Kwõj Ke Keememej?

Kwaar ke riiti Imõniaroñroñ ko ilo allõñ ko rej kab mootl̦o̦k? Eokwe, jen lale el̦aññe kwõmaroñ uwaake kajjitõk kein:

• Ta mel̦el̦ein an kar Anij ba ñan Ri Livai ro: “Ña wõt ij tarrin menin jolõt eo am̦ im kõj eo am̦”?

Kajjojo bwij ko jet bwijjin Israel ear wõr aer wãto ak kõj, bõtab Jeova ear tarrin “kõj” eo an bwijjin Livai. (Bõnbõn 18:​20, UBS) Ear ejjel̦o̦k an rein jolõt ilo ãne eo ak kar lel̦o̦k ñan er juon jerbal ekanooj aorõk. Meñe ãindein, Jeova ear kabwe aikuj ko aer. Rainin, ro im rej bõk kun̦aaer ñan kowõnm̦aanl̦o̦k men ko an Aelõñ eo remaroñ lõke bwe naaj kõke aikuj ko aer.​—9/15, 7-8, 13.

• Ewi wãween ri pãlele ro remaroñ kõnono ñan doon ilo kautiej?

Ñe eo rejetam̦ ej kwal̦o̦k l̦õmn̦ak ko an, ‘en m̦õkaj am̦ roñjake, en rum̦wij am̦ kõnono.’ (Jemes 1:​19) Juon eo im ejel̦ã roñjake ejjab baj roñjake wõt ak ej kajjioñ mel̦el̦e kõn eñjake ko an armej eo me ej kõnnaan. Kõn men in, ñe eo pãleem̦, ej kwal̦o̦k l̦õmn̦ak ko an, kate eok ñan mel̦el̦e kõn eñjake ko an. Wãween am̦ roñjake enaaj kalikkar ñan eo pãleem̦ el̦aññe kwõj kwal̦o̦k kautiej ñan e ak jaab.​—10/1, peij 11.

• Ta eo emaroñ jipañ juon Kũrjin ñan kile kain menin kam̦õn̦õn̦õ rot ko rem̦m̦an im renana ñan e?

Ñan kããlõt menin kam̦õn̦õn̦õ ko rem̦m̦an im rej kabuñbũruon Anij, jemaroñ kajjitõkin kõj make kõn kajjitõk kein: Kain rot menin kam̦õn̦õn̦õ ko? Ewi joñan aõ jol̦o̦k iien ñan menin kam̦õn̦õn̦õ ko? Wõn ro m̦õtta?​—10/15, peij 9-​12.

• El̦aññe juon armej ej kajjitõke eok ñan m̦areiki, etke kwõj aikuj lukkuun etale men in m̦okta?

Jab ebbeer meñe emaroñ to am̦ kõttar. Jeova ejel̦ã ta eo kwõj aikuji, im el̦aññe kwõj lõke e, enaaj jipañ eok ñan kijenmej wõt. (Hibru 13:⁠6) Ta el̦aññe juon ej kajjitõke eok bõtab ejjab kajoor kõtaan eo an ippãn Anij ak ejjab juon iaan Ri Kõnnaan ro an Jeova? Bõlen kõn̦aan eo am̦ ñan m̦are elukkuun kajoor. Ak el̦aññe ebõd kããlõt eo am̦, enaaj l̦apl̦o̦k am̦ bũrom̦õj jãn ke kwaar bũrom̦õj ke kwaar make iaam̦. Keememej bwe kwõnaaj aikuj tiljek wõt ñan armej eo kwaar kããlõte ñan m̦areiki. Jokãlõt eo am̦ kiiõ enaaj jelõt aolepen mour eo am̦. (1 Korint 7:​27, UBS) Kwõn jab m̦are kõnke kwõj l̦õmn̦ak bwe kwõban bar lo juon. Kwõmaroñ naaj ajl̦o̦k im iañaktok am̦ tokãlik.​—10/15, peij 15.

• Ta eo jemaroñ katak jãn jar ko an Hezekaia, Hanna, im Jona?

Ñe jej kajjitõk jipañ ippãn Jeova kõn apañ eo ad, jej aikuj l̦õmn̦ak kõn unin ad jar. Ñe jej jar ñan Jeova bwe en jipañ kõj, jej aikuj keememej in jar bwe en kokwõjarjar ãt eo etan im kam̦ool bwe ej tõllo̦kũn irooj bõtata. Jet iien Jeova ej uwaaki jar ko ad ikijjeen an kakajoor kõj ñan kijenmej kõn apañ eo ad.​—11/15, peij 7.

• Ewi wãween eoon ko ilo Jabõn Kõnnaan 7:​6-23 remaroñ jipañ kõj ñan kõjparok bwe jen jab alwõje pija ko rettoon im renana?

Eoon kein rej kwal̦o̦k kõn juon likao me ear ilo̦k ilo ial̦ eo me ejel̦ã bwe epaake m̦weo im̦õn juon kõrã ekijoñ. Lio ear kareel e bwe en pãd ippãn. Rainin, jej aikuj kõjparok jãn Web site ko ilo Internet me rej kwal̦o̦k pija ko rettoon im renana. Im eaorõk bwe jen jar ñan Jeova bwe en jipañ kõj m̦okta jãn ad etal ñan Web site ko me emaroñ jirilo̦k im wal̦o̦k pija ko rettoon.​—11/15, peij 9-​10.

• Etke jej aikuj kajjitõk ippãn Anij ñan letok kajoor eo an bwe en tõl kõj?

Jijej ear jel̦ã joñan an aorõk kajoor eo an Anij ilo mour eo an. Innem ear kanooj rõjañ rũkal̦oor ro an ñan jar kõn kajoor eo an Anij im kõtl̦o̦k bwe en tõl mour ko aer. (Luk 11:​9-13) Kajoor eo an Anij emaroñ ukot l̦õmn̦ak ko ad im jipañ kõj ñan bõk “l̦ol̦ãtãt an Kũraij.” (1 Korint 2:16; Rom 12:​2, UBS) Mel̦el̦ein men in bwe ñe jej kõtl̦o̦k bwe kajoor eo an Anij en tõl mour ko ad, jemaroñ l̦õmn̦ak ãinwõt Kũraij im anõke joñak eo an.​—12/15, peij 10.