, elaplok an Setan kate ñan “moni aolepen lõl.” (Rev. 12:9, 10) Innem jen jab bwilõñ ñe menin anijnij ko rekanuij buñbuñ ibben armij ro im elaplok air itoklimo im reel kaki. Ta eo jemaroñ kõmmane ñan kejbãrok kij?

8. Ta kajitõk ko jej aikwij kajitõkin kij make ñe jej kãlet menin kamõnõnõ ko?

⁸ Baibel eo ej kakkil kij nae uõta ko rej ekkejellok ñan menin kajitõbtõb im anijnij ko. (Riit Duteronomi 18:10-12, UBS.) Rainin, Setan im enjel ro renana rej kareel lemnak ko an armij ro ikijen book ko, pija ko, im mijjin  in ikkure ko me rej kaitoklimoik ir kin menin anijnij ko. Kin men in ñe jej kãlet menin kamõnõnõ ko, kij kajjojo jej aikwij kajitõkin kij make: ‘Ilo aliñ ko rej kab jemlok, iar ke aluiji pija im channel ko, ak ikkure kin mijjin ko, ak riiti book ko me ewor kajitõbtõb im anijnij ie? Ij ke kile bwe ekanuij aurõk ñan jumae menin anijnij ko? Ak ij ke kõmman jekben im ba bwe rejjab kanuij nana? Inañin ke kalomõnlokjen kin lemnak ko an Jeova kin menin kamõnõnõ ko ij kãleti? Elañe iar reel kin menin kareelel kein an Setan, aõ yokwe Jeova im kien ko an rewãnik enaj ke kamakõt iõ bwe in mõkaj im julok ak kejekron men kein?’—Jerb. 19:19, 20.

Lor Nan in Kakkil ko an Jisõs Nae Mour Etton

9. Ilo wãwen et juõn armij ej kwalok bwe ej yokwe nana?

⁹ Jisõs ear kautiej kien ko rewãnik an Jeova kin mour erreo. Ear ba: “Kom ar jab konono ilo buk, Eo e ar kõmõn ir ke ejino, E ar kõmõn ir man im kõra, im ba, Kin men in man e naj likit jemen im jinen, im e naj ber iben lio belen: im irro re naj juõn wõt kõniek ke? Kin men eo irro re jab ruo, a juõn wõt kõniek. Innem men eo Anij e ar kobaik, armij en jab kijbili.” (Matu 19:4-6) Jisõs ear jelã bwe men eo jej kalimjeke emaroñ jelet buruõd. Ilo Katak eo an ion Tol eo, ear ba: “Kom ar roñ bwe ar ba, Kwon jab lũñ; A Ij ba ñõn kom, Jabrewõt eo ej kalimjek kõra im mijkaiye emwij an lũñ iben ilo buruen.” (Matu 5:27, 28) Ro rej kejekron nan in kakkil in an Jisõs, ilo mol rej yokwe nana.

10. Kwalok wanjoñok eo kin juõn eo me ear maroñ bõjrak jen an aluiji pija ko retton.

¹⁰ Setan ej kajerbal pija ko retton ñan kareel im kaitoklimoik armij ro kin mour etton. Jukjuk im bed in eobrak kin pija ko retton. Ro im rej aluiji pija kein ebin air jolok men ko renana rar loi jen lemnak ko air. Jidrik kin jidrik rej kõnan wõt aluiji pija ko retton, einwõt juõn men rej añũri. Lale kin ta eo ear walok ñan juõn dri Kristian. Lein ear ba: “Iar noje aõ aluiji pija ko retton. Ke iar aluiji ear einwõt ñe ij bed ilo pija kein, im kinke iar baj aluiji wõt iar lemnak bwe rejjab jelet kõtan eo aõ ibben Jeova. Iar jelã bwe enana men eo iar kõmmane bõtab iar ba ibba make bwe Anij ej mõnõnõ wõt kin aõ karejar ñan e.” Ta eo ear jibañ in jeid im jatid bwe en kajimwe lemnak ko an? Ear ba: “Iar konono ibben elder ro kin abañ in aõ, meñe men in ear kanuij bin.” Tokelik, ear maroñ bõjrak jen manit in ekajõjõ. Ear ba: “Elikin aõ kar karreoik iõ jen jerawiwi in iar kõmmane, ej kab emmõn bõklikõt eo aõ.” Ro im rej drike nana rej aikwij bareinwõt drike pija ko retton.

11, 12. Ekijkan ad maroñ kwalok bwe jej drike nana ñe jej kãlet al in roñjake ko?

¹¹ Kajañjañ im nan ko ilo al ko remaroñ lukkun jelet eñjake ko ad im burued. Kajañjañ ej juõn menin letok jen Anij im jen etto rar kajerbale ñe rej kabuñ ñan Anij. (Ex. 15:20, 21; Ep. 5:19, UBS) Bõtab jukjuk im bed in enana an Setan ej kajerbal al ko ñan kareel armij ro ñan lemnak bwe emmõn mour in lũñ. (1 Jon 5:19) Ekijkan am maroñ jelã elañe al ko kwoj roñjaki rej katton lemnak ko am ak jab?

 ¹² Kwomaroñ kajitõkin yuk make: ‘Al ko ij roñjaki rej ke kwalok bwe emmõn mour in lũñ, lejen, uror, ak konono nae Anij? Elañe iar kwalok nan ko jen al eo ñan juõn armij, enaj ke lemnak bwe ij drike nana, ak nan ko renaj ke kalikar bwe emwij air katton buruõ im lemnak ko aõ?’ Jejjab maroñ ba bwe jej drike nana im ilo ejja ien eo wõt roñjake al ko renana. Jisõs ear ba: “A men ko rej walok jen loñin rej itok jen buruen, im rej kananaik armij. Bwe lemnok ko renana, uror ko, lũñ ko, . . . kwot ko, riõp ko, konono nae ko, rej itok jen buru.”—Matu 15:18, 19; keidi Jemes 3:10, 11, UBS.

Bõk Lemnak eo an Jisõs kin Ro Rej Yokwe Nana

13. Ewi wãwen an kar Jisõs watõk ro im rar beran in kõmmani men ko renana?

¹³ Jisõs ear ba bwe ear itok bwe en jibañ dri nana ro bwe ren ukwelok. (Luk 5:30-32) Bõtab ewi wãwen Jisõs ear watõk ro im rar beran in kõmmani men ko renana? Jisõs ear kajju im kakkil nae ad kobalok im bo ibben armij rein. (Matu 23:15, 23-26) Ear bareinwõt ba: “Jab otemjej rej ba ñõn Iõ, Iroij, Iroij, re naj dreloñtok ilo ailiñ in lõñ; a eo ej kõmõnmõn ankil an Jema ej ber i lõñ. Elõñ re naj ba ñõn Iõ ilo ran eo [ñe Anij enaj kokkure ro renana], Iroij, Iroij, kim ar jab drikanij kin etõm ke? Im kajutõklok [enjel ro renana] kin etõm ke? Im kõmõnmõn elõñ men in bwilõñ kin etõm ke?” Bõtab, Jisõs enaj karmijeteik ro im rejjab ukwelok jen jerawiwi ko air ilo an ba: “Komin ilok jen Iõ.” (Matu 7:21-23) Taunin naj ekajete rein ilo wãwen in? Kinke armij rein kajjojo rej kejekron Anij im armij ro jet rej jorrãn kin kõmõn ko air renana.

14. Ta un ko unin air aikwij bukwelok ro im rejjab ukwelok jen jerawiwi eo air?

¹⁴ Nan in Anij ej kakien bwe ñe armij ro rejjab ukwelok jen jerawiwi eo rej kõmmane, rej aikwij bukwelok jen congregation eo. (Riit 1 Dri Korint 5:9-13.) Ewor jilu un ko unin air aikwij bukwelok: (1) ñan kejbãrok bwe en jab etton etan Jeova, (2) ñan kejbãrok bwe en jab etton congregation eo, im (3) ñan kamakõt eo ear jerawiwi bwe en ukwelok.

15. Elañe jekõnan tiljek ilo ad edrep wõt na ibben Jeova, ta kajitõk ko jej aikwij kajitõkin kij make kaki?

¹⁵ Jej ke bõk ejja lemnak eo an Jisõs kin ro rej wõnmanlok wõt im kõmmane men ko renana? Jej aikwij lemnak kin kajitõk kein: ‘Inaj ke ekkeini aõ kobalok im kõmao ibben armij eo ear bukwelok ak eo im ear make kãlet im ba bwe ejako an juõn ian Dri Kennan ro an Jeova? Ta elañe armij eo ej uan baamle eo aõ, bõtab ejjab jokwe ilo mweo imõ?’ Men in enaj lukkun melejoñwe ewi joñan ad yokwe wãnik im tiljek ilo ad edrep wõt na ibben Jeova. *

16, 17. Ta abañ eo juõn jeid im jatid kõrã ear jelmaiki, ak ta eo ear jibañ e bwe en tiljek wõt kin karõk eo kin bukwelok?

¹⁶ Jen lale bwebwenato eo an juõn jeid im jatid kõrã eo me likao eo nejin ear yokwe Jeova ilo jinoin. Bõtab tokelik, ear  kõmmane juõn jerawiwi elap im ear jab ukwelok. Kin men in, kar bukwelok e jen congregation eo. Kõrã in elap an yokwe Jeova, ak ear bareinwõt yokwe likao in nejin im ear kanuij bin ñan an lore kien eo ilo Baibel ñan jab kõmao ibben leo nejin me ebukwelok.

¹⁷ Ta eo kwon kar ba ñan rejañe kõrã in jeid im jatid? Juõn elder ear jibañ e ñan kile bwe Jeova ear melele kin an metak buruen. Brother in ear kajitõk ibben ñan lemnak kin joñan an kar Jeova buromõj ke jet ian enjel ro nejin rar oktak im jumae e. Elder eo ear kemelele ilo joij bwe meñe Jeova emelele kin joñan an men in kaburomõj kij, ak ej kakien bwe ro im rejjab ukwelok jen jerawiwi rej aikwij bukwelok. Nan kein rar tõbar buruen kõrã eo im ear tiljek im lore wõt karõk eo kin bukwelok. * Ad tiljek ilo wãwen in ej kamõnõnõik buruen Jeova.—Ken. 27:11.

18, 19. (a) Ñe jejjab konono ibben ro rebukwelok, ta eo men in ej kamol bwe jej drike? (b) Ta eo emaroñ walok elañe jej tiljek wõt ñan Anij im lore karõk eo an kin bukwelok?

¹⁸ Elañe kwoj iion ejja abañ in wõt, joij im kememej bwe Jeova emelele kin joñan am buromõj. Ilo am jab kõmao ibben ro rebukwelok ak ro rar kalikar bwe ejako air kõnan uan Dri Kennan ro an Jeova, kwoj kwalok bwe kwoj drike air utiej buru im men ko renana rar kõmmani me rar tellok ñan air bukwelok. Bareinwõt ilo am kõmmane men in, kwoj kwalok bwe kwoj yokwe armij eo im kõnan jibañ e. Am tiljek ilo am edrep wõt na ibben Jeova emaroñ lukkun jibañ armij eo ñan an ukwelok im bar jeblak ñan Jeova.

¹⁹ Juõn armij im ear bukwelok im tokelik ear bar jeblak ñan congregation eo ear je: “Ij mõnõnõ bwe joñan an Jeova yokwe armij ro an ej kejbãrok bwe drolul eo an en erreo wõt. Meñe armij in lal in remaroñ lemnak bwe ej juõn kien elej, ak ilo mol ej juõn menin aikwij im ej kalikar bwe kwoj yokwe armij eo.” Kõrã in jeid im jatid eban kar maroñ ba nan kein elañe ro uan congregation eo im baamle eo an rar wõnmanlok im kõmao ibben ke ear bukwelok. Ñe jej rejetake karõk eo an Anij kin bukwelok men in ej kamol bwe jej yokwe wãnik im kaurõk kien ko an Jeova kin mour erreo.

“Drike Nana”

20, 21. Etke eaurõk bwe jen katak ñan drike nana?

²⁰ Dri jilik Piter ear ba: “Komin ekil.” Etke? Kinke “dri kijirãte kom, devil eo, einwõt laiõn e rorror, ej etetal wõt im bukot eo ej maroñ in kõñi.” (1 Pit. 5:8) Armij eo Setan ej bukote im kañe, enaj ke kwe? Eokwe, ej wawa ion joñan am lukkun kate yuk ñan drike nana.

²¹ Ad kate kij ñan drike men ko renana ejjab juõn men ebidrodro. Kij armij dri jerawiwi, im jej mour ilo juõn lal ej kajeoñ in kareel kij kin mõm ko an kõniek. (1 Jon 2:15-17) Bõtab, elañe jej anõke Jisõs Kraist im kamũlallok ad yokwe Jeova Anij, jenaj lo tõbrak ilo ad drike nana. Innem jen beek ilo burued ñan “drike nana,” im liki bwe Jeova “Ej kejbarok . . . ro dron, Ej lomoren ir jen kajur eo an ro ri nana.”—Sam 97:10, UBS.

[Kamelele eo itulal]

Ewi Wãwen Kwonaj Uak?

• Ta eo enaj jibañ kij ñan etale lemnak eo ad kin drenin arkool?

• Ta eo jemaroñ kõmmane ñan kejbãrok kij jen menin anijnij ko?

• Etke pija ko retton rekauwatata?

• Ewi wãwen jej kwalok bwe jej drike nana ñe juõn eo ejitenburu ibbed ej bukwelok?

[Kajitõk ko ñan katak]

[Pija ilo peij 29]

Elañe kwoj idrak drenin arkool, ta eo kwoj aikwij lemnak kake mokta?

[Pija ilo peij 30]

Kejbãrok yuk jen kein kamõnõnõ ko ewor anijnij ie

[Pija ilo peij 31]

Armij eo ej aluiji pija ko retton ej yokwe ta?