Baam̦le ko im Rej Kũrjin, Kom̦win “Emmij im Ekkõl” Wõt
Baam̦le ko im Rej Kũrjin, Kom̦win “Emmij im Ekkõl” Wõt
“Jen emmij im ekkõl.”—1 TE. 5:6, UBS.
1, 2. Ta eo ro uwaan baam̦le eo rej aikuj kõm̦m̦ane bwe ren “emmij im ekkõl” wõt kõn raan eo el̦ap an Jeova?
KE RIJJELÕK Paul ear jeje ñan Kũrjin ro ilo Tessalonika kõn “raan eo el̦ap im kaamijak an Jeova,” ear ba: “Ak kom, ro jeim im jatim, komij jab bed ilo marok, im Ran eo ejamin kailbõk kom einwõt juõn ri kwot. Kom otemjej armij in meram, armij in ran. Kij jejjab armij in boñ kab armij in marok. Kin men in jen jab kiki im einwõt ro jet; ak jen emmij im ekkõl.”—Joel 2:31; 1 Te. 5:4-6, UBS.
2 Naan in kakkõl ko an Paul ñan ri Tessalonika ro relukkuun jejjet ñan Kũrjin ro im rej mour ilo ‘iien ko ãliktata.’ (Dan. 12:4) Setan ej kate joñan an maroñ ñan kabõjrak an armej ro karejar ñan Anij. Etke? Kõnke ejel̦ã bwe m̦õttan jidik ejem̦l̦o̦k jukjuk im pãd in enana. Kõn men in, eaorõk bwe jen l̦oore naan in kakkõl ko an Paul bwe jen “emmij im ekkõl” wõt. El̦aññe juon baam̦le im ej Kũrjin ej “emmij im ekkõl” wõt, aolep ro ilo baam̦le eo rej aikuj inek ijo kun̦aaer ekkar ñan Baibõl̦ eo. Ta eddo eo an l̦eo im lio kab jodrikdrik ro ñan jipañ baam̦le eo aer bwe ren “emmij im ekkõl” wõt?
L̦õm̦aro Anõke ‘Seperd eo Em̦m̦an’
3. Ekkar ñan 1 Timote 5:8, ta eddo ko an l̦eo ãinwõt juon bõran baam̦le?
3 Baibõl̦ eo ej ba bwe “bõran kõrã m̦aan.” (1 Ko. 11:3) Ta eddo ko an l̦eo ãinwõt juon bõran baam̦le? Eokwe, Baibõl̦ eo ej kwal̦o̦k juon iaaer. Ej ba: “A el̦aññe jabdewõt e jab kabwe aikuj ko an ro nukun, im el̦apl̦o̦k ro ri lowaan m̦weo im̦õn, ear kariab an tõmak im ej nana jãn ri jab tõmak.” (1 Ti. 5:8) Aet, l̦eo ej aikuj kabwe aikuj ko an lio pãleen im ajri ro nejin. Bõtab, ejjab baj kabwe wõt aikuj ko an baam̦le eo. El̦aññe ekõn̦aan bwe baam̦le eo an ren “emmij im ekkõl” wõt ej aikuj katak Baibõl̦ ippãer bwe ren kakajoorl̦o̦k kõtaan eo aer ippãn Anij. (JK. 24:3, 4) Ewi wãween emaroñ kõm̦m̦ane men in?
4. Ta eo enaaj jipañ l̦eo bwe en kakajoorl̦o̦k kõtaan eo an baam̦le eo ippãn Jeova?
4 Baibõl̦ eo ej ba: “L̦eo e bõran lio pãleen, ãinwõt Kraist e bõran eklejia.” Kõn men in, l̦eo ej aikuj katak kõn wãween Jijej ej tõl congregation eo im kajjioñe joñak eo an. (Ep. 5:23) Jouj im lale ta eo Jijej ear ba kõn kõtaan eo an ippãn ri kal̦oor ro an. (Riit Jon 10:14, 15.) Ta eo l̦eo ej aikuj kõm̦m̦ane bwe en kakajoorl̦o̦k kõtaan eo an baam̦le eo ippãn Anij? Ej aikuj katak kõn wãween eo me Jijej ear kõnono im kõn men ko ear kõm̦m̦ani ãinwõt juon “seperd em̦m̦an.” Innem ej aikuj “anõke jenkwan ne ko neen.”—1 Pi. 2:21.
5. Ta eo ‘Seperd eo Em̦m̦an’ ejel̦ã kake kõn ro ilo congregation eo?
5 El̦aññe juon “seperd” elukkuun jel̦ã kõn jiip ko nejin im jiip ko rej jel̦ã kajjien im rej lõke “seperd” eo, renaaj epaake doon. Jiip ko rej kile ainikien “seperd” eo im rej pokake e. Jijej ear ba: “I jel̦ã ro Aõ, im ro Aõ re jel̦ã ña.” Ejjab baj jel̦ã kõn armej ro im rej ãinwõt jiip ko nejin ilo congregation eo. Naan in “jel̦ã” ilo kajin Grik mel̦el̦ein “lukkuun jel̦ã kajjien.” Aet, ‘Seperd eo Em̦m̦an’ ejel̦ã kõn kajjojo iaan armej ro im rej ãinwõt jiip ko nejin. Ejel̦ã kõn aikuj ko aer, m̦õjn̦o̦ ko aer im men ko rej kapeel in kõm̦m̦ani. Ejjel̦o̦k juon men ejaje kõn jiip ko nejin. Bareinwõt, jiip ko nejin rej lukkuun jel̦ã kajjien ‘seperd’ eo im lõke naan in tõl ko an.
6. Ewi wãween l̦õm̦aro remaroñ kajjioñe ‘Seperd eo Em̦m̦an’?
6 El̦aññe l̦eo enaaj tõl baam̦le eo an ãinwõt Jijej ej tõl congregation eo, ej aikuj watõk e make ãinwõt juon ‘seperd’ im ro ej wõnake er ãinwõt jiip ko nejin. Ej aikuj kate e ñan lukkuun jel̦ã kajjien lio pãleen im ajri ro nejin. Ewi wãween? Eokwe, ej aikuj roñjake er ñe rej kwal̦o̦k men ko rej inepata kaki im kõnono ilo juon wãween em̦m̦an ñan er. Ej aikuj tõl m̦akũtkũt ko an baam̦le eo. Bareinwõt ej aikuj l̦õmn̦ak kõn joñan maroñ ko aer ilo an kõm̦m̦ani pepe ko ñe ej itok ñan iien kabuñ eo an baam̦le eo, kweilo̦k ko, kwal̦o̦k naan, iien kam̦õn̦õn̦õ ko im men ko rej alwõji. El̦aññe l̦eo ej kõm̦m̦ani men ko Baibõl̦ ej ba im ekanooj jel̦ã bũruon lio pãleen im ro nejin, enaaj lapl̦o̦k aer lõke e im wãween an tõl er. Enaaj bareinwõt m̦õn̦õn̦õ ñe ej lo aer bõrokuk ãinwõt juon baam̦le im kabuñ ñan Anij.
7, 8. Ewi wãween l̦eo bõran baam̦le eo emaroñ anõke ‘Seperd eo Em̦m̦an’ im kwal̦o̦k an yokwe lio pãleen im ajri ro nejin?
7 Juon ‘seperd em̦m̦an’ ej bareinwõt yokwe jiip ko nejin. Ñe jej riit kõn mour eo an Jijej im an jerbal in kwal̦o̦k naan ilo bok in Matu, Mark, Luk im Jon, ej kõm̦m̦akũt bũruod ñe jej lo joñan an kar Jijej yokwe ri kal̦oor ro an. Joñan ear ‘m̦õn̦õn̦õ in mej kõn jiip rein an.’ L̦õm̦aro rej aikuj kajjioñe Jijej im kwal̦o̦k aer yokwe baam̦le eo aer. El̦aññe l̦eo ej kõn̦aan bwe Anij en m̦õn̦õn̦õ ippãn eban lãj im kõbo̦o̦jo̦j ñan lio pãleen. Bõtab ej enaaj yokwe wõt lio pãleen “ãinwõt Kraist ear barãinwõt yokwe eklejia.” (Ep. 5:25) Ñe ej kõnono ñan e ej aikuj jouj im l̦õmn̦ak kõn eñjake ko an kõnke ej aikuj kautiej lio pãleen.—1 Pi. 3:7.
8 Ñe l̦eo ej katakin ajri ro nejin ejjab aikuj anloke er ñan kõm̦m̦ani kõn̦aan ko aer make. Ej aikuj lukkuun l̦oore naan in tõl ko an Anij. Bõtab, ej aikuj kwal̦o̦k an yokwe er. Ej kwal̦o̦k an yokwe er ñe ej katakin im kajim̦we er. Emaroñ bõk iien ñan an jet ajri ro mel̦el̦e ta eo rej aikuj kõm̦m̦ane. Ilo wãween in, l̦eo ej aikuj kanooj meanwõd ippãer. El̦aññe l̦õm̦aro rej l̦oor joñak eo an Jijej aolep iien, rej kõm̦m̦an bwe baam̦le eo aer en m̦õn̦õn̦õ im aenõm̦m̦an. Ro uwaan baam̦le eo aer rejamin uwõta kõnke repaake Jeova. Eñin men eo ri jeje sam ear al kake.—Riit Sam 23:1-6.
9. Ãinwõt kar Noa, ta eddo eo an l̦õm̦aro, im ta eo enaaj jipañ er ñan inek eddo eo aer?
9 L̦õm̦aro remaroñ bareinwõt anõk joñak eo an Noa. Noa ear mour ilo juon iien ke Anij ear bõktok jem̦l̦o̦kin jukjuk im pãd eo ilo raan ko an. Bõtab, Jeova ear lo̦mo̦o̦ren e “im bar jet jiljilimjuon.” (2 Pi. 2:5) Ekar eddo eo an Noa ñan jipañ baam̦le eo an bwe ren el̦l̦ã im mour jãn Ibwijleplep eo. Ilo raan kein ãliktata, l̦õm̦aro rej bõk ejja eddo in wõt. (Matu 24:37) Remaroñ jipañ baam̦le eo aer el̦aññe rej katak kõn joñak eo an Jijej, ‘Seperd eo Em̦m̦an,’ im kate er ñan kajjioñe e.
Kõrã ro, ‘Kõm̦m̦an bwe Baam̦le eo Ami En Em̦m̦an’
10. Ewi wãween kõrã ro rej kõttãik er ñan l̦õm̦aro pãleer?
10 Rijjelõk Paul ear je: “Kõrã ro, kom̦win kõttãik kom̦ ñan l̦õm̦aro pãleõmi, ãinwõt ñan Irooj.” (Ep. 5:22) Ejjab mel̦el̦ein bwe kõrã ro rekanooj in ettã im ejjel̦o̦k tokjãer. M̦okta jãn an kar kõm̦anm̦an kõrã eo m̦oktata, Iv, Anij ear ba: “Ejjab emmõn an leo make ian. Inaj kõmmõne juõn rejtan bwe en jibañe.” (Jen. 2:18, UBS) Eñin eddo eo an lio. Ej ri jipañ ñan l̦eo rejetan. Ej rejetake pepe ko an l̦eo pãleen ke ej lale eddo ko an ãinwõt juon bõran baam̦le. Aet, el̦ap tokjãn eddo eo an lio.
11. Ewi wãween kõrã eo em̦m̦an ej ‘kõm̦m̦an bwe baam̦le eo an en em̦m̦an’?
11 Juon kõrã em̦m̦an ej kate e ñan jipañ l̦eo im ajri ro nejin. (Riit Jabõn Kõnnaan Ko 14:1, UBS.) Juon kõrã enana ejjab kautiej l̦eo pãleen. Bõtab, kõrã eo ejel̦ãl̦o̦kjen̦ ej lukkuun kautiej eo pãleen. Ejjab ãinwõt kõrã ro renana me rej jum̦ae im jab roñjake l̦õm̦aro pãleer. Ej lukkuun kõttãik e ñan l̦eo pãleen. (Ep. 2:2) Kõrã eo enana ej m̦õkaj im kananaik l̦eo ippãn. Bõtab kõrã eo em̦m̦an ej nõbar l̦eo pãleen bwe en l̦apl̦o̦k an ro nejierro im ro jet kautieje l̦eo. Kõrã rot in ej kõjparok bwe en jab kakile ñan l̦eo pãleen ak akwããle. Ej bareinwõt kõjparok jããn. Ak kõrã eo ejajel̦o̦kjen̦ ej iukkure kõn jããn im ejjab bajete jããn ko an baam̦le eo. Ejjab ãindein kõrã eo em̦m̦an. Ej rejetake pepe ko an l̦eo pãleen kõn wãween rej kajerbal jããn ko aer. Ej lukkuun kõjparok im lale wãween an kajerbal jããn ko. Ejjab iuuni l̦eo pãleen bwe en tarjen joñan an jerbal ñan koorl̦o̦k jããn.
12. Ta eo kõrã eo emaroñ kõm̦m̦ane ñan jipañ baam̦le eo an bwe ren “emmij im ekkõl” wõt?
12 Kõrã eo em̦m̦an ej jipañ baam̦le eo an ñan “emmij im ekkõl” wõt. Ewi wãween? Ilo an rejetake l̦eo ñe ej katakin ajri ro nejierro kõn Jeova. (JK. 1:8) Ej jipañ bwe en jejjet im tõprak Iien Kabuñ eo an Baam̦le eo. Bareinwõt, ej rejetake l̦eo pãleen ñe ej lel̦o̦k naan in kakapilõk ñan ajri ro nejierro im ñe ej kauwe er. Elukkuun oktak jãn kõrã eo ej jum̦ae l̦eo pãleen me tokãlik ajri ro nejin ekkã aer lo jerata im ej jorrããn kõtaan eo aer ippãn Jeova.
13. Etke ej aorõk bwe lio en rejetake l̦eo pãleen ñe ej bõk jerbal ko ilo congregation eo?
13 Ewi wãween an juon kõrã em̦m̦an eñjake ñe l̦eo pãleen ej bõk jerbal ko ilo congregation eo? Alikkar em̦õn̦õn̦õ! Jekdo̦o̦n ta jerbal eo an l̦eo ak ej m̦õn̦õn̦õ in rejetake. Ñan waanjoñak, ñe l̦eo ej bõk jerbal in ministerial servant, ak elder, ak m̦õttan kumi eo ej kõnnaan ippãn taktõ ro bwe ren jab letok bõtõktõk ak loloorjake jerbal in kalõk m̦õn kweilo̦k ko. Men in ej kitibuj an lio kaarmejjete e make im rejetake l̦eo ilo naan im kõm̦m̦an ko an. Ejel̦ã bwe an l̦eo poub ilo jerbal ko ilo congregation eo im ilo doulul eo an Jeova, men in ej jipañ baam̦le eo bwe ren “emmij im ekkõl” wõt.
14. (a) Etke jet iien epen an lio rejetake l̦eo ak ta eo emaroñ jipañ e? (b) Ewi wãween lio ej kõm̦m̦an bwe aolepen baam̦le eo ren m̦õn̦õn̦õ?
14 Jet iien emaroñ pen an lio kõttãike ñe l̦eo ej kõm̦m̦ane pepe ko ejjab errã kaki. Meñe ãindein, lio ej aikuj “ineem̦m̦an im jouj wõt” im jipañe l̦eo bwe en tõprak pepe ko ej kõm̦m̦ani. (1 Pi. 3:4) Juon kõrã em̦m̦an ej kate wõt e bwe en kajjioñe joñak ko an kõrã ro rem̦m̦an ilo Baibõl̦ eo ãinwõt Sera, Rut, Abigeil, im Meri jinen Jijej. (1 Pi. 3:5, 6) Bareinwõt ej kajjioñe joñak ko rem̦m̦an an kõrã ro im rerũtto ilo congregation eo. Kõrã rein me ‘rekwõjarjar ilo aer kõm̦m̦an.’ (Tai. 2:3, 4) El̦aññe lio ej yokwe im kautiej l̦eo pãleen, enaaj kajoorl̦o̦k kõtaan eo aerro im aolepen baam̦le eo renaaj m̦õn̦õn̦õ. L̦eo pãleen im ajri ro nejin renaaj aenõm̦m̦an im jokwane ñe rej pãd ilo m̦weo. L̦eo im epaake Jeova ej kile bwe lio pãleen me ej rejetake, ej juon men in letok ekanooj aorõk!—JK. 12:4.
Jodrikdrik ro, “Kallimjeki Men ko Jejjab Loi”
15. Ewi wãween jodrikdrik ro remaroñ jipañ jemãer im jineer bwe baam̦le eo aer en “emmij im ekkõl” wõt?
15 Jodrikdrik ro kom̦ maroñ jipañ rũtto jemõmi im jinemi bwe baam̦le eo ami en “emmij im ekkõl” wõt. Ewi wãween? L̦õmn̦ak kõn jeraam̦m̦an eo epãd im̦aan me Jeova ej kallim̦ur kake. Bõlen jãn ke kom̦ar dik jemõmi im jinemi rar kwal̦o̦k pija in pedetaij eo ñan kom̦. Ke kom̦ar rũttol̦o̦k bõlen rar kajerbal Baibõl̦ eo kab bok ko ad ñan jipañ kom̦ pijaik ilo l̦õmn̦ak eo ami kõn naaj wãween mour ilo pedetaij. Kom̦win l̦õmn̦ak kõn ami karejar ñan Jeova im jab m̦ad. Ilo ami kajerbal mour eo ami ñan karejar ñan Jeova, men in enaaj jipañ kom̦ ñan “emmij im ekkõl” wõt kõn raan eo el̦ap an Jeova.
16, 17. Ta eo jodrikdrik ro remaroñ kõm̦m̦ane bwe ren tõpar jem̦l̦o̦kin iãekwõj eo me ej tõll̦o̦k ñan mour indeeo?
16 Rijjelõk Paul ear keidi ad karejar ñan Jeova ñan juon iãekwõj im ewõr juon ko̦wiinin. Ro im renaaj tõpar jem̦l̦o̦kin iãekwõj eo renaaj mour ñan indeeo. Keememej naan ko an rijjelõk Paul ilo 1 Korint 9:24. (Riit.) Kwõn kamaat joñam̦ bwe kwõn wiin ilo iãekwõj in ej tõll̦o̦k ñan mour indeeo. Kwõn kããlõt ñan mour ilo wãween eo im enaaj kõm̦m̦an bwe kwõn bõk mour indeeo. Elõñ jodrikdrik ro rar jibadek men ko an lal̦ in im jebwãbwe jãn ial̦ eo ej tõll̦o̦k in mour indeeo. Ekabũrom̦õjm̦õj men in! El̦aññe kwõj jibadek men ko an lal̦ in bwe kwõn m̦weiie im lõñ am̦ jããn, kwoban m̦õn̦õn̦õ. Men ko me armej rej wiaiki kõn an lõñ aer jããn rej an jidik wõt iien. Bõtab kwõn “kalimjeki men ko jejjab loi.” Etke? Kõnke “men ko jeban loi rej bed ñõn indrio.”—2 Ko. 4:18, UBS.
17 “Men ko jejjab loi” rej kitibuj jeraam̦m̦an ko me Aelõñ eo an Anij enaaj bũktok. Kwõn kããlõt wãween mour eo im enaaj kõm̦m̦an bwe kwõn bõk jeraam̦m̦an kein. Kwõnaaj lukkuun m̦õn̦õn̦õ el̦aññe kwõj kajerbal mour eo am̦ ñan karejar ñan Jeova. Men in ekitibuj am̦ kõm̦m̦ani mejãnkajjik ko me kwõmaroñ tõpari kiiõ im bareinwõt mejãnkajjik ko me kwõmaroñ tõpari ilju im jekl̦aj. * Ilo am̦ kõm̦m̦ane men in enaaj jipañ eok ñan wõnm̦aanl̦o̦k wõt ilo am̦ karejar ñan Anij. Im enaaj tõll̦o̦k eok ñan am̦ bõk mour indeeo.—1 Jon 2:17.
18, 19. Ewi wãween juon jodrikdrik emaroñ jel̦ã el̦aññe em̦õj an ejaake juon jem̦jerã ippãn Anij?
18 Kom̦ jodrikdrik ro, ta men eo m̦oktata kom̦ij aikuj kõm̦m̦ane ñan ami pãd ilo ial̦ eo ej tõll̦o̦k ñan mour indeeo? Kom̦ij aikuj make ejaake juon jem̦jerã epaak ippãn Jeova. Em̦õj ke ami kõm̦m̦ane men in? Kajjitõk ippam̦ make: ‘Ña ij ke epaake Jeova? Ak ij ke kõm̦m̦ani m̦akũtkũt ko an Kũrjin ãinwõt kweilo̦k im kwal̦o̦k naan kõn jinõ im jema? Ij ke kate eõ ñan kwal̦o̦k jouj, yokwe im ettã bõro im wãween ko erl̦o̦k wõt bwe Anij en m̦õn̦õn̦õ kake eõ? Ij ke kate eõ bwe in ekkeini aõ kõm̦m̦ani m̦akũtkũt ko an kabuñ eo em̦ool ãinwõt jar, katak ippa make, pãd ilo kweilo̦k ko, im kwal̦o̦k naan? Ij ke kakajoorl̦o̦k jem̦jerã eo aõ ippãn Anij im ruwaakl̦o̦k ñan E?’—Jem. 4:8.
19 L̦õmn̦ak kõn joñak eo an Moses. Meñe Moses ear dik im rũttol̦o̦k ilo Ijipt, ak ear kõn̦aan bwe armej ren jel̦ã bwe ej kabuñ ñan Jeova jãn aer n̦aetan nejin kõrã eo nejin Pero. (Riit Hibru 11:24-27.) Kom̦ jodrikdrik ro, kom̦ bareinwõt aikuj peek ilo bũruomi ñan karejar ñan Jeova im tiljek ñan E. El̦aññe kom̦ij kõm̦m̦ane men in kom̦ naaj lukkuun m̦õn̦õn̦õ, enaaj wõr tokjãn ami mour kiiõ im kom̦ “maroñ bõk mour eo ej lukkun mour emol.”—1 Ti. 6:19, UBS.
20. Naaj lel̦o̦k mour indeeo ñan wõn ro?
20 Ke armej ro rar iãekwõj ilo raan ko etto, juon wõt armej ear maroñ wiin. Ejjab ãindein ilo iãekwõj eo me ej tõll̦o̦k ñan mour indeeo. Ej ankilaan Anij bwe en “lo̦mo̦o̦ren armej otemjej, im bwe ren item jel̦ã m̦ool.” (1 Ti. 2:3, 4) Elõñ rar ettõr ilo iãekwõj in m̦okta jãn kwe im em̦õj aer tõpar jem̦l̦o̦kin. Bareinwõt elõñ ro rej ettõr ippam̦ ilo iãekwõj in. (Hi. 12:1, 2) Naaj lel̦o̦k mour indeeo ñan aolep ro rej kate er im jab ebbeer ilo iãekwõj eo. Kõn men in kwõj aikuj kate eok bwe kwõn wiin!
21. Ta eo jenaaj katak kake ilo katak in tok juon?
21 “Raan eo el̦ap im kaamijak an Jeova” ej epaaktok. (Mal. 4:5) Ñe raan eo ej itok, baam̦le ko im rej Kũrjin renaaj aikuj pojak. Ekanooj aorõk bwe kajjojo uwaan baam̦le eo ren kõm̦m̦ane ijo kun̦aaer ekkar ñan Baibõl̦ eo. Bar ta eo kwõmaroñ kõm̦m̦ane bwe kwõn “emmij im ekkõl” wõt im kakajoorl̦o̦k jem̦jerã eo am̦ ippãn Jeova? Katak in tok juon enaaj kwal̦o̦k kõn jilu men ko im remaroñ jelõt jem̦jerã eo ami ippãn Jeova ãinwõt juon baam̦le.
[Kamelele eo itulal]
Ta eo Kwaar Katak Kake?
• Etke eaorõk bwe baam̦le ko im rej Kũrjin ren “emmij im ekkõl” wõt?
• Ewi wãween l̦eo emaroñ kajjioñe ‘Seperd eo Em̦m̦an’?
• Ewi wãween juon kõrã em̦m̦an emaroñ rejetake l̦eo pãleen?
• Ewi wãween jodrikdrik ro remaroñ jipañ baam̦le eo aer bwe ren “emmij im ekkõl” wõt?
[Kajitõk ko ñan katak]
[Pija ilo peij 9]
Juon kõrã em̦m̦an ej juon menin letok eaorõk ñan l̦eo pãleen
