Riit Baibõl̦ Ear Kakajoor Eõ ilo Aolepen Aõ Mour

Ekkar Ñan Marceau Leroy

IAR kũttiliek ilo ruum̦ eo aõ im riiti naan kein ilo juon bok, ej ba: “Ilo jinoin Anij ear kõm̦anm̦an lañ im lal̦.” Etke iar kũttiliek? Eokwe, kõnke jema ear juon eo im ejjab tõmak ilo Anij. Im eban kar m̦õn̦õn̦õ el̦aññe ear lo bok eo ij riiti. Bok rot in? Ej Baibõl̦ eo.

Ej kab iten kein kajuon in aõ riiti Baibõl̦ eo. Ke iar riiti naan ko jinointata ilo bok in Jenesis, iar lukkuun bwilõñ. Iar l̦õmn̦ak ippa make, ‘Eñin ijo ej kwal̦o̦k im kõmel̦el̦e kõn unin elukkuun jejjet im kon̦ an menin kõm̦anm̦an ko jerbal ippãn doon. Aolep iien iar l̦o̦kjen̦aõ kõn men kein!’ Joñan an kar lukkuun itoklimoũ, iar riiti Baibõl̦ eo jãn rualitõk awa jota ñan emãn awa jimmarok. Jãn iien in, iar imminene in riiti Baibõl̦ eo. Aõ kar riiti Baibõl̦ eo ear kakajoor eõ ilo aolepen mour eo aõ. Ewi wãween? Eokwe, inaaj kwal̦o̦k ñan kom̦ kiiõ.

“Kwõnaaj Aikuj Riiti Aolep Raan”

Iar l̦otak ilo iiõ eo 1926 ilo juon bukwõn etan Vermelles me ej pãd tueañ ilo aelõñ in France. Ebuñbuñ bukwõn in kõn an wõr melle ie. Ilo iien Bata eo an Lal̦ Kein Karuo, ear lukkuun aorõk melle kõnke ear jipañ aelõñ eo kõm̦m̦an jããn. Im kõnke iar jerbal ilo mine ko ak jikin ko rej kapok melle ie, iar jab aikuj in etal im tarin̦ae. Ak kõn aõ kõn̦aan mour ilo juon wãween em̦m̦anl̦o̦k, iar etal im jikuul̦ bwe in katak kilen kõm̦m̦an retio im jarom. Ke iar katak kõn men kein, iar maroñ kile bwe elukkuun jejjet im kon̦ wãween an menin kõm̦anm̦an ko jerbal ippãn doon. Ilo tõre eo ear 21 aõ iiõ, juon aõ classmate ear letok juon aõ Baibõl̦. Eñin kar Baibõl̦ eo aõ jinointata. L̦ein ear ba bwe ij aikuj riiti Baibõl̦ eo. Ãlikin aõ kar riiti aolepen Baibõl̦ eo, iar tõmak bwe Baibõl̦ eo ej an Anij. Naan ko raorõk an Anij ñan armej ro repãd ie.

Iar bõk 8 Baibõl̦ kõnke iar l̦õmn̦ak bwe ro ilo town eo aõ renaaj kõn̦aan bar riiti Baibõl̦ eo. Ak ke iar kõnnaan ippãer, rar kajjirere im jum̦ae eõ. Ro nukũ me el̦ap aer tõmak ilo men ko rejjab m̦ool ãinwõt bwijenro, rar kakkõl eõ kõn bok in. Rar ba, “Ñe kwo jino riiti bok in, kwõnaaj aikuj riiti aolep raan!” Em̦ool iar riiti aolep raan. Ijjab ajl̦o̦k kõn aõ kar kõm̦m̦ane men in. Jãn iien in, iar lukkuun imminene in riiti Baibõl̦ eo.

Ro ri iturũ rar jel̦ã bwe eitoklimoũ kõn Baibõl̦ eo. Im ke Ri Kõnnaan ro an Jeova rar lel̦o̦k aer bok, rar bũktok ñan ippa. Juon iaan bok kein kar bok eo etan Juon Lal̦, Juon Kien * (ej wal̦o̦k ilo pija eo ilo kajin French) im ej kõmel̦el̦e etke Baibõl̦ eo ej ba bwe Aelõñ eo wõt an Anij emaroñ namejelan apañ ko otemjej an armej. (Matu 6:⁠10)  Kõn men in, ear l̦apl̦o̦k aõ kõn̦aan kwal̦o̦k ñan ro jet kõn kõjatdikdik in.

Armej eo m̦oktata ear m̦õn̦õn̦õ in ebbõk an Baibõl̦ ippa ej Noël. L̦eo m̦õtta jãn ke iar dik. Kõnke ear kabuñ in Catholic, ear karõk bwe kõmro en etal im bwebwenato ippãn juon em̦m̦aan me ej jikuul̦ in pris. Kõn men in, iar jaad in mijak. Ak iar jel̦ã bwe ilo Sam 115:​4-8 ej ba bwe Anij edike kabuñ ñan ekjab. Im ilo Matu 23:​9, 10 ej ba ejjel̦o̦k juon en ãñinñin ri tõl in kabuñ ko kõn taitõl̦ ko ãinwõt Ri Kaki ak Bata. Eoon kein rar kakajoor eõ bwe in peran im jojomare tõmak eo aõ. Tokjãn men in, Noël ear lo m̦ool eo im ñan rainin ej juon iaan Ri Kõnnaan ro an Jeova.

Iar bareinwõt lol̦o̦k lio jeiõ. L̦eo ippãn ear wõr an bok in bubu im anijnij im enjel̦ ro renana rekõn kaamijak e im urõt e. Ilo jinoin iar l̦õmn̦ak bwe ejjel̦o̦k aõ maroñ ñan jipañ. Ak eoon eo ilo Hibru 1:​14, (UBS) ear kakajoor eõ bwe enjel̦ ro an Jeova renaaj jipañ eõ. Ke l̦eo pãleen lio jeiõ ear l̦oore naan in tõl ko jãn Baibõl̦ im jol̦o̦k aolep menin anijnij ko ippãn, enjel̦ ro renana rar jab bar wal̦o̦kl̦o̦k ñan e. Erro lio jeiõ rar jim̦or erom Ri Kõnnaan ro an Jeova me rekijejeto.

Ilo 1947, juon brother jãn Amedka etan Arthur Emoit ear itok ñan m̦weo im̦õ. Iar kanooj in m̦õn̦õn̦õ im iar kajjitõk ippãn ia eo Ri Kõnnaan ro an Jeova rej kweilo̦k ie. Ear ba bwe rej kweilo̦k ilo Liévin, 6 mail ettol̦o̦k jãn ijo jikũ. Ear pen ellolo bajkõl̦ ilo tõre eo. Kõn men in, iar etetal l̦o̦k ñan kweilo̦k im etetal tok ñan m̦weo im̦õ ium̦win elõñ allõñ. Kien ear kamo jerbal in kwal̦o̦k naan eo an Ri Kõnnaan ro an Jeova ilo France ium̦win 8 iiõ. Ilo kar tõre in, ear wõr wõt 2,380 Ri Kõnnaan ro an Jeova ilo aelõñ in. Elõñ iaan rein rar itok jãn aelõñ in Poland. Ak ilo kar Jeptõmba 1, 1947, kien ear bar kamãlim jerbal in kwal̦o̦k naan im m̦akũtkũt ko jet ad. Ra eo ilo Paris ilo bukwõn eo etan Villa Guibert ear bar jutak. Ear ejjel̦o̦k juon pioneer ilo France ñan jidik. Innem kar je juon katak ilo Tijemba 1947 Ad Jerbal ñan Aelõñ Eo (jem̦aan jekõn ba Informant) me ej kajjitõk im rõjañ ro jet ñan bõk kun̦aaer ilo jerbal in regular pioneer. Ilo iien in, regular pioneer ro rar aikuj kwal̦o̦k naan ium̦win 150 awa kajjojo allõñ. Ilo 1949, rar kadikl̦o̦k awa ko an regular pioneer ñan 100. Kõnke iar errã ilo naan ko an Jijej ilo Jon 17:​17 me ej ba, “[Naan in Anij] m̦ool eo,” iar peptaij ilo 1948. Im ilo Tijemba 1949, iar erom juon pioneer.

Jãn Kalbuuj ñan Bukwõn in Dunkerque

Ijo iar pioneer ie m̦oktata kar ilo Agen itueañ ilo France. Bõtab, ear jab aitok aõ pioneer ie. Kõnke ear jako aõ jerbal ilo jikin kapok melle eo, kien eo ear kõn̦aan bwe in erom ri tarin̦ae. Iar m̦akoko in erom juon ri tarin̦ae. Kõn men in, rar jilkinl̦o̦k eõ ñan jikin kalbuuj. Meñe rar jab kõtl̦o̦k bwe in bõk Baibõl̦ eo aõ, ak iar maroñ noje jet peij ko jãn bok in Sam. Kõn aõ kar riiti rar lukkuun kakajoor eõ. Innem, ke iar diwõj jãn kalbuuj iar aikuj kõm̦m̦ane juon jokããlõt. In wõnm̦aanl̦o̦k ke im pioneer ak bõjrak im kõm̦m̦an jããn im kalõk juon im̦õ em̦? Bar juon alen, men eo iar riiti ilo Baibõl̦ ear jipañ eõ. Iar kõl̦mãnl̦o̦kjen̦ kõn naan ko an Paul ilo Pilippai 4:​11-​13. Ej ba: “I maroñ in kõm̦m̦an men otemjej ilo Eo ej kakajoor eõ.” Kõn men in, iar peek ñan wõnm̦aanl̦o̦k im pioneer. Ilo 1950, rar jilkinl̦o̦k eõ ñan juon bar jikin im jerbal ie. Ej juon bukwõn iar kwal̦o̦k naan ie m̦oktal̦o̦k im etan Dunkerque.

Ke iar etal ñan bukwõn in, ear ejjel̦o̦k jabdewõt ippa. Ear lukkuun jorrããn bukwõn in jãn kar Bata eo an Lal̦ Kein Karuo. Innem, ear kanooj pen ellolo jikin jokwe. Iar etal im lol̦o̦k juon baam̦le me ikõn katak ippãer. Kõrã eo ilo m̦weo ear kanooj m̦õn̦õn̦õ in lo eõ. Ear ba: “Marceau elukkuun em̦m̦an bwe rar kõtl̦o̦k eok jãn kalbuuj! L̦eo ippa ej ba bwe el̦aññe aolep em̦m̦aan ren kar ãinwõt kwe, enaaj kar ejjel̦o̦k tarin̦ae.” Ear wõr bar juon m̦weier em̦ im rar rent kake ñan tourist ro. Innem, rar letok bwe in jokwe ie m̦ae iien tourist ro renaaj jam̦botok. Ilo ejja raan eo wõt l̦eo jein Arthur Emiot etan Evans ear letok juon aõ jerbal. Ear juon ri ukok ilo oab eo im ear aikuj juon ri waj in boñ ñan lale tim̦a eo. Ear kwal̦o̦k kajjieõ ñan Captain in tim̦a eo. Kõn aõ kar pãd ilo kalbuuj, iar lukkuun m̦õ in wõt n̦o̦k. Ke Evans ear kõmel̦el̦eik e kõn etke ilukkuun m̦õ, Captain eo ear ba bwe imaroñ kepel̦l̦o̦k  aij bo̦o̦k eo im kappok m̦õñã ie. Innem, ilo raan eo wõt iar ellolo aõ jikin jokwe, jerbal im bareinwõt kijõ! Men in ear kal̦apl̦o̦k aõ tõmak im lõke naan ko an Jijej ilo Matu 6:​25-​33.

Tokãlik ke tourist ro rar jam̦botok, kõmro pioneer eo m̦õtta etan Simon Apolinarski, kar aikuj kappok amro jikin jokwe. Jekdo̦o̦n ta, kõmro kar peek ñan wõnm̦aanl̦o̦k wõt im pioneer ijo. Juon armej ear m̦õn̦õn̦õ in kõtl̦o̦k amro kiki ilo m̦weo im̦õn kidia ko nejin. Kõmro ar kiki ioon ujooj ko kijen kidia ko. Aolep raan kõmro ar kwal̦o̦k naan. Im kõmro ar kwal̦o̦k naan ippãn armej eo nejin kidia ko im ear oktak im erom juon iaan Ri Kõnnaan ro an Jeova. Ejjab e wõt, ebar wõr ro jet me rar roñjake im erom Ri Kõnnaan ro an Jeova. Ejjabto tokãlik, juon nuujpeba ilo bukwõn eo ear kaamijak armej ro im ba bwe “Ri Kõnnaan ro an Jeova rej iten ukot aolep armej ro ilo town eo.” Ak ejjab m̦ool men in, kõnke eiet wõt Ri Kõnnaan ro an Jeova rar jokwe ilo bukwõn eo! Ke kõmro ar iion iien ko repen, kõmro kar jab ebbeer. Etke? Kõnke kõmro kar kõl̦mãnl̦o̦kjen̦ kõn kõjatdikdik eo amro im kõn wãween eo Jeova ear kõke aikuj ko amro. Ilo 1952, rar jilkinl̦o̦k eõ ñan bar juon bukwõn. Ke iar em̦m̦akũt ear wõr 30 Ri Kõnnaan ro an Jeova ilo Dunkerque.

Baibõl̦ Ear Kakajoor Eõ kõn Eddo ko Rekããl

Ãlikin wõt aõ kar pãd ilo Amiens ium̦win jidik iien, iar etal ñan bar juon bukwõn etan Boulogne-Billancourt im special pioneer ie. Jikin in epaak ñan Paris. Iar katak Baibõl̦ eo ippãn elõñ armej ro. Tokãlik jet iaaer rar pioneer im mijenede. Ewõr juon likao etan Guy Mabilat iar katak ippãn im ear peptaij. Tokãlik l̦ein ear bõk jerbal in lol̦o̦k congregation ko ãinwõt juon circuit overseer im district overseer. Ãlikin men in, ear loloorjake aer kar kalõke jikin kõm̦m̦an bok eo ilo Betel ilo Louviers, juon jikin ettol̦o̦k jidik jãn Paris. Kõn aõ kar kõmel̦el̦e jãn Baibõl̦ eo ilo jerbal in kwal̦o̦k naan aolep iien, ear kõm̦m̦an bwe in keememej wõt eoon ko ilo Baibõl̦. Men in ear lukkuun kalañlõñ eõ im kõm̦m̦an bwe in kapeel ilo aõ katakin armej ro.

Ilo 1953, ear jidimkij aer kajjitõk ippa bwe in lol̦o̦k congregation ko ilo jikin eo etan Alsace-Lorraine. Ruo alen an kar kien eo an Germany bõke jikin in im irooj ioon ikõtaan iiõ ko 1871 im 1945. Kõn men in, iar aikuj kate eõ bwe in bar kõnono kajin Germany. Ke iar jino lol̦o̦k congregation ko ie, ewõr jet wõt wa, TV, im typewriter. Ear ejjel̦o̦k retio ak computer. Bõtab iar jab bũrom̦õj im ebbeer. Ilo m̦ool, eñin iien eo el̦aptata aõ kar m̦õn̦õn̦õ. Ear iietl̦o̦k menin kam̦ad ko ilo tõre eo jãn raan kein. Innem, ear pidodol̦o̦k l̦oore naan ko ilo Baibõl̦ eo ñan jab m̦ad kõn men ko an lal̦.​​​—Matu 6:​19-​22.

Ilo 1955, ear wõr juon kweilo̦k el̦ap ilo Paris me etan “Aelõñ eo Ej Anjo̦.” Ear juon iien iban mel̦o̦kl̦o̦ke kõnke eñin iien eo iar loe lio ippa etan Irène Kolanski. Ear jino pioneer ilo iiõ eo m̦oktal̦o̦k jãn ña. Jemen im jinen rej ri Poland  im eto aer pãd ilo m̦ool eo. Juon brother etan Adolf Weber ear kwal̦o̦k naan ippãer ilo France. L̦ein ear karreoiki mel̦an eo an Brother Russell im ear itok ñan Europe ñan keeañ kõn nuuj eo em̦m̦an. Ilo 1956, kõmro Irène ar jutak. Innem ke iar lol̦o̦k congregation ko ear itok ippa tok. Ej juon jeraam̦m̦an el̦ap kõn an rejetake eõ ium̦win elõñ iiõ!

Ruo iiõ tokãlik, iar bõk jerbal in district overseer. Iar lol̦o̦k kweilo̦k ko rel̦ap im kwal̦o̦k katak ko. Bõtab kõn an jabwe brother ilo tõre eo, iar wõnm̦aanl̦o̦k wõt im lol̦o̦k jet congregation ko ãinwõt juon circuit overseer. Kõmro ar lukkuun poub! Kajjojo allõñ iar aikuj tõpar 100 awa ilo kwal̦o̦k naan. Bareinwõt iar kwal̦o̦k katak ko ilo kweilo̦k wiik otemjej. Iar lol̦o̦k jilu iaan bookstudy ko, loloorjake jerbal ko im ripoote m̦akũtkũt ko an congregation eo. Ak ewi wãween aõ kar maroñ riiti Baibõl̦ eo ke ilukkuun poub? Eokwe, kõl eo wõt ekkar bwe in kõm̦m̦ane ej kekeel jet peij jãn juon Baibõl̦ em̦or im bũki ippa. Jabdewõt iien iar kõttar juon armej, iar kwal̦o̦k peij ko im riiti. Meñe ekadu iien aõ kar riiti Baibõl̦ eo ak ear lukkuun in kakajoor eõ bwe in wõnm̦aanl̦o̦k wõt ilo jerbal eo aõ.

Ilo 1967, rar kũr kõmro Irène ñan etal im jerbal ilo Betel eo ilo bukwõn in Boulogne-Billancourt. Iar jino jerbal ilo opij eo ej loloorjake jerbal in kwal̦o̦k naan ilo France. Ñan kiiõ ij jerbal ilo opij in im ewõr tarrin 40 iiõ jim̦a in aõ jerbal ie. M̦õttan jerbal eo aõ ij uwaake lõta ko jãn ro im ewõr aer kajjitõk kõn Baibõl̦ eo. El̦ap aõ m̦õn̦õn̦õ kõn aõ kũbwij Naan in Anij im jojomare gospel eo. (Pilippai 1:​7, UBS) Im̦õn̦õn̦õ bwe jet iien ij lale iien unin tõl in jibboñ ilo Betel m̦okta jãn iien m̦abuñ. Ilo 1976, rar jitõñ eõ bwe in m̦õttan brother ro rej lale Betel eo ilo France.

Wãween Mour eo Em̦m̦antata

Elõñ iien ko repen iar iioni. Ak men eo el̦aptata an pen ippa ej kiiõ ke kõmro Irène ej bwijwol̦ã l̦o̦k wõt im ewõr amro nañinmej. Im jet iien ejjab lukkuun l̦ap amro maroñ. Ak kõn amro wõnm̦aanl̦o̦k wõt im riiti im katak Naan in Anij, men in ej jipañ kõmro ñan jab ebbeer. El̦ap amro m̦õn̦õn̦õ ñe kõmro ej bus l̦o̦k ñan jikin eo kõmij kwal̦o̦k naan ie im jaketo jaketak nuuj eo em̦m̦an ippãn ro jet. Koba in aolep iiõ ko in amro pioneer im jerbal ilo Betel ej 120 jim̦a iiõ. Innem kõmro ej rõjañ ro rej kõn̦aan jibadek jerbal kein bwe eñin ej wãween mour eo em̦m̦antata, ekamõnõnõ, im wõr tokjãn. Ke Kiiñ Devid ear je Sam 37:​25, (UBS) ear juon l̦al̦l̦ap. Bõtab, ãinwõt e, “ijjañin lo an Iroij ellok jen juõn armij emmõn.”

Ilo aolepen mour e aõ, Jeova ear kakajoor eõ ikijjeen Naan eo an. Ro nukũ rar ba 60 iiõ ko remootl̦o̦k bwe ñe inaaj jino riiti Baibõl̦ eo, inaaj aikuj riiti aolep raan. Ejim̦we aer kar ba men in kõnke aolep raan ij riiti Baibõl̦ eo. Ej juon men ij imminene in kõm̦m̦ane im ijjab ajl̦o̦k kake ñan jidik!

[Kamelele ko itulal]

[Pija ilo peij 5]

Simon im ña

[Pija ilo peij 5]

Ke iar district overseer

[Pija ilo peij 5]

Baibõl̦ eo ãinl̦o̦k wõt kar Baibõl̦ eo aõ jinointata

[Pija ilo peij 6]

Raan eo kõmro ar jutak

[Pija ilo peij 6]

Elukkuun em̦m̦an ippemro Irène riit im katak Naan in Anij