Kwõnaaj Ke L̦oor Naan in Tõl ko jãn Jeova?
Kwõnaaj Ke L̦oor Naan in Tõl ko jãn Jeova?
“I dike ial̦ ko otemjej, ial̦ in riab.”—SAM 119:128.
1, 2. (a) Ñe kwõj kajjitõk jipañ jãn juon m̦õttam̦, ta naan in kakkõl ko kwõnaaj m̦õn̦õn̦õ in roñjaki? Im etke? (b) Ta ko Jeova ej kakkõl kõj kaki rainin im etke?
KWÕJ pojak in etal ñan juon jikin, bõtab kwõj aikuj jipañ kõnke kwõjjab jel̦ã kajjien ial̦ eo. Ewõr juon m̦õttam̦ im ejel̦ã ewi wãween kwõmaroñ tõpar jikin in. Kwõj kajjitõk jipañ jãne kõnke el̦ap am̦ lõke. Ej kwal̦o̦k kajjien ial̦ eo im ej bar kakkõl eok kõn jet kauwõtata ko ilo naaj ial̦ in am̦. Ñan waanjoñak, ej kakkõl eok bwe ilo ial̦ eo, ewõr juon jain ejjab lukkuun alikkar. Elõñ armej rar jebwãbwe kõn aer kar l̦oore jain in. Kwõnaaj ke kar m̦õn̦õn̦õ in roñjake naan in kakkõl ko jãne? Ilo juon wãween ãinl̦o̦k wõt in, kõj aolep jej jibadekl̦o̦k juon jikin. Jikin in ilo kõkkar ej mour indeeo. Jeova ej jerad, im ej kwal̦o̦k ta ko jej aikuj kõm̦m̦ani bwe jen maroñ tõparl̦o̦k ijin. Ej bareinwõt kakkõl kõj kõn jet kauwõtata ko im remaroñ kõm̦m̦an bwe jen jebwãbwe jãn ial̦ eo em̦ool.—Duteronomi 5:32; Aiseia 30:21.
2 Ilo katak in im katak eo tok juon, jenaaj etale jet iaan menin kauwõtata kein. Keememej bwe Jeova ej jerad im ej kakkõl kõj kõnke el̦ap an kaorõke kõj. Ekõn̦aan bwe jen mour ñan indeeo im ej bũrom̦õj ñe armej ro rej kõm̦m̦ani pepe ko renana im rej bõjrak jãn aer karejar ñan e. (Ezekiel 33:11) Ilo katak in, jenaaj etale jilu menin kauwõtata ko. Kein kajuon, ej ikijjeen ad l̦oor armej ro jet. Kein karuo, ej men ko jej loi im kõn̦aan ko an bũruod. Im men eo kein kajilu ej ilo ad l̦oore men ko rejjab m̦ool im rejjab maroñ jipañ kõj. Jej aikuj jel̦ã kõn men kein rekauwõtata im ewi wãween Jeova ej jipañ kõjparok kõj jãn men kein. Eñin unin juon ri jeje Baibõl̦ ear ba: “I dike ial̦ ko otemjej, ial̦ in riab.” (Sam 119:128) Kwõj ke bõk ejja l̦õmn̦ak in an? Jen etale ewi wãween jemaroñ kõjparok kõj jãn ‘ial̦ kein reriab.’
Jab L̦oore Armej ro im Kõn̦aan ko Aer
3. (a) Etke emaroñ kauwõtata ñan l̦oor armej ro jet ñe jejjab jel̦ã ia eo jãn etal ie l̦o̦k? (b) Ta eo jemaroñ katak jãn naan in kakkõl eo ilo Exodus 23:2?
3 Kwõj etal ilo ial̦ in am̦, bõtab kiiõ kwõjaje kwõn etal ia l̦o̦k. Kwõj lo bwe ewõr juon ial̦ im elõñ armej rej l̦oore. Enaaj pidodol̦o̦k bwe kwõn l̦oore aolep armej rein. Ak ekauwatata ñan baj l̦oor juon ial̦ me elõñ armej ro rej etal iel̦o̦k. Etke? Bõlen rejjab jibadekl̦o̦k jikin eo kwõj kõtõparl̦o̦k. Ak bõlen armej rein rej bar jebwãbwe ãinwõt kwe. Waanjoñak in ej jipañ kõj bwe jen mel̦el̦e kõn ta eo jemaroñ katak jãn juon iaan kien ko an Jeova ñan ri Israel ro. Jeova ear lel̦o̦k juon kien ñan ri ekajet ro im ri kam̦ool ro ilo iien ekajet ko. Ear kakkõl er kõn kauwõtata ko remaroñ wal̦o̦k el̦aññe rej l̦oore l̦õmn̦ak ko an armej ro ak kõm̦m̦ani pepe ko ñan kam̦õn̦õn̦õik ro jet. (Riit Exodus 23:2.) Epidodo ñan kõm̦m̦ane men in kõnke jejjab weeppãn. Naan in kakkõl in an Jeova ñan ri ekajet ro im ri kam̦ool ro ej bar jerbal ñan kõj rainin.
4, 5. Ta wãween eo epen Joshua im Keleb rar iione? Ta eo ear kaperan erro?
4 Jemaroñ pãd ilo kauwõtata el̦aññe jej l̦oore armej ro jet im kõn̦aan ko aer. Men in emaroñ wal̦o̦k ilo jidimkij im epidodo ñan ad po. Ñan waanjoñak, kwõj keememej ke ta eo ear wal̦o̦k ñan Joshua im Keleb? Em̦m̦aan rein ruo rar ilo̦k ippãn bar joñoul em̦m̦aan ro im waatetok Enen Kallim̦ur eo. Ke rar jepl̦aak, em̦m̦aan ro joñoul rar kwal̦o̦k jet naan ko im kar kaamijak armej ro. Ñan waanjoñak, l̦õm̦arein rar ba bwe ear wõr ri inea ro ilo Kenan jãn baam̦le ko an ri Nephilim ro. (Jenesis 6:4) Ejjab m̦ool men in kõnke aolep ri Nephilim ro im ro ineer rar mej elõñ buki iiõ ko m̦oktal̦o̦k ilo kar Ibwijleplep eo ilo raan ko an Noa. Bõtab, kõnke ear dik aer tõmak ilo Jeova, ri Israel rein rar tõmake em̦m̦aan rein joñoul. El̦aññe ej m̦õjn̦o̦ ak dik tõmak eo an juon armej, enaaj jako an lõke Anij im jino an tõmake naan ko reriab an armej ro jet. Ta eo ri Israel ro rar kõm̦m̦ane? Jidik kõn jidik, rar jino aer l̦õmn̦ak bwe rejjab aikuj l̦oor naan ko an Jeova ñan del̦o̦ñe Enen Kallim̦ur eo. Ta eo Joshua im Keleb rar kõm̦m̦ane ke rar iione wãween in epen?—Bõnbõn 13:25-33.
5 Joshua im Keleb rar jab l̦oore armej ro. Meñe ri Israel ro rar m̦akoko in roñjake m̦ool eo, em̦m̦an rein ruo rar jab jenliklik in kwal̦o̦ke. Rar kõm̦m̦ane men eo ejim̦we meñe ri Israel ro jet rar kõn̦aan m̦ane erro. Ta eo ear kaperan Joshua im Keleb? Tõmak eo aerro ilo Jeova. El̦aññe juon ej lukkuun lõke Jeova, enaaj tõmake naan ko an im jab l̦oore men ko reriab armej ro rej ba. Tokãlik ke Joshua im Keleb rar kwal̦o̦k kõn tõmak eo aer, rar ba ñan armej ro bwe aolep iien Jeova ej kajejjet kallim̦ur ko an. (Riit Joshua 14:6, 8; 23:2, 14.) Joshua im Keleb rar yokwe Jeova im rar lukkuun lõke e. Rar jab kõn̦aan kõm̦m̦ane jabdewõt men ko im remaroñ kabũrom̦õj Jeova ñan baj kam̦õn̦õn̦õik wõt armej ro. Rar jab l̦oore armej ro ak kõn̦aan ko aer, im rainin rej juon joñak em̦m̦an ñan kõj.—Bõnbõn 14:1-10.
6. Ta juon wãween ekauwatata ñan l̦oore ro jet?
6 Ewõr ke iien im kwõj kõn̦aan baj l̦oore wõt armej ro jet im kõn̦aan ko aer? Rainin, enañin aolep armej ro rejjab kwal̦o̦k aer kautieje Jeova. Rej l̦õmn̦ak bwe kien ko an ejjel̦o̦k tokjãer im rejjab aorõk. Rej ba bwe ejjel̦o̦k jorrããn ñan alwõje pija ko rejakkar, rem̦õrõ im ewõr anijnij ie. Ãindein aer bar l̦õmn̦ak kõn mijjin in iukkure ko. (2 Timote 3:1-5) Ewi wãween am̦ kããlõt menin kam̦õn̦õn̦õ ko ñan kwe im baam̦le eo am̦? Kwõj ke kããlõt menin kam̦õn̦õn̦õ kein ekkar ñan ta ko rem̦m̦an ak renana ippãn ro jet? El̦aññe kwõj ãindein, eokwe kwõj l̦oore armej ro jet im kõn̦aan ko aer.
7, 8. (a) Ewi wãween jemaroñ kal̦apl̦o̦k maroñ eo ad ñan jel̦ã em̦m̦an im nana? Im etke em̦m̦anl̦o̦k kajerbale maroñ in ijello̦kun ad baj l̦oore juon laajrak in kien ko? (b) Etke kwõj m̦õn̦õn̦õ kõn joñak ko rem̦m̦an an elõñ jodrikdrik ro?
7 Jeova ear letok ñan kõj juon menin letok eaorõk bwe jen maroñ kõm̦m̦ani pepe ko rejim̦we. Ta in? Ej maroñ eo ñan ad l̦õmn̦ak m̦okta innem kããlõt men ko rem̦m̦an jãn men ko renana. Jemaroñ kakajoorl̦o̦k ak kal̦apl̦o̦k maroñ in ilo ad kajerbale. (Hibru 5:14) Maroñ in eban kajoorl̦o̦k ak l̦apl̦o̦k el̦aññe jej l̦oore armej ro jet ak kõtl̦o̦k bwe ren kwal̦o̦k ñan kõj ta ko jej aikuj kõm̦m̦ani. Jej aikuj kajerbale naan in kakapilõk ko jaar katak jãn Baibõl̦ eo innem make kõm̦m̦an pepe. Ñan waanjoñak, armej ro doon Jeova rejjab kõtl̦o̦k bwe bar juon en je juon laajrak in pija ko, bok ko, ak al ko rekkar ñan er. El̦aññe jej l̦oore juon laajrak, enaaj ikutkut an oktak kõnke menin kam̦õn̦õn̦õ kein rej oktak jãn iien ñan iien. Bõtab un eo el̦aptata unin ad jab kõtl̦o̦k bwe ro jet ren pepe ñan kõj ej kõnke jekõn̦aan kajerbale maroñ eo Jeova ear letoke. Jeova ekõn̦aan bwe jen lukkuun kõl̦mãnl̦o̦kjen̦ kõn katak ko jãn Baibõl̦ eo im jar bwe en jipañ kõj. Ãlikin, jen wõnm̦aanl̦o̦k wõt im kõm̦m̦ani pepe ko me rej kabuñbũruon.—Epesõs 5:10.
8 El̦aññe jej kõm̦m̦ani pepe ko im rej errã ippãn Baibõl̦ eo, ejjab aolep armej renaaj m̦õn̦õn̦õ kake. Ñan waanjoñak, men in elukkuun pen ñan jodrikdrik ro ilo jikuul̦ kõnke ri jikuul̦ ro jet rej iuuni er bwe ren l̦oore men ko rej kõm̦m̦ani. (1 Piter 4:4) Bõtab, jej lukkuun m̦õn̦õn̦õ bwe elõñ iaan jodrikdrik ro ilo doulul in rej kate er im jab l̦oor jodrikdrik ro jet im kõn̦aan ko aer. Ej juon men eaiboojoj ñan lo an aolep ro doon Jeova kwal̦o̦k aer tõmak ãinwõt kar Joshua im Keleb.
Jab L̦oor Men ko Kwõj Loi im Kõn̦aan ko an Bũruom̦
9. (a) Etke ekauwõtata ñan baj l̦oore wõt juon ial̦ kõnke em̦m̦an ippam̦? (b) Etke kien eo an Jeova ñan ri Israel ro ilo bok in Bõnbõn 15:37-39 ear lukkuun aorõk?
9 Kauwõtata eo kein karuo jenaaj etale ej itok jãn men ko jej loi im kõn̦aan ko an bũruod. Jen bar ro̦o̦l ñan waanjoñak eo ilo jinoin katak in. Kwõj jibadekl̦o̦k juon jikin, im ewõr juon am̦ mab. Ta eo enaaj wal̦o̦k el̦aññe kwõjjab kajerbale mab in ak kwõj kããlõt juon ial̦ me eaiboojoj im em̦m̦an ippam̦? Kwoban tõparl̦o̦k ijo kokõn̦aan jibadekl̦o̦k. Waanjoñak in ej jipañ kõj ñan mel̦el̦e kõn juon iaan kien ko Jeova ear lel̦o̦ke ñan ri Israel ro. (Riit Bõnbõn 15:37-39, UBS.) Elõñ armej rejjab mel̦el̦e etke Jeova ear kakien ri Israel ro bwe ren likũti tõrej bũl̦u ko itõrerein nuknuk ko aer. Kwõjel̦ã ke etke kien in ear lukkuun aorõk? Juon un ej kõnke men in ear kajenolo̦k ri Israel ro jãn armej in aelõñ ko jet. (Livitikõs 18:24, 25) El̦aññe rekõn̦aan kabuñbũruon Jeova, rar aikuj oktak jãn aelõñ ko ipel̦aakier. Bõtab ebar wõr juon un Jeova ear kõm̦m̦ane kien in. Jen etale un in im kal̦apl̦o̦k ad mel̦el̦e kõn kauwõtata in kein karuo im emaroñ kõm̦m̦an bwe jen jab pokake Jeova.
10. Ewi wãween an Jeova kalikkar bwe elukkuun jel̦ã kajjien armej ro?
10 Ilo iien eo Jeova ear lel̦o̦k kien in ñan ri Israel ro, ear kwal̦o̦k un eo: “Kom̦win jab l̦oor mejemi im bũruõmi.” Jeova ear ba men in kõnke elukkuun jel̦ã kõn armej ro. Ejel̦ã bwe bũruon armej ro epidodo an reel kõn men ko rej loi. Ejel̦ã bwe bũruod emaroñ tõl kõj ñan kõm̦m̦ani men ko rejjab jim̦we im ej kakkõl kõj: “Wõn emaroñ melele kin buruen armij? Ejelã mon jen men otemjej, ejjelok en emaroñ kemouri jen mij in an.” (Jeremaia 17:9, UBS) Eñin unin Jeova ear jiroñ ri Israel ro bwe ren jab l̦oor men ko rej loi im kõn̦aan ko an bũrueer. Jeova ear jel̦ã bwe el̦aññe ri Israel ro rar kallimjeke ri aelõñ ko jet, renaaj kõn̦aan l̦oor er. Renaaj kõn̦aan ãinwõt er, im bar l̦õmn̦ak im mour ãinwõt armej rein.—Jabõn Kõnnaan 13:20.
11. Ta eo emaroñ wal̦o̦k el̦aññe jej l̦oor men ko jej loi im kõn̦aan ko ad ilo wãween ad tõreejab?
11 El̦apl̦o̦k an pidodo an bũruod reel kõn men ko jej loi rainin. Ilo lal̦ in rainin, elukkuun pidodo an wal̦o̦k l̦õmn̦ak ak kõn̦aan ko rejakkar. Ewi wãween an bok in Bõnbõn 15:39 jipañ kõj? Ñe jej l̦oor men ko jej loi im kõn̦aan ko ad, men in emaroñ kõm̦m̦an bwe wãween ad nuknuk en jekkar. Armej ro ipel̦aakid rej tõreejab ilo juon wãween me ej kõm̦m̦an bwe en wal̦o̦k l̦õmn̦ak ko rettoon ippãn ro jet. Men in ej wal̦o̦k ilo jikin jikuul̦ ko, jikin jerbal ko im bar ilo bukwõn ko ad. Kõnke jej loe men in aolep raan, emaroñ kõm̦m̦an bwe jen kõn̦aan ãinwõt armej rein. Jidik kõn jidik, jemaroñ tõreejab ãinwõt er im jab ãinwõt juon Kũrjin.—Rom 12:1, 2.
12, 13. (a) Ta eo jej aikuj kõm̦m̦ane ñe ej jiktok kõn̦aan eo ñan kallimjek men ko renana? (b) Etke jejjab aikuj kõm̦m̦ani men ko im remaroñ bõktok kõn̦aan ko rejakkar ñan ro jet?
12 Elukkuun aorõk bwe jen jab kõtl̦o̦k bwe kõn̦aan ko ad ren anjo̦ iood. Jej aikuj kõjparok mejed jãn an kallimjek men ko renana. Waanjoñak eo em̦m̦an an Job emaroñ jipañ kõj. Ear kõm̦m̦an bujen ippãn make bwe en jab kallimjeke kõrã ro jet ilo juon wãween ejakkar im mejkaiie kake er. (Job 31:1) Kiiñ Devid ear bar kõm̦m̦ane ejja men in wõt ke ear ba: “I jãmin likũt im̦aan meja jabdewõt men e nana.” (Sam 101:3) Ãinwõt Devid, jej aikuj peek ippãd make ñan jab kallimjek “jabdewõt men e nana.” Ta men kein? Ej jabdewõt men ko im remaroñ kõm̦m̦an bwe en rup jem̦jerã eo ad ippãn Jeova. Ej kitibuj jabdewõt men me remaroñ likũt kõn̦aan ko rejakkar ilo bũruod im tõll̦o̦k kõj ñan kõm̦m̦ani men ko renana.
13 Jemaroñ erom juon “men e nana” ñan ro jet el̦aññe m̦akũtkũt ko ad rej kõm̦m̦an bwe en wõr kõn̦aan ko rejakkar ippãer. Juon wãween men in ej wal̦o̦k ej ilo wãween ad tõreejab. Eñin unin jej aikuj l̦oore ta eo Baibõl̦ ej ba. Baibõl̦ eo ej rõjañ Kũrjin ro bwe ren kõn̦ak nuknuk ko rekkar im “re karbõb im jab kattoojoj.” (1 Timote 2:9) El̦aññe jej tõreejab ilo juon wãween ‘ekkar im ekarbõb,’ jejjab l̦õmn̦ak wõt kõn kõn̦aan ko ad. Jej kwal̦o̦k ad kautiej ro jet im kwal̦o̦k bwe jekõn̦aan kam̦õn̦õn̦õik ro jet im jab kõj make. (Rom 15:1, 2) Elõñ tausan jodrikdrik ro ilo congregation ko ipel̦aakin lal̦ rej likũt juon joñak em̦m̦an ilo wãween aer tõreejab. Jej m̦õn̦õn̦õ bwe rejjab l̦oore mejãer im bũrueer ak rej kããlõt ñan kabuñbũruon Jeova ilo aolep men ko rej kõm̦m̦ani.
Jab L̦oore Men ko Rejjab M̦ool im Reban Jipañ Eok
14. Ta eo Samuel ear kakkõl ri Israel ro kake?
14 Ilo ial̦ eo am̦, kwõj aikuj kijoone juon lom̦al̦o el̦ap. Ilo am̦ jerakrõk iloan m̦al̦o in, kwo l̦ak reilok ñan kapen lañ, kwõj loe juon ãne. Bõtab, ilo m̦ool mejam̦ ej m̦on̦e eok kõnke ejjel̦o̦k ãne ijo. Ta eo enaaj wal̦o̦k el̦aññe kwõnaaj ilo̦k jãn kooj eo am̦ im jibadekl̦o̦k ãne in? El̦aññe kwõnaaj kõm̦m̦ane men in, kwõmaroñ pel̦o̦k im mour eo am̦ emaroñ pãd ilo kauwõtata. Ilo ejja wãween in wõt, Jeova ejel̦ã bwe elukkuun kauwõtata ñan l̦oore men ko me rejjab lukkuun m̦ool im reban jipañ kõj. Ear kakkõl ri Israel ro kõn men in. Ñan waanjoñak, aolep ri aelõñ ko ipel̦aakin aelõñ in Israel ear wõr aer kiiñ, kõn men in ri Israel ro rar bar kõn̦aan bwe juon armej en kiiñ ñan er. Kõn̦aan in aer ear juon men elukkuun bõd. Etke? Kõnke ear kalikkar bwe rejjab kõn̦aan bwe Jeova en irooj im tõl er. Ta eo Jeova ear kõm̦m̦ane? Ear kõtl̦o̦k bwe en tõprak kajjitõk in aer, bõtab ear jilkinl̦o̦k ri kanaan Samuel bwe en lel̦o̦k juon naan in kakkõl ñan er. Samuel ear kakkõl ri Israel ro kõn kauwõtata ko remaroñ wal̦o̦k el̦aññe rej l̦oore ak lõke juon men eo im ejjab maroñ jipañ er.—Riit 1 Samuel 12:21.
15. Ewi wãween an kar ri Israel ro lõke men ko rejjab maroñ jipañ er?
15 Ri Israel ro remaroñ kar l̦õmn̦ak bwe em̦m̦anl̦o̦k ñe rej lõke juon kiiñ jãn aer lõke Jeova. El̦aññe eñin kar wãween aer l̦õmn̦ak, eokwe rar kããlõt juon eo im ejjab maroñ lukkuun jipañ er. Kõnke rar jab lukkuun lõke Jeova, ekar pidodo ñan aer bar l̦oore aujiid ko jet an Setan. Ñan waanjoñak, kiiñ eo aer emaroñ kar kõm̦m̦an bwe armej ro ren kabuñ ñan ekjab ko. Armej ro rej kabuñ ñan ekjab ko rej lõke men kein kõm̦m̦an jãn al̦al̦ im dekã ko kõnke remaroñ loi. Rejjab lõke Jeova, Anij eo ear kõm̦anm̦an men otemjej im jejjab maroñ loe. Bõtab, rijjelõk Paul ear kwal̦o̦k bwe ekjab ko “rejjab m̦ool.”(1 Korint 8:4) Ekjab ko rejjab maroñ lo, kõnono, ak kõm̦m̦an jabdewõt. Ej juon menin bwebwe ñan kabuñ ñan ekjab kein. Ekjab ko rejjab maroñ jipañ jabdewõt armej im ro rej kabuñ ñan ekjab kein ‘rej ãinwõt er.’—Sam 115:4-8.
16. (a) Ewi wãween an Setan m̦on̦e armej ro rainin? (b) Etke jããn im m̦weiuk ko reban jipañ kõj? Ak etke Jeova wõt emaroñ jipañ kõj?
16 Setan el̦ap an mãlõtlõt im etao. Rainin, ej kõm̦m̦an bwe armej ro ren l̦oore men ko rejjab m̦ool im rejjab maroñ jipañ er. Ñan waanjoñak, ej m̦on̦e armej ro ñan l̦õmn̦ak bwe remaroñ jokwane im m̦õn̦õn̦õ el̦aññe ewõr aer jããn, em̦m̦an jerbal ko aer im elukkuun lõñ m̦weier. Rej lõke men kein im l̦õmn̦ak bwe remaroñ jipañ kõm̦adm̦õde aolep apañ ko aer ilo mour. Men ko m̦weier rejjab maroñ jipañ armej rein ñe renañinmej, ak ñe ejako jerbal ko aer. Men kein rejjab maroñ jipañ er ñe ej wal̦o̦k taibuun ko ak jorrããn ko jet rel̦ap. Ñe armej rein rejjab jel̦ã ta unin aer mour im rej l̦õmn̦ak ejjel̦o̦k tokjãn aer mour, men kein m̦weier remaroñ ke jipañ er? Remaroñ ke jipañ er ñe epaak iien aer mej? El̦aññe el̦ap ad kaorõk jããn im men ko m̦weied, tokãlik jenaaj jerata. Jeban lo m̦õn̦õn̦õ eo em̦ool im men kein rejjab maroñ kõjparok kõj jãn nañinmej im mej. Etke? Kõnke rejjab maroñ jipañ kõj. (Jabõn Kõnnaan 23:4, 5) Jeova emaroñ jipañ kõj kõnke ej Anij eo em̦ool. Bwe jen lukkuun m̦õn̦õn̦õ ilo mour ko ad, jej aikuj lukkuun epaake Jeova. E wõt emaroñ jipañ kõj kõm̦adm̦õd apañ ko ad. Jej lukkuun m̦õn̦õn̦õ bwe jej ro jeran Jeova im jen l̦oore iien otemjej im jab l̦oore men ko rejjab m̦ool im reban jipañ kõj.
17. Ta eo kwõnaaj kõm̦m̦ane kiiõ ke em̦õj am̦ jel̦ã kõn naan in kakkõl ko an Jeova?
17 Jej m̦õn̦õn̦õ bwe Jeova ej jerad im ej tõl kõj ilo ial̦ eo ad ñan mour indeeo. El̦aññe jej wõnm̦aanl̦o̦k wõt im l̦oore naan in kakkõl ko an, jemaroñ mour ñan indeeo. Ilo kar katak in, jaar katak kõn jilu kauwõtata ko im rej kõm̦m̦an bwe armej ro ren jebwãbwe jãn ial̦ eo em̦ool. Kein kajuon ej ikijjeen ad l̦oore armej ro jet. Kein karuo ej men ko jej loi im kõn̦aan ko an bũruod. Im kein kajilu ej ilo ad l̦oore men ko rejjab m̦ool im rejjab maroñ jipañ kõj. Ilo naaj katak in tok juon, jenaaj bar katak kõn bar jilu naan in kakkõl ko jãn Jeova bwe jen maroñ “dike ial̦ ko otemjej, ial̦ in riab.”—Sam 119:128.
Ewi Am̦ L̦õmn̦ak?
Ta eo jemaroñ katak jãn eoon kein?
• Exodus 23:2
• Bõnbõn 15:37-39
• 1 Samuel 12:21
• Sam 119:128
[Kajitõk ko ñan katak]
[Pija ilo peij 7]
Epidodo ke am̦ l̦oore armej ro jet im kõm̦m̦ani men ko rej kõm̦m̦ani?
[Pija ilo peij 9]
Etke ekauwõtata ñan l̦oore men ko jej loi im kõn̦aan ko an bũruod?
[Pija ilo peij 10]
Kwõj ke l̦oore men ko rejjab m̦ool im rejjab maroñ jipañ eok?
