“Meñe Iutam̦we Kiiõ ak Iban Utam̦we ñan Indeeo!”

Ekkar Ñan Sara van der Monde

Ekkã an armej ro ba, “Sara, elukkuun em̦m̦an am̦ ettõñdikdik. Etke aolep iien kwõj m̦õn̦õn̦õ?” Ij jiroñl̦o̦k er im ba kõnke ewõr juon kõjatdikdik ij reim̦aanl̦o̦k ñane ilju im jekl̦aj. Ij ba, “Meñe iutam̦we kiiõ ak iban utam̦we ñan indeeo!”

IAR l̦otak 1974 eo ilo Paris, ilo aelõñ in France. Jinõ ear kanooj eñtaan ke ear keotak eõ. Innem ear wõr jorrããn ke iar l̦otaktok. Tokãlik, taktõ ro rar lo bwe ewõr aõ nañinmej. Ear pen aõ kõm̦akũt peiõ im neiõ im allo aõ kõnnaan. Iar bar bõk nañinmej in dibũpbũp im epidodo aõ bo ilo nañinmej ko.

Ke ear ruo aõ iiõ, baam̦le eo aõ ear em̦m̦akũtl̦o̦k ñan Melbourne, ilo aelõñ in Aujtõrõlia. Ruo iiõ tokãlik, baba ear etal jãn kõmro m̦am̦a. Eñin iien eo jinointata ij keememej aõ kar epaake Anij. M̦am̦a ej juon iaan Ri Kõnnaan ro an Jeova im aolep iien ear bõkl̦o̦k eõ ñan kweilo̦k ko. Ilo kweilo̦k ko iar katak bwe Anij ej yokwe im kaorõk eõ. Meñe kõmro m̦am̦a kar iioni apañ ko reppen, iar lukkuun aenõm̦m̦an kõn aõ jel̦ã bwe m̦am̦a im Jeova rej yokwe im kaorõk eõ.

Bareinwõt m̦am̦a ear katakin eõ kilen jar ñan Jeova. Iar lo bwe epidodol̦o̦k aõ jar jãn aõ kõnono. Ñe ij jar, ijjab aikuj kate eõ ñan ba naan ko kõnke ij maroñ kõnono ilo bũruõ. Epen an ro jet mel̦el̦e men ko ij ba kõn aõ allo. Ak im̦õn̦õn̦õ kõnke ijel̦ã bwe Jeova emel̦el̦e ñe ij jar ñan e ilo bũruõ im meñe allo aõ kõnnaan.​​​—Sam 65:2.

Kijenmej kõn Apañ ko Jet

Ke ear l̦alem aõ iiõ, ear l̦apl̦o̦k an nana nañinmej eo aõ. Kõn men in, taktõ ro rar aikuj kõl̦l̦aak aen ilo ne ko neiõ bwe in maroñ itoitak. Bõtab, ear ajkub aõ etetal. Ilo iien eo ear 11 aõ iiõ, iar jab maroñ etetal. Tokãlik, iar aikuji juon mijjin ñan kotak eõ jãn peet eo aõ ñan wiil̦jea eo. Im ear bar ãindein an kotak eõ jããn wiil̦jea eo ñan peet eo aõ. Wiil̦jea eo aõ ej le pãtõre im imaroñ kattõre im itoitak kake.

Ilo m̦ool ewõr iien ij lukkuun ebbeer. Bõtab, ñe ij ebbeer ij keememejtok men eo aolep iien baam̦le eo aõ ej ba. Rekõn ba: “Jab inepata kõn men ko kwõjjab maroñ kõm̦m̦ani. Kwõn kõm̦m̦ani men ko kwõ maroñwi.” Naan kein rar jipañ eõ bwe in maroñ kõm̦m̦ani elõñ men ko ãinwõt uwe ioon kidia ko, ejerakrõk, aõn̦õn̦, etal ñan jikin kããm ko, im kattõr ilo jikin ko ejjel̦o̦k wa ie! Bareinwõt ij jiña, im ij keke im kõm̦m̦an elõñ kain style ko. Ij bar kõm̦m̦an kõnno ko im jiñaiki.

Kõn aõ nañinmej im utam̦we, elõñ rej ba bwe ejjel̦o̦k aõ maroñ ñan kõm̦m̦ani pepe ko ñan karejar ñan Anij. Ke ear 18 aõ iiõ, juon aõ rũkaki ear rõjañ eõ bwe in em̦m̦akũt jãn m̦weo bwe in “ko” jãn kabuñ eo an jinõ. Ear  bareinwõt ba bwe enaaj jipañ kappok jikin aõ jokwe. Bõtab, iar ba ñan e bwe ijamin jol̦o̦k tõmak eo aõ im iaab em̦m̦akũt wõt jãn ippãn m̦am̦a ñe ipojak in makel̦o̦k iaõ.

Ãlikin wõt men in ear wal̦o̦k ippãn rũkaki eo aõ, iar peptaij im erom juon iaan Ri Kõnnaan ro an Jeova. Ruo iiõ tokãlik, iar em̦m̦akũt l̦o̦k ñan juon em̦ me em̦m̦an joñan. Imõnõnõ kõnke ro jet rej wõnm̦aanl̦o̦k im jipañ eõ im bareinwõt kõn aõ makel̦o̦k iaõ.

Juon Likao Ear Kajjitõke Eõ

Ium̦win elõñ iiõ ko, elõñ men ko iar iioni im rar mãlejjoñwe tõmak eo aõ. Juon raan iar lukkuun ilbõk ke juon likao ear kajjitõk bwe in mareiki. Kõmro ej jikuul̦ ippãn doon im e bareinwõt eutam̦we. Ilo jinoin, iar kanooj em̦m̦õn̦õn̦õ. Iar kõn̦aan juon rejeta ãinwõt jiroñ ro jet. Ak, meñe kõmro jim̦or utam̦we im mel̦el̦e kake doon ejjab mel̦el̦ein bwe kõmro naaj m̦õn̦õn̦õ ippãn doon. Bareinwõt, likao eo ear jab pãd ilo m̦ool eo. Eoktak tõmak, m̦akũtkũt, im kõttõpar ko am̦ro jãn doon. Innem, ekõjkan am̦ro maroñ naaj kar m̦õn̦õn̦õ ippãn doon? Iar bareinwõt jek ilo bũruõ ñan pokake kien eo an Anij ñan m̦are wõt ilo Irooj. (1 Korint 7:​39) Kõn men in, iar ba ñan likao eo ilo juon wãween ejouj bwe ijjab maroñ mareiki.

Ñan rainin, ijel̦ã bwe ejim̦we pepe eo iar kõm̦m̦ane. Im el̦ap aõ lõke bwe inaaj m̦õn̦õn̦õ ilo naaj jukjuk im pãd eo ekããl me Anij ej kallim̦ur kake. (Sam 145:16; 2 Piter 3:​13, UBS) M̦ae iien in, ij kate eõ ñan tiljek wõt ñan Jeova im m̦õn̦õn̦õ wõt meñe inañinmej im utam̦we.

Ij kijoororetok iien eo ñe inaaj kalõñl̦o̦k jãn wiil̦jea eo aõ im kamaat joña ettõr. Im inaaj lam̦õj im ba, “Iar utam̦we ak kiiõ ij ãjmour ñan indeeo!”