Kajjitõk ko jãn Ro Rej Riit

Ewi wãween jemaroñ mel̦el̦e kõn ripoot in kwal̦o̦k naan ko an doulul in ipel̦aakin lal̦?

Kajjojo iiõ, jej reim̦aanl̦o̦k ñan riiti ripoot ko ilo Yearbook eo ad. Jej lukkuun m̦õn̦õn̦õ ñan lo bwe el̦ap tõprak ko me armej ro an Jeova rej kõm̦m̦ani ilo aer kwal̦o̦k naan im katakin armej ro kõn Baibõl̦ eo. Bõtab bwe jen maroñ bõk el̦ap tokjãn jãn ripoot kein, ewõr jet men ko jej aikuj mel̦el̦e kaki. Jen lale jet iaaer.

Iiõ in kwal̦o̦k naan. Iiõ in kwal̦o̦k naan eo ej jinoe ilo kajjojo Jeptõmba im jem̦l̦o̦k ilo Okõj ilo iiõ eo tok juon. Ripoot ko me rej wal̦o̦k ilo Yearbook eo rej an iiõ eo im ej kab jem̦l̦o̦k. Ñan waanjoñak, ripoot ko jãn Jeptõmba 1, 2009, ñan Okõj 31, 2010, rej wal̦o̦k ilo Yearbook eo an 2011.

Oran ri kwal̦o̦k naan ro. Aolep ro me em̦õj aer peptaij im ri kwal̦o̦k naan ro rejañin peptaij rej pãd ium̦win naan eo rej ba “Ri Kwal̦o̦k Naan.” Rej bõnbõn ri kwal̦o̦k naan ro ilo ruo wãween. Wãween eo kein kajuon ej “Joñan eo El̦aptata” (Peak Publishers). Ej mel̦el̦ein ñe ej orl̦o̦k oran ri kwal̦o̦k naan ro ilo kajjojo allõñ ñan juon joñan me rejañin kar tõpar m̦okta. Ro rar rum̦wij in kanne ripoot ko aer renaaj del̦o̦ñ ilo ripoot eo an allõñ eo tok juon. Eñin unin jej aikuj m̦õkaj kõn ripoot ko ad kajjojo allõñ. Wãween eo kein karuo ej “Oran ri Kwal̦o̦k Naan ro ilo Kajjojo Allõñ” (Average Publishers). Men in ej jitõñl̦o̦k ñan oran ri kwal̦o̦k naan ro im rej kanne ripoot ko aer kajjojo allõñ.

Awa ko. Ekkar ñan Yearbook eo an 2011, Ri Kõnnaan ro an Jeova rar jol̦o̦k el̦apl̦o̦k jãn 1.6 bilien awa ko ilo jerbal in kwal̦o̦k naan. Bõtab, nõmba in ejjab kitibuj awa ko me elder ro rej kõjerbali ilo aer lol̦o̦k ri tõmak ro ñan rõjañ im kakajoor er. Jejjab bwinitok bar awa ko jej jol̦o̦ki ilo ad kweilo̦k, katak ippãd make im kõl̦mãnl̦o̦kjen̦.

Jããn. Jãn Jeptõmba 1, 2009 ñan Okõj 30, 2010, Ri Kõnnaan ro an Jeova rar kõjerbale enañin 155 milien jããn ñan jipañ special pioneer ro, mejinede ro, im bareinwõt em̦m̦aan ro me rej itoitak ñan jipañ im kakajoor congregation ko. Bõtab, jããn in ejjab kitibuj joñan jããn eo jej kõjerbali ñan kõm̦m̦ani Baibõl̦ ko im bok ko ad. Ejjab bar kitibuj joñan jããn eo jej kõjerbale ñan jipañ elõñl̦o̦k jãn 20,000 ri jerbal ro ilo Betel ko ipel̦aakin lal̦ in.

Kajjojo iiõ oran ro rej m̦õñã bred im idaak wain ilo Iien Keememej Mej eo an Kũraij ej wal̦o̦k ilo Yearbook eo. Oran in ej ke lukkuun jejjet ñan oran ri kabit ro im rej mour wõt? Eokwe, ejjab lukkuun. Etke? Jet armej rej bõktok wõt m̦antin kabuñ ko aer kar m̦okta. Bar jet emaroñ wõr aer nañinmej in kamelij im ej kõm̦m̦an bwe ren l̦õmn̦ak bwe er rej m̦õttan ri kabit ro. Kõn wõt men kein im un ko jet, jejjab maroñ jel̦ã im ejjab menin aikuj ñan ad jel̦ã lukkuun oran ri kabit ro im rej mour wõt ilo tõre in. Kumi eo Ej Tõl Ri Kõnnaan ro an Jeova ejjab je etan aolep ri kabit ro ak kõm̦m̦an juon aer laajrak kõn rein. *

Men eo drein jejel̦ã ej bwe enaaj wõr jet ri kabit ro me renaaj mour ilo lal̦ in ñe enaaj jino eñtaan eo el̦ap. (Rev. 7:​1-3) M̦ae iien en̦, ri kabit rein renaaj wõnm̦aanl̦o̦k wõt im tõl jerbal in kwal̦o̦k naan eo ad.

[Kamelele ko itulal]