Jen Lañlõñ Ippãn Doon!

EPENL̦O̦K an armej ro ilo raan kein lo lañlõñ im m̦õn̦õn̦õ. Eñin unin emaroñ pen an armej ro kwal̦o̦k naan in rõjañ ko ñan ro jet. Men in em̦ool, el̦aptata ñe armej ro rej jokwe ilo bukwõn ko rel̦ap im robrak kõn elõñ armej ro. Im emaroñ kõm̦m̦an bwe armej ro ren kamakel̦o̦k iaaer im jab kõm̦m̦ao ippãn ro jet.

Juon rũkaki ilo college etan Alberto Oliverio ear ba bwe armej ro rej jokwe ilo bukwõn ko robrak kõn elõñ armej ekkã aer kamakel̦o̦k iaaer im bũrom̦õj. Ear bar ba bwe rein me rej jokwe ilo bukwõn ko rel̦ap ekkã aer jab kõm̦m̦ao ippãn armej ro rej jerbal ippãer, ro ituruer, im ro jet. Aer kamakel̦o̦k iaaer ej kal̦apl̦o̦k wõt aer bũrom̦õj.

Bõtab, ejjab ãindein ippãn Kũrjin ro m̦õttad. Rijjelõk Paul ear je: “Kom̦win lañlõñ iien otemjej.” (1 Tessalonika 5:​16) Elõñ un ko unin ad lañlõñ im m̦õn̦õn̦õ ippãn doon. Jej lañlõñ im m̦õn̦õn̦õ kõnke jej kabuñ ñan Jeova, Anij eo Eutiejtata. Bareinwõt, jemel̦el̦e kõn katak ko rem̦ool ilo Baibõl̦, kab ewõr ad  kõjatdikdik bwe jenaaj bõk lo̦mo̦o̦r im mour indeeo. Im jemaroñ jipañ ro jet ñan aer bõk jeraam̦m̦an kein.​​—Sam 106:​4, 5; Jeremaia 15:​16; Rom 12:​12.

Kũrjin ro rem̦ool rej lañlõñ im kwal̦o̦k aer m̦õn̦õn̦õ ippãn doon. Eñin unin Paul ear je ñan ro ilo Pilippai: “Ij lañlõñ, im ij m̦õn̦õn̦õ ippemi otemjej. Im ãindein kom̦ barãinwõt lañlõñ im m̦õn̦õn̦õ ippa.” (Pilippai 2:​17, 18) Ilo eoon kein, ruo alen an kar Paul kõnono kõn lañlõñ im ad m̦õn̦õn̦õ ippãn doon.

Bõtab, Kũrjin ro rej aikuj kõjparok bwe ren jab kamakel̦o̦k iaaer. El̦aññe jej kamakel̦o̦k iaad, jeban m̦õn̦õn̦õ im lañlõñ ippãn ro jeid im jatid. Kõn men in, ewi wãween jemaroñ l̦oor naan in rõjañ eo an Paul bwe jen “lañlõñ ilo Irooj” ippãn ri tõmak ro jeid im jatid?​​—Pilippai 3:⁠1.

Lañlõñ Ippãn Ro Jeid im Jatid

Ke Paul ear je lõta eo an ñan ri Pilippai ro, bõlen ear pãd ilo kalbuuj ilo Rom kõn an kar kwal̦o̦k naan. (Pilippai 1:​7, UBS; 4:​22) Bõtab, an kar pãd ilo kalbuuj ear jab kadikl̦o̦k an kijejeto ilo jerbal in kwal̦o̦k naan. Ear m̦õn̦õn̦õ in kamaat an maroñ ilo jerbal eo an Jeova. (Pilippai 2:​17) Meñe Paul ear iion apañ ko, ak ear lañlõñ wõt. Meñe ear pãd ilo kalbuuj, ear ba: “Eban jemlok aõ mõnõnõ.”​​—Pilippai 1:​18, UBS.

Paul ear jipañ kajutõke congregation eo ilo Pilippai im ear epaake ro jein im jatin ijo. Paul ear jel̦ã bwe el̦aññe enaaj kwal̦o̦k ñan ro ilo Pilippai kõn an lañlõñ ilo jerbal eo an Jeova, enaaj kakajoor er. Kõn men in, ear je: “Ro jeiũ im jatũ, ikõnan bwe komin jelã bwe men otemjej rar walok ñõn iõ rar kanuij kowõnmanlok gospel eo. Kin men in, ri baar ro otemjej ilo imõn iroij kab aoleb ro rej bed ijin, remelele bwe ij ri prison kin aõ jerbal ñõn Christ.” (Pilippai 1:​12, 13, UBS) Juon wãween Paul ear maroñ lañlõñ im m̦õn̦õn̦õ ippãn ro jein im jatin kar ilo an kakajoor er kõn naan kein an. Innem ri Pilippai ro rar bar m̦õn̦õn̦õ ippãn Paul. Ri Pilippai ro rar jab aikuj bũrom̦õj kõn apañ ko me Paul ear aikuj iioni. Bõtab, rar aikuj anõke joñak eo an. (Pilippai 1:​14, UBS; 3:​17, UBS) Bareinwõt, ri Pilippai ro rar maroñ wõnm̦aanl̦o̦k ilo aer likũt Paul ilo jar ko aer im jipañ e kab rejetake.​​—Pilippai 1:​19, UBS; 4:​14-​16, UBS.

Jej ke l̦oore joñak in an Paul? Jej ke m̦õn̦õn̦õ wõt meñe jej iion apañ ko ilo mour eo ad ak mãlejjoñ ko ilo jerbal in kwal̦o̦k naan? Ñe jej  bwebwenato ippãn ro jeid im jatid, jemaroñ lañlõñ ippãn doon el̦aññe jej kwal̦o̦k naan in rõjañ ko ak ta ko rar wal̦o̦k ilo jerbal in kwal̦o̦k naan. Meñe emaroñ jab l̦ap ad lo tõprak ilo jerbal in kwal̦o̦k naan, ak jemaroñ kakajoor ro jeid im jatid. Ta eo jemaroñ ba? Bõlen jaar maroñ kaitoklimoen juon armej kõn nuuj eo em̦m̦an ke jaar kõjerbal juon naan in kepel̦l̦o̦k ekaitoktoklimo ak kõmel̦el̦e ilo juon wãween ebolemen. Bõlen jaar bwebwenato ippãn juon armej kõn juon eoon ilo Baibõl̦. Ak bõlen juon ilo territory eo ear kile bwe jej Ri Kõnnaan ro an Jeova im rar nõbar kõj. El̦aññe jej bwebwenato ippãn ro jeid im jatid kõn men kein, jemaroñ lañlõñ im m̦õn̦õn̦õ ippãn doon.

Elõñ iaan ri karejar ro an Jeova rar kaarmejjeteik er make bwe ren maroñ kõm̦m̦ane jerbal in kwal̦o̦k naan eo. Im elõñ rej wõnm̦aanl̦o̦k wõt ilo aer kõm̦m̦ane men in. Rein rej pioneer ro, overseer ro rej itoitak im lol̦o̦k congregation ko, ro rej jerbal ilo Betel, mejinede ro, im ro rej jipañ kalõk im̦õn kweilo̦k ko im Betel ko ipel̦aakin lal̦ in. Rein rej lañlõñ ilo aer jerbal. Jej ke lañlõñ im m̦õn̦õn̦õ kõn jerbal ko aer? Eokwe jen kwal̦o̦k ad kam̦m̦oolol kake rein rej ‘jerbal ippãd kõn aelõñ in Anij.’ (Kolosse 4:​11) Jemaroñ rõjañ rein ñe jej iione er ilo kweilo̦k ko ak kweilo̦k ko rel̦ap. Jemaroñ bareinwõt anõke kijejeto eo aer. Im jemaroñ bar kõm̦m̦an iien ñan ad roñjake bwebwenato ko im naan in rõjañ ko aer. Bõlen jemaroñ kõm̦m̦an iien ñan m̦õñã ippãer.​​—Pilippai 4:​10, UBS.

Lañlõñ Ippãn Ro Rej Iion Mãlejjoñ Ko

Ke Paul ear kijenmej ium̦win jum̦ae im mãlejjoñ ko, men in ear kakajoor e bwe en tiljek wõt ñan Jeova. (Kolosse 1:​24, UBS; Jemes 1:​2, 3, UBS) Paul ear jel̦ã bwe ro ilo Pilippai renaaj bar iion ejja mãlejjoñ kein. Ear bar jel̦ã bwe an kijenmej enaaj kakajoor er. Kõn men in, ear lañlõñ im m̦õn̦õn̦õ ippãn rein jein im jatin. Ear je: “Bwe em̦õj lewõj ñan kom̦ kõn Kraist, jab bwe kom̦win lõke e wõt, a barãinwõt bwe kom̦win eñtaan kõn e, im ippemi eñtaan eo kom̦ ar lo ilo ña, im kiiõ kom̦ roñjake bwe ej ilo ña.”​​—Pilippai 1:​29, 30.

Kũrjin ro rainin rej bareinwõt eñtaan kõn jum̦ae ko rej iioni kõn aer kwal̦o̦k naan. Jet iien ri jum̦ae ro rej lãj ñan Kũrjin ro im remaroñ etaoik er. Jet iien, ro rar ilo̦k jãn m̦ool eo rej kananaik kõj, ro nukid remaroñ jum̦ae kõj, ak ro ilo jikin jerbal im jikin jikuul̦ remaroñ kajjirere kake kõj. Bõtab, Jijej ear ba bwe ñe jej iion wãween kein jejjab aikuj bwilõñ ak ebbeer. Jãn men in, jen lañlõñ. Etke? Ear ba: “E m̦õn̦õn̦õ kom̦ ñe armej re naaj kajjirere kake kom̦, im matõrtõr kom̦, im naaj ba naan ko re nana otemjej n̦ae kom̦, riab wõt, kõn ña. Kom̦win lañlõñ im kanooj buñbũruemi, bwe el̦ap jinõkjeej ñan kom̦ i lañ; bwe ãindein aer matõrtõr ri kanaan ro m̦okta jãn kom̦.”​​—Matu 5:​11, 12.

Ñe jej roñ bwe ro jeid im jatid ilo jikin ko jet rej iion el̦ap matõrtõr, jejjab aikuj mijak ak lõl̦ño̦ñ. Bõtab, jej aikuj lañlõñ kõn an rein kijenmej wõt. Jemaroñ jar kõn er im kajjitõk ippãn Jeova bwe en kakajoor aer tõmak im jipañ er ñan kijenmej wõt. (Pilippai 1:​3, 4, UBS) Bõlen erkein men ko wõt im jemaroñ kõm̦m̦ani ñan rein jeid im jatid. Bõtab jemaroñ jipañ ro ilo congregation eo ad im rej iioni mãlejjoñ ko. Jemaroñ kõm̦m̦an ad iien ippãer im jipañ er. Jemaroñ bar kũrtok er ñan iien katak eo an baam̦le eo ad, jerbal ippãer ilo jerbal in kwal̦o̦k naan, im kõm̦m̦an iien ippãer ilo menin kam̦õn̦õn̦õ ko. Ilo wãween in jej kwal̦o̦k ad lañlõñ ippãer.

Elõñ un ko unin ad lañlõñ im m̦õn̦õn̦õ ippãn doon! Jen jab kamakel̦o̦k iaad ãinwõt ro jet ilo lal̦ in. Ak jen wõnm̦aanl̦o̦k wõt im lañlõñ ippãn ro jeid im jatid. Ilo ad kõm̦m̦ane men in, enaaj l̦apl̦o̦k ad yokwe im bõrokuk ilo congregation eo. Bareinwõt, jenaaj lañlõñ im m̦õn̦õn̦õ kõn ro jeid im jatid ipel̦aakin lal̦. (Pilippai 2:​1, 2) Aet, jen “lañlõñ ilo Irooj iien otemjej.” Paul ej rõjañ kõj: “Ij bar ba, kom̦win lañlõñ!”​​—Pilippai 4:⁠4.

[Pija ilo peij 6]

Globe: Courtesy of Replogle Globes