Kajoor eo an Anij Ear Tõl Armej ro ilo Iien ko an Rijjelõk ro im Ej Tõl Kõj Rainin
Kajoor eo an Anij Ear Tõl Armej ro ilo Iien ko an Rijjelõk ro im Ej Tõl Kõj Rainin
“Ak ejja juon wõt Jetõb [kajoor eo an Anij, NW] eo ej kõm̦m̦an aolep men kein.”—1 KORINT 12:11, UBS.
1. Ta ko jenaaj etali ilo katak in?
ILO raan in Pentekost eo ilo iiõ eo 33, elõñ men ko rekaitoktoklimo rar wal̦o̦k. Eñin raan eo Anij ear lutõkl̦o̦k kajoor eo an ioon ri karejar ro an! (Jerbal 2:1-4) Anij ear jino kõjerbal kajoor eo an ñan tõl armej ro doon ilo juon wãween ekããl. Ilo katak eo l̦o̦k, jaar katak kõn wãween an kar kajoor eo an Anij jipañ ri karejar ro retiljek ilo iien ko etto ñan kõm̦m̦ani men ko repen ilo jerbal eo an Anij. Bõtab, ewi oktak eo ikõtaan wãween an kajoor eo an Anij kar tõl ri karejar ro etto im Kũrjin ro ilo iien ko an rijjelõk ro? Im ewi wãween kajoor eo an ej jipañ im tõl Kũrjin ro rainin? Eñin men ko jenaaj etali ilo katak in.
“Ña Ri Karejaran Irooj”
2. Ta eo Meri ear jel̦ã kadede kõn kajoor eo an Anij?
2 Meri ear pãd ilo iien eo ke Anij ear lutõkl̦o̦k kajoor eo an ilo juon ruum̦ ekilep me ej pãd ilõñ ilo juon em̦ ilo Jerusalem. (Jerbal 1:13, 14) Bõtab m̦okta jãn iien in, Meri ear jel̦ã kadede bwe Jeova emaroñ kõm̦m̦an menin bwilõñ ko ikijjeen kajoor eo an. Elõñl̦o̦k jãn 30 iiõ ko m̦oktal̦o̦k, Jeova ear ukot mour eo an Nejin jãn ilañ bwe en itok im mour ioon lal̦. Ear kõjerbal kajoor eo an ñan kõm̦m̦an bwe Meri en bõro̦ro meñe ejañin kar ioon em̦m̦aan.—Matu 1:20.
3, 4. Ewi wãween an kar Meri l̦õmn̦ak kõn men eo Anij ear kajjitõk bwe en kõm̦m̦ane? Ewi wãween jemaroñ anõke?
3 Etke Jeova ear kããlõt Meri? Ãlikin an kar enjel̦ eo jiroñ Meri bwe enaaj keotak Nejin Anij, Meri ear ba: “Ña ri karejaran Irooj. En wal̦o̦k men in ñan eõ ãinwõt am̦ ba.” (Luk 1:38, UBS) Naan kein an Meri rar kalikkar kain armej rot e. Ear pojak in kõm̦m̦ane men eo Anij ear kõn̦aan bwe en kõm̦m̦ane. Ear jab kajjitõk ippãn enjel̦ eo kõn ta eo armej renaaj ba kõn an bõro̦ro. Im ear jab mijak el̦aññe enaaj jako an Josep kõn̦aan m̦areik e. Ilo an kar Meri ba bwe e ri karejaran Irooj, ear kwal̦o̦k bwe ear lukkuun lõke Jeova.
4 Ewõr ke iien kwõj l̦õmn̦ak bwe etarjen joñan eddo ko am̦ ilo jerbal eo an Anij? Kõj kajjojo jej aikuj kajjitõkin kõj make: Ij ke lukkuun lõke bwe Jeova enaaj kajejjet ankilaan jekdo̦o̦n ta eo enaaj wal̦o̦k? Ij ke lukkuun m̦õn̦õn̦õ in kõm̦m̦ane jerbal eo Jeova ekõn̦aan bwe in kõm̦m̦ane? Kwõmaroñ lõke bwe Anij ej lel̦o̦k kajoor eo an ñan ro im rej reil̦o̦k ñan e im pokake ãinwõt Irooj eo aer.—Jerbal 5:32.
Kajoor eo an Anij Ear Jipañ Piter
5. Ewi wãween an kar kajoor eo an Anij jipañ Piter m̦okta jãn raan in Pentekost eo ilo iiõ eo 33?
5 Ãinwõt kar Meri, rijjelõk Piter ear lo im kile an kajoor eo an Anij jerbal m̦okta jãn kar raan in Pentekost eo ilo iiõ eo 33. Jijej ear kamaroñ e kab rijjelõk ro jet ñan kajutakl̦o̦k enjel̦ ro renana me rar miok n̦a ãnbwinnin armej ro. (Mark 3:14-16, UBS) Piter emaroñ kar kõm̦m̦ane men in meñe Baibõl̦ eo ejjab lukkuun kwal̦o̦k bwe ear kõm̦m̦ane. Bareinwõt, ke Jijej ear jiroñ e bwe en etetal ioon lo̦jet l̦o̦k ñan ippãn ilo Lom̦al̦o in Galili, Piter ear maroñ kõm̦m̦ane men in kõnke kajoor eo an Anij ear pãd ippãn. (Riit Matu 14:25-29.) Innem alikkar bwe Piter ear maroñ kõm̦m̦ani men ko rekabwilõñlõñ kõnke ear lõke bwe kajoor eo an Anij enaaj jipañ e. Ejjabto, kajoor in enaaj kar kamaroñ Piter im rũkal̦oor ro jet ñan kõm̦m̦ani elõñ men ko.
6. Ta eo kajoor eo an Anij ear jipañ Piter ñan kõm̦m̦ane ilo raan in Pentekost eo ilo iiõ eo 33? Im ta eo ear jipañ e ñan kõm̦m̦ane ãlikin iien in?
6 Ilo raan in Pentekost eo ilo iiõ eo 33, kajoor eo an Anij ear kõm̦m̦an bwe ilo kabwilõñlõñ Piter im ro jet ren maroñ kõnono ilo kajin ko jet an armej ro rar itok ñan Jerusalem. Innem Piter ear jutak im kõnono im̦aan jarin armej ro. (Jerbal 2:14-36) Ewõr iien Piter ear mijak ak jab l̦õmn̦ak m̦okta jãn an kõm̦m̦ane juon men. Bõtab ke kajoor eo an Anij ear pãd ioon, Piter ear peran in kwal̦o̦k naan ippãn armej ro meñe ear iioon matõrtõr ak meñe rar jiroñe bwe en bõjrak jãn an kwal̦o̦k naan. (Jerbal 4:18-20, 31) Anij ear kõjerbal kajoor eo an ñan kõm̦m̦akũt Piter bwe en jel̦ã kõn men ko renojak. (Jerbal 5:8, 9) Im ear bareinwõt lel̦o̦k ñan rijjelõk in maroñ eo ñan kõmour juon eo me ear mej.—Jerbal 9:40.
7. Ta katak ko an Jijej me Piter ej kab mel̦el̦e kaki ãlikin kar kabiti ilo raan in Pentekost eo?
7 M̦okta jãn kar raan in Pentekost eo, Piter ear jel̦ã im mel̦el̦e elõñ iaan katak ko rem̦ool an Jijej. (Matu 16:16, 17; Jon 6:68) Bõtab ear wõr jet katak ko me ej kab mel̦el̦e ãlikin wõt kar kabiti ilo raan in Pentekost eo. Ñan waanjoñak, Piter ear jab mel̦el̦e bwe Kũraij enaaj kar jerkakpeje ãlikin jilu raan. Bareinwõt ear jab mel̦el̦e bwe Aelõñ eo enaaj kar pãd ilañ. (Jon 20:6-10; Jerbal 1:6, UBS) Piter ear jab bar mel̦el̦e bwe armej ro remaroñ wanlõñl̦o̦k ñan lañ im irooj ilo Aelõñ ak Kien eo ie. Ear jino jel̦ã im mel̦el̦e kõn katak kein an Jijej ãlikin wõt an kar kajoor eo an Anij kabiti ilo raan in Pentekost eo im kar kããlõte bwe en mour ilañ.
8. Ta eo ri kabit ro im jiip ro jet jim̦or remaroñ mel̦el̦e kake?
8 Ãlikin an kar Anij lutõkl̦o̦k kajoor eo an ioon rũkal̦oor ro an Jijej, rein rar maroñ mel̦el̦e katak ko me rar jab mel̦el̦e kaki m̦oktal̦o̦k. Kajoor eo an Anij ear kõm̦m̦akũt ro rar jei Jeje ko ilo kajin Grik ak Matu ñan Revelesõn, bwe ren kõmel̦el̦e katak ko rem̦ool kõn karõk eo an Jeova jãn jinoin. (Epesõs 3:8-11, 18) Rainin, ri kabit ro ekoba jiip ro jet remaroñ katak im mel̦el̦e ejja katak kein wõt me rem̦ool kõn karõk eo an Anij. (Jon 10:16) Kwõj ke kam̦m̦oolol kõn am̦ maroñ jel̦ã im mel̦el̦e katak ko rem̦ool ilo Naan in Anij me kajoor eo an Anij ej jipañ eok ñan mel̦el̦e kaki?
Paul Ear Obrak kõn Kajoor eo an Anij
9. Ta ko kajoor eo an Anij ear jipañ Paul ñan kõm̦m̦ani?
9 Emaroñ juon iiõ ãlikin raan in Pentekost eo ilo iiõ eo 33, kajoor eo an Anij ear bareinwõt kabit Saul, eo me tokãlik kar n̦aetan Paul. Kajoor eo an Anij ear kamaroñ Paul ñan kõm̦m̦ani men ko me rej jipañ kõj rainin. Ñan waanjoñak, kajoor eo an Anij ear kõm̦m̦akũt e bwe en je 14 bok ko ilo Baibõl̦ eo. Kajoor in ear jipañ Paul ilo ejja wãween eo wõt ear jipañ Piter. Ear jipañ Paul ñan mel̦el̦e im jeje kõn kõjatdikdik eo ñan bõk juon mour ilañ eban wabanban im mej. Ear bar kamaroñ Paul ñan kajutakl̦o̦k enjel̦ ro renana, kejmour ri nañinmej ro, im kõmour juon armej me ear mej! Bareinwõt, kajoor eo an Anij ear kamaroñ Paul ñan kõm̦m̦ane juon jerbal me el̦apl̦o̦k an aorõk. Meñe ri karejar ro an Anij rainin rejjab bõk kajoor eo an Anij ilo juon wãween ekabwilõñlõñ, ak kajoor in ej kamaroñ rein ñan kõm̦m̦ane ejja jerbal in wõt.
10. Ewi wãween an kar kajoor eo an Anij jipañ Paul ñan kõnono ilo peran?
10 Paul ear obrak kõn kajoor eo an Anij im ilo peran ear jum̦aeiki juon ri m̦adm̦õd. Prokonsõl ak komja eo an aelõñ in Saiprõs ear roñjake aer kõnono. Komja in ear lukkuun itoklimo kõn men ko Paul ear ba im ear tõmaki. Baibõl̦ eo ej ba bwe l̦ein ear “bwilõñ kõn katak an Irooj.” (Jerbal 13:8-12) Alikkar, Paul ear jel̦ã bwe kajoor eo an Anij wõt emaroñ kamaroñ e ñan kõnono ilo peran kõn m̦ool eo. (Matu 10:20) Tokãlik Paul ear kajjitõk ippãn congregation eo ilo Epesõs bwe ren wõnm̦aanl̦o̦k wõt im jar bwe Anij en kaperan e ñan kõnono.—Epesõs 6:18-20.
11. Ewi wãween an kar kajoor eo an Anij tõl Paul?
11 Kajoor eo an Anij ear jipañ Paul ñan kõnono ilo peran. Ak jet iien kajoor eo an Anij ear jab kõtl̦o̦k bwe en kõnono ilo jet jikin ko. Kajoor in ear tõl Paul ke ear itoitak im kwal̦o̦k naan ãinwõt juon mejinede. (Jerbal 13:2; riit Jerbal 16:6-10.) Jeova ej wõnm̦aanl̦o̦k im kõjerbal kajoor eo an ñan tõl jerbal in kwal̦o̦k naan eo rainin. Ãinwõt Paul, aolep ri karejar ro an Jeova im rej pokake rej kate er joñan wõt aer maroñ ñan kwal̦o̦k naan kõn m̦ool eo ilo peran im kijejeto. Eoktak wãween an Anij kõjerbal kajoor eo an ñan tõl kõj rainin jãn wãween an kar tõl Paul. Meñe ãindein, jemaroñ lõke bwe Jeova ej wõnm̦aanl̦o̦k wõt im tõl ro em̦ool bũrueer ñan m̦ool eo ikijjeen kajoor eo an.—Jon 6:44.
Jerbal ko Reinjuon jãn Doon
12-14. Juon wõt ke wãween an kajoor eo an Anij jerbal ippãn aolep ri karejar ro an Anij? Ta jet iaan wãween ko kajoor eo an Anij ej jerbal ippãn ri karejar ro an Anij?
12 Rainin el̦ap ad bõk kõketak ñe jej riit kõn wãween an kar Jeova kajeraam̦m̦an ri kabit ro ilo iien ko an rijjelõk ro. Kajoor eo an Anij ear lel̦o̦k an Kũrjin rein maroñ ak “menin letok.” Ke Paul ear jeje l̦o̦k ñan congregation eo ilo Korint kõn menin letok kein aer, ear ba bwe menin letok ko reinjuon jãn doon ak ejja kajoor eo wõt ej litoki. Elõñ wãween jerbal reinjuon jãn doon ak rej jerbal ñan ejja Irooj eo wõt. Im elõñ maroñ ko ippãn armej ro reinjuon jãn doon ak ejja Anij eo wõt ej kamaroñ armej otemjej ñan aolep kain jerbal. (1 Korint 12:4-6, 11, UBS) Paul ear ba bwe kajoor eo an Anij emaroñ jerbal ippãn kajjojo iaan ro doon Anij ñan kõm̦m̦ane juon men. Kajoor in ej tõl “bwij e dik” im ‘jiip ro jet’ jim̦or. (Luk 12:32; Jon 10:16) Bõtab, ejjab juon wõt wãween an jerbal ippãn kajjojo iaan ro ilo congregation eo.
13 Ñan waanjoñak, kajoor eo an Anij ej jitõñ elder ro ilo congregation eo. (Jerbal 20:28) Meñe kajoor in ear kabit Kũrjin ri kabit ro bõtab ejjab aolep rein rej jerbal ãinwõt elder. Mel̦el̦ein men in bwe einjuon wãween an kajoor eo an Anij jerbal ippãn kajjojo iaan ro ilo congregation eo.
14 Kajoor eo me ej kõm̦m̦akũt ri kabit ro ñan jel̦ã bwe rej nejin Anij, ej ejja kajoor eo wõt Jeova ear kõjerbale ñan kajerkakpeje Jijej ñan mour ilañ. (Riit Rom 8:11, 15, UBS.) Jeova ear bar kõjerbale kajoor in ñan kõm̦anm̦an aolepen lañ im lal̦. (Jenesis 1:1-3, UBS) Bareinwõt, Jeova ear kõjerbal kajoor in ñan kal̦apl̦o̦k kapeel eo an Bizalel bwe en maroñ kõm̦m̦ane juon jerbal ejej uwaan kõn tampel̦ eo. Ejja kajoor in ear kõm̦m̦an bwe Samson en dipen im kõm̦m̦ani men ko me ejjel̦o̦k jabdewõt ear maroñ kõm̦m̦ani. Im ejja kajoor in wõt ear jipañ Piter bwe en etetal ioon lo̦jet. Innem eoktak ñe kajoor eo an Anij ej tõl juon armej jãn ñe ej kabiti juon armej. An kajoor eo an Anij kabiti juon armej ej bar juon wãween ejej uwaan me kajoor in ej jerbal. Anij ej eo im ej kããlõt ro me ej kabiti er ikijjeen kajoor eo an.
15. An Anij kabit armej ro kõn kajoor eo an enaaj ke wõnm̦aanl̦o̦k ñan indeeo? Jouj im kõmel̦el̦e.
15 Aolep iien kajoor eo an Anij ear jerbal ippãn ri karejar ro retiljek an Anij ilo wãween ko reinjuon jãn doon. Kajoor in ear jerbal ippãer ium̦win elõñ to̦ujin iiõ ko m̦okta jãn an kar Anij jino kããlõt ri kabit ro. Ear jino kabit er kõn kajoor eo an ilo raan in Pentekost eo ilo iiõ eo 33. Bõtab, eban wõnm̦aanl̦o̦k im kõm̦m̦ane men in ñan indeeo. Meñe enaaj jem̦l̦o̦k an Anij kabit armej ro kõn kajoor eo an, bõtab kajoor in enaaj wõnm̦aanl̦o̦k wõt im jerbal ippãn ro doon Anij bwe ren maroñ kõm̦anm̦an ankilaan ñan indeeo.
16. Ta eo kajoor eo an Anij ej jipañ ri karejar ro an Jeova ñan kõm̦m̦ane kiiõ?
16 Ta eo kajoor eo an Anij ej jipañ ri karejar ro an Jeova ñan kõm̦m̦ane kiiõ? Revelesõn 22:17 ej ba bwe kajoor eo an Anij im lio rej ba: “Kwõn itok.” Eoon in ej wõnm̦aanl̦o̦k im ba: “Im eo ej roñjake, en ba, ‘Kwõn itok.’ Im eo ej maro, en itok; eo e kõn̦aan, en bõk dãn in mour ejej on̦ãn.” Kajoor eo an Anij ej jipañ Kũrjin ro rainin ñan kũrtok jabdewõt “eo e kõn̦aan” bõk dãn in mour. Kũrjin ri kabit ro rej tõl jerbal in im jiip ro jet rej kobal̦o̦k ippãer ñan kõm̦m̦ane jerbal in. Kajoor eo an Anij ej tõl kumi kein ruo. Er aolep rar wũjlepl̦o̦k mour ko aer ñan Jeova ilo aer kar peptaij ilo etan Jemen, Nejin, im kajoor eo an Anij. (Matu 28:19) Aolepeir rej kõtl̦o̦k bwe kajoor eo an Anij en tõl mour ko aer im tokjãn men in rej maroñ kwal̦o̦k yokwe, lañlõñ, aenõm̦m̦an, im men ko ãierl̦o̦k wõt. (Galetia 5:22, 23) Ikijjeen jipañ eo jãn kajoor eo an Anij, rein rej kate er joñan wõt aer maroñ ñan dãpij juon wãween mour erreo me ej kabuñbũruon Anij.—2 Korint 7:1; Revelesõn 7:9, 14.
Wõnm̦aanl̦o̦k Wõt im Kajjitõk kõn Kajoor eo an Anij
17. Ewi wãween kwõmaroñ kwal̦o̦k bwe kajoor eo an Anij ej pãd ippam̦?
17 Innem meñe kõjatdikdik eo am̦ ej ñan mour indeeo ilañ ak ioon lal̦, Jeova emaroñ lewõj “maroñ eo e kanooj l̦ap” bwe kwõn maroñ dãpij am̦ tiljek ñan jem̦l̦o̦kin. (2 Korint 4:7) Armej ro remaroñ kajjirere kake eok im jab jouj ñan eok kõn am̦ kwal̦o̦k naan. Ak el̦aññe kwõjjab kõtl̦o̦k bwe men in en kabbeer eok, kwõj kwal̦o̦k bwe kajoor eo an Anij ej jerbal ippam̦. Keememej bwe ñe armej rej ‘kajjirere kake eok kõn etan Kũraij, kwõn m̦õn̦õn̦õ’ kõnke kajoor eo eaiboojoj an Anij ej pãd ioom̦.—1 Piter 4:14.
18, 19. Ewi wãween Jeova enaaj kõjerbal kajoor eo an ñan jipañ eok? Ta eo kwõj aikuj wõnm̦aanl̦o̦k im kõm̦m̦ane?
18 Anij ej lel̦o̦k kajoor eo an ñan ro im em̦ool aer kajjitõk kake im ej lel̦o̦k ilo ejjel̦o̦k on̦ean. Kajoor in emaroñ kal̦apl̦o̦k am̦ kapeel im kakajoorl̦o̦k kõn̦aan eo am̦ ñan kate eok joñan wõt am̦ maroñ ilo jerbal eo an Anij. “Anij ej jerbal iien otemjej ilo kom̦ bwe kom̦win m̦õn̦õn̦õ im maroñ in pokake ankilaan ñan kom̦.” Jipañ eo jãn kajoor eo an Anij ekoba am̦ kate eok ñan dãpij ‘naan in mour,’ enaaj kõm̦m̦an bwe kwõn “kate eok kõn mijak im ekkõl” bwe kwõn maroñ bõk lo̦mo̦o̦r.—Pilippai 2:12, 13, 16, UBS.
19 Kwõn lõke kajoor eo an Anij kõn aolepen bũruom̦. Innem kwõn kõm̦m̦ane jerbal eo Jeova ej lewõj bwe kwõn kõm̦m̦ane. Kwõn kate eok bwe kwõn kapeel ilo jerbal eo am̦ im kajjitõk bwe Jeova en jipañ eok. (Jemes 1:5) Enaaj jipañ eok ñe kwõj aikuj mel̦el̦e Naan eo an, kijenmej ium̦win apañ ko, im kwal̦o̦k kõn nuuj eo em̦m̦an. Jijej ear kallim̦ur: “Kajjitõk, im naaj lewõj ñan kom̦; kappukot, im kom̦ naaj loe; kal̦l̦al̦l̦al̦, im enaaj pel̦l̦o̦k ñan kom̦.” (Luk 11:9, 13) Men in ej kitibuj am̦ kajjitõk kõn kajoor eo an Anij. Innem wõnm̦aanl̦o̦k ilo am̦ kajjitõk ippãn Jeova bwe kwõn maroñ in ãinwõt aolep ri karejar ro an retiljek me kajoor eo an ear tõl er.
Kwõmaroñ Ke Kõmel̦el̦e?
• Ewi wãween jemaroñ anõke Meri im bõk jeraam̦m̦an ko?
• Ewi wãween an kar kajoor eo an Anij tõl Paul?
• Ewi wãween kajoor eo an Anij ej tõl ri karejar ro an Anij rainin?
[Kajitõk ko ñan katak]
[Pija ilo peij 24]
Kajoor eo an Anij ear kamaroñ Paul bwe en kõnono ilo peran ñan juon ri m̦adm̦õd
[Pija ilo peij 26]
Rainin, kajoor eo an Anij emaroñ jipañ Kũrjin ro jekdo̦o̦n ta kõjatdikdik eo aer
