Kwaar ke lukkuun riiti Naan in Keeañ ko an allõñ ko l̦o̦k? Lale kwõmaroñ ke uwaake kajjitõk kein:

Ñe enaaj itok jem̦l̦o̦kin, ta jet iaan men ko renaaj jako?

Jet iaan men ko renaaj jako ej kien ko an armej, tarin̦ae im kalijekl̦o̦k, armej ro renana, im kabuñ ko me rejjab kabuñbũruon Anij im jipañ armej.​—5/1, p. 3-5.

Wõn in Gog jãn aelõñin Megog me bokin Ezekiel ej kwal̦o̦k kake?

Ejjab jitõñl̦o̦k ñan Setan. Bõtab, ej jitõñl̦o̦k ñan kumi in aelõñ ko me renaaj kajjioñ m̦an aolep armej ro an Anij ilo eñtaan eo el̦ap.​—5/1, p. 30-31.

Ewi wãween an kar menin bwilõñ ko an Jijej kaalikkar an jouj?

Ilo juon iien kõm̦are ilo Kena, Jijej ear kõm̦m̦an bwe elõñl̦o̦k jãn 100 kõl̦an in aebõj ren oktak ñan wain. Bar juon iien ear kõm̦m̦ane juon menin kabwilõñlõñ ilo an naajdik elõñl̦o̦k jãn 5,000 armej ro. (Matu 14:14-21; Jon 2:6-11, UBS) Ilo aolep iien kein jim̦or, ear anõke jouj eo an Jemãn.​—6/1, p. 9-10.

Meñe jejjab weeppãn, etke jejel̦ã bwe jemaroñ kabuñbũruon Anij?

Armej ro ãinwõt Job, Lot, im Devid, rar kõm̦m̦an bõd. Bõtab, rar kõn̦aan karejar ñan Anij, im rar ukel̦o̦k im oktak jãn men ko rebõd rar kõm̦m̦ani. Kõn men in, Anij ear buñbũruon ippãer. Kõj bareinwõt jemaroñ kabuñbũruon Anij.​—7/1, p. 12-13.

Enaaj ke mej aolep ro rar uwaan Babil̦on El̦ap ñe renaaj ko̦kkure?

Jaab. Bokin Zekaraia 13:4-6 (UBS) ej kwal̦o̦k bwe ro rar uwaan kabuñ ko reriab, ekoba jet iaan rũtõl in kabuñ ko reriab, renaaj kõm̦m̦an ãinwõt ñe ear ejjel̦o̦k aer kabuñ kar m̦okta im ãinwõt ñe rar jab uwaan kabuñ kein reriab.​—7/15, p. 15-16.

Ta jet iaan men ko juon Kũrjin emaroñ kõl̦mãnl̦o̦kjen̦ kaki?

Jet iaaer ej menin kõm̦anm̦an ko an Jeova, aorõkin Baibõl̦ eo, jeraam̦m̦an eo epãd ippãd ñan jar, im katok in mour eo an Jijej.​—8/15, p. 10-13.

Ñe jej kõjparok wõn ro jej kobal̦o̦k ippãer, etke men in ej kitibuj ad kõjparok wõn ro jej teit ak jerãik er?

Jej kwal̦o̦k jouj ñan aolep armej. Bõtab, ej juon men ebõd el̦aññe juon ej teit ak jerãik juon eo me ejjañin peptaij ak ejjab tiljek ñan Jeova, im ejjab l̦oori kien ko an. (1 Korint 15:33, UBS)—8/15, p. 25.

Etke Berak ear errã in tarin̦ae el̦aññe Debora enaaj etal ippãnl̦o̦k?

Ear l̦ap tõmak eo an Berak. Ijello̦kun an kar kajjitõk ippãn Jeova bwe en kalõñl̦o̦k kein tarin̦ae ko aer, ear kajjitõk bwe Debora en etal ippãer bwe en kakajoor e im l̦õm̦aro doon. Ear jel̦ã bwe Jeova ej pãd ippãn kõrã in. (Ri Ekajet 4:6-8, UBS; 5:7, UBS)—9/1, p. 13.

Etke Piter ear tũm̦m̦wilal̦l̦o̦k, im ewi wãween an kar kõm̦m̦an bwe en bar l̦ap tõmak eo an?

Rijjilõk Piter ear etetal ioon dãn kõn an kar l̦ap an tõmak. (Matu 14:24-32) Bõtab, ke ear kalimjek an l̦ap kõto ear jino mijak. Ke ear itõn tũm̦m̦wilal̦l̦o̦k, ear bar kalimjek Jijej im kõtl̦o̦k bwe en jipañe.​—9/15, p. 16-17.

Ta eo jemaroñ katak jãn an kar Marta poub im m̦ad kõn jerbal ko an?

Juon iien Marta ear m̦ad ilo an kõm̦m̦an m̦õñã. Jijej ear ba bwe lio jatin Marta ear kããlõt ãjinkõj eo em̦m̦an kõn an kar roñjake katak ko an. Jej aikuj kõjparok bwe men ko ejjel̦o̦k tokjãer ren jab kõm̦ad kõj jãn ad karejar ñan Jeova.​—10/15, p. 18-20.