Jab Kõtl̦o̦k bwe Am̦ Nañinmej En Jol̦o̦k Am̦ Lañlõñ

PIJAIK m̦õk am̦ rujtok in jibboñ im kwõlukkuun kijoorore an jem̦l̦o̦k raan eo. Etke? Kõnke ej juon raan kwõj aikuj bar kijenmej kõn nañinmej eo am̦ me ejelõt ãnbwinnũm̦ ak eñjake ko am̦. Kwõmaroñ ãinwõt Job ke ear ba: “Ikõn̦aan lukwõj bũruõ bwe in mej im jab mour ãinwõt in.” (Job 7:​15, UBS) Ta el̦aññe epen an jako nañinmej eo am̦, im eto an pãd ium̦win elõñ iiõ ko?

Eñin kar wãween eo ear wal̦o̦k ippãn Mipiboshet me nejin Jonetan, l̦eo kar jeran Kiiñ Devid. Ke Mipiboshet ear l̦alem an iiõ, ear wõtlo̦k im kõm̦m̦an an “kũrro” ak bol̦io. (2 Samuel 4:⁠4) Ear kanooj bũrom̦õj im inepata ke rar n̦aruon im ba bwe ear jab m̦ool ñan Kiiñ Devid. Men in emaroñ kar kõm̦m̦an bwe en penl̦o̦k wõt ñan an kijenmej kõn nañinmej eo an. Bõtab, aolep iien ear kwal̦o̦k juon joñak em̦m̦an ñan kijenmej meñe ear utam̦we, rar ruruwe, im kabũrom̦õje. Bareinwõt ear jab kõtl̦o̦k bwe mãlejjoñ kein ren kõm̦m̦an bwe en jako an m̦õn̦õn̦õ im lañlõñ.​—2 Samuel 9:​6-10; 16:​1-4; 19:​24-30.

Rijjelõk Paul ej bar juon joñak em̦m̦an. Juon iien ear jeje kõn ‘juon kãlõklõk ilo kanniõkin,’ eo me ear ejjel̦o̦k men en emaroñ kar kõm̦m̦ane kake. (2 Korint 12:⁠7) Kãlõklõk in ear kõnnaan kake emaroñ kar juon nañinmej me eto an jako, ak emaroñ kar armej ro me rar jum̦aeiki an juon rijjelõk. Mekarta, ear jab jako apañ eo an, im ear aikuj kijenmej kake mãlejjoñ in me ear jelõt ãnbwinin ak eñjake ko an.​—2 Korint 12:​9, 10.

Rainin, jet iaan armej ro an Anij rej bõk nañinmej ko repen aer jako ak eñjake ko rekabbeerer. Juon jiroñ 18 an iiõ etan Magdalena, ear bõk juon nañinmej enana me ear eoñ jet men ilo ãnbwinin. Nañinmej in ej kõm̦m̦an bwe kij ko rem̦m̦an ilo ãnbwinid me rej bõbrae an wal̦o̦k nañinmej, ren oktak im ko̦kkure m̦õttan ko ilo ãnbwin eo. Jiroñ in ej ba: “Iar kanooj mijak. Tokãlik, nañinmej eo aõ ear nanal̦o̦k im ear jab em̦m̦an aõ me m̦õñã ko, ear kõm̦m̦an bwe en bok lo̦ñiõ, im jelõt thyroid eo aõ.” Bar juon waanjoñak ej kõn Izabela. Liin ej kate wõt kõn nañinmej eo an me epen an ro jet loe im mel̦el̦e kake. Ej ba: “Iar bõk nañinmej in bũrom̦õj jãn ke iar dik. Men in ear kõm̦m̦an bwe in ikkũm̦kũm̦, pen aõ menono, im jemetak. Kõn men in, ekkã aõ lukkuun m̦õk.”

Kile Joñan Maroñ ko Am̦

Kwõmaroñ illu im inepata ñe ewõr am̦ nañinmej im ñe kwõj juon eo im eutam̦we. Ñe men in ej wal̦o̦k, em̦m̦an bwe kwõn jijet im lukkuun etale wãween eo kwõj jelm̦aiki. Emaroñ jab pidodo ñan kile bwe ewõr joñan am̦ maroñ. Magdalena ej ba: “Nañinmej eo aõ ej kain nañinmej rot eo me ejjab em̦m̦anl̦o̦k ak ej nanal̦o̦k wõt. Ekkã aõ lukkuun m̦õk im pen aõ jerkak jãn kinieõ. Kõnke ijjab jel̦ã ñããt enaaj em̦m̦an aõ mour, ekanooj pen aõ pepe l̦o̦k im̦aan kõn ta eo inaaj kõm̦m̦ane. Men eo el̦aptata aõ inepata kake ej bwe ijjab maroñ kiiõ kal̦apl̦o̦k ijo kun̦aaõ ilo jerbal eo an Jeova ãinwõt kar m̦okta.”

 Zbigniew ej ba: “Kajjojo iiõ, ear l̦apl̦o̦k wõt aõ kũrro. Men in ear kam̦õjn̦o̦ik eõ im kajorrããn kajjojo iaan kõjjem̦ ko ilo ãnbwinnũ. Jet iien, ñe ejiktok an lukkuun metak kũrro e aõ, ijjab maroñ kõm̦m̦ani jerbal ko redik. Ñe men in ej wal̦o̦k, ij lukkuun inepata.”

Jet iiõ ko remootl̦o̦k, taktõ ro rar lo bwe ewõr juon tumor ear eddek ilo kõmãlij eo an Barbara. Liin ej ba: “Ear kajju wõr oktak ko ippa. Ãinwõt ñe emej nukũ, ekutkut an metak bõra, im epen aõ l̦õmn̦ak im kõl̦mãnl̦o̦kjen̦. Kõn aõ nañinmej im dikl̦o̦k aõ maroñ, iar aikuj etale aolep men ko ij kõm̦m̦ani im kõm̦m̦an oktak.”

Aolepen armej rein rej ri karejar ro retiljek an Jeova. Men eo eaorõktata ippãn rein ej ñan kõm̦anm̦an ankilaan. Rej lõke Anij kõn aolepen bũrueer im rej lo an Anij jipañ im kakajoor er.​—Jabõn Kõnnaan 3:​5, 6.

Ewi Wãween Jeova Ej Jipañ Kõj?

Jej aikuj kõjparok bwe jen jab l̦õmn̦ak bwe unin ad nañinmej ej kõnke Anij ejjab buñbũruon ippãd. (Liaajlo̦l̦ 3:​33) L̦õmn̦ak m̦õk kõn Job. Meñe ear “juon armej e weeppãn im wãnõk” ak ear iioon men kein. (Job 1:⁠8) Anij ejjab mãlejjoñe jabdewõt armej kõn men ko renana. (Jemes 1:​13) Aolep nañinmej ko, ekoba nañinmej ko rel̦l̦ap im nañinmej in bũrom̦õj, rej wal̦o̦k ñan kõj kõnke jej bõdañe ro jemed im jined m̦oktata, Adam im Iv.​—Rom 5:⁠12.

Bõtab, Jeova im Jijej renaaj jipañ armej ro rewãnõk. (Sam 34:​15) Iien ko jenaaj lukkuun kile bwe Anij ej ad ‘ri jojomar im ad ri kõjparok’ ej ilo iien ko me reppentata ilo mour ko ad. (Sam 91:​2, UBS) Innem, ke kwõj kijenmej kõn nañinmej eo am̦ me epen namejelan, ta eo emaroñ jipañ eok ñan m̦õn̦õn̦õ im lañlõñ wõt?

Jar: Kwõn l̦oore joñak eo an ri karejar ro retiljek an Anij ilo iien ko etto im jol̦o̦k ineek eo am̦ eddo n̦a ippãn Jemedwõj ilañ ilo am̦ jar. (Sam 55:​22) El̦aññe kwõj kõm̦m̦ane men in, kwõmaroñ lo “aenõm̦m̦an jãn Anij, eo ej el̦l̦ã jãn jel̦ã otemjej.” Aenõm̦m̦an in ‘enaaj kõjparok bũruom̦ im l̦õmn̦ak ko am̦.’ (Pilippai 4:​6, 7) Magdalena ej kijenmej kõn nañinmej eo an ilo an atartar ioon Anij im jar. Ej ba: “Ñe ij kwal̦o̦k aolepen bũruõ ñan Jeova, men in ej kaenõm̦m̦an eõ im kõm̦m̦an bwe in bar m̦õn̦õn̦õ.  Kiiõ ilukkuun mel̦el̦e ta mel̦el̦ein ñe juon ej atartar ioon Anij jãn raan ñan raan.”​—2 Korint 1:​3, 4.

Jeova ej roñjake jar ko am̦. Ewi wãween? Emaroñ kakajoor eok ikijjeen kajoor eo an, Naan eo an, im doulul in armej ro an ipel̦aakin lal̦. Alikkar bwe kwõban kõtmãne bwe Jeova en̦ jol̦o̦k nañinmej eo am̦ ilo kabwilõñlõñ. Bõtab, kwõmaroñ atartar ioon bwe en kakajoor eok im lewõj mãlõtlõt eo kwõj aikuji ñan kijenmej kõn kajjojo apañ ko kwõj iiooni. (Jabõn Kõnnaan 2:⁠7) Emaroñ kakajoor eok im lewõj ñan eok “maroñ eo e kanooj l̦ap.”​—2 Korint 4:⁠7.

Baam̦le: El̦aññe ro uwaan baam̦le eo rej kwal̦o̦k yokwe im jouj emaroñ jipañ eok kijenmej kõn nañinmej eo am̦. Ak keememej bwe nañinmej eo am̦ ej bar jelõt er. Remaroñ ãinwõt kwe im bũrom̦õj ñe ejjel̦o̦k men en̦ remaroñ kõm̦m̦ane. Bõtab, repojak in jipañ eok im renaaj pãd ippam̦ ilo iien ko reppen. Ami jar ippãn doon enaaj jipañ ñan kaenõm̦m̦an bũruom̦.​—Jabõn Kõnnaan 14:⁠30.

Barbara ej ba kõn leddik eo nejin im jet jiroñ ro ilo congregation eo an: “Rej jipañ eõ ilo kwal̦o̦k naan. Aer kijejeto ej rõjañ eõ im kam̦õn̦õn̦õik bũruõ.” Zbigniew ej kile bwe el̦ap an kõrã eo pãleen jipañ e. Ej ba: “Ej lale aolep jerbal ko ilo m̦weo. Ej bareinwõt kanuknuk eõ im ineek iep eo aõ ñan kweilo̦k ko im ilo iien kwal̦o̦k naan.”

Ri tõmak ro m̦õttad: Ñe jej pãd ippãn ri tõmak ro m̦õttad, rej rõjañ im kaenõm̦m̦an kõj. Ak ta el̦aññe kwõjjab maroñ pãd ilo kweilo̦k ko kõnke kwõ nañinmej? Magdalena ej ba: “Ro ilo congregation eo rej kanne katak ko bwe in roñjaki im bõk tokjãn jãni. Ekkã an ri tõmak ro m̦õtta calle tok eõ im lale ewõr ke men ij aikuji. Rej bareinwõt jeje lõta ko ñan rõjañ eõ. Aer keememej eõ im l̦õmn̦ak kõn aikuj ko aõ, men in ej jipañ eõ ñan kijenmej.”

Izabela, eo im ewõr an nañinmej in bũrom̦õj, ej ba: “Elõñ ro ilowaan congregation eo im rej ãinwõt ‘jema’ im ‘jino.’ Rein rej roñjake im kajjioñ mel̦el̦e kõn eñjake ko aõ. Congregation eo ej ãinwõt baam̦le eo aõ. Eñin ej ijo ij lo aõ aenõm̦m̦an im lañlõñ ie.”

Ro im rej jelm̦ae mãlejjoñ ko reoktak jãn doon rej kate er ñan jab ‘kamakel̦o̦k iaaer.’  Jãn aer ãindein, rej kaorõk aer kobal̦o̦k ippãn congregation eo. (Jabõn Kõnnaan 18:⁠1) Aer kõm̦m̦ane men in ej lukkuun kakajoor ro jet. Ilo jinoin, kwõmaroñ ãliklik in kwal̦o̦k ñan ri tõmak ro m̦õttam̦ kõn aikuj ko am̦. Bõtab, enaaj l̦apl̦o̦k aer m̦õn̦õn̦õ im kam̦m̦oolol ñe kwõj kwal̦o̦k bũruom̦ ñan er. Enaaj lel̦o̦k juon iien em̦m̦an ñan kwal̦o̦k aer ‘yokwe ri tõmak ro m̦õttaer ilo m̦ool.’ (1 Piter 1:​22, UBS) Em̦m̦an kwõn ba ñan er bwe kwõj aikuj ial̦ ñan kweilo̦k, kokõn̦aan kwal̦o̦k naan ippãer, ak baj bwebwenato ippãer. Im ñe kwõj kwal̦o̦k aikuj ko am̦ ñan er en jab ilo juon wãween ekaboojoj, ak en ilo juon wãween kwõj kwal̦o̦k am̦ kam̦m̦oolol kõn aer jipañ eok.

L̦õmn̦ak kõn men ko rem̦m̦an: Kwe wõt ewõr am̦ maroñ ñan kõm̦m̦an bwe kwõn lañlõñ wõt ke kwõj kijenmej kõn nañinmej eo am̦. El̦aññe kwõj bũrom̦õj im ebbeer, men kein remaroñ kõm̦m̦an bwe kwõn bõk l̦õmn̦ak ko rejjab em̦m̦an. Baibõl̦ ej ba: “El̦aññe ekajoor am̦ l̦õmn̦ak, innem kwõnaaj kajoor ilo iien am̦ nañinmej; ak el̦aññe em̦õjn̦o̦ am̦ l̦õmn̦ak, innem ejjel̦o̦k am̦ kõjatdikdik.”​—Jabõn Kõnnaan 18:​14, UBS.

Magdalena ej ba: “Ij kate eõ ñan jab l̦õmn̦ak kõn inepata ko aõ. Ij kajjioñ bwe in m̦õn̦õn̦õ ilo raan ko em̦m̦an aõ mour. Ij kile bwe aõ riiti bwebwenato ko an ro im rar tiljek wõt meñe ewõr aer nañinmej, ej kakajoor eõ.” Ñe Izabela ej l̦õmn̦ak kõn an Jeova yokwe im kaorõke, men in ej kakajoore. Ej ba: “Ijel̦ã bwe Jeova ej kaorõk men ko ij kõm̦m̦ani ilo jerbal eo an, im ewõr tokjãn aõ mour. Bareinwõt, ewõr aõ kõjatdikdik ij reim̦aanl̦o̦k ñan e kõn ilju im jekl̦aj.”

Zbigniew ej ba: “Nañinmej eo aõ ej katakin eõ ñan ettã bõro im pokake wõt ilo iien ko reppen. Ej katakin eõ ñan kwal̦o̦k lol̦o̦kjen̦ im mãlõtlõt im bareinwõt jol̦o̦k an ro jet bõd jãn aolepen bũruõ. Iar katak ñan lañlõñ wõt ilo aõ jerbal ñan Jeova im jab bũrom̦õj kõn ña make. Ilo m̦ool, kar kõm̦akũt eõ ñan wõnm̦aanl̦o̦k wõt ilo aõ karejar ñan Jeova.”

Keememej bwe Jeova ej lo am̦ kijenmej. Emel̦el̦e kõn am̦ eñtaan im ej kaorõke eok. Ejamin ‘mel̦o̦kl̦o̦k am̦ jerbal im yokwe, ko kwaar kwal̦o̦k kõn Etan.’ (Hibru 6:​10) Kwõn likũt ilo bũruom̦ kallim̦ur in an ñan aolep ro rej mijak e: “I jamin likũt eok, im I jamin ilo̦k jãn kwe indeeo.”​—Hibru 13:⁠5.

El̦aññe jet iien kwõj ebbeer, kwõn l̦õmn̦ak kõn kõjatdikdik eo kõn lal̦ eo ekããl ak pedetaij eo. Ej epaaktok iien eo ñe kwõnaaj lo jeraam̦m̦an ko Aelõñ eo an Anij enaaj bũktok ñan lal̦ in!

[Box/Pija ilo peij 28]

Rej Wõnm̦aanl̦o̦k im Kwal̦o̦k Naan Meñe Ewõr Aer Nañinmej

“Kiiõ ijjab maroñ make etetal, innem lio pãleeõ ak jet iaan ri tõmak ro m̦õtta rej jipañ eõ ilo jerbal in kwal̦o̦k naan. Ij kakilõklõke jet eoon ko im men ko inaaj ba ñe ij kwal̦o̦k naan.”​—Jerzy, eo im ebilo.

“Ijello̦kun aõ kwal̦o̦k naan ippãn armej ro ilo telephone, ij bar jeje lõta ko im aolep iien ij bar jeje ñan jejjo armej ro im rar kwal̦o̦k aer itoklimo. Ilo aõ pãd ilo aujpitõl̦, aolep iien ij likũt Baibõl̦ eo im bok ko jet an Ri Kõnnaan ro an Jeova iturin men eo kinieõ. Men in ear jipañ eõ ñan jino kwal̦o̦k naan ippãn armej ro.”​—Magdalena, ebõk juon nañinmej enana me eoñ jet men ilo ãnbwinnin.

“Em̦m̦an ippa kwal̦o̦k naan jãn em̦ ñan em̦. Bõtab, ñe ejjab em̦m̦an aõ mour ñan kõm̦m̦ane men in, ij calle armej ro im kwal̦o̦k naan ippãer.”​​—Izabela, ewõr an nañinmej in bũrom̦õj.

“Ij m̦õn̦õn̦õ ñe ij bar jepl̦aak ippãn armej ro iar kwal̦o̦k naan ippãer im ñe ij jipañ ro jet ilo aer katak ippãn ri katak ro aer. Ilo iien ko em̦m̦an aõ mour, ikõn̦aan kwal̦o̦k naan jãn em̦ ñan em̦.”​—Barbara, eo im eddek tumor ilo kõmãlij eo an.

“Imaroñ kotake wõt juon eb emera. Ij kwal̦o̦k naan m̦ae iien elukkuun metak kũrro e aõ im ijjab maroñ wõnm̦aanl̦o̦k.”​—Zbigniew, eo im ekũrro.

[Pija ilo peij 30]

Ro reddik im ro rerũtto jim̦or remaroñ kakajoor ro jet