Eaorõk Ke Wõn Ro Rej Kile Jerbal ko Am̦?

BIZALEL im Oholiab rar jel̦ã jerbalin ekkal. Ke rar rũkõm̦akoko ilo Ijipt, ejjel̦o̦k pere bwe elukkuun lõñ pirõk ko rar kõm̦m̦ani. Bõtab, iiõ kein em̦õj aer mootl̦o̦k. Kiiõ em̦õj an Anij jitõñe erro bwe ren tõl jerbalin ekkal eo ñan im̦õn kõppãd eo im ãeik men ko kõbwebweien. (Exodus 31:1-11, UBS) Bõtab, jejjo wõt armej rar maroñ lo jerbal ko raiboojoj erro kar kõm̦m̦ani. Men in ear ke kõm̦m̦an bwe erro en illu im inepata? Ear ke aorõk ippãerro wõn ro rar lo im kile jerbal ko aerro? Eaorõk ke wõn ro rej lo im kile jerbal ko am̦?

JEJJO WÕT RAR LOI JERBAL KO AER RAIBOOJOJ

Jet iaan men ko kõbwebweien im̦õn kõppãd eo rej jet iaan jerbal ko rej make wõt em̦m̦antata im aiboojoj. Ñan waanjoñak, rijjilõk Paul ear ba bwe annañin kerub ko kar kõm̦m̦ani jãn kool̦ me rar pãd itulõñin tõptõp in kallim̦ur eo rar ‘aiboojoj.’ (Hibru 9:5, UBS) Baj pijaikl̦o̦k joñan an aiboojoj annañin kerub kein me kar kõm̦m̦ani jãn kool̦ ilo aer noi im l̦ami kõn am̦a!—Exodus 37:7-9.

Ñe jerbal kein an Bizalel im Oholiab renaaj kar pãd rainin, renaaj kar pãd ilo jikin kaalwõjwõj ko rem̦m̦antata im elukkuun lõñ armej renaaj kar loi im kile joñan aer em̦m̦an. Bõtab, ilo kar tõre ko an Bizalel im Oholiab, jete armej ro rar loi im kile jerbal ko aerro? Annañin kerub ko rar pãd ilo Jikin Kwõjarjar Otem Kwõjarjar. Kõn men in, bũrij l̦apl̦ap eo wõt ear maroñ loi men kein ñe ej del̦o̦ñe ijin juon alen kajjojo iiõ, ilo Raanin Kõllaajrak eo. (Hibru 9:6, 7, UBS) Jejjo wõt armej rar loi men kein.

RAR M̦ÕN̦ÕN̦Õ WÕT MEÑE EAR JAB LÕÑ RAR NÕBAR JERBAL KO AER

Ñe en kar kwe Bizalel ak Oholiab im kwaar kate eok ñan kõm̦m̦ani jerbal kein relukkuun em̦m̦an, enaaj kar ta eñjake eo am̦ ñe kwõn kar jel̦ã bwe jejjo wõt armej rar loi? Ilo raan kein, elõñ armej rej m̦õn̦õn̦õ kõn jerbal ko aer ñe ro jet rej nõbar er im kile er. Eñin ej wãween eo ñan aer kile bwe ewõr tokjãn aer kate er jerbal. Bõtab, armej ro an Jeova reoktak. Ãinwõt Bizalel im Oholiab, jej m̦õn̦õn̦õ in kate kõj kõn men ko jej kõm̦m̦ani kõnke jejel̦ã bwe jej kõm̦anm̦an ankilaan Jeova im bwe ej buñbũruon ippãd.

Ilo tõre ko an Jijej, ekkã an kar rũtõl in kabuñ ro jar ilo wãween ko me rej kabwilõñ ro jet. Bõtab, Jijej ear katakin armej ro bwe ñe rej jar, ren jar jãn bũrueer im jab ñan kappok nõbar jãn ro jet. Etke? Kõnke ear ba: “Jememi, eo ej lo men ko kom̦ij kõm̦m̦ani ilo ittino, enaaj n̦aon̦eami.”  (Matu 6: 5, 6, UBS) Ealikkar bwe men eo eaorõktata ej wãween an Jeova l̦õmn̦ak kõn jar ko ad, ejjab wãween an ro jet l̦õmn̦ak. L̦õmn̦ak ko an rej kõm̦m̦an bwe en wõr tokjãn jar ko ad. Ejjel̦o̦k oktak jãn jerbal ko jej kõm̦m̦ani ñan Jeova. Jejjab l̦õmn̦ak bwe eaorõk jerbal ko jej kõm̦m̦ani ñane kõnke ro jet rej nõbar kõj. Unin ad kile aorõkin jerbal ko ad ej kõnke jejel̦ã bwe rej kabuñbũruon Jeova, ‘eo ej lo men ko jej kõm̦m̦ani ilo ittino.’

Juon kõdo̦ ear “kalbubu m̦õn kweilo̦k eo, im aiboojoj an Jeova ear kobrak m̦õn kõppãd” eo ke ear dedel̦o̦k. (Exodus 40:34) Men in ej kaalikkar bwe Jeova ear m̦õn̦õn̦õ kõn im̦õn kõppãd eo! Kar ta l̦õmn̦ak ko an Bizalel im Oholiab ilo tõre eo? Meñe rar jab likũt etaerro ilo jerbal ko erro kar kõm̦m̦ani bwe ro jet ren loi, ak ejjel̦o̦k pere bwe erro kar m̦õn̦õn̦õ im jubũrueerro kõnke erro jel̦ã bwe Anij ear kajeraam̦m̦an erro ilo aerro kar kõm̦m̦ani jerbal ko aerro. (Jabõn Kõnnaan 10:22) Bareinwõt, el̦ap aerro m̦õn̦õn̦õ kõnke men ko rar kõm̦m̦ani rar wõnm̦aanl̦o̦k wõt im kõjerbali ilo aer kabuñ ñan Jeova. Ñe Bizalel im Oholiab renaaj bar mour ilo jukjukun pãd eo ekããl, ejjel̦o̦k pere bwe erro naaj lukkuun bwilõñ ñe rejel̦ã bwe kar kõjerbal im̦õn kõppãd eo ium̦win enañin 500 iiõ ko ñan kabuñ ñan Jeova!

Ilo doulul in an Jeova ilo raan kein, ewõr ro rej kõm̦m̦ani pijain alwõj ko ñan ajri ro, rijiña ro, ro rej kõm̦m̦ani al ko, rũpija ro, rukok ro, im rijeje ro. Ro jet rejjab “loi” ta ko rein rej kõm̦m̦ani. Ãindeinl̦o̦k wõt bar jerbal ko rej kõm̦m̦ani ilo elõñl̦o̦k jãn 110,000 eklejia ko ipel̦aakin lal̦ in. Wõn ej lo an eo ej lale jããn ko an eklejia eo kõm̦m̦ani jerbal ko an im kanne aolep peba ko ej aikuj kanni ilo jem̦l̦o̦kin kajjojo allõñ? Wõn ej lo an jekretari eo kõpooje ripoot in jerbalin kwal̦o̦k naan eo an eklejia eo? Wõn ej lo an ro jeid im jatid kõm̦m̦ani jerbal ko ilo Im̦õn Kweilo̦k eo ñan kakõm̦anm̦anl̦o̦k ak kõjparoke bwe en jab jorrããn?

Ke Bizalel im Oholiab rar mej, ejjel̦o̦k aerro kar menin nõbar ñan kaalikkar ñan ro jet kõn jerbal ko relukkuun em̦m̦an erro kar kõm̦m̦ani im kõn aerro kapeel ilo ekkal. Bõtab, ewõr juon men el̦apl̦o̦k an aorõk im erro jeraam̦m̦an kake. Ta in? Ej bwe Jeova el̦ap an m̦õn̦õn̦õ kõn jerbal ko aerro. El̦ap ad tõmak bwe Jeova ear kile jerbal ko aerro. Jen anõke joñak in aerro ilo ad kõttãik bũruod im m̦õn̦õn̦õ in jerbal ñan Jeova.