“Kwõnaaj Jeraam̦m̦an”—Ewi Wãween?

“JERAAM̦M̦AN!” Jet armej ro rar pukot jerbal ko el̦ap on̦aer im kiiõ el̦ap aer jeraam̦m̦an im buñbuñ. Ak ro jet rar kõn̦aan jeraam̦m̦an, bõtab rar jab tõprak innem kiiõ rejerata.

Enañin aolep iien juon armej ejeraam̦m̦an kõnke ear lukkuun kate im jab m̦ad kõn men ko ejjel̦o̦k tokjãer. Juon emaroñ lo jeraam̦m̦an el̦aññe ej kajerbal iien ko im maroñ eo an ilo jim̦we im kate e ñan kõm̦m̦ane ijo kun̦aan.

Elõñ Kũrjin ro rej m̦õn̦õn̦õ kõnke rej poub ilo jerbal in kwal̦o̦k naan im pioneer. Rũtto ro kab jodrikdrik ro rej jeraam̦m̦an kõn aer peek bwe ren pioneer toõn wõt aer mour. Bõtab jet remaroñ ba bwe jerbal in kwal̦o̦k naan ejjab limo. Kõn men in, rej jibadek mejãnkajjik ko an lal̦ in ijello̦kun aer poub ilo jerbal in kwal̦o̦k naan. Etke ãindein? Ta eo kwõj aikuj kõm̦m̦ane bwe kwõn jab mel̦o̦kl̦o̦k men ko raorõktata? Ewi wãween kwõmaroñ lo “jeraam̦m̦an”?—Jos. 1:8.

M̦akũtkũt ko An Jikuul̦ im Men ko Ekkã Am̦ Kõn̦aan Kõm̦m̦ani

Jodrikdrik ro ilo m̦ool eo rej aikuj jel̦ã karõk iien ko aer bwe ren maroñ karejar ñan Jeova im bar kõm̦m̦ani men ko jet rekõn̦aan kõm̦m̦ani. Ro rej kõm̦m̦ane men in renaaj lo jeraam̦m̦an im jej aikuj nõbar er.

Bõtab jet jodrikdrik ro rej poub kõn m̦akũtkũt ko an jikuul̦ ak men ko rekõn̦aan kõm̦m̦ani. Meñe men kein remaroñ jab nana, ak jodrikdrik ro rej aikuj kajjitõkin er make: ‘Jete awa ko ij jul̦o̦ki ñan kõm̦m̦ani men kein? Kain armej rot ij kõm̦m̦ani men kein ippãer? Ta wãween ko renana an ro im rej kõm̦m̦ani men kein? Erkein ke men ko raorõktata ilo mour eo aõ?’ Ealikkar bwe el̦aññe juon ej poub wõt kõn men kein, emaroñ dikl̦o̦k an iien kepaake Anij im kõjparok jem̦jerã eo an ippãn. Eñin unin el̦ap an aorõk bwe jen kile im kaorõki men ko raorõktata ilo mour ko ad.—Ep. 5:15-17.

Jen lale bwebwenato eo an Wiktor. * Ej ba: “Ke ear 12 aõ iiõ, iar pãd ilo juon team in volleyball. Ãlikin jidik iien, iar wiini elõñ kein ko̦wiinin im men in nõbar ko. Imaroñ kar erom juon eo ebuñbuñ kõn aõ kar lukkuun jel̦ã volleyball.” Bõtab, Wiktor ear jino inepata kõnke ear kile bwe ear jab lukkuun epaake Jeova kõn an kar poub wõt kõn volleyball. Juon iien ke ear riit Baibõl̦, ear jino an kiki kõn an m̦õk. Ear dikl̦o̦k an m̦õn̦õn̦õ in kwal̦o̦k naan. Ej ba: “Iar lukkuun m̦õk kõnke iar poub wõt kõn volleyball. Im ejjabto tokãlik, ear dikl̦o̦k aõ kijejeto kõn jerbal ko ñan Jeova. Iar jab kal̦apl̦o̦k ijo kun̦aaõ ñan Jeova meñe ekar wõr aõ maroñ ñan kõm̦m̦ane men in.”

Ij Aikuj Ke College?

Juon Kũrjin ej aikuj kabwe aikuj ko an baam̦le eo an make. (1 Ti. 5:8) Bõtab juon ej aikuj ke college bwe en kõm̦m̦ane men in?

El̦aññe juon ej college, ta eo emaroñ wal̦o̦k ñan kõtaan eo an ippãn Jeova? Ewõr juon bwebwenato kõn juon armej ilo Baibõl̦ eo im emaroñ jipañ kõj ñan uwaake kajjitõk in.

Baruk ear juon ri jipañ ñan Jeremaia. Ekar wõr juon iien me Baruk ear jab watõk jerbal ko an ñan Jeova ãinwõt juon jeraam̦m̦an. Baruk ear kõn̦aan utiejl̦o̦k jãn ro jet. Jeova ear kile men in im ear kakkõl e ikijjeen Jeremaia  ke ear ba: ‘Kwõj pukot men ko rel̦ap ñan kwe. Kwõn jab pukoti.’—Jer. 45:5.

Ta “men ko rel̦ap” me Baruk ear pukoti? Bõlen ear kõn̦aan buñbuñ im̦aan mejen ri Ju ro. Ak bõlen ear kõn̦aan bwe en m̦weiie. Ilo iien in, Baruk ear mel̦o̦kl̦o̦k men ko raorõkl̦o̦k me remaroñ kar jipañ e ñan pãd wõt epaake Jeova. (Pil. 1:10) Bõtab, Baruk ear roñjake naan in kakkõl eo an Jeova. Kõn men in ear el̦l̦ã im mour ke ear jeepepl̦o̦k Jerusalem.—Jer. 43:6.

Ewõr juon men me jemaroñ katak jãn bwebwenato in. Ta in? Naan in kakapilõk ko me Anij ear lel̦o̦k ñan Baruk rar kwal̦o̦k bwe ekar wõr juon likjab ippãn. Ear pukot men ko rel̦ap ñan e make. Ilo raan kein, jet iien armej ro rej college kõnke rej l̦õmn̦ak bwe enaaj l̦apl̦o̦k tokjãer ak kõnke rũtto ro rekõn̦aan bwe ren college. Bõtab, el̦aññe ewõr am̦ maroñ ñan kabwe aikuj ko am̦ make kadede, m̦ool ke bwe kwõj aikuj college?

L̦õmn̦ak kõn bwebwenato eo an Grzegorz, eo im ej jerbal kõn computer ko. Ro im rej jerbal ippãn rar iuuni bwe en college ñan kal̦apl̦o̦k an jel̦ã kõn computer ko. Innem ear college, bõtab ear jabwe iien ñan an kõm̦m̦ane jerbal ko ñan Jeova. Ej ba: “Iar inepata aolep iien. Iar abõn̦õn̦õ im enana aõ mour kõnke iar jab maroñ kõm̦m̦ane men ko iar kõn̦aan kõm̦m̦ani ñan Jeova.”

Jerbal El̦e Jãn Joñan

Baibõl̦ eo ej rõjañ Kũrjin ro rem̦ool bwe ren kate er im m̦ool ilo jikin jerbal ko aer meñe rej juon bo̦o̦j ak rej juon ri jerbal. Rijjelõk Paul ear je: “Ilo men otemjej komij kõmmõni, komin kõmmõni kin aoleben buruõmi, einwõt ñe komij kõmmõne ñõn Iroij, im jab ñõn armij.” (Kol. 3:22, 23, UBS) Bõtab meñe eaorõk bwe jen kate kõj ilo jikin jerbal, ewõr juon men el̦apl̦o̦k an aorõk. Ta in? Ej jem̦jerã eo ad ippãn Ri Kõm̦anm̦an eo ad. (Ekl. 12:13) El̦aññe juon Kũrjin ej jerbal el̦e jãn joñan, emaroñ dikl̦o̦k an kaorõke jerbal ko an ñan Jeova.

Ñe juon ej jerbal el̦e jãn joñan, emaroñ lukkuun m̦õk im enaaj pen ñan an kõjparok jem̦jerã eo an ippãn Jeova. Bareinwõt, kõn an m̦õk, enaaj pen ñan an jipañ baam̦le eo an bwe ren karejar ñan Jeova. Kiiñ Solomon ear kile bwe enañin aolep iien, ejjel̦o̦k tokjãn an armej ro jerbal el̦e jãn joñan. El̦aññe juon Kũrjin el̦ap an poub ilo jikin jerbal eo an, emaroñ wõr an nañinmej im el̦ap an inepata. Joñan an kaorõk jikin jerbal eo an, emaroñ ãinwõt juon ri kam̦akoko. El̦aññe elukkuun m̦õk im nañinmej, emaroñ ke ‘m̦õn̦õn̦õ im lañlõñ kõn aolepen jerbal ko an’? (Ekl. 3:12, 13; 4:6) Im kõn an m̦õk ãnbwinin im kõmãlij eo an, emaroñ ke kõm̦m̦ane ijo kun̦aan ilo baam̦le eo an im bõk kun̦aan ilo jerbal ko ñan Jeova?

 Janusz ej jokwe ilo Europe. Ear kajutak juon an peejnej im ear kanooj poub kake. Ej ba: “Armej ro an lal̦ in rar nõbar eõ kõnke iar kate eõ im tiljek ilo aõ jerbal. Bõtab, ear m̦õjn̦o̦l̦o̦k jem̦jerã eo aõ ippãn Jeova. Iar bõjrak jãn aõ kwal̦o̦k naan im kweilo̦k. Joñan an utiej bũruõ iar kõjekdo̦o̦n jipañ ko jãn elder ro im iar ettol̦o̦k jãn congregation eo.”   

Kwõmaroñ M̦õn̦õn̦õ im Lo Jeraam̦m̦an

Em̦õj ad etali jilu men ko me remaroñ ko̦kkure jem̦jerã eo ad ippãn Jeova. Kwõj ke po ilo juon iaaer? El̦aññe kwõj ba aet, elõñ jet kajjitõk ko, eoon ko im kõmel̦el̦e ko me remaroñ jipañ eok ñan kile el̦aññe em̦ool am̦ jeraam̦m̦an.

M̦akũtkũt ko an jikuul̦ im men ko ekkã am̦ kõn̦aan kõm̦m̦ani: Ewi joñan am̦ poub kõn  men kein? Kwõj ke kajerbal iien ko me kwõn kar kajerbali ñan am̦ karejar ñan Jeova? Edikl̦o̦k ke am̦ m̦õn̦õn̦õ in kõm̦m̦ao ippãn ri tõmak ro m̦õttam̦? El̦aññe kwõj ba aet, jouj im kajjioñe Kiiñ Devid ke ear eoware Jeova im ba: “Kwõn kõm̦m̦an bwe in jel̦ã ial̦ eo em̦m̦an in etal ilowaan.”—Sam 143:8.

Juon elder me ej itoitak ear jipañ Wiktor ke ear ba: “Ãinwõt el̦ap am̦ m̦õn̦õn̦õ in kõnono kõn am̦ volleyball.” Wiktor ear ba, “Iar lukkuun l̦õmn̦ak kõn naan kein an. Iar kile bwe iar jol̦o̦k ekanooj l̦ap iien ilo aõ volleyball. Ejjabto tokãlik, iar bõjrak jãn aõ aetõl ro m̦õtta im rejjab karejar ñan Jeova. Innem iar kobal̦o̦k ippãn ro doon Jeova im m̦õttaik er.” Rainin, Wiktor ej niknik ilo an karejar ñan Jeova. Wiktor ej bar rõjañ ro jet im ba: “Kajjitõk ippãn ro m̦õttam̦, jemam̦ im jinõm̦ ak elder ro ilo congregation eo el̦aññe rej l̦õmn̦ak bwe m̦akũtkũt ko an jikuul̦ rej jipañ eok ñan ruwaakl̦o̦k ñan Jeova ak jaab.”

Kwõmaroñ ba ñan elder ro ilo congregation eo am̦ bwe kokõn̦aan kal̦apl̦o̦k ijo kun̦aam̦ ilo jerbal ko ñan Jeova. Kwõmaroñ ke jipañ ro im rebwijwol̦ã ilo congregation eo ak bwebwenato im jol̦o̦k iien ippãer? Kwõmaroñ ke jipañ er kaikujkuj ak jipañ er kõn jet jerbal ko ilo m̦oko im̦wier? Bõlen kwõmaroñ jerbal in pioneer im kwal̦o̦k naan ñan ro jet.

College: Jijej ear kakkõl armej ro bwe ren jab kõn̦aan utiejl̦o̦k jãn ro jet. (Jon 7:18) Kwõj aikuj kõm̦m̦an pepe eo am̦ make el̦aññe kwõnaaj college ak jaab. Bõtab, ilo am̦ kõm̦m̦ane pepe in am̦, jouj im jab mel̦o̦kl̦o̦k kõn men ko rem̦m̦an ak raorõkl̦o̦k.—Pil. 1:9, 10.

Grzegorz, eo im ej jerbal kõn computer ko ear kõm̦m̦an jet oktak ko ilo mour eo an. Ear ba: “Elder ro rar letok naan in rõjañ ko im iar l̦oori. Iar kõm̦m̦an oktak ko ilo mour eo aõ im kajerbal jããn ko aõ ilo mãlõtlõt. Iar kile bwe iar jab aikuj wõnm̦aanl̦o̦k im college. Enaaj kar ko̦kkure aolepen iien ko aõ im kam̦õk eõ.” Grzegorz ear kal̦apl̦o̦k ijo kun̦aan ilo jerbal ko ilo congregation eo. Tokãlik ear kadiwõjl̦o̦k jãn Jikuul̦ in Baibõl̦ eo ñan L̦õm̦aro im Ejjel̦o̦k Pãleer. Em̦m̦an bwe ear ‘wiaik iien’ bwe en kal̦apl̦o̦k an jel̦ã kajjien Jeova.—Ep. 5:16.

Jikin Jerbal: Kwõj ke jerbal el̦e jãn joñan im kiiõ edikl̦o̦k am̦ iien ñan Jeova? Ebwe ke iien ñan am̦ kõm̦m̦ao im bwebwenato ippãn baam̦le eo am̦? Kwõj ke kate eok im kakõm̦anm̦anl̦o̦k katak ko am̦ ilo iien kweilo̦k ko? Ñe kwõj bwebwenato ippãn ro jet, kwõj ke kakajoor er? “Kwõn mijak Anij, im pokake kien ko An” im kwõnaaj lo jeraam̦m̦an ko jãn Jeova im ‘m̦õn̦õn̦õ kõn jerbal eo am̦.’—Ekl. 2:24; 12:13.

Janusz ear jab lo tõprak im jeraam̦m̦an ilo peejnej eo ear kajutake. Ear l̦ap an m̦uri im ejjel̦o̦k an jããn. Ear kajjitõk jipañ ippãn Jeova. Ear kõm̦m̦an oktak ko ilo mour eo an im kiiõ ej jerbal in pioneer im ej juon elder ilo congregation eo an. Ej ba: “Ñe ij jokwane kõn men ko ewõr ippa im kamaat aõ maroñ ilo jerbal ko ñan Jeova, em̦m̦an l̦õmn̦ak ko aõ im eaenõm̦m̦an bũruõ.”—Pil. 4:6, 7. 

Jouj im jijet ippam̦ make im jol̦o̦k iien bwe kwõn maroñ etali unin am̦ kõn̦aan kõm̦m̦ani men kein. Kwõn bar l̦õmn̦ak kõn men ko el̦ap am̦ kaorõki kiiõ. Am̦ karejar ñan Jeova enaaj kõm̦m̦an bwe kwõn m̦õn̦õn̦õ im lo jeraam̦m̦an. Kwõn kõm̦m̦an bwe am̦ karejar ñan Jeova en men eo eaorõktata ilo mour eo am̦.

Ñan am̦ kõm̦m̦ane men in, kwõmaroñ aikuj kõm̦m̦an oktak ko im kajim̦we ko ilo mour eo am̦. Bõlen kwõnaaj aikuj jol̦o̦k men ko im edik tokjãer bwe kwõn kam̦ool ñan kwe make “ta ankilaan Anij.” (Rom 12:2) Men in emaroñ pen, bõtab kwõnaaj lo “jeraam̦m̦an” ilo am̦ karejar ñan Anij kõn aolepen bũruom̦.

[Kamelele eo Itulal]

[Box/Pija ilo peij 31]

Ewi Wãween Kwõmaroñ Lo Jeraam̦m̦an?

Ilo lal̦ in, elukkuun lõñ men ko rej kam̦ad kõj im ejjel̦o̦k tokjãer. Ta eo jemaroñ kõm̦m̦ane bwe jen jab m̦ad ilo men kein? Jouj im jijet ippam̦ make im l̦õmn̦ak kõn unin am̦ kõn̦aan kõm̦m̦ane men kein im kõn men ko raorõktata ilo mour eo am̦. Kwõmaroñ kajerbali kajjitõk kein ilal̦ ilo am̦ kõm̦m̦ane men in:

M̦AKŨTKŨT KO AN JIKUUL̦ IM MEN KO EKKÃ AM̦ KÕN̦AAN KÕM̦M̦ANI

▪ Ta wãween ko renana an ro im rej kõm̦m̦ani men kein?

▪ Jete awa ko kwõj jol̦o̦ki ñan kõm̦m̦ani men kein?

▪ Erkein ke men ko raorõktata ilo mour eo am̦?

▪ Men kein rej ke ko̦kkure iien ko am̦ ñan Jeova?

▪ Kain armej rot kwõj kõm̦m̦ani men kein ippãer?

▪ El̦apl̦o̦k ke am̦ m̦õn̦õn̦õ in kõm̦m̦ao ippãer jãn ri tõmak ro m̦õttam̦?

COLLEGE

▪ El̦aññe kwõmaroñ kabwe aikuj ko am̦ make kadede, kwõj aikuj ke college?

▪ Ñe ejjel̦o̦k am̦ tiikri, kwoban ellolo am̦ jerbal. M̦ool ke men in?

▪ El̦aññe kwõj college, kwõnaaj ke ekkeini aolep iien kweilo̦k ko?

▪ Em̦õj ke am̦ kile im kaorõki ‘men ko raorõktata’?

▪ Kwõj aikuj ke kal̦apl̦o̦k am̦ lõke bwe Jeova enaaj jipañ eok ñan kabwe aikuj ko am̦?

JIKIN JERBAL

▪ Jikin jerbal eo am̦ ej ke bõk el̦ap iien ko am̦ im kõm̦m̦an bwe kwõn jab m̦õn̦õn̦õ?

▪ Ãlikin am̦ jerbal, kwõj ke ineek eddo ko am̦ ilo baam̦le eo im bõk kun̦aam̦ ilo jerbal ko ñan Jeova? Ewõr ke am̦ iien im maroñ ñan kõm̦m̦ani men kein?

▪ Ewõr ke iien am̦ kõm̦m̦ao im bwebwenato ippãn eo pãleem̦ im ajri ro nejõm̦?

▪ Edikl̦o̦k ke am̦ iien ñan Jeova kõn am̦ jerbal el̦e jãn joñan ilo jikin jerbal?

▪ Edikl̦o̦k ke am̦ iien ñan kõm̦m̦ani katak ko am̦ ilo kweilo̦k ko?

[Pija ilo peij 30]

Jeova ear kakkõl Baruk bwe en jab kõn̦aan utiejl̦o̦k jãn ro jet