Jen Jõjõik Men ko Renana

JEOVA ej juon Anij ekwõjarjar im erreo. Ilo Baibõl̦ eo, Jeova ej “Ri Kwõjarjar in Israel,” kõn men in ear kakien ri Israel ro bwe ren bar erreo. (Sam 89:18) Ear ba ñan ri Israel ro: “Kom̦win kwõjarjar bwe Ña I kwõjarjar.” (Livitikõs 11:45) Jabdewõt eo ear kõn̦aan jerbal ñan Jeova ear aikuj “erreo ilo kõmmõn ko an im ilo lemnak ko an.” (Sam 24:3, 4, UBS) Ta mel̦el̦ein men in? Jej aikuj kõjparok kõj jãn “men ko re nana” im jõjõiki.—Jabõn Kõnnaan 8:13.

Jeova ear lel̦o̦k kien ko ralikkar ñan ri Israel ro bwe ren maroñ kile men ko renana innem kõjparok er jãni. (Rom 7:7, 12) Kien kein rar bareinwõt jipañ armej ro bwe ren mour ilo jim̦we im erreo. Kien kein rar kalikkar elõñ men ko rejakkar im remaroñ ko̦kkure kõtaan eo aer ippãn Jeova. Ãinwõt ta? Lejen ak bar ellolo, em̦m̦aan ñan em̦m̦aan im kõrã ñan kõrã rej lo doon, mour in kõpa im armej ro rej pãd ippãn menin mour ko. (Livitikõs 18:23; 20:10-17) Jabdewõt armej ro rar kõm̦m̦ane men kein rar m̦an er ñan mej.

Jeova ear bar lel̦o̦k kien ko kõn mour erreo ñan ri kabit ro ilo jinoin. (Galetia 6:16) Er bareinwõt rar aikuj ‘jõjõik men ko renana.’ (Rom 12:9) Rar aikuj bar l̦oore naan kein an Jeova kar ñan ri Israel ro: “Kom̦win kwõjarjar, bwe Ña I kwõjarjar.” (1 Piter 1:15, 16) Rar aikuj kõjparok er jãn lejen, mour in kõpa, pãd ippãn menin mour ko im mour eo me l̦õm̦aro rej pãleek doon im lim̦aro rej pãleek doon. Men kein remaroñ kattone congregation eo. Ro rar jab kõn̦aan bõjrak jãn men kein rejakkar im rettoon reban jolete Aelõñ eo an Anij. (Rom 1:26, 27; 2:22; 1 Korint 6:9, 10; Hibru 13:4) Aolep ro uwaan jar eo el̦ap ilo raan kein ãliktata rej aikuj bar l̦oore kien kein an Jeova. (2 Timote 3:1; Jon 10:16) Tokjãn men in, ri kabit ro im jar eo el̦ap rej ejaake juon jarin armej ro rerreo. Eñin unin remaroñ bõke ãt in etaer ãinwõt Ri Kõnnaan ro an Jeova.—Aiseia 43:10.

Kõjparok bwe Congregation eo En Erreo Wõt

Armej ro ilo lal̦ in rainin rej kõm̦m̦ani aolep men kein rettoon im rejakkar. Armej ro doon Anij rej oktak. Bõtab, rejjab aikuj mel̦o̦kl̦o̦k bwe elõñ iaaer rar kõm̦m̦ani men kein m̦okta jãn aer kar jel̦ã kõn Jeova. Kõnke rar jab jel̦ã kõn Jeova, elõñ uwaaer rar l̦oore kõn̦aan ko aer renana im ‘mour ko aer rar awia im nana.’ (1 Piter 4:4, UBS) Ke Paul ear kwal̦o̦k kõn men kein rejakkar me armej ro rej kõm̦m̦ani, ear jiroñl̦o̦k jet iaan ri tõmak ro m̦õttan im ba: ‘Jet iaami kar ãierwõt, a em̦õj kwal̦e kom̦, a em̦õj kokwõjarjar kom̦, a em̦õj kowãnok kom̦ ilo etan Irooj Jijej Kũraij, im ilo kajoor an ad Anij.’—1 Korint 6:11.

Naan kein an Paul relukkuun kakajoor kõj. Meñe ear nana men ko armej eo ear kõm̦m̦ani m̦okta, emaroñ ukel̦o̦k ãlikin an m̦ool eo tõpar bũruon. Im ej jerbale tõmak eo an im ej ajel̦o̦k mour eo an ñan Jeova Anij. Jãn iien in m̦aanl̦o̦k, ej erreo im̦aan mejen Jeova. (Hibru 9:14) Jeova em̦õj an jeorl̦o̦k bõd ko an m̦okta, innem armej in ej ‘kate bwe en tõpar men ko rej pãd im̦aan.’ *—Pilippai 3:13, 14, UBS; Rom 4:7, 8.

 Jeova ear jol̦o̦k bõd ko an Devid ke ear m̦ane juon em̦m̦aan ejjel̦o̦k ruõn im kõn an kar l̦õñ ippãn Bat-Shiba. Im ear bar jol̦o̦k bõd ko an Menassa kõn an kar kabuñ ñan ekjab ko im l̦ap an kar uror. (2 Samuel 12:9, 13; 2 Kronikel 33:2-6, 10-13) Jej kam̦m̦oolol Jeova kõnke ej pojak in jol̦o̦k bõd ko ad el̦aññe jej kepaake ilo ettã im ej m̦ool ad ukel̦o̦k. Bõtab meñe Jeova ear jol̦o̦k bõd ko an Devid im Menassa, l̦õm̦arein ruo rar m̦adm̦õde leen kõm̦m̦an ko aerro. (2 Samuel 12:11, 12; Jeremaia 15:3-5) Ilo ejja wãween in wõt, meñe Jeova ej jol̦o̦k bõd ko an armej ro, armej rein renaaj baj m̦adm̦õde wõt leen kõm̦m̦an ko aer.

Jeban El̦l̦ã jãn Leen Kõm̦m̦an Ko

Ñan waanjoñak, juon em̦m̦aan ear kijoñ mour eo an ear bõk nañinmej in AIDS ak nañinmej in jiroñ im likao. Tokãlik, ear katak kõn m̦ool eo im ajel̦o̦k mour eo an ñan Jeova im peptaij. Kiiõ em̦õj an ejaake juon jem̦jerã ippãn Jeova, bõtab nañinmej in AIDS eo ej pãd wõt ippãn. Bõlen tokãlik, l̦ein emaroñ mej jãn nañinmej in an. Ekabũrom̦õjm̦õj ak ej m̦adm̦õde kar kõm̦m̦an ko an m̦okta. Ñan rainin, elõñ rej m̦adm̦õd wõt jãn kõm̦m̦an ko aer m̦okta. Meñe elõñ iiõ remootl̦o̦k jãn ke rar peptaij, bõlen ilo aolepen mour eo aer ilo jukjuk im pãd in renaaj tarin̦aeki kõn̦aan ko relukkuun kajoor rar kõm̦m̦ani ilo mour eo aer kar m̦okta. Bõtab kõn jipañ eo jãn Jeova, elõñ iaan rein rej maroñ jum̦ae im anjo̦ ioon kõn̦aan kein. Meñe ãindein, rej aikuj kate wõt er iien otemjej ñan tarin̦aeki kõn̦aan kein rejakkar.—Galetia 5:16, 17.

Armej rein rejjab jerawiwi el̦aññe rejjab kõm̦m̦ane ak jerbale kõn̦aan kein rejakkar. Bõtab, el̦aññe er em̦m̦aan, enaaj juon menin mãlõtlõt bwe ren jab jibadek eddo ko rel̦ap ilo congregation eo ilo iien in rej kajjioñ tarin̦aeki kõn̦aan kein rejakkar. (1 Timote 3:1) Etke? Kõnke jerbal ko an elder ro relukkuun aorõk im el̦ap an ro ilo congregation eo lõke er. (Aiseia 32:1, 2; Hibru 13:17) Rej kile bwe ro ilo congregation eo rej kepaake elder ro ikijjeen elõñ wãween ko ñan bõk jipañ. Ejjab juon men emãlõtlõt im ekkar bwe juon em̦m̦aan eo me ej tarin̦aeki kõn̦aan ko rejakkar en jibadek jerbal im eddo kein relukkuun aorõk.—Jabõn Kõnnaan. 14:16; Jon 15:12, 13; Rom 12:1.

El̦aññe juon em̦m̦aan ekõn ko̦kkure ajri ro m̦okta jãn an kar peptaij, ebar wõr juon men me emaroñ wal̦o̦k ñan e. Ke ear katak m̦ool eo, ear ukel̦o̦k im ukot mour eo an.Ejjab bar kõm̦m̦ane jerawiwi in ãlikin an kar erom juon Kũrjin. Tokãlik emaroñ lukkuun kate im kõn̦aan in ejakkar emaroñ lukkuun jako jãn e. Ta el̦aññe ekõn̦aan jibadek eddo ko rel̦ap ilo congregation eo? Ilo bukwõn eo ej jokwe ie, armej ro remaroñ jel̦ã bwe em̦m̦aan in ekõn ko̦kkure ajri ro ilo jinoin. Ilo wãween in, jemaroñ ke ba bwe ‘ejjel̦o̦k n̦otaan im em̦m̦an etan ippãn armej ro’ rejjab pãd ilo congregation eo? (1 Timote 3:1-7, 10, UBS; Taitõs 1:7) Uwaak eo ej jaab. Ejakkar bwe l̦ein en bõk eddo ko rel̦ap ilo congregation eo.

El̦aññe Juon eo Em̦õj an Peptaij Ej Jerawiwi

Jeova ej mel̦el̦e bwe kõj armej im meñe em̦õj ad peptaij, jet iien jemaroñ jirilo̦k im  kõm̦m̦ani men ko rejakkar. Rijjelõk Jon ear jejel̦o̦k ñan ri tõmak ro m̦õttan im ba: “Ij jejewoj men kein ñõn kom, bwe komin jab jerawiwi. Im elañe jabrewõt armij ej jerawiwi, juõn ar dri jojomar iben Jemed, Jesus Christ dru wãnik: Bwe Christ make ej ial in jeorlok jerawiwi ko ad, im jab jerawiwi ko ad wõt, ak bareinwõt jerawiwi ko an armij otemjej.” (1 Jon 2:1, 2, UBS) Ikijjeen Jijej, Jeova ej jol̦o̦k bõd ko an ro doon el̦aññe ej m̦ool bũrueer im rej bõjrak jãn kõm̦m̦an ko aer rebõd.

Ewõr juon waanjoñak kõn men in im ear wal̦o̦k ilo kar congregation eo ilo Korint ilo iien ko etto. Rijjelõk Paul ear roñ bwe juon em̦m̦aan ear kõpa ippãn lio pãleen jemen. Paul ear jiroñ elder ro bwe ren bukwel̦o̦k l̦ein jãn congregation eo. Tokãlik, l̦ein ear ukel̦o̦k jãn men eo ear kõm̦m̦ane, im Paul ear rõjañ elder ro bwe ren bar kajepl̦aak l̦ein ñan loan congregation eo. (1 Korint 5:1, 13; 2 Korint 2:5-9) Kõn wõt jouj eo el̦ap an Jeova im kõn men eo Jijej ear kõm̦m̦ane, kar maroñ karreoik l̦ein jãn jerawiwi ko an. Ãindein ilo raan kein ad. Bõtab, meñe Jeova enaaj jol̦o̦k bõd ko an armej ro doon jãn jerawiwi ko aer, jet iien renaaj m̦adm̦õd wõt leen kõm̦m̦an ko aer.—Jabõn Kõnnaan. 10:16, 17; Galetia 6:7.

Ñan waanjoñak, el̦aññe juon jiroñ eo em̦õj an peptaij ear l̦õñ, emaroñ ukel̦o̦k jãn bõd in ear kõm̦m̦ane im ej bõk el̦ap jipañ jãn elder ro. Ak ta el̦aññe enaaj bõro̦ro kõn an kar mour in l̦õñ? Ealikkar bwe jiroñ in enaaj m̦adm̦õde kõm̦m̦an ko an kar m̦okta. Ak ñe juon em̦m̦aan ear ellolo jãn lio pãleen im tokãlik ear ukel̦o̦k im bõjrak jãn men in, remaroñ jab bukwel̦o̦k e. Bõtab ekkar ñan Baibõl̦ eo, kõrã eo pãleen ewõr an maroñ kiiõ im ej an pepe ñan jepel jãn e. (Matu 19:9) El̦aññe kõrã eo enaaj jepel jãn e, innem l̦ein ej m̦adm̦õde leen jerawiwi eo ear kõm̦m̦ane meñe em̦õj an Jeova jol̦o̦k an bõd.—1 Jon 1:9.   

Ak ta el̦aññe juon em̦m̦aan ejjab tũriam̦o kõn lio pãleen im ej jepel jãn e kõnke ekõn̦aan bar m̦areiki juon kõrã? Bõlen tokãlik l̦ein enaaj ukel̦o̦k im renaaj bar kajepl̦aake ñan congregation eo. Ãlikin jet iiõ ko ej kõm̦m̦an el̦ap wõnm̦aanl̦o̦k ko im kõtaan eo an ippãn Jeova ej kajoorl̦o̦k. (Hibru 6:1, UBS) Bõtab toõn wõt an ejjel̦o̦k pãleen kõrã eo kar m̦okta, ejakkar bwe l̦ein en bõk eddo ko rel̦ap ilo congregation eo. Etke? Kõnke ejjel̦o̦k un ko rem̦m̦an unin an kar ilo̦k jãn kar kõrã eo m̦okta. Innem, ejjab ‘juon wõt pãleen.’—1 Timote 3:2, 12.

Waanjoñak kein rejjab ke kalikkar unin an ro doon Anij aikuj ejaake juon eñjake eo ekajoor ñan kitõtõkake men ko renana?

Ta kõn Eo im Ej Ko̦kkure Juon Ajri?

Ak ta el̦aññe juon rũtto eo em̦õj an kar peptaij ej ko̦kkure juon ajri? Joñan an nana men in ear kõm̦m̦ane, Anij emaroñ ke jol̦o̦k an bõd? Eokwe, ej pepe eo an Jeova. Jijej ear ba bwe ‘jerawiwi n̦ae kajoor eo an Anij’ ejjel̦o̦k jol̦o̦k bõd. Im Paul ear ba bwe Jeova ejjab jol̦o̦k bõd ko an ro rej jel̦ã m̦ool eo ak rej wõnm̦aanl̦o̦k wõt im kõm̦m̦an jerawiwi. (Luk 12:10, UBS; Hibru 10:26, 27, UBS) Bõtab ejjel̦o̦k eoon ilo Baibõl̦ eo ej ba bwe Jeova eban jol̦o̦k bõd ko an juon armej eo im ear ko̦kkure juon ajri. Ilo m̦ool, el̦aññe armej eo ej ukel̦o̦k kõn aolepen bũruon im bõjrak jãn men eo enana ear kõm̦m̦ane, Jeova emaroñ jol̦o̦k an bõd. Mekarta, enaaj aikuj in kate wõt ñan tarin̦aek kõn̦aan kein rejakkar me ear make ejaaki. (Epesõs 1:7, UBS) Bareinwõt, meñe em̦õj an armej in ukel̦o̦k, ewõr jet wãween ko me renaaj wal̦o̦k ñan e im rej itok wõt jãn an kar m̦anit rot in.

Armej in enaaj aikuj bõk kaje ekkar ñan kien ko an aelõñ eo ej jokwe ie. Bõlen emaroñ kalbuuj ak bõk jet kaje jãn kien kõn an kar ko̦kkure ajri eo. Congregation eo eban kõjparok e ak jipañ e bwe en jab bõk kaje kein. Bareinwõt, elder ro ilo congregation eo renaaj aikuj jerbal ippãn armej eo im ear jerawiwi.  El̦aññe armej in ej m̦ool ilo an ukel̦o̦k, elder ro renaaj rõjañ e bwe en wõnm̦aanl̦o̦k im kakajoorl̦o̦k jem̦jerã eo an ippãn Jeova. Remaroñ rõjañ e bwe en bõk kun̦aan ilo kwal̦o̦k naan. Bõlen renaaj lel̦o̦k ñan e jet katak ko ilo Jikuul̦ in Kwal̦o̦k Naan im katak ko redik ilo kweilo̦k in Ad Jerbal ñan Aelõñ eo. Meñe enaaj ãindein, armej in eban ekkar ñan an bõk eddo ko rel̦ap ak erom juon elder ak ministerial servant ilo congregation eo. Etke? Eokwe jen etale jet naan in kakapilõk ko jãn Baibõl̦ eo.

Kein kajuon, juon elder ej aikuj ‘jel̦ã irooj ioon kõn̦aan ko an make.’ (Taitõs 1:8, UBS) Em̦ool bwe kõj aolep jejjab weeppãn im jet iien jej m̦õjn̦o̦ jãn kõn̦aan ko ad. (Rom 7:21-25) Bõtab, juon Kũrjin eo me ej ko̦kkure ajri ro ej kwal̦o̦k juon kõn̦aan me ejakkar im elukkuun kajjõjõ. Em̦õj ad kile bwe ekkã aer bar ko̦kkure ajri ro jet. Ilo m̦ool, jet rej ko̦kkure ajri ro elõñ alen. Bareinwõt, elder ro ilo congregation eo rejjab maroñ lo ta ko rej wal̦o̦k ilo bũruon armej ro bwe ren kile wõn ro renaaj bar ãliji m̦anit in ejakkar. (Jeremaia 17:9) Kõn men in, naan in kakapilõk eo an Paul ñan Timote ej bar jerbal ñan elder ro ilo wãween aer jerbal ippãn rũtto ro me rar ko̦kkure ajri ro. Paul ear ba: “Kwon jab mõkaj in kabit jabdrewõt ñõn jerbal an Iroij. Kwon jab kobalok ibben ro jet rej kõmmõn jerawiwi, ak kwon kejbarok bwe kwon erreo.” (1 Timote 5:22, UBS) Kõnke jekõn̦aan kõjparok ajri ro nejid, juon em̦m̦aan eo im ear ko̦kkure ajri ro eban ekkar ñan an bõke eddo ko rel̦ap ãinwõt juon elder ak ministerial servant. L̦ein ejjab maroñ bar erom juon pioneer ak kõm̦m̦ane jerbal ko jet rel̦ap an doulul in.—Jouj im lale Exodus 21:28, 29.

Jet remaroñ kajjitõk, ‘Ak ta kõn armej ro me rar kõm̦m̦ani jerawiwi ko jet innem ukel̦o̦k, innem tokãlik rej bar kõm̦m̦ane ejja bõd eo wõt?’ Ilo m̦ool, em̦õj an men in wal̦o̦k bõtab eoktak men in jãn jerawiwi eo ñe juon armej ej ko̦kkure juon ajri. Ewi wãween? Eokwe ñan waanjoñak, ñe ruo rũtto rej l̦õñ, ewõr aerro kar maroñ in kar kabõjrak men in jãn an kar wal̦o̦k. Bõtab, emaroñ oktak ippãn ajri ro. Etke? Kõnke epidodo ñan m̦on̦e ajri ro, kapok l̦õmn̦ak ko aer im kaamijak er bwe ren kõm̦m̦ane men ko rejjab kõn̦aan kõm̦m̦ani. Ajri ro remaroñ jab jel̦ã ta eo rũtto eo ej kõm̦m̦ane ñan er. Baibõl̦ eo ej ba bwe ejabwe jel̦ãl̦o̦kjen̦ ippãn ajri ro. (Jabõn Kõnnaan 22:15; 1 Korint 13:11) Jijej ear kajerbale ajri ro ñan kõm̦m̦ane juon waanjoñak bwe el̦ap aer ettã bõro im rejaje kõn men ko renana. (Matu 18:4; Luk 18:16, 17) Rejjab jel̦ã kõn men ko renana im elukkuun ejjel̦o̦k aer imminene kõn mour. Enañin aolep ajri ro epidodo aer epaake bar juon im lõke, eñin unin epidodo an juon eo erũtto m̦on̦e juon ajri bwe en ko̦kkure. Kõn men in, ej an congregation eo eddo jãn Jeova ñan lale im kõjparok ajri ro.

Juon ajri em̦m̦an aer katakin e, elukkuun jel̦ã kwal̦o̦k kautiej im pokake jemen im jinen, elder ro im rũtto ro jet. (Epesõs 6:1, 2; 1 Timote 5:1, 2; Hibru 13:7) Bõtab, ej juon men ebõd im kajjõjõ el̦aññe juon iaan rein enaaj m̦on̦e ak kabwebweiki ajri in ak iuuni bwe en pãd ippãn. Ajri rot in me rar ko̦kkure ekkã an to an metak eñjake ko aer kõn jorrããn eo ear wal̦o̦k ñan er. Innem, eo ej kõm̦m̦an m̦anit rot in enana, congregation eo ej lel̦o̦k kaje ñan e im ewõr men ko ejjab maroñ kõm̦m̦ani iloan congregation eo. Armej in en jab l̦õmn̦ak wõt kõn an naaj nana etan, ak en l̦õmn̦ak kõn erreo eo an congregation eo.—1 Korint 5:6; 2 Piter 3:14.

El̦aññe armej in ej m̦ool an ukel̦o̦k, enaaj kile im l̦oore naan in kakapilõk ko jãn Baibõl̦ eo. Ñe ej m̦ool an jõjõik men eo enana, enaaj el̦l̦o̦k jãn men eo enana ear kõm̦m̦ane im kate e ñan jab bar kõm̦m̦ane. (Jabõn Kõnnaan 8:13; Rom 12:9) Bareinwõt, ej aikuj kwal̦o̦k kam̦m̦oolol ñan Jeova kõn yokwe eo an el̦ap, kõnke ej kõtl̦o̦k e bwe en maroñ bar kabuñ ñan E im pãd ibwiljin ro “re jime” me renaaj mour indeeo ijin iion lal̦.—Jabõn Kõnnaan 2:21.

[Footnote]

[Blurb on page 21]

Meñe Jeova ej jeorl̦o̦k bõd ko an juon ri jerawiwi, bõtab armej in emaroñ lo leen kõm̦m̦an ko an