“Kainemmõn Ro Otemjej Rej Buromõj”
“Kainemmõn Ro Otemjej Rej Buromõj”
“[Anij] ear jilkintok iõ bwe in kainemmõn ro otemjej rej buromõj.”—AISEIA 61:2, UBS.
1. Ta eo Jijej ear kõm̦m̦ane ñan ro rar bũrom̦õj? Etke?
JIJEJ KŨRAIJ ear ba: “Kijiõ bwe in kõm̦anm̦an ankilaan Eo e ar jilkintok eõ, im bwe in kam̦õjl̦o̦k jerbal eo An.” (Jon 4:34) Jeova ear lel̦o̦k ñan Jijej juon jerbal bwe en kõm̦m̦ane. Ke Jijej ear kõm̦m̦ane jerbal in, ear kwal̦o̦k yokwe ñan armej ro ãinwõt Jemen. (1 Jon 4:7-10) Rijjelõk Paul ear kõnono kõn juon iaan wãween ko Jeova ej kwal̦o̦k yokwe. Ear ba bwe Jeova ej “Anij in kaenõm̦m̦an otemjej.” (2 Korint 1:3, NW) Ke Jijej ear kwal̦o̦k naan, ear kwal̦o̦k yokwe ilo ejja wãween in. Aiseia ear kanaan bwe en kar kõm̦m̦ane men in. (Riit Aiseia 61:2, UBS.) Jijej make ear kalikkar bwe ear kajejjete kanaan in an Aiseia. (Luk 4:16-21) Ke ear kwal̦o̦k naan, Jijej ear kaenõm̦m̦an ro rar bũrom̦õj im ear rõjañ er im kõm̦m̦an bwe en jako aer inepata.
2, 3. Etke rũkal̦oor ro an Jijej rej aikuj kaenõm̦m̦an ro jet?
2 Aolep rũkal̦oor ro an Jijej rej aikuj kaenõm̦m̦an ro rej bũrom̦õj. (1 Korint 11:1) Paul ear ba: “Kom̦win kaenõm̦m̦ane doon, im kalõk doon, ãinwõt ami kõm̦anm̦an.” (1 Tessalonika 5:11) Jej aikuj kaenõm̦m̦an ro jet el̦aptata kõnke jej mour ilo “iien ko re nana.” (2 Timote 3:1) Kõnke ej lõñl̦o̦k wõt armej ro renana me rej ba im kõm̦m̦ani men ko rej kainepataik ro jet, men in ej kõm̦m̦an bwe en pen mour eo an armej ro rem̦m̦an.
3 Baibõl̦ eo ear kanaan bwe ilo raan kein ãliktata ilo jukjuk im pãd in enana, elõñ renaaj “yokwe er make, im renaaj ri arõk m̦weiuk, im ri ju-wal̦õñl̦õñ, im ri kajjirere, im ro rej kipiliia ñan jemaer im jinier, im ro re jab kam̦m̦oolol, im ri nana, im ro re jab yokwe ro nukier, im ro re lãj, im ro rej kõnnaan naan in riab, ro re jab kõmmanwa, rawiia, ro rej dike em̦m̦an, ro ri ketak, ro rej kõm̦m̦an jet men m̦okta jãn aer l̦õmn̦ak kake, ro ri kõmmejãje, im ro rej yokwe men in kabuñbũrueir el̦ap jãn aer yokwe Anij.” Ãinwõt an Baibõl̦ eo ba, l̦õmn̦ak im kõm̦m̦an ko an armej ro renana rej nanal̦o̦k wõt.—2 Timote 3:2-4, 13.
4. Ewi wãween lal̦ in rainin?
4 Jejjab bwilõñ ñe jej lo aolep men kein renana kõnke Baibõl̦ eo ej kalikkar bwe “aolepen lal̦ ej pãd wõt ilo ri nana eo.” (1 Jon 5:19) Ñe ej ba “aolepen lal̦,” ej kitibuj kien ko, kabuñ ko, peejnej ko, im wãween ko Setan ej kõjerbali ñan kajeded l̦õmn̦ak ko an retao. Alikkar bwe Setan Tepil̦ eo ej “irooj in lal̦ in” im “anij in lal̦ in.” (Jon 14:30; 2 Korint 4:4) Wãween ko ilo lal̦ in rej nanal̦o̦k wõt kõnke kiiõ el̦ap an Setan illu. Ejel̦ã bwe jidik wõt iien ippãn. (Revelesõn 12:12) M̦õttan jidik Anij enaaj jol̦o̦k Setan im jukjuk im pãd in an enana im naaj kam̦ool an jim̦we irooj bõtata eo An. Ad jel̦ã kõn men kein ej kaenõm̦m̦an kõj!—Jenesis, jebta 3; Job, jebta 2.
Nuuj eo Em̦m̦an Ej Ajeededl̦o̦k Wõt Ipel̦aakin Lal̦
5. Ewi wãween kanaan eo kõn jerbal in kwal̦o̦k naan ej jejjet kitien ilo raan kein ãliktata?
5 Jijej ear kanaan im ba: “Naaj kwal̦o̦k gospel in an aelõñ in lañ i aolepen lal̦ kõn men in kõnnaan ñan aelõñ otemjel̦o̦k, ilo iien eo enaaj itok jem̦l̦o̦kõn.” (Matu 24:14) Ãinwõt an Jijej kar ba, ro doon Jeova ipel̦aakin lal̦ in rej kwal̦o̦k gospel eo kõn Aelõñ in Anij. Rainin, elõñl̦o̦k jãn 7,500,000 Ri Kõnnaan ro an Jeova rej kõm̦m̦ane jerbal in im rej pãd ilo elõñl̦o̦k jãn 107,000 congregation ko. Jijej ear kwal̦o̦k naan im katakin armej ro kõn Aelõñ in Anij im Ri Kõnnaan ro an Jeova rej bar kõm̦m̦ane men in. (Matu 24:17) Ikijjeen jerbal in kwal̦o̦k naan, rein rej kaenõm̦m̦an elõñ armej ro rebũrom̦õj. Ilo 2009 im 2010, ear wõr 570,601 armej ro rar peptaij im erom Ri Kõnnaan ro an Jeova!
6. Ewi am̦ l̦õmn̦ak kõn wõnm̦aanl̦o̦k ko rej wal̦o̦k kõn jerbal in kwal̦o̦k naan?
6 Ri Kõnnaan ro an Jeova rej kiiõ ukote bok ko rej pedped ioon Baibõl̦ eo ilo elõñl̦o̦k jãn 500 kajin ko im rej lito-litak ippãn armej ro. Ejañin wõr juon em̦õj an kõm̦m̦ane kain jerbal rot in! Meñe ro doon Jeova rej mour ilo lal̦ in me ej pãd ium̦win kajoor eo an Setan, ak rein rej niknik wõt ilo jerbal eo an Jeova im rej orl̦o̦k wõt. Men in eban kar tõprak el̦aññe kajoor eo an Anij ear jab jipañ im tõl er. Nuuj eo em̦m̦an ej ajeededl̦o̦k wõt ipel̦aakin lal̦. Innem armej ro rej m̦õn̦õn̦õ in roñjake nuuj eo em̦m̦an kõn Aelõñ eo remaroñ bõk kaenõm̦m̦an jãn Baibõl̦ eo ãinwõt Ri Kõnnaan ro an Jeova.
Ro Jet ilo Congregation eo Remaroñ Kaenõm̦m̦an Kõj
7. (1) Etke jejjab aikuj kõtmãne bwe Jeova enaaj jol̦o̦k aolep men ko im rej kabũrom̦õj kõj kiiõ? (2) Ewi wãween ad jel̦ã bwe ewõr ad maroñ ñan kijenmej ium̦win matõrtõr im eñtaan?
7 Kõn ad mour ilo juon lal̦ eobrak kõn nana, kõj aolep jenaaj baj iion wãween ko me renaaj kainepataik im kabũrom̦õj kõj. Jen jab kõtmãne bwe Anij enaaj jol̦o̦k aolep men ko im rej kabũrom̦õj kõj kiiõ kõnke jej aikuj kõttar iien eo ñe enaaj ko̦kkure jukjuk im pãd in enana. Ke jej kõttare tok iien in, jenaaj iion matõrtõr. Men in enaaj mãlejjoñe tiljek eo ad ñan Jeova im ad rejetake irooj bõtata eo an. (2 Timote 3:12) Bõtab, el̦aññe jej bõk jipañ im kaenõm̦m̦an jãn Jeova, jemaroñ ãinwõt Kũrjin ri kabit ro etto ilo Tessalonika. Rein rar “kijenmej im tõmak” ilo iien ko rar iion matõrtõr im eñtaan otemjej.—Riit 2 Tessalonika 1:3-5.
8. Ewi wãween an Baibõl̦ eo kwal̦o̦k bwe Jeova ej kaenõm̦m̦an ro ri karejaran?
8 Jeova ej kaenõm̦m̦an ro ri karejaran. Ñan waanjoñak, ke lerooj eo enana etan Jezebel ear kõn̦aan m̦an Ilaija, Ilaija ear mijak im ear ko. Ilaija ear bareinwõt ba bwe ekõn̦aan mej. Bõtab, ijello̦kun an Jeova kauweik Ilaija, Jeova ear kaenõm̦m̦an e im kaperan e bwe en wõnm̦aanl̦o̦k wõt im kõm̦m̦ane jerbal eo an ãinwõt juon ri kanaan. (1 Kiiñ 19:1-21) Bar juon waanjoñak kõn wãween an Jeova kaenõm̦m̦an armej ro doon ej ilo an kar jipañ congregation eo ilo iien ko an rijjelõk ro. Baibõl̦ eo ej ba bwe ‘eklejia eo ilo aolepen Judia im Galili im Sameria ej aenõm̦m̦an, im eddekl̦o̦k; im ej etetal ilo mijak Irooj im bõk kaenõm̦m̦an jãn kajoor eo an Anij, im ej orl̦o̦k.’ (Jerbal 9:31) Rainin, kajoor eo an Anij ej bar jipañ kaenõm̦m̦an kõj. El̦ap ad kam̦m̦oolol kake men in!
9. Ñe jej katak kõn Jijej, etke men in emaroñ kaenõm̦m̦an kõj?
9 Ãinwõt Kũrjin ro, jej bõk kaenõm̦m̦an ñe jej katak kõn Jijej Kũraij im l̦oor joñak eo an. Jijej ear ba: “Kom̦win itok ñan ippa, kom̦ otemjej rej jerbal im ban, im inaaj kakkijeik kom̦. Kom̦win bõk aõ ine im likũte i aerami, im katak ippa, bwe ij ineem̦m̦an im ettã bũruõ, im kom̦ naaj lo an ami kakkije. Bwe aõ ine ej em̦m̦an, im men eo ij ineke e mera.” (Matu 11:28-30) Ñe jaar inepata im jej katak kõn wãween an kar Jijej kwal̦o̦k jouj im yokwe ñan armej ro im kajjioñe e, men in emaroñ kaenõm̦m̦an kõj.
10, 11. Wõn ro ilo congregation eo remaroñ kaenõm̦m̦ane kõj?
10 Jemaroñ bareinwõt bõk kaenõm̦m̦an jãn ro jet ilo congregation eo. Ñan waanjoñak, baj l̦õmn̦ak m̦õk kõn wãween an elder ro jipañ ro rej m̦õjn̦o̦ ilo tõmak. Jemes ear je: “Jabdewõt iaami e nañinmej ke? En ãñiñintok elder ro an eklejia, im ren jar ioon im kapit e kõn oil ilo etan Irooj.” Im ta eo ej wal̦o̦k ñe rej kõm̦m̦ane men in? “Jar in tõmak enaaj kemour ri nañinmej eo, im Irooj enaaj kajerkak e; im el̦aññe e kar kõm̦m̦an jero̦wiwi ko, naaj jeorl̦o̦k jãn e.” (Jemes 5:14, 15) Bõtab, ejjab elder ro wõt remaroñ kaenõm̦m̦ane ro jet ilo congregation eo.
11 Ekkã an pidodol̦o̦k ñan an kõrã ro kõnono ippãn kõrã ro jet kõn apañ ko aer. El̦aptata, sister ro rerũtto im el̦ap aer imminene remaroñ lel̦o̦k naan in kakapilõk ko rem̦m̦an ñan sister ro reddik. Bõlen rein rerũtto rar iion ejja wãween ko ro reddik rej iioni. Ilo aer roñjake im kwal̦o̦k aer kea kake er, emaroñ l̦ap an sister rein rerũtto jipañ sister ro reddik. (Riit Taitõs 2:3-5.) Ilo m̦ool, elder ro im ro jet remaroñ “kaperan ro re kũm̦kũm̦” ak ro rebũrom̦õj im ej juon men rej aikuj kõm̦m̦ane. (1 Tessalonika 5:14, 15) Im jen keememej bwe Anij ‘ej kaenõm̦m̦ane kõj ilo ad jorrããn otemjej, bwe jen maroñ in kaenõm̦m̦ane ro rej pãd ilo jabdewõt jorrããn.’—2 Korint 1:4.
12. Etke eaorõk bwe jen pãd ilo iien kweilo̦k ko?
12 Ekanooj aorõk bwe jen pãd ilo iien kweilo̦k ko kõnke enaaj kaenõm̦m̦an kõj. Katak ko jãn Baibõl̦ eo im jej roñjaki ilo kweilo̦k ko rej kõketak kõj. Baibõl̦ eo ej ba bwe Judas im Sailas rar rõjañ ro “jemjein jemjaten kõn elõñ naan, im kakajoor bũrueir.” (Jerbal 15:32) Ro ilo congregation eo rej bwebwenato im kõketak doon m̦okta jãn an jino kweilo̦k im ãlikin kweilo̦k. Innem meñe jemaroñ inepata ak bũrom̦õj kõn juon men, em̦m̦anl̦o̦k jen kobal̦o̦k ippãn ri tõmak ro m̦õttad. Jen jab kamakel̦o̦k iaad kõnke men in enaaj kabũrom̦õjl̦o̦k wõt kõj. (Jabõn Kõnnaan 18:1) Jen l̦oor naan kein an rijjelõk Paul. Ear ba: “Jen lale wãween ad maroñ rõjañ doon ñan yokwe im jerbal ko rem̦m̦an, im jen jab likũt ad kweilo̦k im jar, ãinwõt m̦anit an jet, a jen [rõjañ, NW] doon im kal̦apl̦o̦k ad kõm̦m̦an men in, bwe jej lo an raan eo epaaktok.”—Hibru 10:24, 25.
Baibõl̦ eo Ej Kaenõm̦m̦an Kõj
13, 14. Ilo wãween et ko Baibõl̦ eo emaroñ kaenõm̦m̦an kõj?
13 Jekdo̦o̦n ñe em̦õj ad peptaij ak jej kab jino katak kõn Anij im ankilaan, jemaroñ bõk kaenõm̦m̦an jãn Baibõl̦ eo. Paul ear je: “Jabdewõt men ko ar jeje m̦okta, ar jeje kein katakin kõj, bwe kõj kõn kijenmej, im kõn aenõm̦m̦an jãn Jeje ko, en wor ad kõjatdikdik.” (Rom 15:4) Baibõl̦ eo emaroñ kaenõm̦m̦an kõj im kõm̦m̦an bwe jen ‘bolemen ñan kõm̦m̦ani aolep kain jerbal ko rem̦m̦an.’ (2 Timote 3:16, 17, UBS) Jemaroñ katak m̦ool eo kõn ankilaan Anij im kõjatdikdik eo kõn ilju im jekl̦aj ilo ad riit im etale Baibõl̦ eo kab bok ko ad. Wãween in enaaj kaenõm̦m̦an kõj im jipañ kõj ilo elõñ wãween ko.
14 Jijej ear likũt juon joñak em̦m̦an ñan kõj ke ear kõjerbale Jeje ko ñan katakin im kaenõm̦m̦an ro jet. Ãlikin an kar Jijej jerkakpeje, ear wal̦o̦k ñan ruo iaan rũkal̦oor ro an. Ear kõmel̦el̦eik Jeje ko ñan erro. Ejjel̦o̦k pere bwe men in ear kaenõm̦m̦an erro. (Luk 24:32) Rijjelõk Paul ear kajjioñe joñak in em̦m̦an an Jijej im ear kõmel̦el̦eik armej ro ilo an kar kõjerbal Jeje ko. Ro rar roñjake e ilo Beria rar “m̦õkaj aer bõk naan im m̦õn̦õn̦õ, im pukot ilo Jeje ko raan otemjej.” (Jerbal 17:2, 10, 11) Innem elukkuun aorõk bwe jen riiti Baibõl̦ eo raan otemjej ekoba bok ko jet ad im kõtl̦o̦k bwe naan ko ie ren jipañ kõj! Men in enaaj kaenõm̦m̦an kõj im letok kõjatdikdik ñan kõj ilo raan kein renana.
Wãween ko Jet ñan Kaenõm̦m̦an Ro Jet
15, 16. Ta jet iaan men ko jemaroñ kõm̦m̦ani ñan jipañ im kaenõm̦m̦an ri tõmak ro jeid im jatid?
15 Elõñ men ko jemaroñ kõm̦m̦ani ñan jipañ im kaenõm̦m̦an ro jeid im jatid ilo tõmak. Ñan waanjoñak, jemaroñ jipañ ro rerũtto ak ro renañinmej ilo ad kaikujkuj ñan er. Jemaroñ jipañ ro jet kõn jerbal ko rej aikuj kõm̦m̦ani ilo m̦oko im̦wier. Men in enaaj kwal̦o̦k bwe jej kea kake er im kõn̦aan jipañ er. (Pilippai 2:4) Jemaroñ bareinwõt nõbar ro jet kõn aer kapeel im kõn aer kwal̦o̦k yokwe, peran, im tõmak.
16 Juon wãween jemaroñ kaenõm̦m̦ane ro rerũtto ej ilo ad lol̦o̦k er im roñjake aer bwebwenato kõn mour eo aer im jeraam̦m̦an ko rar loi kõn aer karejar ñan Jeova. Ad kõm̦m̦ane men in emaroñ bar kõketak im kaenõm̦m̦an kõj! Bareinwõt jemaroñ riiti Baibõl̦ eo ak bok ko jet ippãn ro jej lol̦o̦k er. Bõlen jemaroñ katak ippãn doon im kapoje Imõniaroñroñ eo ak bok eo jenaaj katak kake ilo iien Katak Baibõl̦ an Congregation eo iloan wiik eo. Jemaroñ bar alwõje juon iaan DVD ko ad ippãer. Im jemaroñ riit ak kwal̦o̦k kõn juon bwebwenato ekõketak jãn juon iaan bok ko ad.
17, 18. Etke jemaroñ lõke bwe Jeova enaaj jipañ im kaenõm̦m̦an ri karejar ro an retiljek?
17 El̦aññe jejel̦ã bwe juon jeid im jatid ej aikuj bõk kaenõm̦m̦an, jemaroñ jar kake e. (Rom 15:30; Kolosse 4:12) Ñe jej inepata ak bũrom̦õj kõn wãween ko reppen jej iioni im bareinwõt ñe jej kajjioñ kaenõm̦m̦an ro jet, jemaroñ ãinwõt Devid. Ear ba: “Komin likit ami inebata ibben Iroij im enaj jibañ kom. Ejamin kõtlok bwe ro jet ren anjo ion juõn ri wãnik.” (Sam 55:22, UBS) Iien otemjej Jeova enaaj kaenõm̦m̦an kõj im ejamin kabũrom̦õj ri karejar ro an retiljek.
18 Anij ear jiroñ ri karejar ro an etto: “Ña, aet ña wõt, eo ej kaaenõm̦m̦an eok.” (Aiseia 51:12) Jeova enaaj bar kaenõm̦m̦an kõj. Enaaj kajeraam̦m̦an kõj ñe jej kate kõj ñan kaenõm̦m̦an ro jet. Meñe kõjatdikdik eo ad ej ñan mour ilañ ak ioon lal̦, jemaroñ bõk kaenõm̦m̦an jãn naan kein an Paul ñan Kũrjin ri kabit ro ilo iien ko an. Ear ba: “Ad Irooj Jisõs Kraist, im ad Anij Jemed, eo Ear yokwe kõj im letok aenõm̦m̦an indeeo kab kõjatdikdik em̦m̦an kõn jouj, En kaaenõm̦m̦ane bũruemi im kapen [kom̦] ilo naan em̦m̦an im jerbal em̦m̦an otemjej.”—2 Tessalonika 2:16, 17.
Kwõj Ke Keememej?
• Ewi joñan an ajeeded jerbal in kwal̦o̦k naan eo ad?
• Ta jet iaan men ko jemaroñ kõm̦m̦ani ñan kaenõm̦m̦an ro jet?
• Ewi wãween an Baibõl̦ eo kwal̦o̦k bwe Jeova ej kaenõm̦m̦an ro ri karejaran?
[Kajitõk ko ñan katak]
[Pija ilo peij 28]
Kwõj ke kaenõm̦m̦an ro rebũrom̦õj ilo am̦ kwal̦o̦k naan ippãer?
[Pija ilo peij 30]
Ro reddik im ro rerũtto remaroñ kaenõm̦m̦an ro jet
