“Juon Ri Tõl Em̦m̦an im Ejitõnbõro”

ILO KAR jibboñin Jãdede Tijemba 4, 2010, ear jem̦l̦o̦k mour eo an Jon (Jack) Barr ioon lal̦. Kar 97 iiõ dettan ke ear mej. Ippãn elõñ armej, Jack ear juon “ri tõl em̦m̦an im ejitõnbõro.”

Jack Barr ear l̦õtak ilo juon bukwõn etan Aberdeen ilo aelõñ in Scotland. Ewõr juon jein kõrã im juon jein em̦m̦aan. Jemen im jinen jim̦or rar m̦õttan bween ri kabit ro. Ekkã an kar Jack itoklimo in kõnono kõn iien ko ke ear dik im rũttol̦o̦k. Ear lukkuun kam̦m̦oolol jemen im jinen kõn joñak ko aer rem̦m̦an.

Ke ear jodrikdrik, ear lukkuun pen ñan an Jack kõnono ippãn ro im ear jab jel̦ã kajjier. Bõtab, ear kate bwe en anjo̦ jãn apañ in. Juon raelepen Jabõt ilo iiõ eo 1927, ke ear 14 an iiõ, Jack ear ba ñan jemen bwe epojak in kwal̦o̦k naan jãn em̦ ñan em̦. Eñin kar jinointata in an kar jerbal ñan Jeova. Brother Barr ear kijejeto wõt ilo jerbal in kwal̦o̦k naan m̦ae iien eo ear mej.

Juon raan, ear wal̦o̦k juon jorrããn ñan jinen Jack im ebaj wõt mej. Men in ear lukkuun kam̦akũt Jack bwe en lukkuun etale mour eo an. Tokãlik ear wũjlepl̦o̦ke mour eo an ñan Jeova ilo 1929, im ilo 1934 ear peptaij. Innem ilo 1939, ear jino jerbal ilo ra eo ilo London, Iñlen. Jãn iien in m̦ae iien eo ear mej, Jack ear jerbal in full-time iloan doulul eo ium̦win 71 iiõ.

Ilo Oktoba 29, 1960, Jack ear mareik Mildred Willett, juon eo ear kijejeto ilo jerbal in pioneer im mejinede. Brother im Sister Barr rar likũt juon joñak em̦m̦an ilo aerro kar tiljek wõt ñan doon m̦ae iien eo Mildred ear jem̦l̦o̦k mour eo an iion lal̦ ilo Oktoba 2004. Jãn jinoin aerro kar m̦are, Brother im Sister Barr rar riiti Baibõl̦ eo ippãn doon kajjojo raan.

Ro im rar jel̦ã kajjien Brother Jack, rej keememeje ãinwõt juon em̦m̦aan eo el̦ap an rõjañ ro jet. Ej rõjañ er ilo yokwe, ilo jouj, im ilo an kajerbale Baibõl̦ eo. Ear juon ri tõl ejouj im eyokwe, eniknik ilo jerbal eo an, im etiljek ñan ro m̦õttan. Joñan m̦wilal̦ in yokwe eo an kõn m̦ool eo im kõtaan eo an ippãn Jeova ear alikkar ilo uwaak ko an, katak ko an, im bar jar ko an.

Meñe jej bũrom̃oj kake Brother Barr, ak jej lañlõñ ippãn ke ej bõk jinõkjej eo an kõn mour indeeo im eban jem̦l̦o̦k. Juon jeraam̦m̦an ear reimanl̦o̦k ñane im ekkã an kar kõnono kake. Kar men eo drein ear kõn̦aan.—Rom 2:6, 7. *

[Kamelele eo itulal]