Jen Mour ilo Jim̦we im M̦ool ilo Lal̦ in Enana

AOLEP jikin ko ilo lal̦ in, ewõr armej ro im rejjab jim̦we im m̦ool ilo aer mour im jerbal. Ilo lal̦ in rainin, armej ro rej riab im ko̦o̦t. Elõñ armej ro rejjab kepel̦l̦o̦k m̦uri ko aer. Ilo elõñ peejnej ko, jet rej m̦on̦e armej ro ilo aer lukkuun kalapl̦o̦k on̦ãn m̦weiuk ko. Kõn men in, jet iien emaroñ pen ñan kõj ñan m̦ool ilo ad jerbal. Ewi wãween jemaroñ kate kõj bwe jen jim̦we im m̦ool wõt ilo ad mour im jerbal? Jen etale jilu wãween ko me remaroñ jipañ kõj. Wãween eo kein kajuon ej ilo ad mijak Jeova. Kein karuo ej ilo ad kajerbale bũruod im l̦õmn̦ak ko ad ñan kõm̦m̦ani pepe ko rejim̦we. Im kein kajilu, jej aikuj m̦õn̦õn̦õ kõn men ko ewõr ippãd.

Mijak Jeova

Ri kanaan Aiseia ear ba: “Bwe Jeova ej ri ekajete kõj, Jeova ej ad ri kaiñi, Jeova ej ad Kiiñ.” (Ais. 33:22) Ilo ad mijak Anij, men in ej kalikkar bwe jej kile bwe E eo ej Utiejtata. Ad mijak Anij ej jipañ kõj bwe jen jim̦we im m̦ool wõt ilo ad mour im jerbal. Bok in Jabõn Kõnnaan 16:6 ej ba: “Kõn mijak Jeova, armej rej ilo̦k jãn nana.” Ta mel̦el̦ein ad mijak Jeova? Mijak in ejjab juon wãween eo im kwõj kor ak lõl̦ño̦ñ. Ad mijak Jeova ej mel̦el̦ein bwe jejjab kõn̦aan kabũrom̦õj ak kõmetak e.—1  Pi. 3:12.

Jen lale juon bwebwenato im ej kwal̦o̦k kõn aorõkin ad aikuj mijak Jeova. Ricardo im Fernanda rar kadiwõj enañin jiljilimjuõn buki tal̦a jen bok in pããñ eo aerro. * Fernanda ear jab bwine jããn ko ak ear kajju likũti iloan ieb eo an. Erro ar etal im kõl̦l̦ãik jet iaan m̦uri ko aerro. Ke rar jepl̦aak ñan m̦weo, erro ar kile bwe jããn eo erro ar kadiwõje ejja joñan eo wõt im ejañin dikl̦o̦k. Rar kile bwe ri jerbal eo ilo pããñ eo ar lel̦o̦k el̦apl̦o̦k jen joñan eo rar kajjitõk. Ilo jinoin, rar jab kõn̦aan karo̦o̦le jããn eo kõnke erro ar aikuji. Ta eo rar kõm̦m̦ane? Ricardo ej ba, “Kõmro ar jar ñan Jeova bwe en jipañ kõmro ñan karo̦o̦le jããn eo. Kõmro ar karo̦o̦le jããn eo kõnke kõmro lukkuun kõn̦aan kam̦õn̦õn̦õik Jeova ekkar ñan Jabõn Kõnnaan 27:11.”

Maroñ eo Ñan Kile Men ko Rejim̦we im Rebõd

Jej aikuj jipañ ñan kõm̦m̦ani men ko rejim̦we. Eñin unin em̦õj an Jeova letok ñan kõj kajjojo maroñ eo ñan kile el̦aññe ejim̦we men ko jej kõm̦m̦ani, l̦õmn̦ak kaki, ak kõnono kaki. Maroñ in ej bareinwõt jipañ kõj ñan kile el̦aññe men kein rebõd. Ilo ad katak Baibõl̦ eo im jerbali men ko jej katak, jemaroñ kajerbale maroñ in ilo mãlõtlõt. Ilo wãween in, katak ko rem̦ool jãn Baibõl̦ eo renaaj tõpar bũruod im men in enaaj lujur kõj bwe jen m̦ool ilo men otemjej.—Hi. 4:12; 13:18.

Jen lale bwebwenato eo kõn João. Ear lukkuun l̦ap m̦uri eo an ippãn juon armej. Joñan m̦uri eo an ej epaakel̦o̦k $5,000 tal̦a. João ear jab kepel̦l̦o̦ke m̦uri eo an, ak ear em̦m̦akũtl̦o̦k ñan bar juon bukwõn. Rualitõk iiõ ko tokãlik, João ear katak kõn m̦ool eo. Katak ko me rar tõpar bũruon rar kõm̦akũt e ñan call e armej eo ear m̦uri ippãn im ba bwe ekõn̦aan kepel̦l̦o̦k m̦uri eo an. Armej eo ear kõtl̦o̦k bwe João en kõl̦l̦ã jidik kõn jidik kajjojo allõñ m̦ae iien epel̦l̦o̦k m̦uri eo an. Etke? Kõnke ear kile bwe ewõr pãleen João im ewõr emãn nejin ajri im ear aikuj jerbal ñan kabwe aikuj ko aer.

M̦õn̦õn̦õ kõn Men ko Ewõr Ippãd

Rijjelõk Paul ear ba bwe el̦aññe jej lukkuun yokwe Anij, men in enaaj kõm̦m̦an bwe jen ‘jokane kin men ko eor ibbed. Kin men in, elañe eor kijed im ballid, eokwe ebwe.’ (1 Ti. 6:6-8,  UBS) El̦aññe jej jerbale naan in kakapilõk in, enaaj jipañ kõj bwe jen jab arõk m̦weiuk. Enaaj bareinwõt jipañ kõj bwe el̦aññe jej kõm̦m̦an ad peejnej ippãn ro jet, jej aikuj jerbal ilo jim̦we im m̦ool. (JK. 28:20) El̦aññe jenaaj roñjake naan in rõjañ in an Paul, enaaj jipañ koj bwe jen kaorõki jerbal ko an Anij. Enaaj jipañ koj ñan tõmak bwe el̦aññe jenaaj kõm̦m̦ani men ko Jeova ekõn̦aan bwe jen kõm̦m̦ani im̦aantata ilo mour ko ad, enaaj kabwe aikuj ko ad.—Matu 6:25-34.

Elõñ armej ro rainin relukkuun kũbbon̦ im el̦ap aer arõk m̦weiuk. Etke? Kõnke ‘elap air inebata kon mour im yokwe mweiuk ko.’ (Matu 13:22, UBS) Jen lale bwebwenato eo kõn juon em̦m̦aan ilo Baibõl̦ eo etan Ekan. Ekan ear pãd ilo iien eo ke ri Israel ro rar kijone River Jordan ilo kabwilõñlõñ. Bõtab, kõnke el̦ap an arõk m̦weiuk, ear kõm̦m̦ane juon men enana. Ear ko̦o̦te jet jããn im nuknuk ko raorõk jen menin rakim ko jen jikin kweilo̦k in Jeriko. Jen wot an kar kõm̦m̦ane men in, ear mej. (Jos. 7:1, 20-26) Eñin unin Jijej ear kakkõl kõj ilo an ba: “Kom̦win lale, im kõjparok kom̦ jãn jabdewõt arõk m̦weiuk.”—Luk 12:15.

Kwõn M̦ool ilo Jikin Jerbal

Jen lale jet wãween ko me remaroñ kõm̦m̦an bwe en pen ad jerbal ilo jim̦we im m̦ool. Meñe elõñ armej ro rej ko̦o̦t ilo jikin jerbal ko ad, ak kõj jej aikuj m̦ool wõt im “jab ko̦o̦t jabdewõt.” (Tai. 2:9, 10) Jurandir ej jerbal ilo juon opij an kien, im aolep iien ej m̦ool ilo an kwal̦o̦k kõn joñan jããn ko ej kajerbali. Ri jerbal ro jet rejjab m̦ool ilo aer kwal̦o̦k joñan jããn ko rar bar kajerbali. Rar maroñ kõm̦m̦ane men in kõnke bo̦o̦j eo aer ej bar noje bõd ko aer. Bo̦o̦j eo an Jurandir ear illu ippãn kõn an m̦ool ilo jerbal eo an. Kõn men in, ear kabõjrak an Jurandir ilo̦k im kõm̦m̦ane jerbal ko aer ilo aelõñ ko jet. Bõtab, ke rar etale jããn ko an peejnej eo, rar loe bwe Jurandir ear jim̦we im m̦ool ilo an jerbal. Kõn men in, rar lel̦o̦k ñan e juon jerbal eo em̦m̦anl̦o̦k.

Ebar wõr juon waanjoñak kõn juon em̦m̦aan etan André. Bo̦o̦j eo an ear jiroñ e bwe en lukkuun kalapl̦o̦k on̦ean m̦weiuk ko ñan armej ro. André ear kile bwe men in ebõd, kõn men in ear jar im kajjitõk bwe Jeova en jipañ e. (Sam 145:18-20) Ear kajjioñ kõmel̦el̦eik bo̦o̦j eo an etke ejjab maroñ kõm̦m̦ane kajjitõk eo an, bõtab bo̦o̦j eo an ear jab roñjake. Kõn wõt men in, André ear kam̦õje jen jerbal eo an meñe el̦ap on̦ãn. Juon iiõ tokãlik, bo̦o̦j eo an ear bar call e im kajjitõk el̦aññe ekõn̦aan bar jerbal. Bo̦o̦j eo an ear bar ba bwe ejako an lukkuun kalapl̦o̦k on̦ean m̦weiuk ko ñan armej ro. André ear jepl̦aak im jerbal im ear erom mãnija ñan kom̦bani eo.

Kwõn Kõl̦l̦ãik M̦uri ko Am̦

Rijjelõk Paul ear rõjañ ri tõmak ro m̦õttan: “Kom̦win jab m̦uri ñan jabdewõt armej kõn jabdewõt.” (Rom 13:8) Jet rej l̦õmn̦ak bwe rejjab aikuj kõl̦l̦ãik m̦uri ko aer. Etke? Kõnke rej ba bwe  armej ro rar m̦uri ippãn elõñ an jããn, im ejjab aikuji bar jããn eo an. L̦õmn̦ak in ebõd. Baibõl̦ eo ej ba: “Ri nana ej muri, ak ejjab kõllã an likjab.”—Sam 37:21, UBS.

Bõtab, jet iien ejjel̦o̦k ad maroñ ñan kepel̦l̦o̦k m̦uri ko ad. Ta eo jej aikuj kõm̦m̦ane kiiõ? (Ekl. 9:11, UBS) Jen lale juon waanjoñak. Francisco ear m̦uri ippãn Alfredo enañin $7,000 tal̦a bwe en kõl̦l̦ãik jet an likjab. Bõtab juon apañ ear wal̦o̦k, kõn men in Francisco ear jab maroñ karo̦o̦l jããn ko an Alfredo ilo iien eo erro ar pepe kake. Ear kepaake Alfredo im kõnnaan ippãn kõn men in. Alfredo ear kõtl̦o̦k bwe Francisco en jab kajju karo̦o̦l aolepen jããn eo, ak en lel̦o̦k jidik kõn jidik.

Kwõn Jab M̦on̦e Ro Jet

Kwõj ke keememej bwebwenato eo kõn Anenaiõs im Sappaira? Rar pãd ilo congregation eo ilo Jerusalem ilo iien ko etto. Erro ar wiakake juon bwidej im bõkl̦o̦k jidikin tõprak ko ñan rijjelõk ro. Rar ba ñan rijjelõk ro bwe eñin ej aolepen jããn ko rar loi. Erro ar kõn̦aan m̦on̦e armej ro kõn aer jouj etao. Bõtab, Anij ear kõm̦m̦an bwe Piter en kile men in me Anenaiõs im Sappaira rar kõm̦m̦ane. Kõn wõt aerro kar etao, Jeova ear m̦ane erro ñan mej.—Jerb. 5:1-11.

Ro rar je Baibõl̦ eo rar m̦ool ilo aer kar jeje. Rar jab noje bõd ko aer ãinwõt kar Anenaiõs im Sappaira. Ñan waanjoñak, Moses ear je kõn iien eo ear jab maroñ dãpij an illu. Kõn wõt kar men in, Jeova ear jab kõtl̦o̦k bwe en del̦o̦ñ ilo Enen Kallim̦ur eo. (Bõn. 20:7-13) Jona ear jab noje bõd ko an m̦okta im ãlikin an kar ilo̦k ñan Nineva. Ear jei aolepen men kein. —Jona 1:1-3; 4:1-3.

Jej aikuj peran aolep iien ñan kwal̦o̦k wõt m̦ool, meñe jet iien emaroñ wal̦o̦k jet men ko ñan kõj. Ñan waanjoñak, jen lale ta eo ear wal̦o̦k ñan Nathalia, juon leddik 14 an iiõ im ej jikuul̦. Ear lale juon iaan teej ko an jãn jikuul̦. Ear kile bwe em̦õj an ri kaki eo an kajim̦we e ilo juon kajjitõk, meñe Nathalia ear bõd ilo kajjitõk in. Ear jel̦ã bwe el̦aññe enaaj kwal̦o̦k men in, grade eo an enaaj wõtlo̦k jen m̦okta. Bõtab, Nathalia ear wõnm̦aanl̦o̦k wõt im kwal̦o̦ke men in ñan ri kaki eo an. Nathalia ej ba: “Aolep iien jinõ im jema rej katakin eõ bwe ij aikuj m̦ool iien otemjej bwe in maroñ kam̦õn̦õn̦õik Jeova. El̦aññe iar jab kõnnaanek ri kaki eo aõ kõn bõd eo, enaaj kar lukkuun nana aõ mour.” Ri kaki eo an Nathalia ear lukkuun m̦õn̦õn̦õ ippãn kõn an kar kwal̦o̦k m̦ool.

Ad Kwal̦o̦k M̦ool Ej Nõbar Jeova

Juon jiroñ 17 an iiõ etan Giselle ear loe juon wallet ewõr peba iloan im ebar wõr $35 tal̦a kobban. Ilo jikuul̦ eo an, ear karo̦o̦le wallet eo ñan armej eo an. Juon allõñ tokãlik, vice-principal eo ear riiti juon lõta ñan kilaj eo an Giselle. Ear nõbar Giselle kõn an m̦ool im ear kam̦m̦oolol baam̦le eo an kõn aer kar katakin Giselle im kõn aer mour ekkar ñan Baibõl̦ eo. ‘Jerbal ko an rem̦m̦an’ rar nõbar Jeova.—Matu 5:14-16.

Jej aikuj kate kõj meñe epen bwe jen jim̦we im m̦ool ilo ad mour im jerbal. Etke emaroñ pen? Kõnke jej mour ibwiljin armej ro me rej ‘yokwe er make, ri arõk m̦weiuk, ri ju-wal̦õñl̦õñ, re jab kam̦m̦oolol, im ri nana.’ (2 Ti. 3:2) Kõn men in, wãween kein jilu renaaj jipañ kõj bwe jen jim̦we im m̦ool ilo ad mour im jerbal. Wãween eo kein kajuon ej ilo ad mijak Jeova. Kein karuo ej ilo ad kajerbale maroñ eo Jeova ear letok ñan kile el̦aññe ejim̦we ak ebõd men ko jej kõm̦m̦ani, l̦õmn̦ak kaki, ak kõnono kaki. Im kein kajilu, jej aikuj m̦õn̦õn̦õ kõn men ko ewõr ippãd. Ilo ad kõm̦m̦ane men kein, jenaaj epaakel̦o̦k wõt Jeova kõnke “ewãnik im ej yokwe jerbal ko remmõn.”—Sam 11:7, UBS.

[Kamelele eo itulal]

[Pija ilo peij 7]

Ñe jej mijak Jeova, men in enaaj jipañ kõj bwe jen m̦ool iien otemjej

[Pija ilo peij 8]

Ñe jej jim̦we im m̦ool ilo ad mour im jerbal, men in ej nõbar Jeova