Kwõj Ke M̦õn̦õn̦õ Ñe Kwõj ‘Lel̦o̦k Ijo Kun̦aam̦’?

KŨRJIN ro etto ilo Pilippai rar buñbuñ kõn aer jouj im rejetake kabuñ eo em̦ool. Ke Paul ear jeje ñan er, ear ba: “Ij kam̦m̦oolol aõ Anij ilo aolepen aõ keememej kom̦, iien otemjej, ilo aõ jar otemjej kõn aolepemi, ij kõm̦m̦an jar eo kõn lañlõñ, kõn ami kõm̦m̦ao ilo gospel jãn raan eo m̦okta ñan kiiõ.” (Pilippai 1:​3-5) Paul ear keememej iien eo Lidia im baam̦le eo an rar peptaij im ke kõrã in ear karwaineneik er im kajjitõk bwe Paul im ri kwal̦o̦k naan ro jet m̦õttan ren kiki ilo m̦weo im̦õn.​​​—Jerbal 16:​14, 15.

Ejjabto jãn iien in, congregation eo ekããl ilo Pilippai ear jilkinl̦o̦k m̦weien Paul ruo alen ke ear pãd ippãn ri tõmak ro jet ilo Tessalonika ium̦win elõñ wiik. Ewõr enañin 100 mail ettol̦o̦k ikõtaan jikin kein ruo. (Pilippai 4:​15, 16) Jet iiõ tokãlik, Kũrjin ro ilo Pilippai im Masedonia rar jorrããn kõn aer lukkuun “jeram̦õl.” Meñe ãindein, ke rar roñ bwe Kũrjin ro m̦õttaer ilo Jerusalem rar iioon matõrtõr  im rar pãd ilo aikuj, rar kõn̦aan jipañl̦o̦k er. Kõn an Paul jel̦ã kõn wãween aer pãd, ear ba bwe rej lel̦o̦k ‘el̦apl̦o̦k jãn joñan aer maroñ,’ ak jekdo̦o̦n rar kõn̦aan wõt jipañ. Paul ear ba: “Rar kanooj akwel̦ap im kajjitõk ippem bwe ren maroñ lel̦o̦k kun̦aaer ñan jipañ.”​—2 Korint 8:​1-4, UBS; Rom 15:⁠26.

Tarrin joñoul iiõ ko ãlikin an kar Ri Pilippai ro del̦o̦ñ ilo m̦ool eo, ear jab jem̦l̦o̦k aer kõn̦aan jipañ ro jet. Rar roñ bwe Paul ear kalbuuj ilo Rom. Kõn men in, rar jilkinl̦o̦k Epaprodaitõs bwe en itoitak 800 mail ko ioon ãne im lo̦jet bwe en bõkl̦o̦k m̦weien rijjelõk Paul. Etke? Kõnke Ri Pilippai ro rar kõn̦aan kõke aikuj ko an Paul bwe en maroñ wõnm̦aanl̦o̦k im kakajoor ri tõmak ro jet m̦õttaer im ilo an kwal̦o̦k naan, meñe ear pãd ilo kalbuuj.​—Pilippai 1:​12-​14; 2:​25-​30; 4:​18.

Ãindein rainin, Kũrjin ro rem̦ool rej watõk bwe ej juon jeraam̦m̦an el̦ap ñan rejetake jerbal in kwal̦o̦k naan kõn Aelõñ in Anij im kõm̦m̦an rũkal̦oor ro. (Matu 28:​19, 20) Rej kõjerbale iien, maroñ, kab jããn ko aer ñan rejetake jerbal ko an Aelõñ eo. Bo̦o̦k eo itulal̦ ej kwal̦o̦k jet iaan wãween ko im kwõmaroñ lel̦o̦k ijo kun̦aam̦ ñan jipañl̦o̦k jerbal in kwal̦o̦k naan ipel̦aakin lal̦ in.

[Bo̦o̦k eo ilo peij 22, 23]

WÃWEEN KO ARMEJ REJ PEPE IN LEL̦O̦K

JABAWÕT KO ÑAN JERBAL IN KWAL̦O̦K NAAN EO IPEL̦AAKIN LAL̦

Jet rej kõjparok joñan jããn ko aer ñan jabawõt kaki im likũti ilo bo̦o̦k in jaba eo me rej je naan kein “Jerbal In Kwal̦o̦k Naan Ipel̦aakin Lal̦.”

Kajjojo allõñ, congregation ko rej jilkinl̦o̦k joñan jããn kein ñan ra eo an Ri Kõnnaan ro an Jeova ilo elõñ aelõñ ko. Bareinwõt remaroñ jilkinl̦o̦k jããn ko aer me rej m̦õn̦õn̦õ in jabawõt kaki ñan Watch Tower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-2483, ak ñan ra eo an Ri Kõnnaan ro an Jeova me ej bõk eddon aelõñ eo am. (El̦aññe kwõj pepe in kõm̦m̦an kain jaba ko me em̦õj kõlaajrak itulal̦, kwõmaroñ jilkinl̦o̦k ñan ra eo ej bõk eddon aelõñ eo am̦.) Kwõmaroñ jilkinl̦o̦k jabawõt ko ikijjeen check ñan atõrej eo ej wal̦o̦k itulõñ im aikuj je naan in “Watchtower.” Kwõmaroñ jabawõt kõn m̦weiuk ko raorõk bareinwõt. Kwõn je juon lõta ilo tukaru ñan kõmel̦el̦e bwe kwõj jabawõt kaki.

JUON KARÕK EWÕR JOÑÕN KÕN JABAWÕT

Kwõmaroñ lel̦o̦k joñõn jããn eo ñan Watch Tower Bible and Tract Society of Pennsylvania bwe ren kõjerbal ñan jerbal in kwal̦o̦k naan eo ipel̦aakin lal̦. Bõtab, remaroñ bar karo̦o̦lwõj jããn in ñe kwõj bar kajjitõk kake. Ñan bõk mel̦el̦e ko jet, jouj im jejel̦o̦k ñan Treasurer’s Office eo me kar kwal̦o̦k kake atõrej eo an, ak call (718) 560-7500.

WÃWEEN KO JET JEMAROÑ JABAWÕT

Ewõr wãween ko jet ñan lel̦o̦k jããn ak menin jipañ ñan jerbal in kwal̦o̦k naan kõn Aelõñ eo ipel̦aakin lal̦. Men kein rej:

Insurance: Kwõmaroñ karõk in lel̦o̦k insurance ak joortoklik eo am ñan Watch Tower Bible and Tract Society of Pennsylvania.

Jããn ko ilo Pããñ: Kwõmaroñ kõjparok joñõn jããn ko ilo pããñ me kwõj pepe bwe Watch Tower Bible and Tract Society of Pennsylvania en joliti.

Stocks im Bonds: Kõj eo am̦ kwaar bõk jãn juon peejnej im peba in kam̦ool ko rej kam̦ool bwe kwaar m̦uriik jããn ko am̦ ñan juon peejnej bwe en koorl̦o̦k jããn. Ñe kwõj lel̦o̦k kõj eo im peba in kam̦ool in ñan Watch Tower Bible and Tract Society of Pennsylvania, jããn ko me kwõnaaj kar bõk jen peejnej eo, renaaj an Society kõnke kwaar jabawõt ñane.

Wãto: Wãto ko me jemaroñ wia kaki ñan armej, jemaroñ jabawõt ñan Watch Tower Bible and Tract Society of Pennsylvania. Kwõmaroñ jejel̦o̦k ñan ra eo ej bõk eddon aelõñ eo am̦ m̦okta jen am jaba kake.

Bar Juon Karõk in Jaba: “Gift annuity” ej juon karõk me juon ekõn̦aan lel̦o̦k jããn in jabawõt ak menin lel̦o̦k ko jet ñan Ri Kõnnaan ro an Jeova im ej jilkinl̦o̦k ñan doulul eo me Ri Kõnnaan ro an Jeova rej kããlõte ñan loloorjake jããn ko aer. Kajjojo iiõ, eo me ear jaba ak eo me ear kããlõte, emaroñ wõr an jããn jãn jããn in jabawõt ko ear lel̦o̦k ñan Watch Tower Bible and Tract Society of Pennsylvania, im joñan eo enaaj bõke enaaj ekkar ñan joñan eo me ear karõke, toõn wõt an mour. Innem ilo iiõ eo ej jabawõt, kien eo emaroñ kadikl̦o̦k joñõn an kõl̦l̦ã owõj.

Juon Kein Kam̦ool: Kwõmaroñ kõm̦m̦ane juon peba in kallim̦ur ñan kam̦ool bwe Watch Tower Bible and Tract Society of Pennsylvania, ej e eo enaaj lali ak joliti men ko m̦weiõm̦ ak jããn ko am ñe kwõnaaj mej. Bareinwõt karõk rot in emaroñ wõr tokjãn ñan eo ej jaba ñan juon doulul in kabuñ ñe ej kõl̦l̦ã owõj ko an ñan kien eo.

Jej aikuj in kapojakl̦o̦k im̦aan ñe jej pepe in lel̦o̦k ak jaba ilo wãween kein. Ñan jipañ jabdewõt eo ej kõn̦aan kõjerbal wãween kein ñan jabawõt kõnke ekõn̦aan jipañ jerbal eo an Ri Kõnnaan ro an Jeova ej wal̦o̦k ipel̦aakin lal̦, emaroñ lale brochure eo em̦õj kõm̦m̦ane ilo kajin Belle im Spanish ak ejjel̦o̦k ilo kajin M̦ajel̦, taitõl̦ in ej “Wãween Ko Jet Jemaroñ Jabawõt ñan Jipañ Jerbal in Kwal̦o̦k Naan” (Charitable Planning to Benefit Kingdom Service Worldwide). Bok in ej kõmel̦el̦e kõn elõñ wãween ko me jemaroñ jabawõt ilo iien eo jej mour wõt ak ãlikin. Ãlikin an kar jet riiti bok in im kõnono ippãn ro rej jerbal ilo opij in bõk owõj ko, rar jino jabawõt ñan jipañ kõj kõn jerbal in kwal̦o̦k naan eo ipel̦aakin lal̦. Im ro rar jabawõt rar bõk el̦ap tokjãn ilo an dikl̦o̦k on̦ean owõj ko aer. Ñan bõk bok in jemaroñ kajjitõk ippãn Charitable Planning Office eo.

Ñan bõk mel̦el̦e ko rel̦apl̦o̦k, kwõmaroñ jeje ñan Charitable Planning Office eo ilo atõrej eo ej wal̦o̦k itulal̦, ak telephone l̦o̦k, ak ñe jab, jeje ñan ra eo ej bõk eddon aelõñ eo am̦.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707