Jipañ L̦õm̦aro bwe Ren Bõk Eddo ko Rel̦apl̦o̦k ilo Congregation Eo
Jipañ L̦õm̦aro bwe Ren Bõk Eddo ko Rel̦apl̦o̦k ilo Congregation Eo
“Ejjel̦o̦k ri katak ej utiejlok jen ri kaki eo an; ak kajjojo ri katak ñe edede l̦o̦k an katak enaaj ãinwõt ri kaki eo an.”—LUK 6:40, UBS.
1. Ta ko Jijej ear kõm̦m̦ani ñan katakin im jipañ ri kwal̦o̦k naan ro?
ÃLIKIN an kar rijjelõk Jon kwal̦o̦k kõn mour eo an Jijej, ear jei naan kein, “Kiiõ ebar lõñ men ko Jijej ear kõm̦m̦ani. El̦aññe renaaj kar jeje kajjojo men kein otemjej, ij l̦õmn̦ak edik lal̦ in ñan an ãti aolep bok ko joñan aer lõñ.” (Jon 21:25, UBS) Meñe ear jab to an kar Jijej pãd ioon lal̦ in ak ear lukkuun poub kõn jerbal in kwal̦o̦k naan. Ear aikuj pukot em̦m̦aan ro ñan katakin er bwe ren wõnm̦aanl̦o̦k kõn jerbal eo ear jinoe. Ilo iiõ eo 33, ear wõr juon kumi edik me Jijej ear jipañ im katakin er. Im ejjabto oran kumi in ear orl̦o̦k ñan elõñ to̦ujin ri kwal̦o̦k naan ro.—Jerbal 2:41, 42; 4:4; 6:7.
2, 3. (1) Etke el̦ap ad aikuji em̦m̦aan ro bwe ren bõk eddo ko ilo congregation ko? (2) Ta eo jenaaj etale ilo katak in?
2 Rainin, elõñl̦o̦k jãn 7 milien ro jeid im jatid ilo elõñl̦o̦k jãn 100,000 congregation ko ipel̦aakin lal̦ in. Eñin unin el̦ap ad aikuji em̦m̦aan ro ñan tõl im loloorjake jerbal ko an congregation kein. Congregation kein rej aikuj elder ro. Eddo ko an elder ro raorõk im rem̦m̦an, im jej nõbar im kam̦m̦oolol aolep em̦m̦an ro rej kate er im ‘rekõn̦aan’ bõke eddo kein.—1 Timote 3:1, UBS.
3 Ewõr jet men ko juon em̦m̦aan ej aikuj kõm̦m̦ani m̦okta jãn an maroñ bõk eddo ak jerbal ko rel̦apl̦o̦k ilo congregation eo. Doulul in ejjab kããlõt em̦m̦aan ro ñan jerbal kein kõnke remãlõtlõt im el̦ap aer jel̦ã kilen mour im kilen jerbal. Bwe juon em̦m̦aan en maroñ bõk eddo kein, ewõr jet men ko ej aikuj kõm̦m̦ani m̦okta ekkar ñan Baibõl̦ eo. Ewi wãween jemaroñ jipañ em̦m̦aan ro bwe ren kal̦apl̦o̦k ijo kun̦aaer ñan Anij im bõk eddo ko rel̦apl̦o̦k ilo congregation ko? Jijej ear ba: “Ejjel̦o̦k ri katak ej utiejlok jen ri kaki eo an; ak kajjojo ri katak ñe edede l̦o̦k an katak enaaj ãinwõt ri kaki eo an.” (Luk 6:40, UBS) Ilo naaj katak in, jenaaj etale wãween an kar Jijej jipañ im katakin rũkal̦oor ro an im wãween jemaroñ katak jãn men in.
“Iar N̦a Etami Ro Jera”
4. Etke jemaroñ ba bwe Jijej ear epaake rũkal̦oor ro an?
4 Jijej ear jab l̦õmn̦ak bwe eutiejl̦o̦k im em̦m̦anl̦o̦k jãn rũkal̦oor ro an. Em̦m̦aan rein rar ro jeran. Jijej ear epaake er im ear lõke er. Ear ba ñan er: “Men otemjej iar roñ jãn Jema iar kwal̦o̦k ñan kom̦.” (Riit Jon 15:15.) Juon iien rũkal̦oor ro rar kajjitõk ippãn Jijej: “Ñããt eo enaaj jejjet kitien men kein, im ta eo enaaj kwal̦o̦k iien eo kwõnaaj itok, kab ñããt iien eo ãliktata?” Ke Jijej ear uwaak er, l̦õm̦arein rein rar lukkuun m̦õn̦õn̦õ. (Matu 24:3, 4, UBS) Jijej ear bar kõn̦aan bwe rũkal̦oor rein an ren jel̦ã kõn l̦õmn̦ak im eñjake ko an. Ñan waanjoñak, m̦okta jãn aer kar kalbuuji, Jijej ear bõk Piter, Jemes im Jon ñan juon jikin kallib etan Getsemane. Iien in elukkuun kar pen ñane, kõn men in Jijej ear aikuj jar im kajjitõk jipañ ippãn Jeova. Ear jab n̦ooje an eñtaan im bũrom̦õj jãn em̦m̦aan rein jilu jeran. (Mark 14:33-38) Bar juon iien, tõmak eo an l̦õm̦arein ear kajoorl̦o̦k ke rar loe an Jijej kõm̦m̦ane juon men ekabwilõñlõñ. (Mark 9:2-8, UBS; 2 Piter 1:16-18, UBS) Jem̦jerã eo ikõtaan Jijej im rũkal̦oor ro ear jipañ er bwe ren wõnm̦aanl̦o̦k wõt kõn jerbal in eaorõk im kar kabbeik er kake.
5. Ta wãween ko elder ro rej jipañ ro jet?
5 Elder ro ilo congregation ko rainin rej l̦oore joñak in an Jijej. El̦ap aer yokwe ri tõmak ro m̦õttaer im rekõn̦aan jipañ er. Elder ro rej bõk iien ñan bwebwenato ippãn ri tõmak ro jet kõn men ko rej katak jãn Baibõl̦ eo. Bõtab, ewõr jet men ko me elder ro rejjab maroñ kõnnaan kaki ñan ro jet. Elder ro rej lõke ri tõmak ro m̦õttaer. Rejjab l̦õmn̦ak bwe reutiejl̦o̦k im el̦apl̦o̦k tokjãer jãn ministerial servant ro me redikl̦o̦k jãn er. Elder ro remel̦el̦e bwe ministerial servant ro rej kate er im remaroñ kal̦apl̦o̦k ijo kun̦aaer ñan Anij. Rejel̦ã bwe likao rein rej yokwe Jeova im jipañ elder ro ilo congregation eo.
“Iar Lewõj Ñan Kom̦ Juon Joñak”
6, 7. Ilo wãween et ko Jijej ear juon joñak em̦m̦an ñan rũkal̦oor ro an? Ewi wãween joñak eo an Jijej ear jipañ er?
6 Meñe rũkal̦oor ro an Jijej rar yokwe Naan in Anij, jet iien wãween aer kar dik im rũttol̦o̦k ear jelõt l̦õmn̦ak ko aer. (Matu 19:9, 10; Luk 9:46-48; Jon 4:27) Meñe jet iien ear bõd wãween aer l̦õmn̦ak, Jijej ear jab illu ak kajju an kõnnaan ñan er. Ear jab lel̦o̦k ñan er jerbal ko me ejel̦ã ke rejjab maroñwi. Im ear jab kajjitõk ippãer bwe ren kõm̦m̦ani men ko me e make eban kar kõm̦m̦ani. Jijej ear juon joñak em̦m̦an, im rũkal̦oor ro an rar katak jãn men in.—Riit Jon 13:15.
7 Ilo wãween et ko Jijej ear juon joñak em̦m̦an? (1 Piter 2:21) Eokwe, Jijej ear jab arõk m̦weiuk ak ear kõjerbale iien ko an ñan jerbal ñan ro jet. (Luk 9:58) Jijej ear jab make kõm̦m̦an an katak ak ear katakin ro jet kõn katak ko an Jeova. (Jon 5:19; 17:14, 17) Jijej ear jouj im ear pidodo ñan an armej ro kepaake im bwebwenato ippãn. Men ko ear kõm̦m̦ani rar kalikkar bwe el̦ap an yokwe armej ro. (Matu 19:13-15; Jon 15:12) Joñak eo em̦m̦an an Jijej ear jipañ rijjelõk ro an. Joñak in an Jijej ear jipañ Jemes bwe en peran im karejar wõt ñan Anij m̦ae iien eo rar m̦ane ñan mej. (Jerbal 12:1, 2) Rijjelõk Jon ear bar l̦oore joñak in an Jijej ilo an kar tiljek ium̦win elõñl̦o̦k jãn 60 iiõ ko.—Revelesõn 1:1, 2, 9.
8. Ewi wãween elder ro remaroñ kate er bwe ren juon joñak em̦m̦an ñan likao ro im ro jet?
8 Elder ro remaroñ bar kate er bwe ren juon joñak em̦m̦an ñan likao ro. Ilo wãween et? Ilo aer kõttãik bũrueer im kwal̦o̦k yokwe ñan ro jet. Rej aikuj kõjerbale iien im maroñ ko aer ñan jipañ ro jet. (1 Piter 5:2, 3) Elder ro rej m̦õn̦õn̦õ in kwal̦o̦k joñak ko rem̦m̦an ñan em̦m̦aan ro. Rej juon joñak em̦m̦an ilo mour ko aer im kõn tõmak eo aer. Rej bar juon joñak em̦m̦an ilo wãween aer katakin ro jet im ilo kwal̦o̦k naan.—Hibru 13:7.
Jijej Ear Lel̦o̦k Naan in Tõl im Jilkinl̦o̦k Er ñan Kwal̦o̦k Naan
9. Etke jejel̦ã bwe Jijej ear katakin im jipañ rũkal̦oor ro an bwe ren wõnm̦aanl̦o̦k wõt kõn jerbal in kwal̦o̦k naan eo el̦ap?
9 Ãlikin an kar kõm̦m̦ane jerbal eo an ium̦win ruo iiõ ko, Jijej ear kiiõ jilkinl̦o̦k rijjelõk ro an 12 bwe ren ilo̦k im kwal̦o̦k naan. Bõtab, m̦okta jãn an kar kõm̦m̦ane men in, Jijej ear lel̦o̦k naan in tõl ko ñan er. (Matu 10:5-14) Bar juon iien, m̦okta jãn an kar naajdik elõñ to̦ujin armej ro ilo kabwilõñlõñ, Jijej ear lel̦o̦k naan in jiroñ ko ñan rũkal̦oor ro an. Ear kwal̦o̦k ñan er ewi wãween remaroñ karõk armej ro bwe aolep en wõr kijeer m̦õñã. (Luk 9:12-17) Ear kalikkar ñan er ta ko ren kõm̦m̦ani im ewi wãween remaroñ kõm̦m̦ani. Kõn an kar Jijej jipañ er im bareinwõt kõn kajoor eo an Anij, rijjelõk rein rar maroñ jinoe jerbal in kwal̦o̦k naan in el̦ap ilo kar iiõ eo 33.
10, 11. Ewi wãween elder ro im ro jet remaroñ jipañ l̦õm̦aro bwe ren bõk eddo ko ilo congregation eo?
10 Rainin, jej jino ad katakin im jipañ juon em̦m̦aan ñe jej katak Baibõl̦ ippãn. Jet iien, bõlen jej aikuj jipañ e bwe en em̦m̦an an riit. Ilo ad wõnm̦aanl̦o̦k im katak ippãn, jej bareinwõt jipañe ilo wãween ko jet. Ñe enaaj jino kobatok ilo kweilo̦k ko ad, enaaj katak ta ko ej aikuj kõm̦m̦ani bwe en maroñ bõk kun̦aan ilo Jikuul̦ in Kwal̦o̦k Naan eo. Im enaaj bar katak kõn men ko ej aikuj kõm̦m̦ani bwe en maroñ erom juon ri kwal̦o̦k naan eo ejañin peptaij. Ãlikin an naaj peptaij, elder ro renaaj bar jipañe ilo wãween ko jet. Ñan waanjoñak, remaroñ katakin e kilen kõjparok Im̦õn Kweilo̦k eo. Bareinwõt, elder ro remaroñ kwal̦o̦k ñan e ta ko ej aikuj kõm̦m̦ani bwe en maroñ erom juon ministerial servant.
11 Ñe elder ro rej lel̦o̦k jerbal ko ilo congregation eo ñan em̦m̦aan ro em̦õj aer peptaij, rekõn̦aan jipañ em̦m̦aan rein bwe ren lolorjake eddo kein aer. Rej kõmel̦el̦e ñan er kõn jerbal eo im kwal̦o̦k ñan er ta ko rej aikuj kõm̦m̦ani bwe en dedel̦o̦k jerbal eo. El̦aññe jerbal eo ejaad pen jidik ñan em̦m̦aan eo, elder ro reban kajju bõke jerbal eo jãn e im l̦õmn̦ak bwe ejjab maroñwe. Ilo jouj, rej bar ãliji im kõmel̦el̦eik em̦m̦aan eo kõn ta ko ej aikuj kõm̦m̦ani ñan kadedel̦o̦k jerbal eo. Elder ro rekõn̦aan im rem̦õn̦õn̦õ in jipañ em̦m̦aan ro kadedel̦o̦k eddo ko kõnke rejel̦ã bwe em̦m̦aan ro renaaj lo m̦õn̦õn̦õ ñe rej jerbal ñan ro jet ilo congregation eo.—Jerbal 20:35.
‘Ri Jel̦ãl̦o̦kjen̦ Rej Eo̦roñ Naan in Kapilõk’
12. Etke naan in kauwe ko an Jijej rar maroñ jipañ rũkal̦oor ro an?
12 Bar juon wãween Jijej ear jipañ rũkal̦oor ro an ej ilo an lel̦o̦k naan in kauwe ko ekkar ñan aikuj ko an rũkal̦oor ro an kajjojo. Ñan waanjoñak, ke Jemes im Jon rar kõn̦aan bwe kijeek jãn lañ en ko̦kkure jet ri Sameria ro, Jijej ear kajim̦we erro im kwal̦o̦k bwe men in erro ar kõn̦aan ebõd. (Luk 9:52-55) Bar juon iien, jinen Jemes im Jon ear kajjitõk ippãn Jijej bwe en lel̦o̦k eddo ko rel̦ap ñan l̦õm̦arein nejin ilo naaj Aelõñ eo an. Bõtab, Jijej ear jel̦ã bwe Jemes im Jon rar kõn̦aan bwe jineer en kajjitõk kõn men in. Ear ba ñan erro: “A kõn amiro jijet i anmoon̦õ im i anmiiñõ, e jab aõ bwe in lewõj, a Jema enaaj lel̦o̦k ñan ro ear kapojak ñan er.” (Matu 20:20-23) Aolep iien Jijej ear lel̦o̦k naan in kauwe ko ilo alikkar bwe armej ro ren jel̦ã ta ko rej aikuj kõm̦m̦ani. Naan in kauwe kein an rar itok jãn Naan in Anij. Ear kõn̦aan bwe wãween l̦õmn̦ak im kõm̦m̦an ko an rũkal̦oor ro an ren jab idaptõk ippãn Naan ko an Anij. (Matu 17:24-27) Jijej ear jel̦ã bwe rũkal̦oor ro an rejjab weeppãn im jet iien rej likjab. Ear lel̦o̦k naan in kauwe ko ñan er kõnke ekõn̦aan jipañ er im el̦ap an yokwe er.—Jon 13:1.
13, 14. (1) Wõn ro elder ro rej aikuj jipañ im lel̦o̦k naan in kauwe ko ñan er? (2) Ewi wãween elder ro remaroñ jipañ em̦m̦aan ro? Kwal̦o̦k jet waanjoñak ko.
13 Ñe juon em̦m̦aan ej jibadek eddo ko rel̦apl̦o̦k ilo congregation eo, ewõr jet iien ej aikuj bõk naan in kauwe im kapilõk ko jãn Baibõl̦ eo. Bok in Jabõn Kõnnaan 12:15 (UBS) ej ba bwe ‘ro ri jel̦ãl̦o̦kjen̦ rej eo̦roñ naan in kapilõk.’ Juon likao ej ba bwe ilo kar m̦okta, ekõn l̦õmn̦ak bwe ejjab ekkar im ejjab maroñ bõk eddo ko rel̦ap ilo congregation. Bõtab juon elder ear jipañ e ñan an kile bwe meñe ewõr an likjab im ejjab weeppãn, emaroñ wõnm̦aanl̦o̦k wõt im kate ñan bõk eddo kein.
14 Jet iien elder ro remaroñ kile bwe juon em̦m̦aan ak likao ej kõm̦m̦ani jet men ko me remaroñ bõbraik e jãn an bõk eddo ko rel̦ap ilo congregation eo. Ilo jouj im meanwõd, renaaj kajjioñ in kajim̦we em̦m̦aan eo ilo m̦õkaj. Etke? Kõnke elder ro rekõn̦aan bwe em̦m̦aan in en bõk eddo ko rel̦ap ñan jipañ ro jet ilo congregation eo. (Galetia 6:1, UBS) Ewõr iien ko elder ro rej aikuj lel̦o̦k naan in kauwe ko ñan kajim̦we im jipañ em̦m̦aan ro. Ñan waanjoñak, ñe elder ro rej kile bwe juon em̦m̦aan ak likao ejjab lukkuun kate ilo an jerbal ñan Jeova, eokwe elder ro renaaj jijet im bwebwenato ippãn. Renaaj rõjañ em̦m̦aan in bwe en kõl̦mãnl̦o̦kjen̦ kõn joñak eo an Jijej. Jijej ear kijejeto ilo an kar kwal̦o̦k naan im ear rõjañ rũkal̦oor ro an bwe ren l̦oore joñak eo an. (Matu 28:19, 20; Luk 8:1) Jet iien, jet em̦m̦aan ro ilo congregation eo rekõn̦aan bwe ren utiejl̦o̦k jãn ro jet. Elder ro remaroñ jipañ em̦m̦aan rein im kõmel̦el̦eik er bwe Jijej ear katakin rũkal̦oor ro an bwe ren jab kõn̦aan im l̦õmn̦ak bwe reutiejl̦o̦k jãn ro jet. (Luk 22:24-27) Bõlen ewõr jet em̦m̦aan ro me epen aer jol̦o̦k bõd ko an ro jet. Elder ro remaroñ jipañ l̦õm̦arein ilo aer kõjerbal bwebwenato eo kõn ri karejar eo me ear jab kõn̦aan jol̦o̦k bõd ko an ro jet, meñe irooj eo an ear jol̦o̦k bõd ko an m̦oktal̦o̦k. (Matu 18:21-35) Ñe elder ro rej kile bwe rej aikuj jipañ juon em̦m̦aan im lel̦o̦k naan in kauwe ko ñane, eokwe ren jab aepedped.—Riit Jabõn Kõnnaan 15:23.
Juon Em̦m̦aan Ej Aikuj Make Kate
15. Ewi wãween kõrã ro im ajri ro remaroñ jipañ jemen baam̦le eo bwe en kõm̦m̦ani eddo ko an ilo congregation eo?
15 Meñe elder ro rej kate er ñan jipañ em̦m̦aan ro ilo congregation bwe ren bõk eddo ko rel̦apl̦o̦k, ro jet remaroñ bar jipañ. Ewi wãween? Eokwe, kõrã eo im ajri ro rej aikuj jipañ im rõjañ jemen baam̦le eo bwe en jibadek eddo kein. El̦aññe l̦eo ej juon elder kadede, eokwe kõrã eo im ajri ro rej aikuj bareinwõt jipañ e im rejetake ilo an kõm̦m̦ani eddo ko an ilo congregation eo. Remel̦el̦e bwe l̦eo ej aikuj kõjerbal jet iien im maroñ ko an ñan jipañ ro jet. Im el̦ap an l̦eo m̦õn̦õn̦õ ñe ej loe an kõrã eo im ajri ro jipañ e bwe en maroñ kõm̦m̦ani eddo ko an ilo congregation eo. Jej kam̦m̦oolol aolep kõrã ro im ajri ro kõn aer jipañ l̦õm̦aro bwe ren maroñ kõm̦m̦ane ijo kun̦aaer ñan congregation ko.—Jabõn Kõnnaan 15:20; 31:10, 23.
16. (1) Wõn eo ej aikuj kwal̦o̦k bwe ekõn̦aan im em̦õn̦õn̦õ in jerbal ñan ro jet? (2) Ta ko juon em̦m̦aan ej aikuj kõm̦m̦ani bwe en bõk eddo ko rel̦ap ilo congregation eo?
16 Em̦m̦an ñe ro jet rej jipañ l̦õm̦aro bwe ren maroñ jibadek eddo ko ilo congregation eo. Bõtab, juon em̦m̦aan ej aikuj make kwal̦o̦k bwe ekõn̦aan im em̦õn̦õn̦õ in jerbal ñan ro jet. (Riit Galetia 6:5.) Juon em̦m̦aan ej aikuj ke erom juon ministerial servant ak juon elder bwe en maroñ jipañ ro jet? Ejjab. Bõtab, el̦aññe ekõn̦aan bõk eddo ko rel̦apl̦o̦k ilowaan congregation eo, ewõr jet men ko ej aikuj kõm̦m̦ani m̦okta ekkar ñan Baibõl̦ eo. (1 Timote 3:1-13, UBS; Taitõs 1:5-9, UBS; 1 Piter 5:1-3, UBS) Ñe juon em̦m̦aan ekõn̦aan erom juon ministerial servant ak elder, eokwe ej aikuj kõl̦mãnl̦o̦kjen̦ kõn ta ko ej aikuj kõm̦m̦ani ñan tõpar eddo kein. Ta ko emaroñ kõm̦m̦ani? Eokwe, ej aikuj kõm̦m̦an an iien ñan riit Baibõl̦ im kõl̦mãnl̦o̦kjen̦ kõn men ko ej riiti. Ej aikuj niknik ilo jar im ej aikuj kate joñan wõt an maroñ ñan bõk kun̦aan ilo jerbal in kwal̦o̦k naan. El̦aññe enaaj kõm̦m̦ane men kein, ej eo̦roñ naan in kakapilõk eo an Paul ñan Timote: “Kwõn make kammineneikl̦o̦k eok ilo jerbal in Anij.”—1 Timote 4:7.
17, 18. Jet em̦m̦aan ro rej l̦õmn̦ak bwe ejjel̦o̦k tokjãer im bar jet rejjab kõn̦aan kal̦apl̦o̦k ijo kun̦aaer. Ta eo emaroñ jipañ em̦m̦aan rein bwe ren maroñ bõk eddo ko rel̦ap ilo congregation eo?
17 Ak ta kõn em̦m̦aan ro me rej l̦õmn̦ak bwe ejjel̦o̦k tokjãer im rejjab maroñ erom ministerial servant ak elder? Rej aikuj keememej bwe Jeova im Jijej relukkuun kõn̦aan jipañ er. Jeova ej kallim̦ur bwe enaaj ‘ineek eddo ko ad jãn raan ñan raan.’ (Sam 68:19, UBS) Jeova enaaj jipañ em̦m̦aan ro bwe ren maroñ bõk eddo ko ilo congregation eo. Em̦m̦aan ro me rejjab ministerial servant ak elder rej aikuj keememej bwe el̦ap aikuji em̦m̦aan ro ñan loloorjake jerbal ko ilo congregation ko. Em̦m̦aan rein remaroñ jar im kajjitõk bwe Anij en lel̦o̦k kajoor eo an ñan jipañ bwe ren aenõm̦m̦an wõt im jel̦ã irooj iooer make. Kajoor eo an Anij emaroñ jipañe bwe en jab l̦õmn̦ak ejjel̦o̦k tokjãn. (Luk 11:13; Galetia 5:22, 23) Jejel̦ã bwe Jeova el̦ap an m̦õn̦õn̦õ in jipañ em̦m̦aan ro me em̦ool bũrueer im rekõn̦aan jerbal ñan ro jet.
18 Jet em̦m̦aan bõlen ejjel̦o̦k aer kõn̦aan ñan bõk eddo ko rel̦ap. Ta eo emaroñ jipañ em̦m̦aan rein? Rijjelõk Paul ear ba: “Anij ej jerbal iien otemjej ilo kom̦ bwe kom̦win m̦õn̦õn̦õ im maroñ in pokake ankilaan.” (Pilippai 2:13, UBS) Kõn̦aan eo ñan bõk eddo ko rel̦ap ej itok jãn Anij, im ej kakajoor em̦m̦aan ro ñan karejar ñan ro jet im kõm̦anm̦an ankilaan Anij. (Pilippai 4:13) Kõn men in, em̦m̦aan ro remaroñ jar bwe Anij en jipañ er ñan kõm̦m̦ane men ko rejim̦we.—Sam 25:4, 5.
19. Ta mel̦el̦ein an Baibõl̦ eo ba bwe Jeova enaaj ‘kajutak jiljilimjuon jabõt im rualitõk irooj in armej’?
19 Jeova ej kajeraam̦m̦an elder ro rej kate er ñan jipañ em̦m̦aan ro jet. Ej bareinwõt kajeraam̦m̦an l̦õm̦aro im rekõn̦aan kal̦apl̦o̦k ijo kun̦aaer im jerbal ñan ro ilo congregation eo. Baibõl̦ eo ej ba bwe Jeova enaaj ‘kajutak jiljilimjuon jabõt im rualitõk irooj in armej’ ñan tõl jerbal ko an ro doon. Ta mel̦el̦ein men in? Eokwe, ej kalikkar bwe Jeova enaaj kõm̦m̦an bwe en wõr em̦m̦aan ro me renaaj tõl jerbal ko ilo congregation ko ipel̦aakin lal̦ in. (Maika 5:5) Rainin, jej lukkuun m̦õn̦õn̦õ ñan lo elõñ em̦m̦aan im likao ro rej kate er bwe ren maroñ bõk eddo ko rel̦apl̦o̦k im jerbal ñan ri tõmak ro m̦õttaer ilo congregation ko. Kõj aolep jej bõk jeraam̦m̦an jãn an em̦m̦aan rein kate er, im el̦ap an bõktok nõbar ñan Jeova.
Ewi Wãween Kwõnaaj Uwaak?
• Ta ko Jijej ear kõm̦m̦ani ñan katakin im jipañ rũkal̦oor ro an?
• Ewi wãween elder ro remaroñ l̦oore joñak eo an Jijej ilo aer jipañ l̦õm̦aro bwe ren kal̦apl̦o̦k ijo kun̦aaer ilo congregation eo?
• Ta ko kõrã eo im ajri ro remaroñ kõm̦m̦ani ñan jipañ l̦eo bwe en jibadek eddo ko rel̦apl̦o̦k ilo congregation eo?
• Ta ko em̦m̦aan ro rej aikuj kõm̦m̦ani bwe ren maroñ bõk eddo ko rel̦apl̦o̦k ilo congregation eo?
[Kajitõk ko ñan katak]
[Pija ilo peij 31]
Ewi wãween kwõmaroñ jipañ em̦m̦aan ro kwõj katak ippãer bwe ren kõm̦m̦an wõnm̦aanl̦o̦k ko?
[Pija ilo peij 32]
Ta ko em̦m̦aan ro rej aikuj kõm̦m̦ani ñan kwal̦o̦k bwe rekõn̦aan bõk eddo ko rel̦apl̦o̦k ilo congregation eo?
