Kajjitõk ko jãn Ro Rej Riit

Jemaroñ ke jel̦ã kõn oran aolep kanaan ko kõn Messaia eo jãn bok in Jenesis ñan Malkai?

Ñe jenaaj lukkuun etale aolep bok ko jãn Jenesis l̦o̦k ñan Malkai, jenaaj lo elõñ kanaan ko kõn Messaia eo me Jijej Kũraij ear kajejjet kitieir. Kanaan kein rej kwal̦o̦k elõñ men ko kõn mour eo an naaj Messaia eo, ñããt eo enaaj erom Messaia, im men ko enaaj kõm̦m̦ani. Rej bar kwal̦o̦k kõn wãween an naaj armej ro kõm̦m̦an ñane, im wãween eo Jeova enaaj kõjerbale ñan kajejjet ankilaan. Aolep kanaan kein rej jipañ kõj ñan ad kile bwe Jijej ej Messaia eo. Bõtab, jemaroñ ke lukkuun jel̦ã kõn jete aolep kanaan ko kõn Messaia eo jãn bok in Jenesis ñan Malkai? Eaorõk ke bwe jen jel̦ã?

Jet rej l̦õmn̦ak bwe jet eoon rej jitõñl̦o̦k ñan Messaia eo, bõtab ro jet remaroñ jab errã ippãer. Ñan waanjoñak, ewõr juon ri jeje etan Alfred Edersheim im ear je juon bok kõn tõre ko im wãween mour eo an Jijej ke ear pãd ilo lal̦. Ilo bok in an, l̦ein ej ba bwe ekkar ñan ri Ju ro m̦okta jãn tõre ko an Jijej, ewõr enañin 456 kanaan ko kõn Messaia eo jãn bok in Jenesis ñan Revelesõn. Jet iaan kanaan kein rejjab alikkar. Bõtab, ñe jej lukkuun etale kanaan kein 456, jenaaj loe bwe jet iaaer ejjel̦o̦k aer kein kam̦ool. Ñan waanjoñak, Alfred ej ba bwe Ri Ju ro rej l̦õmn̦ak bwe eoon eo ilo Jenesis 8:​11 ej juon kanaan kõn Messaia eo. Rej ba bwe “m̦ul̦e eo ear bõk bõlõk in wõjke olive eo jãn Tol̦ eo an Messaia eo.” Alfred ej bar ba bwe ekkar ñan bok in Exodus 12:​42, Ri Ju ro rej l̦õmn̦ak bwe “kõnke Moses ear itok jãn ãne jem̦aden, eokwe Messaia eo enaaj itok jãn aelõñ in Rom.” Mel̦el̦e kein an ri Ju ro kõn eoon kein ruo rejjab jim̦we. Elõñ ri mãlõtlõt ro im ro jet me rej katak kõn Baibõl̦ eo rejjab errã ilo kõmel̦el̦e kein.

Ak ta kõn kanaan ko kõn Messaia eo me em̦õj an jejjet kitieer? Jemaroñ ke lukkuun jel̦ã jete oraer? Epen ñan ad lukkuun bwini aolep kanaan kein. Ñan waanjoñak, jen etale bok in Aiseia jebta 53 (UBS). Jebta in ej kwal̦o̦k kõn jet men ko me Messaia eo enaaj kar kõm̦m̦ani ak iioni. Aiseia 53:​2-7 ej ba: “Ejjab emmõn im aibuijuij ñõn an armij lale . . . Jaar drike im ellok jene . . . Ear bõk iñtan eo en kar ad, im metak eo jen kar bõke . . . Ear ikkinejnej kin jerawiwi ko ad . . . Einwõt juon kon in sheep eo rej bojak in mõne, ear jab kwalok juõn nan.” Ilo am̦ baj l̦õmn̦ak, jete kanaan kein ilo jebta 53? Juon wõt ke ak elõñl̦o̦k jãn juon?

Jen bar lale kanaan eo ilo bok in Aiseia 11:⁠1. Ej ba: “Juon jul̦ enaaj wal̦o̦k dãpdepin Jesse, im juon ra jãn okar ko an enaaj jebar leen.” Kanaan in ej bar wal̦o̦k ilo eoon 10. Meñe eoktak eoon kein jãn doon, kanaan kein rej juon wõt ke ak reoktak jãn doon? Ñe jenaaj lukkuun etale oran kanaan kein ilo Aiseia jebta 11 im 53, oran eo jej loe emaroñ oktak jãn l̦õmn̦ak ko an ro jet.

Ta eo jej aikuj kõm̦m̦ane kiiõ? Eokwe, jen jab inepata kõn jete oran aolep kanaan ko kõn Messaia eo. Doulul eo an Jeova ejjab kwal̦o̦k jete oran aolep kanaan kein. Bõtab rej kõm̦m̦ane bok ko me remaroñ jipañ kõj ñan katak kõn elõñ iaan kanaan kein. * Bok kein remaroñ jipañ kõj im kakajoor kõj ilo ad katak ippãd make im ippãn ajri ro nejid. Remaroñ bar jipañ kõj bwe jen kijejeto ilo jerbal in kwal̦o̦k naan. Meñe jejjab jel̦ã lukkuun jete oraer, aolep kanaan kein rej jipañ kõj ñan tõmak bwe Jijej Kũraij ej Messaia eo.

[Kamelele ko itulal]