Kwõj Ke Keememej?

Kwaar ke riiti Imõniaroñroñ ko ilo allõñ ko rej kab mootl̦o̦k? Eokwe, jen lale el̦aññe kwõmaroñ uwaake kajjitõk kein:

• Ta eo enaaj jipañ ri pãlele ro bwe ren maroñ tiljek wõt ñan doon?

Kwõn kate eok ñan kõm̦m̦an bwe eo pãleõm en kile bwe kwõj kaorõke im yokwe. Kwõn pukot wãween ko ñan kalikkar men in ilo naan im kõm̦m̦an ko am̦. El̦aptata em̦m̦aan ro rej aikuj kwal̦o̦k ñan lim̦aro pãleir bwe raorõk ippãer. Jab kõtl̦o̦k bwe jabdewõt men ak jabdewõt armej en ko̦kkure kõtaan eo am̦ ippãn eo pãleõm.—1/15, peij 14.

• Wõn eo ekõn̦aan bwe armej ro ren abwinmake?

Kabuñ ko reriab rej katakin armej ro bwe ñe armej ro rej mej, ilo m̦ool rejjab lukkuun mej. Baibõl̦ eo ej kwal̦o̦k bwe Setan ej “jemãn riab.” E im enjel̦ ro an renana rej “m̦on̦i aolepen lal̦.” (Jon 8:44; Rev. 12:9) Katak in me ro remej remaroñ wal̦o̦ktok im ko̦kkure armej ro ej juon katak eriab. Katak in ear itok jãn Setan.—3/15, peij 7.

• Ro doon Anij rej ke kajerbal etan Anij ãinwõt juon kein kõjparok ak karwaan?

Jet rej kajerbal jet men bwe en ãinwõt kein aer karwaan ak juon kein kõjparok er ilo kabwilõñlõñ. Ak armej ro doon Anij rejjab ãinwõt rein im rejjab l̦õmn̦ak bwe etan Anij ej kein aer karwaan. Rej likũt aer tõmak ilo Jeova im rej kõm̦anm̦an ankilaan, ilo aer kõm̦m̦an ãindein, rej kõm̦m̦an bwe etan Jeova en aer jikin kone. (Zp. 3:12, 13)—1/15, peij 5-6.

• Anij ej kajerbal kajoor eo an ñan jipañ kõj ta?

Anij ej kajerbal kajoor eo an ñan jipañ kõj jol̦o̦k m̦anit ko ad kar m̦okta. Ej jipañ kõj bwe jen kwal̦o̦k yokwe, jouj im kõm̦m̦an em̦m̦an ñan armej ro. Ej lujur kõj bwe jen jol̦o̦k an doon bõd im ej jipañ kõj bwe jen kwal̦o̦k “jouj ñan doon.” (Ep. 4:31, 32)—3/15, peij 30-31.

• Etke Jeova ear kaarmejjeteik Kiiñ Saul?

Kõnke ijello̦kun an kar Kiiñ Saul kõttar ri kanaan eo an Anij bwe en katok kõn menin katok ko, ear wõnm̦aanl̦o̦k im make katok kõn menin katok ko. Im bareinwõt ear jab pokake ke Anij ear ba bwe en m̦an aolep ri kõjdat ro.—2/15, peij 22-23.

• Ekijkan ad maroñ kwal̦o̦k bwe jej dike nana?

Jej dike nana ilo ar jab idaak arkool l̦e jãn joñan, kõjparok kõj jãn menin anijnij ko, im l̦oor naan in kakkõl ko an Jijej n̦ae mour ettoon. Ñan waanjoñak, jenaaj bõbraik kõj make jen ad alwõji pija ko rettoon. Im jeban pijaik ad kõm̦m̦ani m̦anit kein rettoon ilo l̦õmn̦ak ko ad. Bareinwõt, jeban kõmao ippãn ro rebukwel̦o̦k.—2/15, peij 29-32.

• Etke ad kal̦apl̦o̦k ad mel̦el̦e kõn katak ko rem̦wilal̦ ilo Baibõl̦ eo emaroñ jipañ kõj ñan lañlõñ wõt?

Katak kõn men ko rem̦wilal̦ ej kalõk tõmak eo ad. (Kol. 2:6, 7) Ñe jej katak Baibõl̦ ej kakeememej kõj kõn ta men ko rej lukkuun kabuñbũruon Jeova.—3/15, peij 30-31.

• Ewi wãween Jeremaia ear ãinwõt juon “wõjke em̦õj ekkat iturin dãn ko [me] ej jilkinl̦o̦k okran iturin juon river”? (Jer. 17:7, 8)

Jeremaia ear wõnm̦aanl̦o̦k wõt im jebar elõñ leen. Ear jab kõtl̦o̦k bwe ri jum̦ae ro ren kabbeer e. Ãinwõt an wõjke eo wãmourur kõn an pãd iturin dãn ko, Jeremaia ear kajoor wõt kõn an kar roñjake im pokake aolep men ko Jeova ear jiroñ e.—3/15, peij 14.

• Ta ko juon likao emaroñ kõm̦m̦ani ñan an kal̦apl̦o̦k eddo ko an ilo congregation eo?

Ilo an kal̦apl̦o̦k ijo kun̦aan ilo kwal̦o̦k naan. Kate e bwe en wõr an ri katak Baibõl̦. Jipañ ro rerũtto ilo congregation eo ilo jabdewõt wãween ko emaroñ, im bareinwõt bõk kun̦aan im jipañ karreo Im̦õn Kweilo̦k eo.—4/15, peij 11.

• Ta wãween ko jiljino me renaaj jipañ eok ñan kõm̦m̦ani pepe ko rem̦m̦an?

Jab bõkjab. Kappukot mel̦el̦e ko me renaaj jipañ eok kõm̦m̦ane pepe eo am̦. Jar kõn mãlõtlõt. Kõm̦m̦ane pepe eo am̦ make. Jerbale ak kajejjete pepe eo am̦. Bar etale pepe eo am̦ im kõm̦m̦an kajim̦we.—4/15, peij 16.