Jej Aikuj Kabwe Aikuj ko an Wõn Ro?

ILO aelõñ ko ilo Micronesia ekoba aelõñ ko jet ipel̦aakin lal̦, armej rej jipañ baam̦le ko aer aolep raan. Bõtab, elõñ armej rej l̦õmn̦ak bwe ro jein im jatin jemãer im jineer, ro rilikier, im ajri ro nejin lio ak l̦eo jeer im jatier rej uwaan “baam̦le” ko aer.

Baibõl̦ eo ej ba: “Elañe juõn ejjab kejbarok ak lale ro nukin, elabtata ñõn ro rej bed ilo family eo an make, ej karmijjete tõmak in ad, im elablok an nana jen ro rejjab tõmak.” (1 Timote 5:8, UBS) Bõtab, naan in kakapilõk in ej jerbal ñan wõn ro? Juon Kũrjin ej aikuj ke kabwe aikuj ko an ro jet nukũn ãinwõt ro rilikin ak ro jein im jatin jemen im jinen?

Rũtto ro Kab Ro Nejier

Ilo iien ko etto armej ro rar l̦õmn̦ak bwe ro uwaan juon baam̦le ear kitibuj ro jet nukũer ijello̦kun jemãer im jineer im ro jeer im jatier. Bõtab, ke Baibõl̦ eo ear ba bwe juon Kũrjin ej aikuj ‘kejbarok ak lale ro rej bed ilo baam̦le eo an make,’ ejjab mel̦el̦ein bwe ej aikuj kabwe aikuj ko an aolep ro jet nukũn.

Baibõl̦ eo ej lukkuun kalikkar aorõkin an rũtto ro kabwe aikuj ko an ro nejier. Ke Paul ear je ñan juon congregation kõn aer jipañ e, ear ba: “Bwe ajiri rejjab kõke aikwij ko an jemeir im jineir, ak ro jemeir im jineir rej kõke aikwij ko an ro nejier.” (2 Korint 12:14, UBS) H. B. Clark, juon eo im ebuñbuñ kõn an jel̦ã kõn kien ko ilo Baibõl̦, ear ba: “Ej eddo eo an jemen ajri ro ñan kabwe aikuj ko an ro nejin. Men in ej juon men ekkar im ejim̦we.” Kõnke Anij ear jitõñ l̦õm̦aro bwe ren bõran baam̦le eo, ej eddo eo an l̦eo ñan kabwe aikuj ko an baam̦le eo an make. Ekkã an kõrã eo jipañ e ilo an lale m̦weo, jab iukkure kõn jããn, im jet iien ej bar jerbal el̦aññe ej juon menin aikuj.—Lale Jabõn Kõnnaan Ko 31:10-31.

Bõtab, Baibõl̦ eo ejjab baj rõjañ wõt rũtto ro ñan aer jerbal bwe en wõr on̦aer. Ej rõjañ er bwe ren kõm̦m̦an joortoklik ñan jipañ ro nejier. Rũtto ro im rej jerbale naan in kakapilõk in ekkã aer maroñ jipañ ro nejier. Remaroñ kõm̦m̦ane men in meñe ro nejier rerũtto im rar em̦m̦akũt jãn m̦weo. Enaaj l̦ap aer jipañ el̦aptata ñe ro nejier rej kate er ilo jerbal in pioneer ak jerbal ko ãierl̦o̦kwõt kõnke jet iien remaroñ aikuj jidik jããn bwe ren wõnm̦aanl̦o̦k wõt ilo jerbal kein. Baibõl̦ eo ejjab ba bwe rũtto ro rej aikuj “kõke aikwij” ko an ro jet nukũer.

‘N̦a On̦aer’

Kõnke rũtto ro rej yokwe ro nejier im kabwe aikuj ko aer, ekkar bwe ro nejier ren n̦a on̦aer. Ilo 1 Timote 5:4, rijjelõk Paul ear ba: “A el̦aññe jabdewõt kõrã e jako pãleen, im ewor nejin ak jibwin ak jim̦m̦an, ren katak m̦okta kõn lale ro nukũer, im ren em̦m̦an m̦wilier kake, im n̦a on̦ãn ro jemaer im jinier; bwe men in men in kabuñbũruon im̦aan mejãn Anij.” Eo im ej jipañ jemen ak jinen ñe rej bwijwol̦ã, ak jibwin ak jim̦m̦an, ej jerbale kien eo ilo Baibõl̦ ñan kautiej jemen im jinen.—Epesõs 6:2; Exodus 20:12.

Paul ear kalikkar bwe ñan kabwe aikuj ko an juon kõrã ejako pãleen ej eddo eo an ro nejin ak ro jibwin im jab ro jet nukũn. Ilo raan ko an Paul, el̦aññe juon kõrã ejako pãleen ear tiljek ñan Jeova bõtab ejjel̦o̦k nejin  ak jibwin ñan kõke aikuj ko an, ro uwaan congregation eo an rar aikuj jipañ e.—1 Timote 5:3, 9, 10.

Kõn men in, eddo eo an juon Kũrjin ñan ‘lale baam̦le eo an make’ ej jitõñl̦o̦k wõt ñan eo pãleen im ro nejin, jemen im jinen kab jibwin im jim̦m̦an. Rej aikuj kajejjet eddo in meñe rein rejjab pãd ilo m̦ool eo ak renañinmej im utam̦we. Toõn wõt an rein ilo baam̦le eo an mour, Kũrjin eo ej aikuj kabwe aikuj ko aer. El̦aññe juon ear m̦are, innem enaaj bar an eddo ñan jipañ eo pãleen ñan kautiej jemen im jinen. Jet iien apañ ko rel̦ap rej wal̦o̦k ikõtaan l̦eo im lio ñe juon iaaer ej kõjekdo̦o̦n naan in kakapilõk in.

Kabwe Ta im Ñaat?

Jet iien rũtto ro rej l̦õmn̦ak bwe remaroñ iukkure kõn jããn ko aer kõnke remaroñ kajjitõk ippãn ro nejier ñan lel̦o̦k aer jããn aolep iien. Kain l̦õmn̦ak rot in ejjab jim̦we. Bareinwõt, rũtto ro rejjab aikuj kõtmãne bwe eo nejier en kamaat an maroñ ñan jipañ er el̦aññe ejjab juon menin aikuj. Rej aikuj keememej bwe eo nejin ej aikuj kabwe aikuj ko an eo pãleen im ajri ro nejin m̦oktata. Men in ej rejetake naan kein an Paul, eo ear ba: “Bwe ajiri rejjab kõke aikwij ko an jemeir im jineir, ak ro jemeir im jineir rej kõke aikwij ko an ro nejier.”—2 Korint 12:14, UBS.

Bõlen ewõr m̦õn rũtto ro, aer wãto, im jet wãween ko rej maroñ ebbõk aer jããn ekoba jããn in jipañ jãn kien. Men kein remaroñ jipañ kabwe aikuj ko aer ñe renaaj bwijwol̦ã. “M̦ani ej kõm̦m̦an bwe kwõn jab aikuj.” Kõn men in, el̦aññe rũtto ro rej kõjparok jããn ko aer, tokãlik ñe rej bwijwol̦ã eban pen ñan an ro nejier lale im kabwe aikuj ko aer.—Ekklisiastis 7:12.

Bõtab, meñe em̦õj ad kõm̦m̦an karõk ko rem̦m̦an ak jet iien remaroñ jab tõprak kõnke “jerata ej walok ñõn jabdrewõt armij.”  (Ekklisiastis 9:11, UBS) Innem ta el̦aññe ejjab tõprak karõk ko an rũtto ro ñan kabwe aikuj ko aer make ñe rej bwijwol̦ã? Wõn ro ren jipañ er? Ro nejier renaaj kõn̦aan jipañ er ekkar ñan aer maroñ. Remaroñ kõm̦m̦ane men in ilo aer lel̦o̦k jããn in jipañ ak karõk bwe rũtto ro ren jokwe ippãer ak ilo juon jikin epaake er. Mekarta, rũtto ro ren jab kõtmãne bwe ro nejier ak jibwier renaaj kõm̦m̦an bwe en kanooj em̦m̦an kõjeiier. Etke? Kõnke Baibõl̦ eo ej ba: “Elañe eor kijed im ballid, eokwe ebwe.”—1 Timote 6:8, UBS.

Enañin aolep iien joortoklik ak jããn in jipañ jãn kien ãinwõt social security ebwe ñan kajejjet aikuj ko an rũtto ro. Ej juon men emãlõtlõt ñan pukot wãween ko kien eo emaroñ jipañ ñan kabwe aikuj ko an rũtto ro.—Rom 13:6.

Jab Bõk L̦õmn̦ak eo an Ri Parisi Ro

Jijej ear kauweik skraib ro im Parisi ro kõnke rar ba ñan ro jineer im jemãer rejeram̦õl, ‘Eor ibba jet men ko i maroñ in jibañ kom̦ kake, ak men in ej an Anij.’ (Matu 15:5, UBS) Ilo raan ko an Jijej, ri Ju ro rar maroñ kajenolo̦k jet jããn ko ak men ko m̦weier me renaaj jabawõt kaki ilo tampel̦ eo. Bõtab ri Parisi ro rar ba bwe el̦aññe em̦õj an juon peek ippãn make bwe enaaj jabawõt kaki men kein, innem ejjab maroñ kajerbali ñan jabdewõt men. Rar ba bwe juon ej aikuj kõm̦m̦ane men in jekdo̦o̦n ñe emaroñ kar kajerbali ñan jipañ jemen im jinen ñe rej bwijwol̦ã.

Kũraij ear ba bwe l̦õmn̦ak in an ri Parisi ro ebõd kõnke ej idaaptõk ippãn unin an kar Anij kõm̦m̦ane kien eo kõn jabawõt. Ippãn Jijej, el̦apl̦o̦k an aorõk ñan an juon kautiej jemen im jinen jãn an l̦oor kien ko an armej. Ãindeinl̦o̦k wõt rainin, jet Kũrjin ro rej kajerbale mour eo aer ñan kõm̦m̦ane jerbal in kwal̦o̦k naan. Bõlen rar bõk jerbal in mejinede, pioneer, ak jerbal eo ñan itoitak im lol̦o̦k congregation ko. Ak ke rar kile bwe ro jemãer ak jineer rej aikuj jipañ, rej pukot kilen ñan jipañ er ke rej wõnm̦aanl̦o̦k wõt ilo jerbal eo aer. Bõtab ke rar lo bwe rejjab maroñ jipañ er ilo wãween in, rein rar jab jekpen im ba bwe el̦apl̦o̦k an aorõk jerbal eo aer jãn aer lale im kautiej jemãer im jineer. Jej aikuj nõbar rein kõn aer kõm̦m̦an oktak ko ilo mour eo aer bwe ren maroñ ineek eddo eo ñan lale baam̦le eo aer make.

Kõm̦m̦an Em̦m̦an ñan Aolep

Meñe Baibõl̦ eo ej ba bwe juon Kũrjin ej aikuj lale wõt aikuj ko an baam̦le eo an make, ak ejjab mel̦el̦ein bwe ejjab aikuj yokwe ro jet nukũn. Ewõr ro jet nukũd im jelukkuun epaake er! Baibõl̦ eo ej rõjañ kõj bwe jen kõm̦m̦an “em̦m̦an ñan armej otemjej.” (Galetia 6:10) El̦aññe juon iaan ro nukũm̦ ej aikuj jipañ im ekajoor peiom̦, innem kwõmaroñ jipañ e. Kwõjjab aikuj ‘kil bũruom̦ jãn e.’ Kwõmaroñ eñjake ak l̦õmn̦ak bwe ej juon men ejim̦we ñan am̦ jipañ e.—1 Jon 3:17.

Mekarta, eddo eo an juon Kũrjin ej ñan lale baam̦le eo an make. Wõn rein? Ej eo pãleen, ro nejin, jemen ak jinen, im jibwin ak jem̦aan. Kõn men in, m̦okta jãn an jipañ ro jet nukũn, enaaj aikuj lukkuun kõl̦mãnl̦o̦kjen̦ kõn ta ko remaroñ wal̦o̦k ñan baam̦le eo an make. Ej aikuj lale bwe an jipañ ro jet en jab jelõt eñjake ko an baam̦le eo an make, aikuj ko aer, ak ko̦kkure kõtaan eo aer ippãn Jeova.

El̦ap an em̦m̦an im jejjet naan in kakapilõk ko ilo Baibõl̦ eo ñan lale baam̦le eo ad make. Eo im ej jerbale naan in kakapilõk kein enaaj dikl̦o̦k an inepata kõn men ko ejjab aikuj inepata kaki. Bareinwõt enaaj jipañ e ñan jel̦ã likũt men ko raorõk m̦oktata ilo mour eo an. Ej kõm̦m̦ane men kein bwe en nõbar Jeova, ‘Jemed, Eo baam̦le otemjej i lañ im i lal̦ em̦õj n̦a etaer.’—Epesõs 3:14, 15.

[Pija ilo peij 18]

Ej eddo eo an ro jemen im jinen ñan kabwe aikuj ko an ro nejier