Eñin Ej Jikin Kabuñ eo Ad

“El̦ap Aõ kijejeto bwe en em̦m̦an aer kõjerbal m̦weo im̦õm̦.”—JON 2:17.

AL: 13, 21

TA UWAAK EO AM̦?

Ewi wãween ad kwal̦o̦k kautiej ilo iien kweilo̦k ko ad?

Ilo wãween et ko armej ro an Jeova rej jipañ bwe en jutak Im̦õn Kweilo̦k ko?

Etke elukkuun aorõk bwe jen karreoik im kõjparok wõt Im̦õn Kweilo̦k ko ad?

1, 2. (1) Ilo kar iien ko etto, ia ko rũkarejar ro an Jeova rar kabuñ ie? (2) Ewi wãween an kar Jijej watõk tampel̦ eo an Jeova ilo Jerusalem? (3) Ta eo jenaaj katak kake ilo katak in?

 JÃN iien ko etto in an wõr an rũkarejar ro an Anij jikin kabuñ. Ñan waanjoñak, ke Ebel ear lel̦o̦k menin katok ñan Jeova, emaroñ kar kõm̦m̦ane juon lokatok. (Jenesis 4:3, 4) Noa, Ebream, Aisak, Jekob, im Moses rar aolep kõm̦m̦an aer lokatok. (Jenesis 8:20; 12:7; 26:25; 35:1; Exodus 17:15) Jeova ear jiroñ RiIsrael ro bwe ren kalõk juon im̦õn kõppãd. (Exodus 25:8, UBS) Tokãlik, ear ba bwe ren kalõk juon tampel̦. (1 Kiiñ 8:27, 29, UBS) Ãlikin an armej ro an Anij kar jepl̦aak jãn aer kõm̦akoko ilo Babil̦on, rekõn keini aer kweilo̦k ippãn doon ilo im̦õn kabuñ ko aer. (Mark 6:2; Jon 18:20; Jerbal 15:21) Kũrjin ro m̦oktata rar kweilo̦k ilo m̦õko im̦õn rũttõmak ro m̦õttaer. (Jerbal 12:12; 1 Korint 16:19, UBS) Im rainin, armej ro an Jeova jãn ipel̦aakin lal̦ in rej kweilo̦k ippãn doon ilo elõñ to̦ujin Im̦õn Kweilo̦k ko. Rein rej katak kõn Jeova im kabuñ ñane ilo Im̦õn Kweilo̦k kein.

² Jijej ear lukkuun kaorõk tampel̦ eo an Jeova ilo Jerusalem. Kõnke Jijej ear lukkuun kaorõk tampel̦ eo, men in ear kakeememej rũkal̦oor ro an kõn naan ko an juon rijeje sam ke ear ba:  “El̦ap Aõ kijejeto bwe en em̦m̦an aer kõjerbal m̦weo im̦õm̦.” (Sam 69:9; Jon 2:17) Im̦õn Kweilo̦k ko ad rainin rejjab ãinwõt kar tampel̦ eo ilo kar Jerusalem. (2 Kronikel 5:13; 33:4) Meñe ãindein, ak jej aikuj kaorõk Im̦õn Kweilo̦k kein ad kõnke rej jikin ad kabuñ. Ilo katak in, jenaaj katak kõn naanin kakapilõk ko jãn Baibõl̦ me renaaj jipañ kõj ñan jel̦ã ta ko rekkar ñan ad kõm̦m̦ani ilo Im̦õn Kweilo̦k ko ad, im kõn wãween ad kõjparoki im kõl̦l̦ãik on̦ãer. *—Lale kõmel̦el̦e eo itulal̦.

JEJ KAORÕK IIEN KWEILO̦K KO AD

3-5. Im̦õn Kweilo̦k ko ad rej jikin ta, im ewi wãween ad aikuj watõk iien kweilo̦k ko ad?

³ Im̦õn Kweilo̦k ko rej ijo me armej ro rej kobatok ippãn doon im kabuñ ñan Jeova. Iien kweilo̦k ko ad rej menin letok jãn Anij, im rej jipañ kõj ñan kakajoorl̦o̦k jem̦jerã eo ad ippãn. Ilo iien kweilo̦k ko ad, jej bõk naanin tõl im naanin rõjañ ko jãn doulul eo an Jeova. Jelukkuun jeraam̦m̦an bwe Jeova im Nejin rej kũrtok kõj bwe jen “m̦õñã ilo tebõl̦” an Jeova kajjojo wiik. Kõn men in, jej aikuj lukkuun kaorõk jeraam̦m̦an in epãd ippãd.​—1 Korint 10:21.

⁴ Elukkuun alikkar an Jeova kõn̦aan bwe jen pãd ilo kweilo̦k ko bwe jen kabuñ ñane im rõjañ doon. (Riit Hibru 10:24, 25, UBS.) El̦aññe jej lukkuun kautiej Jeova, jenaaj kate kõj bwe jen jab jako jãn kweilo̦k ko, m̦ae iien ej lukkuun menin aikuj bwe jen jako. Jej kwal̦o̦k ad kam̦m̦oolol kõn kweilo̦k ko ñe jej kõppojakl̦o̦k im̦aan im bõk kun̦aad ilo uwaak.​—Sam 22:22.

⁵ Kõm̦m̦an ko ad ilo iien kweilo̦k ko im wãween ad kõjparok Im̦õn Kweilo̦k ko ad rej kwal̦o̦k joñan ad kautiej Jeova. Kõnke etan Jeova ekkã an wal̦o̦k ilo jain in Im̦õn Kweilo̦k ko ad, jej aikuj kate kõj bwe kõm̦m̦an ko ad ren kaiboojoj ãt eo etan.​—Bar lale 1 Kiiñ 8:17.

6. Ta ko jet armej rej ba kõn Im̦õn Kweilo̦k ko ad im ro rej pãd ilo iien kweilo̦k ko? (Lale pija eo ilo jinoin katak in.)

⁶ Ñe jej kaorõk Im̦õn Kweilo̦k ko ad, ro jet renaaj kile men in. Ñan waanjoñak, juon em̦m̦aan jãn aelõñin Turkey ej ba: “Ke iar lo an lukkuun erreo im mel̦ak Im̦õn Kweilo̦k eo aer, men in ear lukkuun kabwilõñ eõ. Wãween an armej ro nuknuk elukkuun karbõb, im rej ettõñdikdik im yokyokweik ña. El̦ap aõ kar bwilõñ kõn men in.” Em̦m̦aan in ear jino itok ñan iien kweilo̦k ko im ejjabto tokãlik ear peptaij. Ilo juon jikin ilo Indonesia, ro jeid im jatid rar kũrtok ro rũturier, mayor eo, im ro jet rej jerbal ilo kien bwe ren itõn lale Im̦õn Kweilo̦k eo aer ekããl. Mayor in ear lukkuun bwilõñ kõn an lukkuun kar em̦m̦an wãween aer kar kalõke Im̦õn Kweilo̦k in im an aiboojoj menin eddek ko kar katõki inabõjin. Mayor in ear ba: “Erreo eo an Im̦õn Kweilo̦k in ej kwal̦o̦k bwe kabuñ n̦e ami em̦ool.”

7, 8. Ewi wãween ad kwal̦o̦k bwe jej kautiej Jeova ñe jej pãd ilo Im̦õn Kweilo̦k ko ad?

⁷ Jeova eo ej kũrtok kõj ñan iien kweilo̦k ko. Ej kea kõn wãween ad nuknuk im kõn wãween kõm̦m̦an ko ad. Kõn men in, jej aikuj kõjparok bwe jen jab kõm̦m̦an kien kõn ta ko jemaroñ kõm̦m̦ani im ta ko jejjab maroñ kõm̦m̦ani ilo Im̦õn Kweilo̦k eo. Bareinwõt, jen jab watõk Im̦õn Kweilo̦k eo ãinwõt m̦õko im̦õd me jemaroñ kõm̦m̦an jabdewõt men jekõn̦aan ie. M̦ool bwe Jeova ekõn̦aan bwe kõj im armej ro me jej kũrtok er jen jab mijak im abn̦õn̦õ ñe jej kweilo̦k ilo Im̦õn Kweilo̦k ko ad. Bõtab, jejjab kõn̦aan kwal̦o̦k ad jab kaorõk kweilo̦k ko ilo jabdewõt wãween. Eñin unin jejjab kõn̦ak nuknuk ko  me rejokdãd im jej ekpã kaki, im jej aikuj kõjparok bwe jen jab text, keroro, ak m̦õñã im idaak ilo iien kweilo̦k ko. Im ro jinen im jemãn ajri ro rej aikuj katakin ajri ro bwe ren jab iukkure im ettõrto ettõrtak ilo Im̦õn Kweilo̦k eo.​—Ekklisiastis 3:1.

⁸ Ke Jijej ear lo an armej ro peejnej ilo tampel̦ eo an Anij, ear lukkuun illu im ear kadiwõjl̦o̦k er jãn tampel̦ eo. (Jon 2:13-17) Ilo Im̦õn Kweilo̦k ko ad jej kabuñ ñan Jeova im katak kõn E. Kõn men in, Im̦õn Kweilo̦k ko ad rejjab jikin ad peejnej, kabajet, ak kõm̦m̦ani men ko ãierl̦o̦kwõt.​—Bar lale Nihimaia 13:7, 8, UBS.

JEJ JIPAÑ BWE EN JUTAK IM̦ÕN KWEILO̦K KO

9, 10. (1) Ewi wãween an armej ro an Jeova kalõk Im̦õn Kweilo̦k ko, im ta tõprak ko rar wal̦o̦k? (2) Ta wãween jipañ eo me eklejia ko ejabwe jããn ippãer rej bõk tokjãn jãne?

⁹ Armej ro an Jeova ipel̦aakin lal̦ in rej ekkal Im̦õn Kweilo̦k ko. Aolep ro rej bõk kun̦aaer ñan jiñaiki jekjekin Im̦õn Kweilo̦k kein, kalõki, im kõkããli rej m̦õn̦õn̦õ in jipañ ilo ejjel̦o̦k on̦ãn. Ta tõprak ko rar wal̦o̦k jãn men in? Jãn Nobõm̦ba 1, 1999 eo, elõñl̦o̦k jãn 28,000 Im̦õn Kweilo̦k ko rekããl kar kalõki ipel̦aakin lal̦ in. Mel̦el̦ein bwe ium̦win 15 iiõ ko remootl̦o̦k tok ñan kiiõ, ewõr tarrin 5 Im̦õn Kweilo̦k ko ej dedel̦o̦k ad kalõki kajjojo raan.

¹⁰ Doulul in an Jeova ej jilkinl̦o̦k ro rej m̦õn̦õn̦õ in jipañ ilo ejjel̦o̦k on̦ãn ñan jikin ko ewõr jerbalin ekkal ie. Doulul in ej bareinwõt kõjerbali jããn in jabawõt ko ñan kalõk Im̦õn Kweilo̦k ko ilo jabdewõt jikin ko el̦ap aer aikuj Im̦õn Kweilo̦k ie. Wãween jipañ in ej pedped ioon naanin kakapilõk eo ilo Baibõl̦ me ej ba bwe ro ewõr maroñ ippãer ren jipañ ro rej pãd ilo aikuj. (Riit 2 Korint 8:13-15, UBS.) Eñin unin elõñ kiiõ Im̦õn Kweilo̦k ko rekããl ñan eklejia ko me ejabwe jããn ippãer ñan ekkal aer Im̦õn Kweilo̦k.

11. Ta eo jet jeid im jatid rej ba kõn Im̦õn Kweilo̦k eo aer ekããl, im ewi wãween am̦ l̦õmn̦ak kõn men in?

¹¹ Ro jeid im jatid jãn juon eklejia ilo Costa Rica rar je im ba: “Ñe kõmij jutak inabõjin Im̦õn Kweilo̦k eo, ej ãinwõt ñe kõmij ettõn̦ak! Kõmij jab tõmak bwe ewõr juon ammim Im̦õn Kweilo̦k eaiboojoj im kar kalõke ium̦win wõt 8 raan! Kõn kajeraam̦m̦an eo jãn Jeova, karõk ko jãn doulul in an, im kõn jipañ ko jãn ro jeid im jatid, ear maroñ dedel̦o̦k m̦wiin. Jikin kabuñ in ej juon menin letok eaorõk me Jeova ear letok. El̦ap am m̦õn̦õn̦õ kake Im̦õn Kweilo̦k in ekããl.” El̦ap ad m̦õn̦õn̦õ ñe jej roñ an ro jeid im jatid kam̦m̦oolol Jeova kõn men ko ej kõm̦m̦ani ñan er. Im el̦ap ad m̦õn̦õn̦õ bwe emaroñ kiiõ wõr an aolep ro jeid im jatid ipel̦aakin lal̦ in Im̦õn Kweilo̦k.  Elukkuun alikkar bwe Jeova ej kajeraam̦m̦an jerbalin ekkal Im̦õn Kweilo̦k ko kõnke elukkuun lõñ armej ro rej jino itok ñan iien kweilo̦k ko im katak kõn Jeova ãlikin wõt an dedel̦o̦k kalõki Im̦õn Kweilo̦k kein.​—Sam 127:1.

12. Ewi wãween am̦ maroñ jipañ jerbalin ekkal Im̦õn Kweilo̦k ko?

¹² Ewi wãween am̦ maroñ jipañ jerbalin ekkal Im̦õn Kweilo̦k ko? Juon wãween ej ilo am̦ m̦õn̦õn̦õ in jerbal ilo iien ekkal ko. Im kõj aolep jemaroñ jipañ jerbal in ikijjeen ad jabawõt. Ñe jenaaj kate kõj joñan wõt ad maroñ ñan rejetak jerbal in, jenaaj kile ad m̦õn̦õn̦õ, im el̦aptata jenaaj kaiboojoj im nõbar Jeova. Jej anõke joñak eo an armej ro an Anij ilo iien ko etto me rar m̦õn̦õn̦õ in jipañ im jabawõt ñan kalõk jikin kabuñ ko aer.​—Exodus 25:2; 2 Korint 9:7.

JEJ KARREOIK IM̦ÕN KWEILO̦K KO AD

13, 14. Ta ko jej katak kaki ilo Baibõl̦ me rej kwal̦o̦k bwe jej aikuj kõm̦m̦an bwe Im̦õn Kweilo̦k ko ad ren erreo wõt im mel̦ak?

¹³ Jej kabuñ ñan juon Anij eo erreo im kwõjarjar me ekõn̦aan bwe jen kõm̦m̦an men otemjej ilo laajrak. Eñin unin jej aikuj kõm̦m̦an bwe Im̦õn Kweilo̦k eo ad en erreo wõt im mel̦ak. (Riit 1 Korint 14:40.) Im bwe jen erreo im kwõjarjar ãinwõt Jeova, jejjab baj kõm̦m̦an wõt bwe wãween ad kabuñ, wãween ad l̦õmn̦ak, im kõm̦m̦an ko ad ren erreo. Bõtab, jej bar kõm̦m̦an bwe en erreo ãnbwinnid.​—Revelesõn 19:8, UBS.

¹⁴ Ñe jej kõm̦m̦an bwe Im̦õn Kweilo̦k ko ad ren erreo wõt im mel̦ak, jenaaj m̦õn̦õn̦õ in kũrtok armej ro ñan iien kweilo̦k ko ad. Im armej ro renaaj lo bwe jej mour ekkar ñan men ko jej kwal̦o̦k naan kaki kõn juon  lal̦ ekããl im erreo. Renaaj kile bwe jej kabuñ ñan juon Anij erreo im kwõjarjar me enaaj kõm̦m̦an bwe lal̦ in en erom juon pedetaij eaiboojoj.​—Aiseia 6:1-3; Revelesõn 11:18.

15, 16. (1) Etke ejjab aolep iien epidodo ñan kõm̦m̦an bwe Im̦õn Kweilo̦k eo ad en erreo wõt? (2) Etke jej aikuj kõm̦m̦an bwe en erreo wõt? (3) Ta laajrak in karreo ko an Im̦õn Kweilo̦k eo am̦, im ta jeraam̦m̦an eo epãd ippãd kajjojo?

¹⁵ Ewõr jet armej me eaorõk karreo ippãer, im bar jet me ejjab lukkuun aorõk karreo ippãer. Etke ej ãindein? Eokwe, emaroñ kõnke eoktak wãween aer kar dik im rũttol̦o̦k. Bareinwõt, ewõr jet ro me rej jokwe ilo jikin ko el̦ap bũñal ie ak jikin ko me ettoon im pedkat ial̦ ko ie. Im ro jet ejabwe aer dãn ak kein karreo. Jekdo̦o̦n ia eo jej jokwe ie im ewi wãween an armej ro ijo l̦õmn̦ak kõn karreo, ak jej aikuj kõm̦m̦an bwe Im̦õn Kweilo̦k ko ad ren erreo wõt im mel̦ak. Etke? Kõnke rej jikin ad kabuñ ñan Jeova.​—Duteronomi 23:14.

¹⁶ Ñe jekõn̦aan bwe Im̦õn Kweilo̦k ko ad ren erreo wõt, ej aikuj wõr laajrak. Em̦m̦aan ro rej lale eklejia eo rej aikuj kõm̦m̦an jikejuul̦ im lale bwe aolep iien en wõr kein jerbal im karreo ko ñan eklejia eo. Bareinwõt rej kõm̦m̦an laajrak bwe en dedel̦o̦k aolep jerbal ko. Ewõr jet men ko jej aikuj in karreoiki kajjojo iien ãlikin kweilo̦k, im ewõr jet men me ejjab aolep iien jej aikuj karreoiki. Kõj aolep epãd ippãd jeraam̦m̦an eo ñan karreoik Im̦õn Kweilo̦k eo ad.

JEJ KÕJPAROK IM̦ÕN KWEILO̦K KO AD

17, 18. (1) Ta eo jemaroñ katak jãn wãween an armej ro an Jeova ilo kar iien ko etto kõjparok tampel̦ eo aer? (2) Etke jej aikuj kõjparok Im̦õn Kweilo̦k ko ad?

¹⁷ Jej kõjparok Im̦õn Kweilo̦k eo ad ilo ad kõm̦m̦ani jorrããn ko ie. Rũkarejar ro an Jeova m̦okta rar bar kõm̦m̦ane men in. Ñan waanjoñak, ilo tõre ko an kiiñ eo an Juda etan Joash, armej ro rar jabawõt im lel̦o̦k jããn ñan tampel̦ eo. Im kiiñ eo ear jiroñ bũrij ro bwe ren kõjerbal jããn ko ñan kõkããle ijoko rar jorrããn ilo tampel̦ eo. (2 Kiiñ 12:4, 5, UBS) Elõñl̦o̦k jãn 200 iiõ ko tokãlik, Kiiñ Josaia ear bar kõjerbal jabawõt ko ñan kõkããle ijoko rejorrããn ilo tampel̦ eo.​—Riit 2 Kronikel 34:9-11, UBS.

¹⁸ Jet iaan em̦m̦aan ro rej lale ra ko rej kile bwe armej ro ilo ijoko rej jokwe ie rejaje kilen kõjparok m̦õko im̦weer ak kein jerbal ko aer. Unin an ãindein ej kõnke bõlen jet wõt armej ilo jikin kein rejel̦ã kilen kõm̦m̦ani jorrããn ko ilo men kein. Ak bõlen ejabwe jããn ippãer ñan kõl̦l̦ã on̦ãn kõkããli. Bõtab, ñe jejjab kõkããli jorrããn ko ilo Im̦õn Kweilo̦k ko ad, enaaj jino jorrããnl̦o̦k im armej ro renaaj kile. Enaaj oktak im nana etad ippãn armej ro jet. Ak el̦aññe jej kate kõj ñan kõjparok Im̦õn Kweilo̦k ko ad, jej lel̦o̦k nõbar im aiboojoj ñan Jeova im jejjab kajettokjãn jããn ko me ro jeid im jatid rej jabawõt kaki.

19. Ta eo kwõmaroñ kõm̦m̦ane ñan kwal̦o̦k am̦ kaorõk im̦õn kabuñ eo ad ñan Jeova?

¹⁹ Im̦õn Kweilo̦k ko ad rej an Jeova. Rejjab an jabdewõt armej ak eklejia. Ãinwõt ad kar katak kake ilo katak in, naanin kakapilõk ko ilo Baibõl̦ renaaj jipañ kõj bwe en jim̦we wãween ad l̦õmn̦ak kõn jikin kabuñ eo ad ñan Anij. Kõnke jej kautiej Jeova, jej kaorõk iien kweilo̦k ko ad im Im̦õn Kweilo̦k ko ad. El̦ap ad m̦õn̦õn̦õ in jabawõt bwe en maroñ lõñl̦o̦k wõt Im̦õn Kweilo̦k ko, im jej kate kõj ñan kõjparoki im karreoiki. Ãinwõt Jijej, jej kwal̦o̦k ad kijejeto im kaorõk im̦õn kabuñ ko ad ñan Jeova.​—Jon 2:17.

[Kõmel̦el̦e eo itulal̦]

[Kajjitõk ko]