Kwõj Ke M̦õn̦õn̦õ in Riiti Baibõl̦ Eo?

LORRAINE ej ba: “Meñe iar jino keini aõ riiti Baibõl̦ eo, ak iar jab lukkuun kar itoklimo in kõm̦m̦ane. Ear lukkuun pen ñan aõ mel̦el̦e kõn eoon ko im ilo iien eo ij riit elukkuun pidodo aõ m̦ad kõn men ko jet.”

Ro jet rej bareinwõt ba bwe meñe rar jino keini aer riiti Baibõl̦ eo, ak ear jab juon men ekaitoktoklimo ñan er. Bõtab, rar wõnm̦aanl̦o̦k wõt im kõm̦m̦ane men in kõnke rej kile bwe ej juon men ejim̦we im rej aikuj kõm̦m̦ane. Mark ej ba: “Epidodo an l̦õmn̦ak eo am̦ m̦ad kõn men ko jet ñe kwõj riit ak katak Baibõl̦ ippam̦ make. Iar aikuj lukkuun kate eõ im jar ñan Jeova bwe en jipañ eõ kaorõk aõ riiti Baibõl̦ eo kajjojo raan.”

Ta eo emaroñ jipañ eok ñan kaorõk Naan eo an Anij, Baibõl̦ eo? Im ta eo emaroñ jipañ eok bwe kwõn m̦õn̦õn̦õ in riiti Baibõl̦ eo? Jen etale kõmel̦el̦e kein itulal̦ im remaroñ jipañ kõj ilo men in.

Mejãnkajjik ko im Wãween Kwõmaroñ Kajejjeti

M̦okta jãn am̦ riiti Baibõl̦ eo, kwõn jar im jab m̦ad kõn men ko jet. Jar ñan Jeova bwe en jipañ eok bwe en wõr am̦ kõn̦aan ñan katak Baibõl̦ eo. Kwõn eoware Jeova bwe en jipañ eok ñan lukkuun mel̦el̦e kõn Naan eo An. (Sam 119:34) Elukkuun aorõk ñan am̦ kõm̦m̦ane men in kõnke el̦aññe kwõjjab, enaaj juon men kwõj kõm̦m̦ane ak ejjab jãn bũruom̦. Men in emaroñ kõm̦m̦an bwe en jako am̦ kõn̦aan riiti Baibõl̦ eo. Lynn ej ba: “Jet iien elukkuun m̦õkaj aõ riiti eoon ko im men in ekõm̦m̦an aõ likjab jãn mel̦el̦e ko rem̦m̦an. Ekkã aõ jab lukkuun mel̦el̦e kõn ta ko eoon ko rej kõnnaan kaki. Bõtab, ñe ij jar, men in ej jipañ eõ ñan jab m̦ad kõn men ko jet ilo iien eo ij riit.”

Kwõn kaorõk men ko kwõj katak kaki. Ñan am̦ maroñ bõk mour indeeo, men in ej wawa ioon am̦ mel̦el̦e im jerbale katak ko rem̦ool ilo Baibõl̦. Kõn men in, kwõn kate eok ñan pukot kõmel̦el̦e ko im remaroñ jipañ eok im kwõn jerbali. Chris ej ba: “Ñe ij riiti Baibõl̦ eo, ij kajjioñ pukot mel̦el̦e ko ie me renaaj jipañ eõ ñan kajim̦we l̦õmn̦ak ko aõ. El̦ap an kaitoktoklimo ñan lo bwe ewõr mel̦el̦e ko ilo Baibõl̦ eo im relukkuun jejjet ñan eõ. Bareinwõt bok ko jet an doulul in el̦ap aer jejjet ñan eõ meñe ro rar jei rejjab jel̦ã kõn wãween mour eo aõ.”

Kõm̦m̦an mejãnkajjik ko me kwõmaroñ kajejjeti. Kwõn kajjioñ in katak men ko rekããl kõn armej ro ilo Baibõl̦ eo. Kwõmaroñ lo elõñ men ko rekaitoktoklimo kake er ilo am̦ etale Baibõl̦ eo im bok ko jet an doulul in. Kwõnaaj bõk el̦ap tokjãn ñe kwõnaaj jel̦ã kõn rein im wãween mour ko aer.

Pukot wãween ko rekããl kõn kilen kõmel̦el̦eik eoon ko. (Jrb. 17:2, 3) Eñin ej mejãnkajjik eo an Sophia ñe ej katak Baibõl̦ eo. Ej ba, “Ikõn̦aan pukot wãween ko rekããl kõn kilen kõmel̦el̦eik eoon ko ilo jerbal in kwal̦o̦k naan im ilo iien ko jet. Ij kõm̦m̦ane men in bwe en maroñ alikkar aõ kõmel̦el̦eik katak ko rem̦ool ilo Baibõl̦. Bok in Imõniaroñroñ eo el̦ap an jipañ eõ ñan kajejjete mejãnkajjik in aõ.”—2 Ti. 2:15, UBS.

Pijaik men eo kwõj riiti ilo Baibõl̦ eo. Hibru 4:12 ej ba, “Naan in Anij ej mour.” Ñe kwõj riiti juon bwebwenato ilo Baibõl̦ eo, kwõn pijaik am̦ pãd ilo tõre eo. Kajjioñ in l̦õmn̦ak kõn ta ko armej ro rej loi, roñ, im jel̦ã ta eñjake ko aer. Bareinwõt, kajjioñ in lale ewi wãween  men ko rar wal̦o̦k ilo mour ko aer remaroñ jejjet ñan wãween ko kwõj iioni ilo mour eo am̦. Kwõn katak jãn waanjoñak ko aer. Am̦ kõm̦m̦ane men in enaaj kal̦apl̦o̦k am̦ mel̦el̦e im jipañ eok ñan keememej bwebwenato ko ilo Baibõl̦.

Kõm̦m̦an iien ñan am̦ etale eoon ko repen bwe kwõn maroñ mel̦el̦el̦o̦k. Kajjojo iien ñe jej katak ippãd make jen bõk iien. Ñan waanjoñak, ñe ewõr juon men epen im ewõr am̦ kajjitõk kake, kwõn bõk am̦ iien im pukot mel̦el̦e ko ilo bok ko an doulul in. Ñe enaaj l̦apl̦o̦k am̦ mel̦el̦e im jerbali eoon ko kwõj riiti, innem enaaj l̦apl̦o̦k am̦ itoklimo in riiti Baibõl̦ eo. Kwõnaaj bõk l̦õmn̦ak eo an ri jeje sam ke ear ba naan kein: “Iar bõk naan in kõnnaan ko Am̦ [Jeova] men in jolõt ippa ñan indeeo, bwe re men in lañlõñ an bũruõ.”—Sam 119:111.

Kwõn jab ekaiuriur ñe kwõj etale Baibõl̦ eo. En jejjet joñan iien eo kwaar kajenolo̦ke ñan am̦ riiti Baibõl̦ eo im katak ippam̦ make. Bõtab, kwõj aikuj bar l̦õmn̦ak in kõm̦m̦an iien ñan am̦ kapoje katak ko ñan iien kweilo̦k ko. Raquel ej ba: “Ñe ejjab em̦m̦an aõ mour, enana aõ katak im ijjab maroñ l̦õmn̦ak kõn men eo ij riiti. Kõn men in, ijjab lukkuun kaitok aõ katak kõnke iban bõk tokjãn ilo men in.” Chris ej ba: “Ñe ij ekaiuriur ilo aõ riiti Baibõl̦ eo, men in ekõm̦m̦an bwe en nana aõ mour tokãlik kõnke jidik wõt aõ keememej men eo iar riiti im katak kake. Eñin unin ekkã an katak ko jab tõpar bũruõ.” Kõn men in, elukkuun aorõk bwe kwõn bõk am̦ iien ñe kwõj riit Baibõl̦.

Ejaake juon kõn̦aan ippam̦ ñan riiti Naan in Anij. Rijjelõk Piter ear ba, ‘Ãinwõt niñniñ rej kab l̦otak, kom̦win kanooj kõn̦aan milik em̦m̦an ak naan eo, bwe kom̦win eddekl̦o̦k kake ñan lo̦mo̦o̦r.’ (1 Pi. 2:2) Jejel̦ã bwe niñniñ ko rejjab aikuj ejaake juon kõn̦aan ñan ijol milik, rej kajju ijole. Bõtab, eoon ko rej kalikkar bwe jej aikuj ejaak ippãd juon kõn̦aan ñan katak Baibõl̦ eo. Kwõnaaj maroñ ejaake kõn̦aan in ippam̦ el̦aññe kwõj riiti juon peij ilo Baibõl̦ eo kajjojo raan. Meñe ilo jinoin epen ñan am̦ kõn̦aan riiti Baibõl̦ eo, bõtab tokãlik kwõnaaj m̦õn̦õn̦õ in kõn̦aan kõm̦m̦ane men in.

Kõl̦mãnl̦o̦kjen̦ kõn eoon ko. Kwõnaaj bareinwõt bõk el̦ap tokjãn ñe kwõj kõl̦mãnl̦o̦kjen̦ kõn men eo kwõj riiti. Men in enaaj jipañ eok ñan mel̦el̦e kõn ewi wãween men eo kwõj riiti ej rejetake aolep katak ko kwaar katak kaki. Ejjabto, kwõnaaj jel̦ã kõn elõñ katak ko raorõk im m̦ool. Ej juon men enaaj l̦ap an kalañlõñ eok.—Sam 19:14; JK. 3:3.

 Ewõr Tokjãn Am̦ Kajerbal Iien ko Am̦

Kwõj aikuj kate eok ñan keini am̦ riiti im katak ippam̦ make kõn Baibõl̦ eo. Kwõnaaj lo elõñ jeraam̦m̦an ko jãn am̦ kõm̦m̦ane men in. Enaaj l̦apl̦o̦k am̦ mel̦el̦e kõn Baibõl̦ eo. (Hi. 5:12-14) Am̦ riiti Naan in Anij enaaj kõm̦m̦an am̦ mãlõtlõt im jel̦ã kajerbal lol̦o̦kjen̦. Kõn men in, kwõnaaj lo lañlõñ, m̦õn̦õn̦õ im aenõm̦m̦an ilo mour eo am̦. Aolep ro im rej katak Naan in Anij im jerbale renaaj “mour” ak bõk mour indeeo.—JK. 3:13-18, UBS.

Ñe kwõj liñori ak lukkuun turi Baibõl̦ eo, men in enaaj kõm̦m̦an am̦ lukkuun mel̦el̦e. (JK. 15:14) Men in enaaj jipañ eok ñan jel̦ã kilen lel̦o̦k naan in rõjañ ko jãn Baibõl̦ eo im tõpar bũruon armej eo kwõj rõjañ e. Bareinwõt, kwõn kõm̦m̦ani pepe ko am̦ ekkar ñan men ko kwaar riiti ilo Baibõl̦ eo im bok ko jãn “ri karijer e tiljek im mãlõtlõt.” Ñe kwõj kõm̦m̦ane men in, kwõnaaj lo lañlõñ im kõtaan eo am̦ ippãn Jeova enaaj pen. (Matu 24:45) Bareinwõt, enaaj jipañ eok bwe kwõn juon armej eo eineem̦m̦an im am̦ kõm̦m̦an im kõnono renaaj ekkar ñan Naan in Anij, Baibõl̦ eo. Innem kwõnaaj lo tõprak ilo aolep men ko kwõj kõm̦m̦ani me rej jipañ eok bõk juon kõtaan epaak ippãn Jeova.—Sam 1:2, 3.

Ñe kwõj yokwe Jeova kõn aolepen bũruom̦ enaaj lujur eok ñan kõnono ñan ro jet kõn tõmak eo am̦. Enaaj l̦ap am̦ jeraam̦m̦an ilo men in. Sophia ej kajjioñ keememej im kajerbali elõñ kain eoon ko ñan kaitoklimoik armej ro im bwe en maroñ m̦õn̦õn̦õ im lo tõprak ilo jerbal in kwal̦o̦k naan. Ej ba: “Ñe ij lo an armej ro itoklimo kõn eoon ko ilo Baibõl̦ eo, men in el̦ap an kam̦õn̦õn̦õik eõ.”

Jeraam̦m̦an eo el̦aptata jenaaj bõke jãn ad itoklimo in riiti Baibõl̦ eo ej juon kõtaan epaak ippãn Jeova. Am̦ katak Baibõl̦ eo ej jipañ eok ñan jel̦ã kõn kien ko an Jeova. Enaaj bareinwõt jipañ eok ñan am̦ mel̦el̦e bwe ej juon Anij in ekajet jim̦we, ewõr yokwe ippãn, im ejouj. Men in ej juon jeraam̦m̦an im ejjel̦o̦k bar men el̦apl̦o̦k an aorõk jãne. Kwõn riit im katak Naan in Anij kõn aolepen bũruom̦. Em̦ool enaaj wõr tokjãn am̦ kajerbal iien ko am̦ ñan kõm̦m̦ane men in.—Sam 19:7-11.

[Box/Pija ilo peij 5]

RIITI NAAN IN ANIJ: MEJÃNKAJJIK KO IM WÃWEEN KWÕMAROÑ KAJEJJETI

▪ M̦okta jãn am̦ riiti Baibõl̦ eo, kwõn jar im jab m̦ad kõn men ko jet.

▪ Kwõn kaorõk men ko kwõj katak kaki.

▪ Kõm̦m̦an mejãnkajjik ko me kwõmaroñ kajejjeti.

▪ Pukot wãween ko rekããl kõn kilen kõmel̦el̦eik eoon ko.

▪ Pijaik men eo kwõj riiti ilo Baibõl̦ eo.

▪ Kõm̦m̦an iien ñan am̦ etale eoon ko repen bwe kwõn maroñ mel̦el̦el̦o̦k.

▪ Kwõn jab ekaiuriur ñe kwõj etale Baibõl̦ eo.

▪ Ejaake juon kõn̦aan ippam̦ ñan riiti Naan in Anij.

▪ Kõl̦mãnl̦o̦kjen̦ kõn eoon ko.

[Pija ilo peij 4]

Ñe kwõj riiti juon bwebwenato ilo Baibõl̦ eo, kwõn pijaik eok ãinwõt ñe kwõj pãd ijo