L̦oore Kũraij, Ri Tõl eo Ad Eweeppãn

RO IM rej l̦oor ri tõl ro an lal̦ ekkã wõt aer iion inepata. Bõtab, ro im rej l̦oor tõl eo an Kũraij rejjab ãinwõt rein. Jijej ear ba: “Komin itok ñõn ibba, kom otemjej ro remõk kin air inek men ko reddro, im inaj kakkijeik kom. Komin bõk aõ ine im likit iaerami, im katak ibba; bwe ij inemmõn im ettã buru; im kom naj lo ami kakije.” (Matu 11:28, 29, UBS) An Jijej tõl el̦ap an bõktok m̦õn̦õn̦õ im jubõro ñan armej ro rej l̦oore. El̦ap an m̦õn̦õn̦õ in jipañ ro rej bũrom̦õj im eñtaan, im ej kõn̦aan bwe ren l̦oore tõl eo an. Bõtab, ta ko jej aikuj kõm̦m̦ani bwe jen maroñ l̦oor tõl eo an Jijej?

Rijjelõk Paul ear je, “Kraist e ar eñtaan kõn kom̦, im likũt joñak ñan kom̦, bwe kom̦win anõke jenkwan ne ko neen.” (1 Pi. 2:21) Etke eaorõk bwe jen l̦oore joñak eo an Jijej? Baj l̦õmn̦ak m̦õk, kwe im ro jet kom̦ij pãd ilo aujpitõl̦ kõnke ewõr juon nañinmej ekauwõtata kom̦ij iione. Ak kiiõ ewõr juon taktõ me ejel̦ã unokan nañinmej eo. Kwõnaaj ke kar l̦oor aolep naan in jiroñ ko ej kwal̦o̦k ñan eok? Ejjel̦o̦k pere bwe kwõnaaj kar lukkuun roñjake im pokake. Ejja ãinl̦o̦k wõt in, ilju im jekl̦aj eo ad enaaj em̦m̦an el̦aññe jej lukkuun l̦oore tõl eo an Jijej. Jej kwal̦o̦k ad l̦oor tõl eo an Kũraij ilo ad roñjake im pokake e im bõrokuk ippãn ro im ear jitõñ er bwe ren tõl.

Roñjake im Pokake

Ilo jem̦l̦o̦kin l̦o̦k katak eo an ioon tol̦ eo, Jijej ear ba: “Innem, jabdrewõt eo ej roñ nan kein aõ im bokaki enaj einwõt juõn armij emeletlet eo ear kalek mweo imon ion bar. Im ej wut mejiljil im river ej ibwijlebleb im tore, im kõto ko rellab rej buñ ion. Ak ejjab wõtlok, bwe emwij kalek ion bar.”—Matu 7:24, 25, UBS.

Eo im ej roñjake im pokake e, Jijej ear ba bwe ‘emãlõtlõt.’ Jej ke kautiej im kaorõk tõl eo an Kũraij ilo ad pokake jãn bũruod? Ak jej ke pokake Kũraij ilo iien ko wõt im repidodo? Jijej ej ba: “Iien otemjej ij kõm̦m̦an men ko rej kabuñbũruon [Anij].” (Jon 8:29) Kõn men in, jen kate koj ñan l̦oore Jijej.

Ilo iien ko etto, rijjelõk ro rar likũt juon joñak em̦m̦an ke rar kõttãik er ñan tõl eo an Kũraij. Juon iien, Piter ear ba ñan Jijej: “Lo, kõm ar likũt men otemjej im l̦oor eok.” (Mark 10:28) Ealikkar bwe rijjelõk ro rar kaorõk tõl eo an Jijej kõnke rar m̦õn̦õn̦õ in likũt men otemjej bwe ren l̦oore.—Matu 4:18-22.

Bõrokuk Ippãn Ro im Jijej Ear Jitõñ Er

M̦oktal̦o̦k jãn an Jijej mej, ear kwal̦o̦k bar juon wãween me jemaroñ l̦oore tõl eo an. Ear ba: “Eo ej bõk jabdewõt eo ij jikinl̦o̦k e ej bõk ña.” (Jon 13:20) Jijej ear kõnono kõn ri kabit ro me ear jitõñ er ãinwõt ro ‘jatin.’ (Matu 25:40) Ãlikin an kar Jijej jerkakpeje im wanlõñl̦o̦k ñan lañ, kar jitõñ rein ñan ‘kõnono ilo etan Kũraij.’ Rar kõm̦m̦ane men in ilo aer jipañ ro jet ñan erom ro jeran Jeova Anij. (2 Ko. 5:18-20, UBS) Ñan kwal̦o̦k ad l̦oore tõl eo an Kũraij, jej aikuj kõttãik kõj ñan rein ‘jatin.’

Jej aikuj pokaki naan in kakapilõk ko jãn Baibõl̦ eo me rej pãd ilo bok ko im rej pedped wõt ioon Baibõl̦. Jej lo im roñ naan in  kakeememej ko an Jijej ikijjeen ad katak Baibõl̦ im pãd ilo kweilo̦k ko. (2 Pi. 3:1, 2, UBS) Ñe jej keini ad kõm̦m̦ani men kein, jej kwal̦o̦k ad kam̦m̦oolol kõn katak ko rem̦ool jãn Baibõl̦ eo. Ak ta el̦aññe ewõr iien rej bar eliji naan in kakapilõk ko? Ta eo jen kar kõm̦m̦ane? Ñan waanjoñak, Baibõl̦ eo ej kakapilõk kõj bwe jen m̦areik wõt ro ilo doulul eo. (1 Ko. 7:39, UBS) Jen jem̦aan in aer likũt naan in kakapilõk in jãn iien ñan iien ilo bok in Imõniaroñroñ eo. Ri kabit ro jatin Kũraij rej kwal̦o̦k aer kea kõn kõtaan eo ad ippãn Jeova ikijjeen aer letok naan in kakapilõk in im ko jet jãn Baibõl̦ eo ilo bok ko rej kõm̦m̦ani. Ñe jej roñjake im pokake naan in kakapilõk kein, eñin ej juon wãween jej kalikkar bwe jej l̦oore ri tõl eo ad eweeppãn, Jijej Kũraij.

Jabõn Kõnnaan 4:18 ej ba: “A ial̦ an ro rũ wanõk ej ãinwõt meram ilo iien raantak, eo ej meraml̦o̦k wõt m̦ae iien e lukkuun raan.” Aet, ri tõl eo ad Jijej ejjab jowan. Ijello̦kun, el̦ap tõprak im wõnm̦aanl̦o̦k ko rej wal̦o̦k ilo an tõl. Bar juon wãween jemaroñ bõrokuk ippãn ro ‘jatin’ Kũraij ej ilo ad errã ilo mel̦el̦e ko rekããl kõn katak ko ilo Baibõl̦ jãn Jeova ikijjeen ‘ri karejar eo tiljek im mãlõtlõt.’—Matu 24:45.

Jej bareinwõt kõttãik kõj ñan ro ‘jatin’ Kũraij ikijjeen ad bõrokuk ippãn ro im kar jitõñ er bwe ren tõl congregation ko. Rijjelõk Paul ear ba: “Kom̦win pokake im kõttãik kom̦ ñan ro rej tõl kom̦, bwe rej lale ami.” (Hi. 13:17) Ñan waanjoñak, juon elder emaroñ kakapilõk kõj kõn aorõkin an baam̦le eo ad keini an katak Baibõl̦ ippãn doon. Ak emaroñ letok naan in rõjañ ko kõn wãween ad maroñ kakõm̦anm̦anl̦o̦k jerbal in kwal̦o̦k naan eo ad. Bareinwõt juon overseer me ej lol̦o̦k congregation ko emaroñ letok jet naan in kakapilõk ko ilo Baibõl̦ eo kõn jet wãween ko me jemaroñ kakõm̦m̦anm̦anl̦o̦ke ippãd make. El̦aññe jej m̦õn̦õn̦õ in jerbale naan in kakapilõk kein rej litok, innem jej kwal̦o̦k bwe jej l̦oore Ri Tõl eo ad eweeppãn, Jijej.

Ri tõl ro an lal̦ in ejjel̦o̦k tõprak ko rej kõm̦m̦ani ilo aer tõl. Ak ñe jej l̦oore wõt tõl eo an Kũraij el̦ap ad m̦õn̦õn̦õ im jubũruod. Kõn men in, jen pokake Ri Tõl eo ad im bõrokuk ippãn ro im ej kajerbale er rainin ñan tõl.

[Pija ilo peij 27]

Kwõj ke pokake naan in kakapilõk ko ilo Baibõl̦ bwe jen m̦areik wõt ro ilo doulul eo?