Kajoor eo an Anij en Tõl Eok ñan Mour im Aenõm̦m̦an
Kajoor eo an Anij en Tõl Eok ñan Mour im Aenõm̦m̦an
“Je jab etetal ekkar ñan kanniõk, a ekkar ñan jetõb [kajoor eo an Anij, NW].”—ROM 8:4.
1, 2. (1) Ta eo emaroñ wal̦o̦k el̦aññe jej m̦ad im kattõr? (2) Ta men eo ekauwõtata emaroñ wal̦o̦k el̦aññe jej m̦ad jãn ad karejar ñan Jeova?
ILO Amedka, juon ri utiej ilo kien ear ba bwe kajjojo iiõ el̦apl̦o̦k an armej ro m̦ad kake men ko jet ñe rej kattõr wa. Ñan waanjoñak, remaroñ m̦ad ñe rej kõjerbal cellphone eo nejier ilo ejja iien eo wõt rej kattõr. Elõñ rar ba bwe rar pãd ilo juon lanwõtwõt, ak m̦õttan jidik ren kar iion wãween in kõnke ri kattõr eo ilo bar juon wa ear kõjerbal cellphone im ettõr. Armej remaroñ l̦õmn̦ak bwe rej kõjparok iien ñe rej kõjerbal cellphone im kattõr, bõtab men in emaroñ kõm̦m̦an bwe ren jirilo̦k im pãd ilo juon jorrããn el̦ap.
2 Juon eo ej m̦ad im kattõr emaroñ jab kile kauwõtata ko ilo ial̦ eo. Ilo ejja wãween in wõt, el̦aññe jej kõtl̦o̦k bwe men ko jet ren kam̦ad kõj, kõtaan eo ad ippãn Jeova emaroñ pãd ilo kauwõtata. Paul ear ba bwe tõmak eo ad emaroñ jorrããn ãinwõt juon tim̦a erup im ruñl̦o̦k n̦a lom̦al̦o. (1 Timote 1:18, 19) Rijjelõk Paul ear kakkõl kõn kauwõtata in ke ear jeje ñan ri tõmak ro m̦õttan ilo Rom. Ear ba: “L̦õmn̦ak an kanniõk mej; a l̦õmn̦ak an Jetõb [kajoor eo an Anij, NW] mour im aenõm̦m̦an.” (Rom 8:6) Ta mel̦el̦ein naan kein an Paul? Ewi wãween jemaroñ kõjparok kõj jãn “l̦õmn̦ak an kanniõk” im kate kõj ñan “l̦õmn̦ak kõn men ko an Anij”?
Kar Lo̦mo̦o̦ren Er
3, 4. (1) Ta men eo Paul ear ba ear aikuj tarin̦aeki ilo mour eo an? (2) Etke jej aikuj itoklimo in jel̦ã kõn apañ eo Paul ear jelm̦aiki?
3 Ilo lõta eo an Paul ñan Ri Rom ro, Paul ear jeje kõn juon men ear aikuj tarin̦aeki ilo mour eo an. Ear ba bwe ãinwõt ñe l̦õmn̦ak ko an im kõn̦aan ko an rej tarin̦aek doon. (Riit Rom 7:21-23, UBS.) Paul ear jab kõnono kake men in bwe en jekpen kõn kõm̦m̦an ko an ak kõn an bũrom̦õj kake e make. Bareinwõt ear jab l̦õmn̦ak bwe ejjab maroñ kõm̦m̦ani men ko rejim̦we. Paul ear juon ri kabit ekajoor ilo tõmak im kar jitõñ e bwe en “rijjelõk ñan ri aelõñ ko.” (Rom 1:1; 11:13) Innem etke Paul ear jeje kake men in me ear aikuj tarin̦aeki ilo mour eo an?
4 Paul ear ba bwe ear pen an kõm̦anm̦an ankilaan Anij ilo wãween eo ear lukkuun kõn̦aan. Etke? Ear ba: “Bwe otemjej raar jero̦wiwi im rej likjab jãn aiboojoj an Anij.” (Rom 3:23) Ãinwõt ro otemjej nejin Adam, Paul ear jab weeppãn im ear wõr ippãn kõn̦aan ko rebõd. Kõj aolep jemel̦el̦e kõn eñjake eo an. Kajjojo raan jej jelm̦aik ejja wãween in wõt kõnke jejjab weeppãn im ej wal̦o̦k kõn̦aan ko renana ippãd. Bareinwõt elõñ menin kam̦ad ko im remaroñ kam̦ad kõj jãn ad kabuñ ñan Anij im kajeõr kõj jãn ial̦ eo ej tõll̦o̦k ñan mour indeeo. (Matu 7:14) Bõtab, ejjab mel̦el̦ein bwe ejjel̦o̦k kein n̦amejal̦an apañ in an Paul ekoba kõj.
5. Ta eo ear jipañ Paul?
5 Paul ear kajjitõk wõn eo enaaj lo̦mo̦o̦ren e jãn wãween in epen ej iione, innem ear ba: “Ij kam̦m̦oolol Anij kõn Jijej Kũraij ad Irooj.” (Rom 7:24, 25) Tokãlik, Paul ear kõnono ñan ri kabit ro, ro im rar “juon wõt ippãn Kũraij Jijej.” (Riit Rom 8:1, 2, UBS.) Jeova ear kõjerbal kajoor eo an ñan bõk er ãinwõt ro nejin. Ear kõm̦m̦an bwe ren “ri jolõt ippãn Kũraij.” (Rom 8:14-17) Kajoor eo an Anij im tõmak eo aer ilo katok in mej eo an Jijej ej jipañ rein ñan anjo̦ ilo tarin̦ae eo me Paul ear kõnono kake. Kõn men in, ejako an Anij kiiõ liaakel̦o̦k rein kõn jab weeppãn eo aer. Rej anemkwoj jãn “kien jero̦wiwi im mej.”
6. Etke aolep ri karejar ro an Anij rej aikuj mel̦el̦e kõn naan ko an Paul?
6 Paul ear kõnono ñan ri kabit ro. Bõtab, men eo ear ba kõn kajoor eo an Anij im katok in mej eo an Jijej ej jerbal ñan aolep ri karejar ro an Jeova, jekdo̦o̦n ñe kõjatdikdik eo aer ej ñan mour ilañ ak ioon lal̦. Anij ear kõm̦m̦akũt Paul ñan kwal̦o̦k naan in kakapilõk in ñan ri kabit ro, innem elukkuun aorõk bwe aolep ri karejar ro an Anij ren mel̦el̦e im pokake men eo Paul ear je.
Wãween Anij Ear Lo̦mo̦o̦ren Kõj jãn “Jerawiwi im Mej”
7, 8. (1) Ilo wãween et Kien eo ear “m̦õjn̦o̦ kõn kanniõk”? (2) Ta eo Anij ear kõm̦m̦ane ikijjeen kajoor eo an im katok in mej eo an Jijej?
7 Ilo Rom jebta 7, Paul ear kõmel̦el̦e im ba bwe el̦ap kilan jerawiwi ioon armej ro rejjab weeppãn. Ilo jebta 8, ear kõnono kõn wãween an kajoor eo an Anij maroñ jipañ kõj. Ear ba bwe kajoor eo an Anij emaroñ jipañ Kũrjin ro ñan anjo̦ ilo tarin̦ae eo aer n̦ae jerawiwi. Emaroñ jipañ er ñan kõm̦m̦ane men eo Jeova ekõn̦aan im ebuñbũruon kake. Paul ear kwal̦o̦k bwe Anij ear kõjerbale kajoor eo an im katok in mej eo an Jijej ñan katõprak juon men me Kien ko kar lil̦o̦k ñan Moses rar jab maroñ katõprake.
8 Kien ko kar lil̦o̦k ñan Moses rar kalikkar ñan armej ro bwe er ri jerawiwi kõnke rar jipañ er ñan kile bwe rejjab maroñ kajejjet ak l̦oore aolep kien ko. Pris ro rel̦l̦ap an Israel me rar pãd ium̦win Kien eo rar jab weeppãn im menin katok ko rar katok kaki rar jab maroñ jol̦o̦k jerawiwi ko. Ilo wãween in, Kien eo ear “m̦õjn̦o̦ kõn kanniõk.” Innem, Anij ear jilkintok Nejin ñan lal̦ in ilo “nemãmeen armej ri jerawiwi,” im katok in mej eo an ear “jeorl̦o̦k jerawiwi an armej.” Katok in mej eo an Jijej emaroñ lo̦mo̦o̦ren armej jãn jerawiwi. Jeova emaroñ watõke ri kabit ro ãinwõt ro rewãnõk kõnke el̦ap aer tõmak ilo katok in mej eo an Jijej. Naan ko an Paul ej rõjañ ri kabit ro bwe ren jab kõtl̦o̦k bwe kõn̦aan ko renana ren tõl l̦õmn̦ak ko aer im jerbal ko aer. Ak rej aikuj kõtl̦o̦k bwe kajoor eo an Jeova en tõl er ilo wãween aer l̦õmn̦ak im jerbal. (Riit Rom 8:3, 4, UBS.) Rein rej aikuj wõnm̦aanl̦o̦k im kõm̦m̦ane men in toõn wõt aer mour ioon lal̦. El̦aññe rej tiljek, renaaj bõk “pãllin eo pãllin mour.”—Revelesõn 2:10.
9. Ta mel̦el̦ein naan ko an Paul ilo Rom 8:2?
9 Paul ear bareinwõt kõnono kõn ‘kien kajoor eo an Anij’ im “kien jero̦wiwi im mej.” (Rom 8:2) Ta mel̦el̦ein naan kein an Paul? Juon bok ej kõmel̦el̦e bwe naan in Grik ko Paul ear kõjerbali ilo eoon in rej mel̦el̦ein men ko rem̦m̦an im men ko renana me ekkã an armej ro kõn̦aan kõm̦m̦ani im rej tõl mour ko aer. Emaroñ bar mel̦el̦ein naan in tõl ko me armej ro rej make kããlõt ñan l̦oori.
10. Kien jerawiwi im mej ej irooj iood. Ta mel̦el̦ein men in?
10 Rijjelõk Paul ear je: “Kõn men in, ãinwõt kõn juon armej, jero̦wiwi ear del̦o̦ñ ilo lal̦, im mej kõn jero̦wiwi; im ãindein mej ear itok ioon armej otemjej, bwe er otemjej raar jero̦wiwi.” (Rom 5:12) Kõnke kõj aolep jej ro nejin Adam, kien jerawiwi im mej ej irooj iood. Ta mel̦el̦ein men in? Kõn ad jab weeppãn, kõn̦aan ko ad jãn bũruod remaroñ lujur kõj ñan kõm̦m̦ani men ko rejjab kabuñbũruon Jeova. Bõtab, men kein rej tõll̦o̦k kõj ñan mej. Ilo lõta eo an ñan Ri Galetia ro, Paul ear ba bwe kõm̦m̦an ak m̦anit kein renana rej ‘jerbal ko an kanniõk’ im “ro rej kõm̦m̦an men rot kein re jamin bõk aer jolõt aelõñ in Anij.” (Galetia 5:19-21) Armej rein rej l̦oore kõn̦aan ko aer renana. (Rom 8:4) Rej kõtl̦o̦k bwe kõn̦aan ko aer renana en tõl er ilo wãween aer l̦õmn̦ak im jerbal ko aer. Bõtab, ro me rej l̦õñ, kabuñ ñan ekjab, anijnij, im kõm̦m̦ani men ko jet rekanooj nana, rej ke ro wõt im rej l̦oore kõn̦aan ko an kanniõk? Jaab. ‘Jerbal ko an kanniõk’ me bok in Galetia ej kõnono kaki ej bareinwõt kitibuj men ko ãinwõt ebanban, illu, akwããl, im juunm̦aad. Innem, armej ro rej kõm̦m̦ani men kein rej bar l̦oor kõn̦aan ko renana. Aolep iien jej aikuj tarin̦aek kõn̦aan ko renana me remaroñ itok jãn ad jab weeppãn.
11, 12. Ta eo Jeova ear kõm̦m̦ane ñan kanemkwoj kõj jãn kien jerawiwi im mej? Ta eo jej aikuj kõm̦m̦ane ñan kabuñbũruon Anij?
11 El̦ap ad m̦õn̦õn̦õ bwe Jeova ear kõm̦m̦an bwe jen maroñ anemkwoj jãn kien jerawiwi im mej! Jijej ear ba: “Bwe kõn an Anij yokwe lal̦, Ear letok juon wõt Nejin Ear keotak, bwe jabdewõt eo ej lõke e en jab jako, a en mour indeeo.” El̦aññe jej mour ilo wãween eo me ej kwal̦o̦k ad yokwe Anij im jej tõmak ilo katok in mej eo an Jijej, naaj lo̦mo̦o̦ren kõj jãn jerawiwi. (Jon 3:16-18) Jenaaj bõk ejja eñjake eo an Paul ke ear ba: “Ij kam̦m̦oolol Anij kõn Jijej Kũraij ad Irooj.”
12 Ñan waanjoñak, ej ãinl̦o̦k wõt ñe jej bõk juon nañinmej el̦ap im ewõr unokan kõmouri. Ak el̦aññe jekõn̦aan lukkuun mour jãn nañinmej eo, jej aikuj kõm̦m̦ani men ko taktõ eo ej jiroñ kõj ñan kõm̦m̦ani. Ãindein, meñe tõmak eo ad ilo katok in mej eo an Jijej emaroñ kanemkwoj kõj jãn kien jerawiwi im mej, jekdo̦o̦n ak jej jerawiwi wõt im jejjab weeppãn. Bwe jen epaake wõt Jeova im kabuñbũruon, ewõr juon men jej aikuj kõm̦m̦ane. El̦aññe jekõn̦aan bwe en lukkuun jako ad jerawiwi, Paul ear ba bwe jej aikuj kõtl̦o̦k bwe kajoor eo an Anij en tõl l̦õmn̦ak im kõm̦m̦an ko ad.
Ewi Wãween Jemaroñ Etetal Ekkar ñan Kajoor eo an Anij?
13. Ta mel̦el̦ein an Baibõl̦ eo ba bwe jen etetal ekkar ñan kajoor eo an Anij?
13 Ñe jej etetal ñan juon jikin, jej m̦aaj m̦aanl̦o̦k ñan jikin eo. Innem, bwe jen maroñ etetal ekkar ñan kajoor eo an Anij ak kõtl̦o̦k bwe en tõl kõj, jej aikuj kõm̦m̦an wõnm̦aanl̦o̦k ko ilo m̦ool eo. (1 Timote 4:15) Kajjojo raan jen kate kõj joñan wõt ad maroñ ñan kõtl̦o̦k bwe kajoor eo an Anij en tõl kõj. El̦aññe jej ‘etetal ekkar ñan kajoor eo an Anij,’ jenaaj kabuñbũruon Anij.—Galetia 5:16.
14. Ro me rej mour “ekkar ñan kanniõk,” ewi wãween l̦õmn̦ak im kõm̦m̦an ko aer?
14 Paul ear tokãlik kõnono kõn armej ro me eoktak wãween aer l̦õmn̦ak jãn doon ilo lõta eo an ñan Ri Rom ro. (Riit Rom 8:5.) Ilo Baibõl̦ eo, jet iien naan in “kanniõk” emaroñ jitõñl̦o̦k ñan jab weeppãn eo ad. Kõn ad jab weeppãn, men in ej kõm̦m̦an bwe kõn̦aan ko ad im l̦õmn̦ak ko ad ren jum̦aeik doon. Eñin men eo Paul ear kõnono kake. Paul ear jum̦ae kõn̦aan ko an renana. Bõtab, elõñ armej rainin rejjab kajjioñ in jum̦ae kõn̦aan ko aer renana. Kõn men in, rein rej mour “ekkar ñan kanniõk.” Rejjab l̦õmn̦ak kõn ta eo Anij ekõn̦aan bwe ren kõm̦m̦ane, im rejjab kajjitõk ippãn Anij bwe en jipañ er anjo̦ ioon kõn̦aan ko aer renana. Rej ‘l̦õmn̦ak kõn men ko an kanniõk.’ Ekkã aer l̦õmn̦ak wõt ñan kõm̦m̦an bwe en em̦m̦an kõjeãer im rej mour ekkar ñan kõn̦aan ko aer renana. Ak ro im rej mour ekkar ñan kajoor eo an Anij, rej kõtl̦o̦k bwe Jeova en tõl er.
15, 16. (1) Ewi wãween men ko jej l̦õmn̦ak kaki rej jelõt kõj? (2) Ta eo elõñ armej ro rej itoklimo kake rainin?
15 Riit Rom 8:6. M̦okta jãn an armej ro kõm̦m̦ani men ko rem̦m̦an ak men ko renana, rej m̦okta l̦õmn̦ak kake men ko rekõn̦aan kõm̦m̦ani. El̦aññe armej ro rej l̦õmn̦ak kake men ko an kanniõk, innem renaaj kõm̦m̦ani men kein. Erkein men ko enaaj ekkã wõt aer l̦õmn̦ak kaki, itoklimo kaki, im kaorõki.
16 Ta eo elõñ armej ro rej itoklimo kake rainin? Rijjelõk Jon ear je: “Bwe men ko otemjej ilo lal̦, m̦õm̦ an kanniõk, m̦õm̦ an mej ko im wõj waan an mour in, re jab an Jemed a rej an lal̦.” (1 Jon 2:16) Kõn̦aan ko me Jon ej kõnono kaki rej l̦õñ, buñbuñ im utiej, im m̦weiie. Bok ko ak nuujpeba ko, pija in alwõj ko, channel ko ilo TV, im Internet rej aolep iien karreelel kaki kõn̦aan kein. Erkein men ko elõñ armej ro rej l̦õmn̦ak kaki kõnke men ko kein rekõn̦aan kõm̦m̦ani. Paul ear ba bwe “l̦õmn̦ak an kanniõk mel̦el̦ein mej.” Emaroñ ko̦kkure kõtaan eo ad ippãn Anij im kõm̦m̦an bwe jen luuji mour eo ad. Etke? Kõnke “l̦õmn̦ak an kanniõk ej kõjdate Anij; bwe e jab pokake kien Anij, im e jab maroñ kake. Im ro rej pãd ilo kanniõk re jab maroñ in kabuñbũruon Anij.”—Rom 8:7, 8.
17, 18. Ewi wãween jemaroñ kõtl̦o̦k bwe kajoor eo an Anij en tõl kõj? Ta eo enaaj wal̦o̦k el̦aññe jej kõm̦m̦ane men in?
17 “Ro rej l̦õmn̦ak kõn men ko an Anij mel̦el̦ein mour im aenõm̦m̦an.” Mel̦el̦ein men in bwe renaaj bõk mour indeeo ilju im jekl̦aj. Im renaaj aenõm̦m̦an im bareinwõt enaaj em̦m̦an kõtaan eo aer ippãn Anij kiiõ. Ewi wãween jemaroñ kwal̦o̦k bwe jej l̦õmn̦ak kõn men ko an Anij? El̦aññe iien otemjej jej kõtl̦o̦k bwe kajoor eo an Anij en tõl kõj, wãween ad l̦õmn̦ak enaaj errã ippãn l̦õmn̦ak ko an Anij. Jekõn̦aan bwe l̦õmn̦ak ko ad ren “pokake kien Anij.” Innem ñe jenaaj iioon juon menin kapo ak mãlejjoñ, jenaaj jel̦ã ta eo jej aikuj kõm̦m̦ane. Enaaj wõr ippãd kõn̦aan eo ñan kããlõt men eo ejim̦we kõnke jej kõtl̦o̦k bwe kajoor eo an Anij en tõl kõj.
18 Ej aikuj wõr ippãd kõn̦aan eo ñan l̦õmn̦ak kõn men ko an Anij. Jej aikuj kõm̦m̦an bwe men ko im rej ekkejel ñan kabuñ eo ad ñan Jeova ren men ko raorõktata ilo mour eo ad. Men kein ej kitibuj ad keini ad jar, riit Baibõl̦ im katak ippãd make, pãd ilo kweilo̦k ko im kwal̦o̦k naan. (1 Piter 1:13) Jen jab kõtl̦o̦k bwe kõn̦aan ko renana ren irooj iood. Jej aikuj l̦oore l̦õmn̦ak ko an Anij im kõtl̦o̦k bwe kajoor eo an en tõl kõj. El̦aññe jej kõm̦m̦ane men in, enaaj l̦ap ad jeraam̦m̦an, im jenaaj mour indeeo im aenõm̦m̦an.—Galetia 6:7, 8.
Kwõmaroñ Ke Kõmel̦el̦e?
• Ta eo Kien ko kar lil̦o̦k ñan Moses rar jab maroñ katõprake? Ak ta eo Anij ear kõm̦m̦ane?
• Ta mel̦el̦ein “kien jerawiwi im mej”? Ewi wãween jemaroñ anemkwoj jãn kien in?
• Ewi wãween jemaroñ kwal̦o̦k bwe jej l̦õmn̦ak kõn men ko an Anij?
[Kajitõk ko ñan katak]
[Pija ilo peij 12]
Kwõj ke l̦oori men ko kokõn̦aan ak men ko Anij ekõn̦aan?
