JINÕ ear kajjitõk ippa im ba: “Etke kwõjjab kabuñ ñan rũtto ro jibũm̦ im jim̦m̦aam̦ me remej? Kwõjjab kile ke bwe unin am̦ mour ej kõn er? Kwõjjab kam̦m̦oolol er ke? Etke kwõj kõjekdo̦o̦n m̦anit im imminene kein ad jãn etto? Am̦ jab kabuñ ñan ro jibwid im jim̦m̦aad me remej ej ãinwõt ñe kwõj ba bwe ejjel̦o̦k tokjãn kabuñ in ad.” Jinõ ear jino jañ ãlikin an ba men kein.

Jet allõñ m̦okta jãn iien in, Ri Kõnnaan ro an Jeova rar kajjitõk ippãn jinõ el̦aññe ear kõn̦aan katak Baibõl̦. Jinõ ear jab kõn̦aan katak Baibõl̦ ak kõnke ear kõn̦aan kwal̦o̦k jouj, ear karõk bwe ren katak Baibõl̦ ippa. Ak kiiõ ellu ippa. Ibwilõñ bwe ejjañin kar illu ippa kar m̦okta kõnke aolep iien ij pokake e. Bõtab kiiõ, kõnke ikõn̦aan kabuñbũruon Jeova, ijjab aikuj pokake e kõn men in ej jiroñtok eõ. Ejjab juon men epidodo ñan kõm̦m̦ane, ak Jeova ear jipañ eõ.

Enañin aolep armej ro ilo Jepaan rar kabuñ in Buddhism. Baam̦le eo aõ rar bar kabuñ in. Bõtab, ãlikin aõ katak Baibõl̦ ippãn Ri Kõnnaan ro an Jeova ium̦win ruo allõñ, iar tõmak bwe em̦ool ta ko Baibõl̦ ej ba. Ke iar katak im jel̦ã bwe Anij ej Jema ilañ, iar kõn̦aan kal̦apl̦o̦k aõ jel̦ã kajjien. Ilo kar jinoin, em̦m̦an am̦ro kõn jinõ bwebwenato kõn ta ko ij katak kaki. Iar jino pãd ilo kweilo̦k ko ilo raanin Jabõt ilo Im̦õn Kweilo̦k ko. El̦ak to l̦o̦k aõ katak im l̦apl̦o̦k aõ jel̦ã, iar ba ñan jinõ bwe inaaj bõjrak jãn aõ kõm̦m̦ani m̦akũtkũt ko an kabuñ in Buddhism. Ilo m̦õkaj, wãween an jinõ kõnnaantok ear oktak. Jinõ ear ba ñan ña, “El̦ap an kajjookok ñe ewõr juon ilo baam̦le in ejjab kwal̦o̦k an yokwe ro jibwid im jim̦m̦aad.” Ear jiroñtok eõ bwe in bõjrak jãn aõ katak Baibõl̦ im pãd ilo kweilo̦k ko. Iar jab l̦õmn̦ak ñan jidik ke jinõ enaaj kar ba tok men in ñan eõ! Ear lukkuun oktak jãn kar m̦okta.

Jema ear bar errã ippãn jinõ. Iar katak im jel̦ã bwe ilo bokin Epesõs jebta 6, Jeova ekõn̦aan bwe in pokake jinõ im jema. Iar kõn̦aan bwe baam̦le eo ammim en bar aenõm̦m̦an. Kõn men in, iar l̦õmn̦ak bwe erro naaj roñjake eõ ñe inaaj bar roñjake erro. Ilo kar tõre in, iar jikuul̦ im iar aikuj pojak ñan iien teej. Innem, iar roñjake ta eo jinõ im jema rar ba ñan ña. Iar jiroñl̦o̦k erro bwe inaaj bõjrak jãn aõ pãd ilo kweilo̦k ko ium̦win 3 allõñ. Bõtab, iar kallim̦ur ñan Jeova bwe ñe ejem̦l̦o̦k 3 allõñ, inaaj bar pãd ilo kweilo̦k ko.

Ewõr ruo un ko unin an kar jab em̦m̦an pepe in iar kõm̦m̦ane. Kein kajuon, iar l̦õmn̦ak bwe ãlikin  3 allõñ enaaj kajoor wõt kõn̦aan eo aõ ñan karejar ñan Jeova. Bõtab, jem̦jerã eo aõ ippãn Jeova ear m̦õkaj an m̦õjn̦o̦l̦o̦k. Kein karuo, ear l̦apl̦o̦k an jinõ im jema kajjioñ kareel eõ bwe in bõjrak jãn aõ karejar ñan Jeova.

Ilo Im̦õn Kweilo̦k eo, iar iioon elõñ Ri Kõnnaan ro an Jeova me rar bar iioon jum̦ae jãn baam̦le ko aer. Rar jipañ eõ bwe in jel̦ã ke Jeova enaaj kakajoor eõ. (Matu 10:34-37, UBS) Rar kõmel̦el̦eik eõ bwe ñe inaaj tiljek wõt, baam̦le eo aõ emaroñ oktak im katak kõn Jeova. Kõn men in, ear ikkutkut aõ jar ñan Jeova kõnke iar kõn̦aan atartar wõt ioon.

Baam̦le eo aõ ear jum̦aik eõ ilo elõñ wãween ko. Jinõ ear akwel̦ap ñan eõ bwe in bõjrak jãn aõ katak Baibõl̦. Enañin aolepen iien kein, ijjab kõnnaan. Ak ñe ij kõnnaan, ekkã am̦ro akwããl kõnke kõm̦ro jim̦or ej kajjioñ kwal̦o̦k wõn eo ejim̦we iaam̦ro. Kiiõ, ij kab kile bwe ñe en kar l̦apl̦o̦k aõ kwal̦o̦k kautiej ñan eñjake ko an jinõ im tõmak ko an, emaroñ kar wõr aenõm̦m̦an. Jinõ im jema rar letok elõñ jerbal ko ilo m̦weo bwe in maroñ pãdwõt ie. Jet iien, rej l̦ake m̦weo jãn eõ im jab letok kijõ m̦õñã.

Jinõ ear kajjitõk jipañ ippãn ro jet bwe ren jipañe ñan kareel eõ bwe in bõjrak. Ear kõnnaan ippãn rũkaki eo aõ, ak ear jab lo tõprak. Jinõ ear bõk eõ ñan mãnija eo an ilo jikin jerbal bwe en kajjioñ kõm̦m̦an bwe in tõmak bwe aolep kabuñ ko rejjab maroñ jipañ eõ. Ear bar ko̦o̦l̦e ro nukũm im jañ im akwel̦ap bwe ren jipañe. El̦ap aõ kar inepata kõn men in. Bõtab ilo aõ kobal̦o̦k ilo iien kweilo̦k ko,  em̦m̦aan ro rej lale eklejia eo rar kakeememej eõ bwe ñe jinõ ej kõnnaan ñan ro jet kõn men in, ilo m̦ool ej kwal̦o̦k naan ñan er.

Jinõ im jema rar kõn̦aan bwe in etal ñan university bwe in maroñ lo juon jerbal em̦m̦an. Ke kõmar kõnnaan kake men in, kõmar inepata im illu. Kõn men in, iar je jet lõta ko ñan kõmel̦el̦eik erro kõn mejãnkajjik ko aõ. Jema ear lukkuun illu im ba: “El̦aññe kwõj l̦õmn̦ak bwe kwõmaroñ lo juon am̦ jerbal, kwõn jino kappok kiiõ bwe ñe kwõjab ellolo jerbal ilju, inaaj jilkinl̦o̦k eok jãn m̦wiin.” Iar jar ñan Jeova im kajjitõk bwe en jipañ eõ. Raan eo juon ke iar kwal̦o̦k naan, ruo iaan rũttõmak ro jeiũ im jatũ rar kajjitõk el̦aññe im̦õn̦õn̦õ in jipañ erro. Kõrã rein rar ba bwe renaaj kõl̦l̦ã on̦ea ñe inaaj rũkaki ñan ajri ro nejier. Meñe ãindein, ak jema ear jab m̦õn̦õn̦õ kõn men in im ear bõjrak jãn an kõnnaantok im el̦tok ñan eõ. Jinõ ear ba bwe em̦m̦anl̦o̦k ñe in kar juon rinana jãn aõ erom juon iaan Ri Kõnnaan ro an Jeova.

Jet iien, ijjab lukkuun jel̦ã el̦aññe Jeova ear kõn̦aan bwe in ãindein ñan jinõ im jema. Kõn men in, iar jar ñan Jeova im kõl̦mãnl̦o̦kjen̦ kõn ta eo Baibõl̦ ej ba kõn yokwe eo an. Men in ear jipañ eõ bwe en jim̦we l̦õmn̦ak eo aõ im bwe in mel̦el̦e ta unin an jinõ im jema jum̦aik eõ. Rar jum̦aik eõ kõnke rar inepata kõn ña. Jeova ear jipañ eõ bwe en jim̦we wãween aõ l̦õmn̦ak im bwe in jel̦ã ta eo in kõm̦m̦ane. Bareinwõt, el̦ak ikkutkut aõ kwal̦o̦k naan, el̦apl̦o̦k an em̦m̦an ippa. Innem, iar kõn̦aan bainier.

Ke jet iaan kõrã ro jeiũ im jatũ ilo eklejia eo rar roñ bwe ikõn̦aan bainier, rar jiroñtok eõ bwe in kõttar ñan iien eo edikl̦o̦k an jinõ im jema jum̦aik eõ. Iar jar bwe Jeova en letok mãlõtlõt. Iar kõm̦m̦an etale ko im l̦õmn̦ak kõn ta unin aõ kõn̦aan bainier. Bareinwõt, iar kõnnaan ippãn rũttõmak ro jeiũ im jatũ me epaak jem̦jerã eo aer ippãn Jeova. Iar kõn̦aan kabuñbũruon Jeova, im eñin pepe eo aõ. Iar bar jel̦ã bwe jinõ im jema renaaj baj jum̦aik wõt eõ meñe inaaj kõttar ium̦win jidik iien im jino bainier.

Iar jino bainier ilo iiõ eo aõ ãliktata ilo high school. Ãlikin aõ kar bainier ium̦win jidik iien, iar kõn̦aan etal ñan juon jikin me rar aikuj jipañ ilo jerbalin kwal̦o̦k naan. Bõtab, jinõ im jema rar jab kõn̦aan bwe in ilo̦k jãn erro. Kõn men in, iar kõttar an 20 aõ iiõ. Innem, iar kajjitõk ippãn ra eo bwe ren jilkinl̦o̦k eõ ñan juon jikin iturõkin Jepaan me ewõr ro nukũ rej pãd ie bwe jinõ en jab l̦ap an inepata.

Ke iar jerbal ijin, iar lukkuun m̦õn̦õn̦õ bwe jet iaan rũkkatak ro aõ rar peptaij. Iar jino katak kajin Pãlle kõnke iar kõn̦aan kal̦apl̦o̦k ijo kun̦aõ ilo jerbalin kwal̦o̦k naan. Tokãlik, ke iar lale wãween an ruo jipejel̦ bainier ilo eklejia eo aõ kijejeto im jipañ ro jet, men in ear jipañ eõ bwe in pepe in jipejel̦ bainier. Ilo iien in, ruo alen an jinõ lukkuun nañinmej, im iien kein iar ro̦o̦l im jipañe. Jinõ ear bwilõñ kõn men in, im ear jino jouj ñan eõ.

Jimjuon iiõ tokãlik, Atsushi, juon iaan jipejel̦ bainier ro iar kõnnaan kake er ear jilkintok juon lõta ñan ña. Ear ba bwe ej l̦õmn̦ak in kappok rejetan im ekõn̦aan jel̦ã ejet aõ l̦õmn̦ak kõn e. Ear ejjel̦o̦k aõ l̦õmn̦ak kõn Atsushi, im iar l̦õmn̦ak ejjel̦o̦k an kõn̦aan ñan ña. Juon allõñ tokãlik, iar jejel̦o̦k ñane im ba bwe ikõn̦aan bwe kõm̦ro en kal̦apl̦o̦k am̦ro jel̦ã kajjien doon. Kõm̦ro jim̦or ear kile bwe mejãnkajjik ko am̦ro rar juon wõt. Kõm̦ro ear kõn̦aan wõnm̦aanl̦o̦k wõt im kal̦apl̦o̦k ijo kun̦aam̦ro im m̦õn̦õn̦õ in kõm̦m̦ane jabdewõt jerbal. Tokãlik, kõm̦ro ear m̦are. Ear l̦ap aõ m̦õn̦õn̦õ bwe jinõ, jema, im ro nukũ rar itok ñan kõm̦are eo am̦ro.

Ejjabto tokãlik, ke kõm̦ro ear rekũl̦ar bainier, kar kajjitõk bwe Atsushi en jerbalin lol̦o̦k eklejia ko  ilo iien ko rej aikuji. Tokãlik, kar jitõñ kõm̦ro bwe kõm̦ro en jipejel̦ bainier im ejjabto jãn iien eo, jerbalin lol̦o̦k eklejia ko. Ke ear dedel̦o̦k iien eo kein kajuon in am̦ro lol̦o̦k eklejia ko kajjojo, ra eo ear ko̦o̦l̦e tok kõm̦ro. Rar kajjitõk ñe kõm̦ro m̦õn̦õn̦õ in em̦m̦akũt ñan aelõñin Nepal im wõnm̦aanl̦o̦k wõt kõn jerbal in ijin.

Iar inepata kõnke iar l̦õmn̦ak kõn ta l̦õmn̦ak eo an naaj jinõ im jema ñe rejel̦ã bwe inaaj em̦m̦akũt ñan juon jikin ettol̦o̦k. Ke iar ko̦o̦l̦e er, jema ear ba ñan ña, “Ijen̦ kwõj etal ñane, el̦ap an em̦m̦an.” Juon wiik m̦oktal̦o̦k, juon iaan ro m̦õttan jema ear lel̦o̦k juon bok me ej kwal̦o̦k kõn Nepal, im jema ear ba bwe enaaj juon jikin em̦m̦an ñan jam̦bol̦o̦k ñane.

Kõm̦ro l̦eo ippa ear lukkuun m̦õn̦õn̦õ in pãd ibwiljin armej ro rejouj ilo Nepal. Tokãlik, kõm̦ro ear bar lol̦o̦k eklejia ko ilo aelõñin Bangladesh. Meñe jikin in ear epaake Nepal, ak ear lukkuun oktak. Ear oktak kilen kwal̦o̦k naan ilo jikin kein. Ãlikin l̦alem iiõ, kar bar kajjitõk bwe kõm̦ro en ro̦o̦l ñan Jepaan im wõnm̦aanl̦o̦k wõt ilo jerbalin lol̦o̦k eklejia ko.

Elõñ men ko iar katak kaki kõn Jeova ke iar jerbal ilo Jepaan, Nepal, im Bangladesh. Armej ro ilo aelõñ kein eoktak m̦anit ko aer, imminene ko aer, im tõmak ko aer jãn doon. Kajjojo iaaer el̦ap aer oktak jãn doon. Iar lo wãween an Jeova kwal̦o̦k an kea kõn armej ro kajjojo, im an m̦õn̦õn̦õ ippãer, jipañ er, im kajeraam̦m̦an er.

Elukkuun lõñ men ko ij kam̦m̦oolol Jeova kaki. Ear kamaroñ eõ bwe in jel̦ã kajjien im kõm̦m̦ane jerbal eo an. Ear letok juon pãleõ elukkuun em̦m̦an. Anij ear jipañ eõ bwe in kõm̦m̦ani pepe ko rem̦m̦an, im kiiõ el̦ap aõ epaake baam̦le eo aõ im Anij. Ij kam̦m̦oolol Jeova kõnke kiiõ ibar epaake jinõ. El̦ap aõ kam̦m̦oolol bwe eaenõm̦m̦an kiiõ jem̦jerã e aõ ippãn Anij im ippãn jinõ.