“Kom̦win Seperd Bwijin Anij”

“Kom̦win seperd bwijin Anij ej pãd ippemi, im lale e, jab ilo m̦akoko, a kõn ami kõn̦aan.”—1 PI. 5:2.

1. Etke Piter ear kõn̦aan kakajoor ri tõmak ro m̦õttan ke ear je lõta eo an kein kajuon?

 LLO Rom, m̦okta jãn an kar Irooj eo etan Nero jino matõrtõre Kũrjin ro ilo jikin in, rijjelõk Piter ear je lõta eo an kein kajuon. Piter ear kõn̦aan kakajoor ri tõmak ro m̦õttan. Etke? Kõnke ãinwõt juon laiõn, Tepil̦ eo ‘ear etetal’ im pukot eo ear maroñ in kañe. Bwe Kũrjin ro ren maroñ jutak pen n̦ae e, rar aikuj “ekil” im ‘kõttãik er ium̦win pein Anij e kajoor.’ (1 Pi. 5:6, 8) Bareinwõt rar aikuj dãpij aer bõrokuk ippãn doon. Rar aikuj kõjparok er jãn aer “kemetak dron im kokkure dron” kõnke remaroñ “kejebeblok dron.”—Ga. 5:15, UBS.

2, 3. Wõn eo jej tarin̦aeki, im ta ko jenaaj etali ilo katak in im ilo katak eo tok juon?

² Rainin, jej iion ejja wãween in wõt. Tepil̦ eo ej pukot kilen an ko̦kkure kõj. (Rev. 12:12) Bareinwõt, m̦õttan wõt jidik enaaj wõr juon eñtaan el̦ap, im “jorrãn eo enaj lab jen ko rar walok mokta jen jinoin lõl in.” (Matu 24:21, UBS) Ãinwõt Kũrjin ro ilo raan ko an Piter, kõj bareinwõt jej aikuj kõjparok kõj jãn ad akwããle doon. Jet iien, jej aikuj jipañ jãn elder ro ñan kõjparok kõj jãn men in.

³ Jenaaj etale ewi wãween elder ro remaroñ kal̦apl̦o̦k aer kaorõk jerbal eo aer ñan lale ro ‘bwijin Anij’ me kar likũt ippãer. (1 Pi. 5:2) Jenaaj bareinwõt etali wãween ko rekkar im rejim̦we ñan an elder ro kõm̦m̦ane jerbal in aer. Ilo katak eo tok juon, jenaaj etale ewi wãween ro ilo congregation eo remaroñ ‘kautiej ro rej tõl’ jerbal ko ilo congregation eo. (1 Te. 5:12, UBS) Ad etali men kein enaaj jipañ kõj ñan jutak pen n̦ae Setan, ri Kõjdat eo ad El̦ap, eo im jej tarin̦ae ippãn.—Ep. 6:12, UBS.

Seperd Bwijin Anij

4, 5. En kar ewi l̦õmn̦ak eo an elder ro kõn jiip ro? Jouj im kwal̦o̦k juon waanjoñak.

⁴ Piter ear rõjañ elder ro ilo raan ko an bwe ren bõk ejja l̦õmn̦ak eo an Anij kõn jiip ro nejin. (Riit 1 Piter 5:1, 2.) Piter ear to an pãd ilo m̦ool eo im elõñ eddo ko an ilo congregation eo. Bõtab, ear jab kõnnaan ñan elder ro jet ilo juon wãween me ej reilal̦l̦o̦k ñan er. Jãn men in, ear kõnono ñan er ãinwõt elder ro m̦õttan. (Ga. 2:9, UBS) Ãinwõt Piter, Kumi eo Ej Tõl Doulul eo an Jeova rainin ej rõjañ elder ro bwe ren lukkuun kate er kajejjet jerbal eo ñan lali jiip ro nejin Anij.

⁵ Piter ear jeje ñan elder ro ilo raan ko an bwe rar aikuj ‘seperd bwijin Anij.’ El̦ap an kar aorõk bwe elder ro ren kile bwe jiip ro ilo congregation eo rej nejin Jeova im Jijej Kũraij. Elder rein rar aikuj uwaak kõn wãween eo rar lale jiip ro nejin Anij. Ñan waanjoñak, bõlen juon m̦õttam̦ ear kajjitõk ippam̦ ñan lale ajri ro nejin kõnke ej aikuj etal ñan juon jikin. Ejjel̦o̦k pere bwe kwõnaaj kar kanooj lale er im naajdik er. El̦aññe juon iaan ajri ro ear nañinmej, kwõnaaj kar pukot kilen ñan jipañ e ak pukot juon taktõ el̦aññe ear aikuji. Ãindeinl̦o̦k wõt, elder ro rainin rej “shepherd ñõn eklesia eo an Anij, eo ear wiaik kin bõtõktõkin Nejin.” (Jrb. 20:28, UBS) Elder ro rej aikuj keememej bwe Anij ear wiaik kajjojo jiip ro kõn bõtõktõkin Jijej Kũraij. Innem kõnke renaaj aikuj uwaak ñan Anij, elder ro rej kate er ñan naajdik, kõjparok, im lali jiip ro nejin.

6. Ta jerbal ko an seperd ro ilo iien ko etto?

⁶ Jen m̦õk l̦õmn̦ak kõn jerbal ko an seperd ro ak ri lale jiip ro ilo iien ko etto. Ilo raan, rar  aikuj kijenmej im jerbal ium̦win det. Im ilo boñ, rar lale jiip ko meñe ear lukkuun molo. (Jen. 31:40, UBS) Rar bareinwõt likũt mour ko aer ilo kauwõtata bwe ren maroñ lo̦mo̦o̦ren jiip ko jãn menin mour ko rawia. Devid ear jerbal ãinwõt juon seperd ke ear juon l̦addik im ear lo̦mo̦o̦ren jiip ko jãn juon laiõn im juon pããr. Ikijjeen menin mour kein ruo, Devid ear ba bwe ear “jibwe an kwõdeak, im baite, im m̦an e.” (1 Sa. 17:35) El̦ap an kar Devid peran! Meñe emaroñ kar jorrããn, ak ear jab jenliklik jãn an lo̦mo̦o̦ren jiip ko.

7. Ewi wãween elder ro remaroñ lo̦mo̦o̦ren jiip ko jãn Setan?

⁷ Rainin, elder ro rej aikuj ekkõl wõt bwe ren kõjparok jiip ko jãn Tepil̦ eo. Bõlen renaaj aikuj peran im lo̦mo̦o̦ren jiip ko ak ro uwaan congregation eo jãn Setan, eo im ej ãinwõt juon laiõn. Ãinwõt an kar Devid jibwe kwõdeak eo an menin mour eo awiia im baiti, elder ro remaroñ kõm̦m̦ane men in ilo kõkkar ñan lo̦mo̦o̦ren juon iaan jiip ko jãn Setan. Rej kõm̦m̦ane men in ilo aer kõmel̦el̦e im kõmmaanwa ippãn ro ilo congregation eo im rej reel kõn menin kapo ko an Setan. (Riit Jud 22, 23.) Ñan aer maroñ lo tõprak ilo men in, elder ro rej aikuj jipañ jãn Jeova. Rej kwal̦o̦k yokwe ñe rej jipañ ro ilo congregation eo im rej ãinwõt jiip eo ekinejnej. Ilo kõkkar, rej korake kinej eo kinjen im kemoiki ikijjeen naan ko rekaenõm̦m̦an jãn Baibõl̦ eo.

8. Elder ro rej rõjañ ro ilo congregation eo ñan aer pãd ia? Im ewi wãween rej rõjañ er?

⁸ Seperd ro ilo iien ko etto rar bareinwõt tõl jiip ko ñan mel̦aaj ko reaiboojoj im jikin ko ewõr dãn ie bwe ren m̦õñã im idaak. Ãindein, elder ro rej rõjañ ro ilo congregation eo bwe ren keini aer pãd ilo kweilo̦k ko. Ilo wãween in, remaroñ bõk kakajoor jãn katak ko me kar litok ilo “iien em̦m̦an.” (Matu 24:45) Elder ro remaroñ aikuj el̦ap iien ñan aer jipañ im meanwõd ippãn ro rej m̦õjn̦o̦ ilo tõmak. Rej aikuj rõjañ er ñan kõtl̦o̦k bwe Naan in Anij en bar kakajoor er. Juon jiip ejebwãbwe emaroñ kajjioñ in jepl̦aak ñan congregation eo. Ijello̦kun an elder ro kaamijak e, ilo jouj rej kõmel̦el̦eik e kõn naan in kakapilõk ko ilo Baibõl̦. Bareinwõt rej kwal̦o̦k ñan e ewi wãween emaroñ jerbali eoon kein ilo mour eo an.

9, 10. Ewi wãween elder ro rej aikuj jipañ ro remõjino ilo tõmak?

⁹ Taktõ rot eo kokõn̦aan etal ippãn ñe kwõj nañinmej? Em̦m̦an ke ippam̦ taktõ eo me ejjab bõk an iien ñan roñjake eok im ej kajju lewõj wũno bwe kwõn m̦õkaj im etal? Ak em̦m̦an ke ippam̦ taktõ eo me ej lukkuun roñjake ta ko kwõj ba, ej kõmel̦el̦e kõn ta nañinmej eo am̦, im ej kwal̦o̦k ta men ko remaroñ jipañ eok?

¹⁰ Ãindeinl̦o̦k wõt, elder ro rej aikuj lukkuun roñjake eo im emõjino ilo tõmak. Ilo kõkkar, remaroñ jipañ kemoiki kinej eo kinjen ilo aer “kapit e kõn oil ilo etan [Jeova].” (Riit Jemes 5:14, 15.) Naan eo an Anij emaroñ jipañ im kaenõm̦m̦an eo emõjino ilo tõmak ãinwõt pinneep eo rar kajerbale ilo iien ko etto ñan eoeoki tõreren kinej ko. Pinneep in rar kajerbale ear jãn jikin eo etan Giliad. (Jer. 8:22; Ezk. 34:16) Ñe eo emõjino ilo tõmak ej jerbali naan in kakapilõk ko ilo Baibõl̦, enaaj maroñ kõm̦m̦an pepe ko me renaaj jipañ e ñan karejar ñan Jeova joñan wõt an maroñ. Innem, enaaj l̦ap an elder ro jipañ el̦aññe rej lukkuun roñjake eo emõjino ilo tõmak ke ej kwal̦o̦k inepata ko an im ilo aer jar ippãn.

Jab ilo M̦akoko, Ak En kõn Ami Kõn̦aan

11. Etke elder ro rej kõn̦aan seperde bwij eo bwijin Anij?

¹¹ Tokãlik, Piter ear kakeememej elder ro kõn wãween ko rekkar ñan aer lale congregation eo. Elder ro rej aikuj lale ro uwaan congregation eo ak seperde bwijin Anij ‘jab ilo m̦akoko, a kõn aer kõn̦aan.’ Etke elder ro rej kõn̦aan jipañ ro jeer im jatier? Eokwe, etke Piter ear seperde im naajdik jiip ro nejin Jijej? Kõnke ear yokwe Jijej. (Jon 21:15-17) Kõn ejja un in, elder ro rejjab “mour ñan er make, a  ñan eo ear mej im jerkakpeje kõn er.” (2 Ko. 5:14, 15) Kõnke elder ro rej yokwe Jeova, Jijej im ro jeer im jatier, rein rej kõn̦aan jipañ ro uwaan congregation eo. Rej kajerbal iien im maroñ ko aer ñan kõm̦m̦ane men in. (Matu 22:37-39) Rej jipañ lale bwij eo bwijin Anij jab ilo m̦akoko, ak kõn aer kõn̦aan.

12. Ewi joñan an kar Paul jipañ ro jein im jãtin?

¹² Ewi joñan an elder ro aikuj jipañ ro uwaan congregation eo? Ñan kõm̦m̦ane jerbal in aer, rej l̦oor joñak eo an rijjelõk Paul, eo im ear l̦oor joñak eo an Jijej. (1 Ko. 11:1) Kõn aer yokwe ro jeer im jatier ilo Tessalonika, Paul im ro jet m̦õttan rar kõn̦aan lel̦o̦k ñan er ‘jab Naan eo Em̦m̦an jãn Anij wõt, ak bareinwõt mour ko aer.’ Rej kõm̦m̦ane men in ilo jouj ãinwõt ‘juon jinen ejouj ñan ro nejin.’ (1 Te. 2:7, 8, UBS) Paul ear mel̦el̦e kõn yokwe eo an juon jinen ñan niñniñ eo nejin. Enaaj kar kõm̦m̦an jabdewõt men ñan jipañ niñniñ eo meñe ej aikuj jerkak in lukwõn boñ ñan kaninnin e.

13. Ta eddo ko ruo elder ro rej aikuj ineeki?

¹³ Elder ro rej aikuj lale bwe ren ineek eddo ko aer ilo congregation eo im ilo baam̦le ko aer bareinwõt. (1 Ti. 5:8) Ñe juon elder ej poub kõn jerbal ko ilo congregation eo, enaaj dikl̦o̦k an iien ippãn baam̦le eo an. Innem juon wãween emaroñ jipañ juon elder ñan ineek eddo kein an jim̦or ej ilo an kũrtok ro jet ñan iien katak Baibõl̦ eo an baam̦le eo an. Juon elder ilo Japan etan Masanao ear kũr ro ejjel̦o̦k pãleer im ro me jemãer rejjab pãd ilo m̦ool eo ñan iien katak Baibõl̦ eo an baam̦le eo an. Ear kõm̦m̦ane men in ium̦win elõñ iiõ ko. Ejjabto tokãlik, jet iaan ro ear kũrtok er rar erom elder im rar l̦oor joñak eo em̦m̦an an Masanao.

Jab kõn On̦ean Tal̦a, Ak kõn Ami Kon̦aan Jipañ

14, 15. Etke elder ro rej aikuj kõjparok er jãn aer jerbal “kõn on̦eãn tal̦a”? Ewi wãween remaroñ l̦oor joñak eo an Paul kõn men in?

¹⁴ Piter ear bareinwõt rõjañ elder ro bwe ren lale bwij eo bwijin Anij ‘jab kõn on̦eãn tal̦a, ak kõn aer kõn̦aan jipañ.’ Meñe el̦ap jerbal ko an elder ro, ak rejjab watõk bwe ro jet ren kõl̦l̦ã on̦aer. Piter ear aikuj kakkõl elder ro m̦õttan bwe ren jab lale bwij eo bwijjin Anij “kõn on̦eãn tal̦a.” Ri kaki in kabuñ ko an “Babilon El̦ap” rem̦weiie kõn an armej ro kõl̦l̦ã on̦aer meñe armej rein rejeramel. (Rev. 18:2, 3) Innem elukkuun aorõk bwe elder ro rainin ren kõjparok er bwe ren jab ãinwõt rein.

¹⁵ Paul ear likũt juon joñak em̦m̦an ñan elder ro. Meñe ear juon rijjelõk im emaroñ kar ãinwõt juon “eddo” ñan congregation eo ilo Tessalonika, ak ear jab “m̦õñã pilawã jãn jabdewõt armej im ejjel̦o̦k on̦ãn.” Paul ear “jerbal im eñtaan raan im boñ.” (2 Te. 3:8) Elõñ elder ro rainin, ekoba ro rej itoitak im lol̦o̦k congregation ko rej juon joñak em̦m̦an kõn men in. Meñe rej bõk jipañ jãn ri tõmak ro m̦õttaer, ak rejjab kõn̦aan bwe ren ãinwõt juon “eddo ñan jabdewõt.”—1 Te. 2:9.

16. Ewi wãween elder ro rej kwal̦o̦k bwe ‘rekõn̦aan’ lale bwij eo bwijjin Anij?

¹⁶ Elder ro rej lale bwij eo bwijjin Anij kõnke ‘rekõn̦aan’ kõm̦m̦ane men in. Rem̦õn̦õn̦õ in kaarmejjeteik kõn̦aan ko aer make bwe ren lale im jipañ ro uwaan congregation eo. Bõtab rejjab iuun ro ilo congregation eo bwe ren karejar ñan Jeova. Bareinwõt rejjab rõjañ er bwe ren jiãiik doon ilo aer karejar ñan Jeova. (Ga. 5:26, UBS) Elder ro remel̦el̦e bwe kajjojo iaan jiip ko reoktak jãn doon. Rekõn̦aan jipañ ro jeer im jatier bwe ren karejar ñan Jeova ilo m̦õn̦õn̦õ.

 Kõm̦m̦an Joñak Em̦m̦an ñan Bwij eo im Jab Irooj Ioon

17, 18. (a) Jet iien ear pen ñan an rijjelõk ro jerbali katak eo an Jijej kõn ettã bõro. Etke? (b) Ta eo jemaroñ katak jãn men eo ear wal̦o̦k ñan jet iaan rijjelõk ro?

¹⁷ Ãinwõt ad kar etale ilo katak in, elder ro rej aikuj keememej bwe ro uwaan congregation eo rej ãinwõt bwij eo bwijjin Anij. Rej kõjparok bwe ren jab ‘irooj ioon ro me em̦õj likũte n̦a ippãer.’ (Riit 1 Piter 5:3.) Jet iien rijjelõk ro an Jijej rar kõn̦aan bwe ren utiejl̦o̦k jãn ro jet. Men in ear juon l̦õmn̦ak ebõd. Rar kõn̦aan bwe armej ro ren reilo̦k ñan er ãinwõt irooj ro an aelõñ ko.—Riit Mark 10:42-45.

¹⁸ Rainin l̦õm̦aro me rekõn̦aan bõk jerbal in elder rej aikuj etale er make im lale etke rekõn̦aan bõk jerbal in. (1 Ti. 3:1) Ro im rej elder kiiõ remaroñ kajjitõkin er make el̦aññe ewõr ippãer kõn̦aan eo ñan irooj ioon ro jet ak bwe ren utiejl̦o̦k jãn ro jet ãinwõt kar jet rijjelõk ro. Kõnke rijjelõk ro rar likjab ilo men in, elder ro rej kile bwe rej aikuj kate er ñan kõjparok er jãn kõn̦aan eo ñan utiejl̦o̦k jãn ro jet.

19. Ta eo elder ro rej aikuj keememej ñe rej kauwe ro ilo congregation eo?

¹⁹ Bõtab jet iien elder ro rej aikuj lel̦o̦k naan in kauwe ko. Ñan waanjoñak, rej aikuj lel̦o̦k naan in kauwe ko ñan kõjparok bwij eo bwijjin Anij jãn ro im rej jum̦ae m̦ool eo. (Jrb. 20:28-30) Paul ear jiroñ Taitõs bwe en ‘kauwe kõn naan in kaiñi otemjej.’ (Tai. 2:15) Ak meñe elder ro rej kõm̦m̦ane men in, rej kwal̦o̦k kautiej ñan ro im rej kauwe er ak kajim̦weik er. Rej kile bwe reban jipañ rein el̦aññe rej kananaik im bũroñ er. Ak rej kõm̦m̦an joñak ko rem̦m̦an ñan er kõnke rej kile bwe ekkã an men in jipañ im lujur armej eo bwe en oktak im l̦oor ial̦ eo ejim̦we.

20. Ewi wãween elder ro remaroñ kajjioñe Jijej ñe rej kõm̦m̦an joñak ko rem̦m̦an?

²⁰ Joñak eo em̦m̦an an Jijej ej lujur elder ro bwe ren kwal̦o̦k yokwe ñan ro ilo congregation eo. (Jon 13:12-15) Ñe jej riit kõn wãween an kar Jijej katakin ri kal̦oor ro an ilo jerbal in kwal̦o̦k naan im kõm̦m̦an ri kal̦oor ro, men in el̦ap an jelõt bũruod. Joñak eo an kõn ettã bõro ej kam̦akũt ri kal̦oor ro an bwe ren  kajjioñ e ilo aer ‘ettã bũrueer im l̦õmn̦ak bwe ro jet rem̦m̦an jãn er.’ (Pil. 2:3) Elder ro rainin rekõn̦aan l̦oor joñak in an Jijej im kõm̦m̦an ‘joñak em̦m̦an ñan bwij eo.’

21. Ta jeraam̦m̦an ko elder ro remaroñ reim̦aanl̦o̦k ñani?

²¹ Ilo naan in kajem̦l̦o̦k ko an Piter ñan elder ro, ear kwal̦o̦k ñan er kõn kallim̦ur eo kõn ilju im jekl̦aj. (Riit 1 Piter 5:4.) Ri kabit ro im rej elder renaaj “bõk pãllin aiboojoj e jãmin mãjkun” ippãn Jijej ilañ. Elder ro im rej m̦õttan ‘jiip ro jet’ renaaj bõk jeraam̦m̦an eo ñan lale bwij eo bwijin Anij ioon lal̦ ium̦win irooj eo an seperd eo el̦ap. (Jon 10:16) Katak in tok juon enaaj kwal̦o̦k kõn wãween ko ro uwaan congregation eo remaroñ rejetake ro im kar jitõñ er ñan tõl congregation ko.

Ãlij

• Etke Piter ear kakapilõk elder ro m̦õttan bwe ren lale bwij eo bwijin Anij?

• Ewi wãween elder ro remaroñ jipañ ro rem̦õjn̦o̦ ilo tõmak?

• Etke elder ro rekõn̦aan seperde bwij eo bwjin Anij?

[Kajitõk ko ñan katak]

[Pija ilo peij 23]

Ãinwõt ri lale jiip ro ilo iien ko etto, elder ro rainin rej aikuj kõjparok ro uwaan congregation eo