Yokwe Wãnik kin Aolepen Buruõm

“Kw’ar yokwe wãnik.”—SAM 45:7.

1. Ta eo enaj jibañ kij ñan lor ‘ial ko re wãnik’ an Anij?

 JEOVA ej kajerbal Baibel eo im kajur eo an ñan tel armij ro dron ilo “ial ko An otemjej re wãnik.” (Dut. 32:4) Bõtab kinke jejjab wãppen, ekkã wõt ad jebwãbwe jen ial eo ejimwe. Innem ñan ad jeblak ñan ial eo ejimwe, jej aikwij lukkun kate kij. Ta eo enaj jibañ kij ñan lo tõbrak ilo ad kõmmane men in? Eokwe, jej aikwij yokwe kõmman emmõn einwõt kar Jisõs.—Riit Sam 45:7.

2. Ta in ‘ial ko rewãnik’?

² Ta in ‘ial ko rewãnik’? “Ial” kein rej bedbed ion kien ko rewãnik an Jeova. Ilo kajin Hibru im Grik, nan in “wãnik” ej jitõñlok ñan juõn men “ejimwe” im ej edrep wõt ñan kien ko kin mour erreo. Kinke Jeova ej “juõn Anij ewãnik,” ro im rej kabuñ ñan e rej mõnõnõ in reilok ñan e bwe en tel ir ilo ial eo ejimwe.—Sam 31:1, UBS.

3. Ewi wãwen jemaroñ kalaplok ad jelã kin kien ko rewãnik an Anij?

³ Wãwen eo wõt im jenaj lukkun kabuñburuen Anij ej ikijen ad beek ñan bokake kien ko an rewãnik kin aolepen buruõd. Jemaroñ jino kõmmane men in ilo ad kamat ad maroñ ñan katak kin Jeova Anij ilo Nan eo an, Baibel eo. Elañe elaplok ad jelã kajen im druaklok ñan e ran otemjej, enaj laplok ad yokwe kien ko an rewãnik. (Jem. 4:8) Bareinwõt jej aikwij kõtlok bwe nan in kakabilek ko jen Baibel eo ren tel kij ñe jej kõmmani bebe ko raurõk ilo mour ko ad.

Bukot Wãnik eo an Anij

4. Ad bukot wãnik eo an Anij ej kitibuj ta?

⁴ Matu 6:33 ej ba: “A komin bukot mokta ailiñ in Anij, im [wãnik, NW] eo An.” Ad bukot wãnik eo an Anij ej kitibuj elaplok jen ad baj jolok ien ñan kwalok kin nuuj eo emmõn kin Ailiñ eo an Anij. Elañe jekõnan bwe jerbal ko ad ñan Anij ren kabuñburuen, jej aikwij kwalok mwil ko remmõn ran otemjej me rej ekkar ñan kien ko an. Ta eo ro otemjej im rej bukot wãnik eo an Jeova rej aikwij kõmmane? Rej aikwij “kõnõk armij ekãl, eo ekar ñõn Anij emwij kõmõne ekãl ilo wãnik im kwojarjar in mol.”—Ep. 4:24.

5. Ta eo enaj jibañ kij bwe en jako ad buromõj im ebwer?

⁵ Meñe jej kate kij ñan mour ekkar ñan kien ko rewãnik an Anij, jet ien jemaroñ buromõj im ebwer kin likjap ko ad. Ta eo emaroñ jibañ kij bwe en jako ad buromõj im ebwer? Im ta eo emaroñ jibañ kij ñan yokwe wãnik im kõmmani men ko rejimwe? (Ken. 24:10) Jej aikwij ekkeini ad kebake Jeova ilo ad jar ñan e “kin buru emol im kin tõmak ebin.” (Hib. 10:19-22, UBS) Meñe jej ro uan Kristian dri kabit ro ak ro im kejatrikrik eo air ej ñan mour indrio ion lal, jej aikwij jerbale tõmak eo ad ilo mij eo an Jisõs me ej wõnan jerawiwi ko ad im einwõt Pris eo ad Elap. (Rom 5:8; Hib. 4:14-16) Dri jilik Jon ear je: “Bõtõktõkin Jisõs Nejin, ej karreoik kij jen jerawiwi otemjej.” (1 Jon 1:6, 7) Bareinwõt, Baibel eo ej ba bwe meñe jerawiwi ko ad ‘rej kõmãr kij, ak Anij enaj  kwal kij bwe jen erreo einwõt snow.’ Jeova ear nawõnãn jerawiwi ko ad ikijen mij eo an Nejin eo ejitenburu ibben. Men in ej juõn menin letok ekanuij emmõn jen Jeova!—Ais. 1:18, UBS.

Etale Kein Tõrinae ko Am jen Anij

6. Etke elap an aurõk bwe jen etale kein tõrinae ko ad jen Anij?

⁶ Ien otemjej, jej aikwij kõnõk “binjen op in wãnik” kinke ej juõn ian kein tõrinae ko jen Anij me ekanuij aurõk. (Ep. 6:11, 14) Meñe jej kab ajelok mour eo ad ñan Jeova ak eto ad karejar ñan e, elap an aurõk bwe jen etale kein tõrinae ko ad jen Anij ran otemjej. Etke? Kinke emwij jolõltak Devil eo im enjel ro an renana ñan ijin ion lal. (Rev. 12:7-12) Elap an Setan illu kinke ejelã bwe jidrik wõt ien ibben. Kin men in, elaplok an matõrtõre ro dron Anij. Innem ekanuij aurõk bwe jen kõnõk “binjen op in wãnik” ien otemjej.

7. Ewi wãwen jemaroñ kalikar bwe jej kile aurõkin ad kõnõk “binjen op in wãnik”?

⁷ Binjen op eo ej kejbãrok menono eo an juõn dri tõrinae. Ilo ejja wãwen in lok wõt, wãnik ej kejbãrok buruõd. Kinke jejjab wãppen, buruõd ejelã mon. (Jerm. 17:9, UBS) Elap an aurõk bwe jen katak im kajimwe buruõd make kinke ekkã wõt an buruõd mone kij ñan kõmmani men ko renana. (Jen. 8:21) Elañe jej kile aurõkin ad kõnõk “binjen op in wãnik,” jejamin wutiki iomin jidrik ien ñan kãlet menin kamõnõnõ ko me Anij ej driki. Bareinwõt, ñe ej jiktok juõn lemnak ñan kõmmani men ko renana, jenaj mõkaj in jolok lemnak in. Jejamin kokkure ien ko raurõk ñan aluij TV. Jen ad eindrein, jenaj lukkun kate wõt kij ñan kabuñburuen Jeova. Elañe jaar buñ iomin jidrik ien im jino lemnak kin men ko renana, Jeova emaroñ jibañ kij ñan bar jutak.—Riit Jabõn Kennan Ko 24:16.

8. Etke eaurõk “ken tõrak in tõmak”?

⁸ “Ken tõrak in tõmak” ej bareinwõt juõn ian kein tõrinae ko ad jen Anij. Ej kamaroñ kij ñan “kwũni mõri kijeek otemjej an eo dri nana.” (Ep. 6:16) Innem, ad tõmak im yokwe Jeova kin aolepen buruõd enaj jibañ kij ñan kõmmani men ko rejimwe im jab jeõr jen ial eo ej tellok nan mour indrio. Elañe jej kalaplok ad yokwe Jeova, enaj laplok ad kaurõk wãnik. Ak ta kin bõklikõt eo ad? Ewi wãwen emaroñ jibañ kij ñan yokwe wãnik?

Kejbãrok Juõn Bõklikõt Emmõn

9. Ta tokjen ad kejbãrok juõn bõklikõt emmõn?

⁹ Ke jaar baptais, jaar kajitõk ibben Jeova kin juõn “bõklikõt emõn.” (1 Pit. 3:21) Kinke jej jerbale tõmak eo ad ilo binmour eo an Jisõs, bõtõktõkin Jisõs ej jeorlok jerawiwi ko ad im kin men in jemaroñ erreo iman mejen Anij. Jej aikwij kejbãrok juõn bõklikõt emmõn elañe jekõnan erreo wõt iman mejen Anij. Elañe jet ien bõklikõt eo ad ej kinaklok im kakkil kij, jen mõnõnõ kinke  emmõn an bõklikõt eo ad jerbal. Wãwen kein rej kalikar bwe bõklikõt eo ad ej jerbal ekkar ñan kien ko rewãnik an Jeova. (1 Tim. 4:2, UBS) Ak ewor bar juõn wãwen bõklikõt eo emaroñ jibañ ro im rekõnan yokwe wãnik.

10, 11. (a) Kwalok juõn wanjoñok me ej kalikar aurõkin ad roñjake bõklikõt eo ad emwij kamineneiki ekkar ñan Baibel eo. (b) Etke ad yokwe wãnik ej kamõnõnõik kij?

¹⁰ Bõklikõt eo ad emaroñ liakelok kij ñe jej kõmmani men ko renana. Juõn likao ear jebwãbwe jen “ial ko rewãnik” an Anij. Ear kajur aluij pija ko retton im ebin an bõjrak im ear jino kõbatat maruana. Ke ear kwelok ear abnõnõ bõklikõt eo an. Im enana an mour ke ej kwalok nan kinke ear jelã bwe ear mone armij ro, innem ear bõjrak jen an kwelok im kwalok nan. Ear ba, “Iar jab kõtõmene bwe bõklikõt eo aõ enaj liakelok iõ kin kõmman ko aõ. Iar wõnmanlok im mour ilo wãwen in enana iomin emen yiõ.” Tokelik ear jino an lemnak in jeblak ñan mol eo. Ear jar im kajitõk bwe Jeova en jolok an bwid meñe ear lemnak bwe ejamin eoroñ jar eo an. Elikin joñoul wõt minit, jinen ear lolok e im rejañ e ñan an bar jeblak im kwelok. Ear etal ñan Imõn Kwelok eo im kajitõk ibben juõn elder ñan katak ibben. Tokelik, ear baptais im elap an kamolole Jeova kin an kar lomoren mour eo an.

¹¹ Ñe jej kõmmani men ko rejimwe, men in ejjab ke lap an kamõnõnõik kij? Ke jej katak ñan yokwe wãnik im kõmmani men ko rejimwe, enaj laplok ad lõñliñ in kõmmani men ko me rej kabuñburuen Jemed ilañ. Baj lemnak mõk, mõttan wõt jidrik aolep armij ro rejamin bar abnõnõ bõklikõt ko air kinke renaj wãppen ilo air kajeoñwe Anij. Innem, kiõ ej ien ñan ad yokwe wãnik kin aolepen buruõd, im menin enaj kamõnõnõik Jeova.—Ken. 23:15, 16.

12, 13. Ewi wãwen jemaroñ kamineneik bõklikõt eo ad?

¹² Ewi wãwen jemaroñ kamineneik bõklikõt eo ad? Ñe jej katak Baibel im book ko rej bedbed ion Baibel eo, eaurõk ñan kememej bwe “buruen dru wãnik, ej kalomõnlokjen kin an uak.” (Ken. 15:28) Jen etale ewi wãwen ad kalomõnlokjen kin eon ko emaroñ jibañ kij ñe jej kabuk ad jerbal. Elañe juõn jerbal ej nae kien ko ilo Baibel eo, alikar enañin aolep renaj mõkaj air lor nan in tel ko jen dri kõmñe eo etiljek im meletlet im jab bõk jerbal eo. Bõtab, ewor jet jerbal ko emaroñ bin ad jelã elañe remõn ak renana. Innem jej aikwij bukot nan in kakabilek ko ilo Baibel eo, jar im kalomõnlokjen kaki bwe jen maroñ kõmmane bebe eo ejimwe. * Men in ej kitibuj ad lemnak kin eon eo me ej kwalok aurõkin ad jab kokkure bõklikõt ko an ro jet im kalõkatip ir. (1 Kor. 10:31-33) Elaptata jej aikwij lemnak  kin eon ko me renaj kakajurlok jimjerã eo ad ibben Anij. Elañe jej tõmak bwe Jeova emol an bed, jenaj kajitõkin kij make kin kajitõk in, ‘Elañe ij bõk jerbal in enaj ke kõmetak Jeova im kaburomõje?’—Sam 78:40, 41.

¹³ Ñe jej kaboj Imõniaroñroñ eo ad ak book eo jej etale ilo ien Katak Baibel an Congregation eo, jej aikwij kalomõnlokjen kake katak ko. Emõkaj ke ad kakõleik uak ko im kajju ñan pãrokõrããp eo tok juõn? Elañe eindrein ad katak ibbed make, men in eban kõmman bwe jen yokwe wãnik kin aolepen buruõd im eban emmõn an jerbal bõklikõt eo ad. Elañe jekõnan yokwe wãnik jej aikwij niknik ilo ad katak im kalomõnlokjen kin men ko jej riiti ilo Baibel eo. Jeban maroñ yokwe wãnik kin aolepen buruõd elañe jej ekkaiurir ilo ad katak.

‘Kwuli im Maro kin Wãnik’

14. Jeova Anij im Jisõs Kraist rekõnan bwe jen ta ñe jej kõmmani makõtkit ko an Kristian?

¹⁴ Jeova Anij im Jisõs Kraist rekõnan bwe jen mõnõnõ ñe jej kõmmani makõtkit ko an Kristian. Ta eo enaj jibañ kij bwe jen mõnõnõ wõt? Eokwe, ej ilo ad yokwe wãnik. Ilo katak eo an Jisõs ion Tol eo, ear ba: “Emõnõnõ ro rej kwuli im maro kin [“wãnik,” NW]; bwe re naj mat.” (Matu 5:6) Etke eaurõk nan kein ñan ro im rekõnan yokwe wãnik?

15, 16. Ilo wãwen et naj kõke aikwij eo an ro rej kwuli im maro kin mol eo?

¹⁵ Lal in jej mour ie ej bed iomin kajur eo an dri nana eo. (1 Jon 5:19) Jekron ia eo jej bed ie, ñe jej jibwetok juõn nuujpepa im riiti jenaj lo bwebwenato ko rekaburomõjmõj kin joñan an lap kowaroñ im lej. An armij kejorran bar juõn armij ej lukkun kainebataik armij ro rewãnik. (Ekk. 8:9) Bõtab, jejelã bwe Jeova wõt emaroñ kõke aikwij eo an ro rej kwuli im maro kin mol eo im rekõnan katak wãnik. Mõttan wõt jidrik ro renana renaj jako im ro rej yokwe wãnik reban bar inebata kin dri kowaroñ ro im kõmman ko air renana. (2 Pit. 2:7, 8) Ejelok emmõn in ñe enaj walok men in!

¹⁶ Einwõt dri karejar ro an Jeova im ro rej lor Kraist, jejelã bwe ro im rej ‘kwuli im maro kin wãnik renaj mat.’ Men in ej melelen bwe renaj ainemõn im mõnõnõ ñe Anij enaj kajejjit ankilan kin juõn lañ ekãl im lal ekãl “ijo wanik enaj bed ie.” (2 Pit. 3:13, UBS) Innem jen jab ebwer ak bwilõñ kin an jakolok wãnik im laplok nana im kowaroñ ilo lal in an Setan. (Ekk. 5:8) Jeova, eo Eutiejtata, ejelã kin men ko renana rej walok ibelakid im ejjabto jen kiõ enaj lomoren ro im rej yokwe wãnik.

Tokjen Ad Yokwe Wãnik

17. Ta jet ian jerammõn ko rej waloktok jen ad yokwe wãnik?

¹⁷ Sam 146:8 ej kalikar jerammõn eo me ej itok jen ad lor ial ko rewãnik. Dri jeje sam eo ear al im ba: “Jeova ej yokwe ro dru wãnik.” Baj lemnak mõk! Eo ej Iroij Bõtata ijoko otemjej ej yokwe kij kinke jej yokwe wãnik! Kinke Jeova ej yokwe kij, jejelã bwe enaj kõke aikwij ko ad elañe jej likit men ko an Ailiñ eo moktata ilo mour ko ad. (Riit Jabõn Kennan Ko 10:3; 13:21.) Ejjabto, armij ro rej yokwe wãnik renaj jukjuk im amnak ion lal in. (Ken. 13:22) Jerammõn eo an enañin aolep ro dron Anij im rej kõmmani  men ko rejimwe ej mour indrio ilo juõn lal eaibujuij me enaj lap lõñliñ im mõnõnõ ie. Rainin, Anij ej kajerammõn ro rej yokwe wãnik ilo an kõmman bwe ren jab inebata ak ren ainemõn wõt. Men in ej kõmman air mõnõnõ im burukuk ibben baamle ko air im congregation ko air.—Pil. 4:6, 7.

18. Ta ko jej aikwij wõnmanlok wõt im kõmmani ke jej lipjerjere an ran in kwi eo an Jeova itok?

¹⁸ Ke jej lipjerjere an ran in kwi eo an Jeova itok, jej aikwij wõnmanlok wõt im bukot ial ko an rewãnik. (Zep. 2:2, 3) Kin men in, jen kalaplok ad yokwe ial ko an Jeova Anij me rejimwe im wãnik. Men in ej kitibuj ad kõnõk wõt “binjen op in wãnik” ñan kejbãrok buruõd. Bareinwõt, jej aikwij kejbãrok juõn bõklikõt emmõn, eo enaj bõktok elap mõnõnõ ñan kij im elaptata enaj kamõnõnõik buruen Anij.—Ken. 27:11.

19. Ta eo jej aikwij beek ilo buruõd, im ta eo jenaj etale wik in lal?

¹⁹ “Mejen Jeova rej etõrlok im etõrtok ilo aolepen lõl, im mõke kwalok E kajur in jibõñ ro burueir re wãppen ñõn E.” (2 Kron. 16:9) Nan kein remaroñ kainemõn kij kiõ ñe jej kate kij ñan kõmmani men ko rejimwe meñe ej laplok bwoktak im kowaroñ im men ko renana! Armij in lal in me rejjab karejar ñan Anij remaroñ jab melele unin ad kõmmani men ko rejimwe, bõtab elap tokjen ko remmõn jenaj loi ilo ad lor wõt ial ko rewãnik an Jeova. (Ais. 48:17; 1 Pit. 4:4) Innem, jen beek ilo buruõd ñan yokwe wãnik kin aolepen buruõd im kõmmani men ko rejimwe. Men in enaj bõktok elap lõñliñ ñan kij. Bõtab, ej bareinwõt kitibuj ad drike nana. Katak eo tok juõn enaj kwalok ñan kij ta melelen men in.

[Kamelele eo itulal]

Ewi Wãwen Kwonaj Uak?

• Etke ad tõmak ilo binmour eo an Jisõs enaj jibañ kij ñan yokwe wãnik?

• Etke eaurõk bwe jen kõnõk wõt “binjen op in wãnik”?

• Ewi wãwen ad kamineneiki bõklikõt eo ad?

[Kajitõk ko ñan katak]

[Pija ilo peij 26]

Juõn bõklikõt emmõn enaj jibañ kij ñan kõmmani bebe ko remmõn kin jerbal