Juon Kweilo̦k im El̦ap an Aorõk

“ÃLIKIN wõt kweilo̦k in, kwõnaaj ba, ‘Ear juon kweilo̦k elukkuun em̦m̦an im eaorõk!’ ” Eñin kar naan in kepel̦l̦o̦k ko an Stephen Lett, juon iaan ro ilo Kumi eo Ej Tõl Ri Kõnnaan ro an Jeova. Kweilo̦k in an Watch Tower Bible im Tract Society an Pennsylvania ej wal̦o̦k kajjojo iiõ im ej kein 126 alen aer kõm̦m̦ane kiiõ. Kweilo̦k in ear wal̦o̦k ilo Oktoba 2, 2010 ilo Im̦õn Kweilo̦k eo El̦ap an Ri Kõnnaan ro an Jeova ilo Jersey City, New Jersey, ilo Amedka. Ta ko rar wal̦o̦k ilo kweilo̦k in eaorõk?

Ilo katak eo an, Stephen Lett ear kõnono kõn jariot eo waan Jeova im ej wal̦o̦k ilo bok in Ezekiel. Jariot in el̦ap ej kõkkar kõn doulul eo an Jeova. Ewõr ruo m̦õttan ko ilo doulul in an Jeova, juon ilañ im juon ijin ioon lal̦. Jeova im Jijej kab enjel̦ ro rej pãd ilo doulul eo ilañ im el̦ap jerbal ko rej kõm̦m̦ani. M̦õttan eo kein karuo ijin ioon lal̦ ej bar kõm̦m̦an el̦ap wõnm̦aanl̦o̦k ko. Stephen Lett ear kwal̦o̦k kõn elõñ wõnm̦aanl̦o̦k ko me doulul eo an Jeova ijin ioon lal̦ ej kõm̦m̦ani.

Ñan waanjoñak, rar kobaik elõñ Betel ko ippãn doon ipel̦aakin lal̦ in. Men in ej kõm̦m̦an bwe elõñ ro rekõn jerbal ilo Betel ren maroñ ilo̦k im jipañ ilo jerbal in kwal̦o̦k naan eo. Stephen Lett ear rõjañ ri kweilo̦k ro bwe ren jar kõn Kumi eo Ej Tõl Ri Kõnnaan ro an Jeova bwe ren wõnm̦aanl̦o̦k wõt im tiljek im mãlõtlõt ilo aer kõm̦m̦ani pepe ko.​​—Matu 24:​45-​47.

Ripoot im Bwebwenato Ko

Tab Honsberger, ej juon iaan em̦m̦aan ro me rej loloorjake jerbal ko ilo Betel eo ilo Haiti. Ear kwal̦o̦k juon ripoot kõn ta ko rar wal̦o̦k ãlikin kar m̦akũtkũt lal̦ eo me ear wal̦o̦k ilo Haiti ilo kar Jãnwõde 12, 2010. Ilo kar iien eo, enañin 300,000 armej ro rar mej. Elõñ ri tõl ro an kabuñ rar ba ñan armej ro bwe Anij ear m̦ane armej ro renana bõtab ear kõjparok wõt ro rem̦m̦an. Bõtab, ke m̦akũtkũt lal̦ eo ear rupe juon jikin kalbuuj ilo Haiti, elõñ to̦ujin ri kalbuuj ro rar ko im mour wõt. Elõñ Ri Haiti rekõn̦aan jel̦ã m̦ool eo kõn etke jej iioni elõñ kain apañ im jorrããn ko ilo raan kein. Ke Ri Kõnnaan ro an Jeova rar kõnnaan ippãer, rar maroñ kaenõm̦m̦an er kõn nuuj eo em̦m̦an. Tab Honsberger ear kwal̦o̦k kõn juon jeid im jatid em̦m̦aan ilo Haiti me kõrã eo ippãn ear mej ilo m̦akũtkũt lal̦ eo. Em̦m̦aan in ear ba: “Ñan rainin, ij jañ wõt. Ijaje ñããt enaaj bõjrak aõ jañ kõn aõ bũrom̦õj. Bõtab, ij m̦õn̦õn̦õ kõn aõ loe joñan yokwe eo ej wal̦o̦k iloan doulul in an Jeova. Ewõr aõ kõjatdikdik bwe mour enaaj em̦m̦anl̦o̦k ilju im jekl̦aj, im ikõn̦aan kõnnaanek ro jet kõn men in.”

 Mark Sanderson ej jerbal ilo Betel eo ilo Brooklyn, New York. Ear kwal̦o̦k juon ripoot kõn jerbal ko rej wal̦o̦k ilo Philippines. Mark Sanderson ear juon iaan em̦m̦aan ro rekõn loloorjake jerbal ko ilo Betel eo ilo Philippines. Ear lukkuun m̦õn̦õn̦õ ke ear kwal̦o̦k kõn an lõñl̦o̦k oran ri kwal̦o̦k naan ro im ri katak ro. Ear kwal̦o̦k juon bwebwenato kõn juon em̦m̦aan etan Miguel me rar m̦ane l̦addik eo jibwin. Miguel ear jipañ ñan kõm̦m̦an bwe ren kalbuuji ri nana eo. Bõtab juon raan, Miguel ear ilo̦k im kwal̦o̦k naan ilo im̦õn kalbuuj eo. Ear iione em̦m̦aan eo me ear m̦ane l̦addik eo jibwin. Miguel ear kor, bõtab ear kõnnaan ñan em̦m̦aan in ilo jouj im kautiej. Em̦m̦aan eo ear jino katak Baibõl̦ eo im jerbali men ko ej katak kaki. Ear bar kate bwe en lukkuun epaake im yokwe Jeova. Tokãlik, em̦m̦aan in ear peptaij im erro Miguel lukkuun epaake doon kiiõ. Miguel ej kiiõ kajjioñ jipañ l̦ein bwe en m̦õkajl̦o̦k an diwõj jãn kalbuuj.

Mark Noumair, ear kwal̦o̦k katak eo juon im ear bwebwenato ippãn jet ri pãlele ro. Etaer ej Alex im Sarah Reinmueller, David im Krista Schafer, im Robert im Ketra Ciranko. Alex Reinmueller ear kwal̦o̦k kõn kar jinoin an kar lo m̦ool eo. Ear juon pioneer ilo Canada ke ear 15 an iiõ. Elõñ iien ear kwal̦o̦k naan ippãn make. Ear ba bwe ke ear jino jerbal ilo Betel, jilu em̦m̦aan ro retiljek rar jipañ e bwe en epaakel̦o̦k wõt Jeova. Em̦m̦aan rein jilu ej Richard Abrahamson, Daniel Sydlik, im Lee Waters. Kõrã eo ippãn Alex etan Sarah ear kwal̦o̦k kõn jem̦jerã eo an ippãn juon jeid im jatid kõrã etan Nancy Yuen. Nancy ear kijenmej ium̦win elõñ iiõ ko ke rar kalbuuji ilo Jeina kõn an kwal̦o̦k naan. Sarah ej ba bwe ear l̦apl̦o̦k an lõke Jeova ilo an jar.

Mark Noumair ear bar bwebwenato ippãn David im Krista Schafer. David ear kam̦m̦oolol jinen kõn an kar kajoor tõmak eo an. Ear ba bwe ear wõr jet em̦m̦aan ro jeid im jatid me rar jipañ e bwe en maroñ auxiliary pioneer ke ear juon jodrikdrik. Krista ear kõnnaan kõn wãween an kar ro rerũtto ilo Betel kar jipañ im rõjañ e. Rein rerũtto rar lukkuun ‘tiljek ilo men ko reddik,’ ãinwõt an kar Jijej rõjañ ri kal̦oor ro an.​​—Luk 16:⁠10.

Ãliktata, Mark Noumair ear bwebwenato ippãn Robert im Ketra Ciranko. Robert ear kõnnaan kõn jibwin im jim̦m̦an me rar itok ñan Amedka jãn aelõñ in Hungary. Rũtto rein rej m̦õttan ri kabit ro. Ke Robert ear juon l̦addik wõt, ear lukkuun bwilõñ ñe ej ilo̦k ñan kweilo̦k ko rel̦ap ilo iiõ ko ãlikin 1950. Ke ear pãd ilo kweilo̦k kein, ear katak bwe doulul eo an Jeova elukkuun l̦apl̦o̦k jãn congregation eo ej pãd ie. Ketra ear kwal̦o̦k kõn wãween an kar aikuj tiljek wõt ilo an pioneer ilo congregation  eo an. Ear obrak ri jum̦ae ro ilo congregation in im ear bar wõr apañ ko jet me rar wal̦o̦k. Ak ear kijenmej wõt im tokãlik ear ilo̦k ñan bar juon congregation im special pioneer. Bõrokuk eo an congregation in ear lukkuun lujur e.

Ilo katak eo tok juon, Manfred Tonak ear kwal̦o̦k juon ripoot jãn aelõñ in Itiopia, ilo Africa. Itiopia ej juon iaan jikin ko me rej pãd ilo Baibõl̦ eo, im kiiõ elõñl̦o̦k jãn 9,000 ri kwal̦o̦k naan ro ie. Enañin aolepeir rej jokwe ilo jikin eo el̦ap etan Addis Ababa ak ilo ijoko epaake jikin in. Kõn men in, el̦ap aikuj ilo bukwõn ko jet me ejjel̦o̦k ri kwal̦o̦k naan ro. Kar kũr Ri Itiopia ro jeid im jatid me rej jokwe ilo aelõñ ko jet bwe ren lol̦o̦k Itiopia im jipañ kwal̦o̦k naan ilo bukwõn kein. Elõñ iaan rein rar itok jãn aelõñ ko jet, im rar maroñ rõjañ im kakajoorl̦o̦k ri tõmak ro ilo Itiopia. Rar bar tõpar elõñ armej ro me rar itoklimo im rekõn̦aan katak kõn Baibõl̦ eo.

Ilo kar kweilo̦k in, kar kwal̦o̦k jet katak im ripoot ko kõn Ri Kõnnaan ro an Jeova ilo Rojia im kõn apañ ko rel̦ap me rej iioni jãn kien eo an Rojia. Aulis Bergdahl, ej juon iaan em̦m̦aan ro me rej loloorjake jerbal ko ilo Betel eo ilo Rojia. Ear kwal̦o̦k kõn an kar ro jeid im jatid iion jum̦ae ilo Rojia, el̦aptata ilo jikin eo etan Moscow. Philip Brumley eo ej jerbal ilo Betel eo ilo Amedka, ear kõnnaan kõn men ko rar wal̦o̦k ilo allõñ ko l̦o̦k ikijjeen rein jeid im jatid ilo Rojia. Jikin Ekajet eo El̦ap an Europe ear etale aolep keej ko 9 me kien eo an Rojia ear bõkm̦aantak n̦ae Ri Kõnnaan ro an Jeova. Ewi jem̦l̦o̦k eo? Eokwe, jikin ekajet in ear kile bwe aolep keej kein n̦ae Ri Kõnnaan ro an Jeova rar jab m̦ool im ejjel̦o̦k aer pedped. Meñe jejaje ta eo enaaj wal̦o̦k ilju im jekl̦aj, Philip Brumley ej kwal̦o̦k bwe jem̦l̦o̦k in an jikin ekajet in el̦ap enaaj jelõt wãween an kien ko an aelõñ ko jet kõm̦m̦an ñan Ri Kõnnaan ro an Jeova.

Ãlikin ripoot kein kõn Rojia, Stephen Lett ear kwal̦o̦k bwe Jikin Ekajet eo El̦ap an Europe ear m̦õn̦õn̦õ in etale keej eo an Ri Kõnnaan ro an Jeova n̦ae kien eo an France ikijjeen kõl̦l̦ã eowoj. Jikin ekajet in me el̦ap an buñbuñ ejjab etale aolep keej ko me armej ro rej bõkm̦aantak. Ak rej kããlõt wõt keej ko me rej l̦õmn̦ak raorõk. Ñan kiiõ, jikin ekajet in em̦õj an etale 39 keej ko an Ri Kõnnaan ro an Jeova. Rar errã ippãn Ri Kõnnaan ro an Jeova ilo 37 iaan keej kein. Stephen Lett ear rõjañ aolep bwe ren jar kõn rein jeid im jatid ilo France im keej in aer.

Richard Morlan ear kwal̦o̦k ripoot eo ãliktata kõn jikuul̦ eo an elder ro. Ear kwal̦o̦k kõn ta ko rej wal̦o̦k ilo jikuul̦ in. Ear bar kwal̦o̦k kõn an elder ro me rar ilo̦k ñan jikuul̦ in kwal̦o̦k aer kam̦m̦oolol.

 Katak ko Jet jãn Em̦m̦aan ro jãn Kumi eo Ej Tõl Ri Kõnnaan ro an Jeova

Guy Pierce, juon iaan em̦m̦aan ro me rej pãd ilo Kumi eo Ej Tõl Ri Kõnnaan ro an Jeova, ear kwal̦o̦k juon katak me ej pedped ioon unin tõl eo an 2011, ‘Kõmman bwe Etan Jeova En Am Jikin Kone.’ (Zep. 3:​12, NW) Guy Pierce ear kwal̦o̦k bwe iien kein kiiõ jej mour ie ej iien ko rekam̦õn̦õn̦õ ñan ro doon Jeova. Bõtab ej bar juon tõre me jej aikuj lukkuun kõjparok wõt im kate kõj. Raan in kwi eo an Jeova epaak. Bõtab, elõñ armej rainin rej reilok wõt ñan kabuñ ko aer, kien ko aer, m̦weiuk im jããn, im men ko erl̦o̦k wõt. Jet armej rejjab kõn̦aan jel̦ã ta ko rej wal̦o̦k ipel̦aakier, kõn men in rej mour wõt ñan er make. Jej aikuj lõke wõt Jeova im yokwe e el̦apl̦o̦k jãn aolep men ko jet. Etke? Kõnke Jeova ej ad jikin kone eo em̦ool im emaroñ jipañ kab kõjparok kõj.

David Splane, eo ej bar pãd ilo Kumi eo Ej Tõl Ri Kõnnaan ro an Jeova, ear bar kwal̦o̦k juon katak ekaitoktoklimo etan “Kwõj Ke Del̦o̦ñ im Kakkije Ippãn Anij?” Ear kwal̦o̦k bwe raan in kakkije eo an Anij ej juon naan in kõkkar, kõnke Jeova im eo Nejin rejjab pãd bajjek ak rej poub wõt im jerbal ñan rainin. Rej jerbal ñan kõm̦m̦an bwe en jejjet ankilaan Jeova kõn lal̦ in. (Jon 5:​17) Kiiõ, ewi wãween jemaroñ del̦o̦ñ im kakkije ippãn Anij? Jej aikuj jerbale tõmak eo ad ilo Jijej im katok eo an. Jej aikuj bar pokake Jeova im jerbal ippãn doulul eo an. Jet iien emaroñ pen ñan l̦oore naan in tõl ko rej litoki, bõtab jej aikuj l̦oori im bõrokuk ilo men kein. David Splane ear rõjañ aolep ro ilo iien in bwe ren kate er ñan aer maroñ del̦o̦ñ im kakkije ippãn Anij.

Anthony Morris, juon iaan em̦m̦aan ro jãn Kumi eo Ej Tõl Ri Kõnnaan ro an Jeova, ear kwal̦o̦k katak eo ãliktata n̦aetan “Ta N̦e Jej Kõttare?” Brother Morris ear kakeememej ri roñjake ro kõn kanaan ko me rej pãd im̦aan me aolep ro doon Anij rej kijooror in lo an jejjet kitieer. Kanaan kein rekoba iien eo ñe irooj ro im ri tõl ro an lal̦ rej ba “Aenõm̦m̦an im ejjel̦o̦k unin lõl̦ño̦ñ.” Bar juon kanaan ej jeepepl̦o̦k eo an aolep kabuñ ko rejjab kwal̦o̦k katak ko rem̦ool. (1 Tessalonika 5:​2, 3; Revelesõn 17:​15-​17) Brother Morris ear kakkõl n̦ae l̦õmn̦ak kein me rej ba, “Bõlen eñin Armagedon,” el̦aññe nuuj ko rej wal̦o̦k im ãinwõt ñe rej kakũrm̦ool kanaan ko. Ear rõjañ ri roñjake ro bwe ren l̦oore naan in kakapilõk eo ilo Maika 7:7 ilo aer kõttar wõt jem̦l̦o̦kin. Bareinwõt ear rõjañ bwe jen jipañ im rejetake Kumi eo Ej Tõl Ri Kõnnaan ro an Jeova. Jen ãinl̦o̦k wõt ri tarin̦ae ro rej kuk ippãn doon ñe ebuñ bata. Ear ba: “Bũruemi ren peran, kom̦ otemjej kom̦ij kõjatdikdik kom̦ ilo Jeova.”​​—Sam 31:⁠24.

Ñan kajem̦l̦o̦k kweilo̦k eo, Geoffrey Jackson, juon iaan ro uwaan Kumi eo Ej Tõl Ri Kõnnaan ro an Jeova ear kwal̦o̦k jet kõjjel̦ã ko. Ear kwal̦o̦k bwe renaaj kiiõ kapidodoikl̦o̦k Imõniaroñroñ eo ilo kajin Belle. Men in enaaj jipañ ro me ejabwe kajin Belle ippãer. Stephen Lett ear bar kõjjel̦ã bwe Kumi eo Ej Tõl Ri Kõnnaan ro an Jeova enaaj kõm̦m̦ane juon karõk ekããl ñan district overseer ro im kõrã ro pãleer ilo Amedka. Ilo karõk in, renaaj kããlõt jet em̦m̦aan bwe ren lol̦o̦k rein im lale aikuj ko aer im jipañ er. Ear bar kwal̦o̦k bwe em̦õj aer kõm̦m̦ane juon ãt ekããl ñan jikuul̦ eo an elder im ministerial ro me ejjel̦o̦k pãleer. Ãt eo ekããl ej “Jikuul̦ in Baibõl̦ ñan L̦õm̦aro me Ejjel̦o̦k Pãleer.” Enaaj bar wal̦o̦k juon jikuul̦ ekããl me enaaj jipañ ri pãlele ro bwe ren kal̦apl̦o̦k ijo kun̦aaer ilo doulul in an Jeova. Stephen Lett ear bar kwal̦o̦k bwe jikuul̦ eo ñan district im circuit overseer kab kõrã ro ippãer enaaj kiiõ wal̦o̦k ruo alen ilo juon iiõ. Ro me rar pãd ilo jikuul̦ in kar m̦okta, remaroñ bar ilo̦k ñan jikuul̦ in alen ruo.

John E. Barr, eo 97 an iiõ im ej pãd ilo Kumi eo Ej Tõl Ri Kõnnaan ro an Jeova, ear kajem̦l̦o̦k kweilo̦k eo kõn juon jar me elukkuun em̦m̦an. * Aolep ro rar pãd rar kile bwe kweilo̦k in ear lukkuun aorõk im ejej uwaan.

[Kamelele ko itulal]

[Kamelele in juõn pija ilo 19]

Aolep rar m̦õn̦õn̦õ kõn bwebwenato ko

[Kamelele in juõn pija ilo 20]

Jeova ej kajeraam̦m̦an jerbal in kwal̦o̦k naan eo ilo aelõñ in Itiopia