Rar M̦õn̦õn̦õ In Em̦m̦akũt ñan Jipañ ilo Rojia

ILO iiõ eo 1991, Ri Kõnnaan ro an Jeova ilo Rojia rar lukkuun m̦õn̦õn̦õ ke ear jako an kien eo an aelõñ eo kamo aer kweilo̦k im kwal̦o̦k naan im rar jino kile er. Ilo kar tõre eo, elõñ rar jab l̦õmn̦ak bwe uwaan Ri Kõnnaan ro an Jeova ilo jikin in enaaj kar 10 alen an lõñl̦o̦k im tõpar joñan in 170,000 ilo raan kein! Ewõr rukwal̦o̦k naan jãn aelõñ ko jet rar em̦m̦akũtl̦o̦k ñan Rojia im jipañ ilo jerbalin kwal̦o̦k naan. (Matu 9:37, 38) Jen lale jet iaaer.

EM̦M̦AAN IM LIKAO RO REJ M̦ÕN̦ÕN̦Õ IN JIPAÑ ILO EKLEJIA KO

Ilo iiõ eo me ear jako an kien eo an Rojia kamo jerbalin kwal̦o̦k naan, Matthew jãn Great Britian ear 28 an iiõ. Ilo juon kweilo̦k el̦ap ilo iiõ eo, ear wal̦o̦k juon katak me ear kwal̦o̦k kõn aikuj ko ilo eklejia ko iturearin Europe. Rũkõnono eo an katak in ear kwal̦o̦k juon waanjoñak kõn juon eklejia ilo St. Petersburg ilo Rojia me ear wõr juon wõt rijjipañ ie im ejjel̦o̦k em̦m̦aan ej lale eklejia eo. Meñe ãindein, ak rukwal̦o̦k naan ro ilo eklejia in rar katak ippãn jejjo bukwi rũkkatak ro! Matthew ej ba: “Ãlikin kar katak eo, ear jab bõjrak aõ l̦õmn̦ak kõn Rojia. Kõn men in, iar jar ñan Jeova im lukkuun kaalikkar ñane kõn̦aan eo aõ ñan em̦m̦akũt ñan jikin in.” Matthew ear kakkon̦ an jããn, wiakake enañin aolep men ko m̦weien, im em̦m̦akũt ñan Rojia ilo iiõ eo 1992. Ta ko rar wal̦o̦k ke ear em̦m̦akũt?

Matthew ej ba: “Ear pen aõ katak kajin eo. Iar jab maroñ lukkuun bwebwenato kõn katak ko ilo Baibõl̦ ippãn ro jet.” Bar juon apañ ej kappok jikin jokwe. Ej ba: “Ijaje jete kõttan aõ aikuj em̦m̦akũt jãn juon em̦ ñan bar juon ilo jidimkij.” Jekdo̦o̦n ñe ear iiooni apañ kein ilo jinoin, ak ear ba: “Pepe eo aõ ñan em̦m̦akũttok ñan Rojia ear pepe eo em̦m̦antata iar kõm̦m̦ane.” Ear kõmel̦el̦e im ba: “Ilo aõ jipañ ijin, iar katak ñan kal̦apl̦o̦k aõ lõke Jeova im iar loe an tõl eõ ilo elõñ wãween ko.” Tokãlik, kar jitõñ Matthew bwe en juon em̦m̦aan ej lale eklejia im juon jipejel̦ bainier. Kiiõ ej jerbal ilo ra eo iturin St. Petersburg.

Ilo 1999 eo, Hiroo ear 25 an iiõ ke ear kadiwõjl̦o̦k jãn Jikuul̦ in Baibõl̦ ñan L̦õm̦aro me Ejjel̦o̦k Pãleer ilo  Jepaan. Juon iaan rũkaki ro ear rõjañe bwe en em̦m̦akũt ñan jikin ko jet im jipañ ie. Hiroo ear roñ bwe el̦ap aikuj jipañ ilo Rojia. Kõn men in, ear jino katak kajin Rojia. Ear bar kõm̦m̦ane juon men eaorõk. Ej ba: “Iar etal ñan Rojia im pãd ium̦win 6 allõñ. Kõnke elukkuun l̦ap m̦õl̦o ilo Rojia, iar etal ilo allõñ in Nobõm̦ba kõnke in lale imaroñe ke joñan m̦õl̦o en̦ ijen̦.” Ãlikin an jem̦l̦o̦k allõñ in m̦õl̦o ko, ear ro̦o̦l ñan Jepaan. Ke ear pãd ilo Jepaan, ear jokwane kõn men ko ewõr ippãn bwe en maroñ bwe jããn ko ej kakon̦i ñan an jepl̦aak ñan Rojia im mour ie.

Ium̦win 12 de iiõ in an Hiroo mour ilo Rojia im jipañ ilo jet eklejia ko. Jet iien, ej make wõt iaan ñan lale juon eklejia me elõñl̦o̦k jãn 100 rukwal̦o̦k naan ie. Ilo juon iaan eklejia ko, kajjojo wiik ej kõm̦m̦ane enañin aolep katak ko ilo Kweilo̦kin Ad Jerbal ñan Anij, lale Jikuul̦in Kwal̦o̦k Naan eo, Naan in Keeañ, im Katak Baibõl̦ an Eklejia. Ilo kajjojo wiik, 5 alen an kõm̦m̦ane katak in, Katak Baibõl̦ an Eklejia. Ebar lõñ alen an lol̦o̦k rũttõmak ro m̦õttan ñan rõjañ er. Ke Hiroo ej keememejtok iien kein, ej ba: “Iar lukkuun m̦õn̦õn̦õ bwe iar maroñ jipañ ro jeiũ im jatũ bwe ren kajoor wõt ilo tõmak.” Ke ear em̦m̦akũt im jipañ ilo jikin in el̦ap aikuj ie, ewi wãween an kar men in jipañe? Ej ba: “M̦okta jãn aõ kar itok ñan Rojia, iar juon eo ej lale eklejia im juon bainier. Bõtab, ãlikin aõ itok, ej ãinwõt ñe iar bar jino juon jem̦jerã ekããl ippãn Jeova. Iar katak ñan lõke Jeova ilo men otemjej ij kõm̦m̦ani ilo mour e aõ.” Ilo 2005 eo, Hiroo ear m̦areik Svetlana , im erro kar jim̦or wõnm̦aanl̦o̦k im bainier.

Matthew, eo im 34 an iiõ, kab l̦adik eo jatin etan Michael me 28 an iiõ, rej jãn Canada. Erro kar jam̦bol̦o̦k ñan Rojia im bwilõñ ke rar lo an lõñ armej rej kobal̦o̦k ilo kweilo̦k ko, bõtab ear iiet likao im em̦m̦aan ñan kõm̦m̦ani katak ko. Matthew ej ba: “Eklejia eo iar lol̦o̦k ear wõr 200 rukweilo̦k ro ie, bõtab ear wõr juon wõt l̦al̦l̦ap ej lale eklejia eo im juon likao ej rijjipañ, im erro wõt rar kõm̦m̦ani katak ko. Men in ear kõm̦akũt eõ bwe in kõn̦aan em̦m̦akũtl̦o̦k im jipañ.” Kõn men in, ear em̦m̦akũt ñan Rojia ilo 2002 eo.

Emãn iiõ tokãlik, Michael ear em̦m̦akũt ñan Rojia im ear m̦õkaj an kile bwe ej l̦ap wõt aer aikuj likao im em̦m̦aan ñan jipañ. Kõnke Michael ear juon rijjipañ, kar jitõñe bwe en loloorjake jããn ko an eklejia eo, bok ko aer, im jikin ko rej kwal̦o̦k naan ie. Kar bar kajjitõk bwe en kõm̦m̦an public talk, jipañ kõm̦m̦an karõk ñan kweilo̦k ko rel̦l̦ap im ekkal Im̦õn Kweilo̦k, im ñan kõm̦m̦ani jerbal ko me ekkã an em̦m̦aan ro rej jekretari ñan eklejia ko kõm̦m̦ani. Ilo m̦ool, ej l̦ap wõt aikuj ilo eklejia kein. Michael ej kiiõ juon em̦m̦aan ej lale eklejia. Meñe ebwe an l̦ap jerbal kein kar lil̦o̦k ñane, ak ej ba: “El̦ap aõ jubũruõ kõn aõ jipañ ro jeiũ im jatũ. Wãween eo em̦m̦antata in imaroñ kõm̦m̦ane ilo mour e aõ!”

Tokãlik, Matthew ear m̦areik Marina , im Michael ear m̦areik Olga. Rein im ebar lõñ ro rem̦õn̦õn̦õ in jipañ rej wõnm̦aanl̦o̦k im jipañ eklejia kein me el̦ap aikuj ie.

JIROÑ IM KÕRÃ RO REKIJEJETO REJ JIPAÑ ILO KWAL̦O̦K NAAN

Ilo 1994 eo, ke Tatyana ear 16 an iiõ, 6 jipejel̦ bainier jãn Czech Republic, Poland, im Slovakia rar jino jipañ ilo eklejia eo an ilo Ukraine. Ej keememejtok rein ilo an ba: “Rar jet bainier ro me rekijejeto, epidodo kepaake er, rejouj, im relukkuun jel̦ã Baibõl̦.” Tatyana ear lo wãween an Jeova kajeraam̦m̦an rein kõn aer kaarmejjete er make, im men in ear kõm̦m̦an bwe en kõn̦aan ãinwõt er.

Joñak eo an bainier rein ear kõm̦akũt Tatyana bwe en kõjerbal iien ko ej kakkije jãn jikuul̦ ñan an etal ippãn ro jet im kwal̦o̦k naan ilo jikin ko rettol̦o̦k ilo Ukraine im Belarus, me ejjel̦o̦k enañin kar kwal̦o̦k naan ie m̦okta. Joñan an em̦m̦an ippãn tũreep in kwal̦o̦k naan kein, ear pepe in kal̦apl̦o̦k kun̦aan ilo an  em̦m̦akũt ñan Rojia. M̦okta, ear etal ñan Rojia im lol̦o̦k juon jiroñ me ear em̦m̦akũt ñan ijin im ñan pukot juon jerbal me emaroñ jipañe ilo an bainier. Tokãlik ilo 2000 eo, ear em̦m̦akũt ñan Rojia. Ear ke pen ñane?

Tatyana ej ba: “Kõnke ear l̦ap on̦ãn em̦, iar aikuj rent e juon ruum̦ ilo juon em̦. Ear jab pidodo men in. Ewõr iien iar kõn̦aan ro̦o̦l. Bõtab, aolep iien Jeova ej jipañ eõ bwe in lo tokjãn ko renaaj wal̦o̦k ñe inaaj wõnm̦aanl̦o̦k im jerbal ijin.” Rainin, Tatyana ej jerbalin mijinede ilo Rojia. Ej ba: “Aolep iiõ kein me iar pãd ettol̦o̦k jãn aelõñ eo aõ, elõñ men ko rekanooj em̦m̦an rar wal̦o̦k ñan ña im elõñ ro iar jino m̦õttaik er. El̦aptata, iiõ kein rar jipañ eõ bwe en kajoorl̦o̦k tõmak e aõ.”

Masako jãn Jepaan, me kiiõ 50 jim̦a an iiõ, ear to an kõn̦aan mijinede bõtab ear jab maroñ kõn an wõr an nañinmej. Bõtab, ke ear em̦m̦anl̦o̦k jidik ãjmour eo an, ear pepe in em̦m̦akũt ñan Rojia bwe en jipañ ilo jerbalin kwal̦o̦k naan. Meñe ear pen ñan an kappok jikin jokwe im jikin jerbal me em̦m̦an ñane, ak ear maroñ bainier wõt ilo an katakin ro jet kajin Jepaan im jerbalin karreo. Bar ta ko rar jipañe bwe en bainier wõt?

Ium̦win 14 iiõ in an Masako jipañ ilo Rojia. Ej ba: “Kõn an l̦ap aõ lo lañlõñ ilo jerbal in, ijjab l̦õmn̦ak kõn joñan apañ ko iar iiooni. Kwal̦o̦k naan ilo jikin ko el̦ap aikuj rukwal̦o̦k naan ie ej kõm̦m̦an bwe jen lo m̦õn̦õn̦õ.” Ear wõnm̦aanl̦o̦k im ba: “Aõ kar lo wãween an Jeova jipañ eõ ium̦win iiõ kein ikijjeen an kabwe aikuj ko aõ kõn m̦õñã, nuknuk, im jikin jokwe, ej ãinwõt juon menin kabwilõñlõñ ñan ña.” Masako ear jab baj jipañ wõt ilo jikin ko el̦ap aikuj ie ilo Rojia. Ear bar jipañ ilo Kyrgyzstan. Bareinwõt, ear maroñ jipañ kurub ko an kajin Pãlle, Jaina, im Uighur. Kiiõ ej juon bainier ilo St. Petersburg.

BAAM̦LE KO REJ JIPAÑ IM LO ELÕÑ JERAAM̦M̦AN KO

Kõn an l̦apl̦o̦k on̦ãn mour, ekkã an baam̦le ko em̦m̦akũt ñan jikin ko jet ñan kappok jerbal. Bõtab ãinwõt  Ebream im Sera, jet baam̦le ko rej etal ñan jikin ko jet ñan kwal̦o̦k naan ie. (Jenesis 12:1-9) Ñan waanjoñak, Mikhail im Inga, ruo rippãlele jãn Ukraine, rar em̦m̦akũt ñan Rojia ilo 2003 eo. Rar iioon elõñ armej ro me rar kõn̦aan jel̦ã m̦ool eo.

Mikhail ej ba: “Juon iien kõmar kwal̦o̦k ilo juon jikin me ejjañin kar wõr Ri Kõnnaan ro an Jeova ear kwal̦o̦k naan ie m̦okta. Juon l̦al̦l̦ap ear kõpel̦l̦o̦k kõjãm eo an im kajjitõk, ‘Kom̦ rukwal̦o̦k naan ke?’ Ke kõmar ba aet, ear ba: ‘Iar jel̦ã ke juon iien kom̦ naaj kar itok. Ijel̦ã ke enaaj kar baj jejjet wõt naan ko an Jijej.’ Innem ear kwal̦o̦ktok kobban Matu 24:14.” Mikhail ear wõnm̦aanl̦o̦k im ba: “Ilo jikin in, kõmar bar lo juon kumi in enañin 10 kõrã in Baptist. Rar lukkuun kõn̦aan jel̦ã m̦ool eo. Ear wõr aer bok eo etan Kwo Maroñ Mour Indrio ilo Paradise ion Lõl, im aolep wiikããn rej kõjerbale ñan katak Baibõl̦. Elõñ awa in ammim uwaaki kajjitõk ko aer im al kõn al ko ad ippãer, im kõmar kõjota ippãer. Ear juon iaan iien ko rem̦m̦antata ilo mour e aõ.” Mikhail im Inga rar ba bwe aerro jerbal ilo jikin kein el̦ap aikuj rukwal̦o̦k naan ie ear jipañ erro bwe ren epaakel̦o̦k Jeova, l̦apl̦o̦k aerro yokwe armej, im bwe ren lo m̦õn̦õn̦õ. Rainin, rej kiiõ jerbalin lol̦o̦k eklejia ko.

Ilo 2007 eo, Yury im Oksana, ruo rippãlele jãn Ukraine me 30 jim̦a kiiõ aerro iiõ, im l̦adik eo nejierro etan Aleksey, me 13 an iiõ kiiõ, rar lol̦o̦k ra eo ilo Rojia. Ke rar pãd ie, rar lo juon mab in Rojia im lo bwe elõñ jikin ko me ejjel̦o̦k ej kwal̦o̦k naan ie. Oksana ej ba: “Ãlikin ammim loe mab eo, el̦apl̦o̦k ammim kile bwe elukkuun l̦ap aer aikuj rukwal̦o̦k naan. Ear jipañ kõm ñan pepe in em̦m̦akũt ñan Rojia.” Ta ko rar jipañ er ñan wõnm̦aanl̦o̦k kõn pepe in aer? Yury ej ba: “Am kar riiti katak ko ilo bok ko ad ear l̦ap an jipañ kõm, ãinwõt katak eo etan ‘Kwõmaroñ Ke Jipañ ilo Aelõñ ko Jet?’ * (Lale kõmel̦el̦e eo itulal̦.) Kõmar bareinwõt etal ñan juon jikin ilo Rojia me ra eo ear ba bwe kõmin em̦m̦akũt ñane, bwe kõmin lale ewõr ke em̦ kõm maroñ jokwe ie im jikin jerbal repel̦l̦o̦k ñan kõm.” Ilo 2008 eo, rar em̦m̦akũt ñan Rojia.

Ilo kar jinoin ear pen aer ellolo jerbal, im jejjo iien rar aikuj in em̦m̦akũt ñan bar juon em̦. Yury ej ba: “Ekõn ikkutkut am jar bwe kõmin jab ebbeer, im kõmar wõnm̦aanl̦o̦k ilo am kwal̦o̦k naan im lõke bwe Jeova enaaj jipañ kõm. Kõmar kile wãween an Jeova kabwe aikuj ko am ilo am likũt Aelõñ eo an m̦oktata. Jerbal in ear lukkuun kakajoor baam̦le e am̦ro.” (Matu 6:33) Ilo an baam̦le in jipañ ilo jikin kein el̦ap aikuj ie, ewi wãween an kar men in jipañ l̦adik eo nejier, Aleksey? Oksana ej ba: “Men in ear jipañe ilo elõñ wãween ko. Ear ajel̦o̦k mour eo an ñan Jeova im peptaij ke ear 9 an iiõ. Kõn an lo bwe el̦ap aikuj rukwal̦o̦k naan ilo jikin in, ear akjel̦õri bainier ilo iien ko ej kakkije jãn jikuul̦. Kõm̦ro lukkuun m̦õn̦õn̦õ ilo am̦ro lo an yokwe jerbal in im kijejeto kake.” Rainin, Yury im Oksana rej jipejel̦ bainier.

“MEN EO WÕT IJ AJL̦O̦K KAKE”

Ãinwõt an kar rein kwal̦o̦k, rar aikuj lukkuun lõke Jeova ke rar em̦m̦akũt ñan bar juon jikin ñan kal̦apl̦o̦k ijo kun̦aaer. Ilo m̦ool, ro rej jerbal ilo ijoko el̦ap aikuj ie rej iioon apañ ko. Bõtab, rej bareinwõt lo el̦ap lañlõñ ilo aer kwal̦o̦k kõn ennaan eo em̦m̦an kõn Aelõñ eo ñan armej ro me rem̦õn̦õn̦õ in roñjake. Kwõm̦õn̦õn̦õ ke in jipañ kwal̦o̦k naan ilo jikin ko me ej l̦ap wõt aikuj rukwal̦o̦k ie? El̦aññe kwõnaaj pepe in kõm̦m̦ane men in, kwõnaaj ãinwõt Yury. Ear kwal̦o̦k kõn pepe eo an ñan em̦m̦akũt im jipañ ilo jikin eo el̦ap aikuj ie, ilo an ba: “Men eo wõt ij ajl̦o̦k kake ej bwe iar jab l̦õmn̦ake pepe in m̦oktal̦o̦k.”

[Kõmel̦el̦e eo itulal̦]