Ewõr Unin Am̦ Lañlõñ

AOLEP menin kõm̦anm̦an ko an Jeova rejejjet im kon̦, meñe jãn kij en̦ ediktata ñan kumi in iju ko relap im relõñ. Jejjab bwilõñ kõn men in kõnke Ri Kõm̦anm̦an eo ejjab juon Anij in pok. (1 Kor. 14:33, NW) Wãween an Jeova kõm̦m̦an karõk ñan ro doon im rej kabuñ ñan e ej bareinwõt kabwilõñlõñ. Jen lale ta eo Jeova ear kõm̦m̦ane. Ear ejaake juon doulul elap me elõñ million armej im enjel̦ ro rej bõrokuk ippãn doon ilo aer kabuñ ñan e im ewõr aer maroñ ñan kããlõt el̦aññe rekõnan karejar ñan e ak jab. Ej juon men ekanuij em̦m̦an im kabwilõñlõñ!

Ilo kar aelõñ in Israel, m̦õttan doulul eo an Jeova ijin ioon lal̦ ear pãd ilo Jerusalem, ijo tampel̦ eo an Jeova ear pãd ie im kiiñ eo em̦õj kabiti ear jokwe ie. Juon armej im ear jipo̦kwe ilo aelõñ in Babilon ear kwal̦o̦k eñjake eo an kõn jikin kweilo̦k in ekwojarjar, ilo an ba: “Elañe ij meloklok yuk, O Jerusalem, in jab bar maroñ kejañe harp eo nejũ. Elañe ijjab kememej yuk, im watõk yuk bwe kwoj aõ unin lõñliñ elabtata, innem in jab bar maroñ al.”—Sam 137:5, 6, UBS.

Ãindein ke am̦ l̦õmn̦ak kõn doulul eo an Anij rainin? Elapl̦o̦k am̦ lañlõñ ke ñe kwõj kobal̦o̦k ippãn ro ilo doulul eo ipel̦aakin lal̦ im kabuñ ñan Jeova? Ajri ro nejõm̦ rejel̦ã ke kõn bwebwenato in doulul eo an Jeova im wãween an jerbal ijin ioon lal̦? Rejel̦ã ke bwe rej m̦õttan doulul in jemjein jemjaten eo ipel̦aakin lal̦ an Ri Kõnnaan ro an Jeova, im rej ke kaorõk men in? (1 Pit. 2:17) Ewõr jet wãween ko kwõmaroñ kajerbali ilo Iien Kabuñ an Baam̦le eo am̦ ñan kalapl̦o̦k aer mel̦el̦e im kam̦m̦oolol kõn doulul eo an Jeova.

Bwebwenato Kõn “Ran ko Etto”

Kajjojo iiõ, ri Israel ro im baam̦le ko aer rar kweilo̦kl̦o̦k ippãn doon ñan aer keememe raan in Kijone eo. Ke ear jino iien in, Moses ear jiroñ armej ro: “Ñe nejõm̦ m̦aan ej kajjitõk ippam̦ ilo iien ko rej itok im ba, ‘Ta mel̦el̦ein men in?’ Kwonaaj ba ñan e, ‘Kõn pein e kajoor, Jeova ear ãñintok kõm jãn Ijipt jãn m̦on kam̦akoko eo.’” (Ex. 13:14) Ri Israel ro rar aikuj kwal̦o̦k bwebwenato ko kõn men ko Jeova ear kõm̦m̦ani bwe ren jab mel̦o̦kl̦o̦ki. Elõñ emaan ro ewõr aer baam̦le rar l̦oore naan in jiroñ ko an Moses. Elõñ epepen tokãlik, juon ri Israel ear jar: “Kõm ar roñ kõn lo̦jilñem, O Anij; ro jim̦m̦am raar kõnnaanõk kõm, ta jerbal eo Kwaar kõm̦m̦ani ilo raan ko aer, ilo raan ko re mootl̦o̦k.”—Sam 44:1.

Rainin, jodrikdrik ro remaroñ watõk bwebwenato ko an Ri Kõnnaan ro an Jeova elõñl̦o̦k jãn 100 iiõ ko remootl̦o̦k ãinwõt men ko an jem̦aan ak “ran ko etto.” Ta eo kwõmaroñ kõm̦m̦ane bwe bwebwenato kein ren kaitoklimoik ro nejõm̦? Jet ro jemen im jinen ajri ro rej kajerbal bwebwenato ko ilo Imõniaroñroñ ko me rej kwal̦o̦k kõn mour eo an ro jet. Rein rej bareinwõt kajerbale pija eo ekããl me ej bar kwal̦o̦k kõn bwebwenatoun armej ro an Anij ilo raan kein. Pija ko jet rej kwal̦o̦k kõn ro jeid im jatid rar kalbuuj ilo Jãmne ium̦win kien eo an Hitler im kien Rojia. Pija kein rej katakin baam̦le ko bwe ren atartar wõt ioon Jeova ñe rej jelm̦ae mãlejjoñ ko. Kwõn kajerbal men kein ilo Iien Kabuñ an Baam̦le eo am̦. Renaaj kakajoorl̦o̦k tõmak eo an ajri ro nejõm̦ bwe ren tiljek wõt ñe rej iion mãlejjoñ ko.

Bõtab, emaroñ pidodo an ajri ro m̦õk im jab itoklimo ñe kwõj kwal̦o̦k wõt bwebwenato ko ñan er. Innem kwõn kõm̦m̦an bwe ajri eo en bõk kun̦aan. Ñan waanjoñak, kwõmaroñ kajjitõk ippãn eo nejõm̦ ñan kããlõt juon ene me em̦m̦an ippãn im en kõm̦m̦an etale ko kõn bwebwenato ko kõn m̦akũtkũt ko an ro jeid im  jatid ie, im en kwal̦o̦k ñan baam̦le eo kõn jet iaan men ko ear katak jãni. Emaroñ wõr jet jeid im jatid ilo congregation eo am̦ me eto aer karejar ñan Jeova im kwõmaroñ kũrtok er bwe ren kobawõj ilo iien kabuñ an baam̦le eo am̦. Bõlen ajri eo nejõm̦ emaroñ bũkmantak kajjitõk ko ñan er bwe ren kwal̦o̦k bwebwenato ko kõn mour eo aer. Ak kwõmaroñ ba ñan e bwe en jiñaik m̦akũtkũt ko rel̦ap an doulul eo. Ñan waanjoñak, emaroñ jiñaik aer kalõk juon Betel. Ak emaroñ jiñaik an ro jeid im jatid ipel̦aakin lal̦ koba ippãn doon ilo juon kweilo̦k elap, ak aer kwal̦o̦k naan.

Katak Ewi Wãween “Kajjojo Ra Kein Rej Jerbal Ekkar ñõn Jerbal ko Air Make”

Rijjelõk Paul ear keidi congregation eo ñan “aoleb mõttan ko rej kajjo wãweir ilo enbwin in rej kon ibben dron, im aoleb mokoj ko emwij karõki rej drebij aoleben enbwin eo ibben dron. Innem elañe kajjojo ra kein rej jerbal ekkar ñõn jerbal ko air make, aoleben enbwin eo enaj eddrek im kalek e make kin yokwe.” (Ep. 4:16, UBS) Ñe jej katak kõn wãween an m̦õttan ko ilo ãnbwinin armej jerbal ippãn doon, ej kalapl̦o̦k ad kam̦m̦oolol im kautiej Ri Kõm̦anm̦an eo ad. Ilo ejja wãween in wõt, ñe jej etale wãween an congregation ko ipel̦aakin lal̦ jerbal, jenaaj bwilõñ kõn joñan “mãlõtlõt an Anij.”—Ep. 3:10.

Jeova ej kwal̦o̦k kõn wãween an doulul eo an jerbal ekoba m̦õttan in doulul eo an me ej pãd ilañ. Ñan waanjoñak, ej jiroñ kõj bwe ear lel̦o̦k revelesõn eo m̦oktata ñan Jijej Kũraij, eo im ear “jilkinl̦o̦k im bakajjien e kõn enjel̦ eo an ñan Jon karijeran.” (Rev. 1:1, 2) El̦aññe Anij ej kwal̦o̦k wãween an m̦õttan eo ilañ jerbal, ejjel̦o̦k pere ekõn̦aan bwe jen mel̦el̦e kõn wãween m̦õttan eo ilal̦ ej jerbal.

Ñan waanjoñak, el̦aññe elder eo ej itoitak ej lowõj congregation eo am̦, etke kwojjab bwebwenato ippãn baam̦le eo am̦ kõn eddo ko im jeraam̦m̦an ko an rein rej lolok congregation ko? Ewi wãween aer jipañ kõj kajjojo? Kom̦ maroñ bar etali kajjitõk kein: Etke eaorõk ñan kanne awa ko ad ilo jerbal in kwal̦o̦k naan im lel̦o̦k ñan congregation eo? Jããn ko ñan jipañ doulul eo an Jeova rej itok jãn ia? Ewi wãween Kumi eo Ej Tõl Ri Kõnnaan ro an Jeova rej bõrokuk im jerbal ippãn doon? Im ewi wãween aer letok katak ko rej pedped ioon Baibõl̦?

Ewõr jilu tokjãn ko jenaaj loi ñe jej mel̦el̦e kõn wãween an kon̦ an armej ro an Jeova jerbal ippãn doon. Wãween eo kein kajuon, enaaj lapl̦o̦k ad kam̦m̦oolol kõn ro rej tõl kõj im jipañ kõj. (1 Tes. 5:12, 13) Kein karuo, jenaaj kõn̦aan rejetake karõk ko an doulul eo an Jeova. (Jerb. 16:4, 5) Kein kajilu, enaaj lapl̦o̦k ad lõke rein rej tõl kõj kõnke pepe ko aer im men ko rej kõm̦m̦ani rej wawa ioon Baibõl̦ eo.—Hib. 13:7.

“Etali Jikin Likibbijñak ko Ie”

“Komin etetal im kabol Tol Zion im bwini imõn waj ko ie. Komin lale worwor ko ie im etali jikin likibbijñak ko ie; bwe komin maroñ jiroñ ebeben eo tokelik.” (Sam 48:12, 13, UBS) Ri jeje sam in ear rõjañ ri Israel ro bwe ren kallimjeke im lukkuun lale Jerusalem. L̦õmn̦ak m̦õk kõn an ri Israel ro ememl̦o̦kjen̦ kõn iien ko rem̦m̦an ke rar etal ñan Jerusalem bwe ren pãd ilo kwõjkwõj ko kajjojo iiõ im lale tampel̦ eo eaiboojoj. Rar m̦õn̦õn̦õ in kwal̦o̦k bwebwenato kein ñan ro nejier.

L̦õmn̦ak kõn lerooj in Shiba eo. Ilo jinoin ear jab kanooj tõmak kõn joñan an em̦m̦an wãween irooj eo an Solomon im joñan an kar mãlõtlõt. Ta eo ear jipañ e bwe en tõmak men ko ear roñ kõn Solomon? Lerooj in ear ba: “Iar jab tõmak aer in naan, m̦ae iien aõ iten loe.” (2 Kron. 9:6) Aet, men ko jej loi kõn mejer remaroñ lukkuun tõbar bũruod.

Ewi wãween kwomaroñ jipañ ajri ro nejõm̦ ñan lo em̦m̦an in doulul eo an Jeova? El̦aññe ewõr Betel ilo ijo kwõj pãd ie, kwõn kõm̦m̦an karõk ñan lolok jikin in. Ñan waanjoñak, Mandy im Bethany rar rũttol̦o̦k ilo Canada. Ra eo ilo Canada ear 900 buki mail ettol̦o̦k jãn bukwõn eo aer. Jen ke rar dik, jemaer im jineer rar ekkeini aer bõkl̦o̦k erro ñan alwõje Betel.  Leddik rein rej ba: “M̦okta jãn amro kar lolok Betel, kõmro ar l̦õmn̦ak jikin lel̦l̦ap im l̦al̦l̦ap ro wõt. Bõtab, kõmar iion jodrikdrik ro im elap aer m̦õn̦õn̦õ im lañlõñ ilo aer jerbal ñan Jeova! Kõmro ar jab jel̦ã bwe doulul eo an Jeova ekanooj lap m̦ae iien eo kõmro ar lolok Betel. Kajjojo iien kõmar lolok jikin in kõmar epaakel̦o̦k wõt Jeova im ear lujur kõm ñan kalapl̦o̦k am karejar ñan e.” Kõn an kar Mandy im Bethany lolok Betel, men in ear lujur erro ñan jino pioneer, im tokãlik kar kũr erro ñan etal im jerbal ilo Betel ium̦win jiddik iien.

Ebar wõr juon wãween jemaroñ lo doulul eo an Jeova im ear ejjel̦o̦k ilo iien ko an ri Israel ro. Ilo raan kein ad, doulul eo an Jeova ear kõm̦m̦ani elõñ pija in alwõj ko im rej kwal̦o̦k kõn doulul in. Erkein ej title in pija ko: Jehovah’s Witnesses—Organized to Share the Good News, Our Whole Association of Brothers, To the Ends of the Earth, and United by Divine Teaching. Enaaj lapl̦o̦k an baam̦le eo am̦ kam̦m̦oolol kõn doulul in jemjein jemjaten eo ipel̦aakin lal̦ ñe komij alwõji pija kein im lale wãween an rein jerbal, ãinwõt ri jerbal ro ilo Betel, ro rej jipañ ilo iien jorrããn ko, mejinede ro, im ro rej tõl im lolorjake kweilo̦k ko relap.

Elap ijo kun̦aan ro doon Anij ilo kajjojo congregation ilo aer kwal̦o̦k naan im aer jipañ doon. Bõtab, kwõn jol̦o̦k elap iien im bwebwenato ippãn baam̦le eo am̦ ñan kakeememej doon bwe komij m̦õttan doulul in “jemjein jemjaten” eo ipel̦aakin lal̦. Men in enaaj jipañ eok im ro nejõm̦ ñan ami “jutak pen ilo ami tõmak.”—1 Pit. 5:9.

 [Box/Pija ilo peij 18]

Men ko Jemaroñ Katak Kaki kõn Doulul eo an Anij

Elõñ katak ko remaroñ jipañ kõj aolep ñan kalapl̦o̦k ad mel̦el̦e kõn doulul eo an Jeova im wãween an jerbal. Kajjitõk kein remaroñ jipañ eok:

☞ Ewi wãween ear jino karõk eo bwe traveling overseer ro ren lol̦o̦k congregation ko?—Imõniaroñroñ eo an Juun 1, 1997, peij 21.

☞ Ewi wãween an kar Betel eo ilo Brooklyn jinoe?—Imõniaroñroñ eo an Jul̦ae-Jeptõmba 2009 peij 14-17.

☞ Ewi wãween an Kumi eo Ej Tõl Ri Kõnnaan ro an Jeova kõm̦m̦an pepe ko rainin?—Imõniaroñroñ eo an Mãe 15, 2008 peij 29.