Dren in Kemjalal ilo Boto Eo

LIKAO eo ear ko. Joñõn an buromõj im inebata kin melejoñ eo ear iione, ear jõñ im kir ñõn Anij eo an ejoij im tiriamokake, Jeova, ear akwelap ñõn e im ba: “Kwoj bwini jebwãbwe ko aõ, Kwoj likit dren in kemjalal ko aõ ilo boto eo Am; re jab ilo buk ne Am ke?” (Sam 56:8) Likao in kar Devid, eo me ear erom kiñ in Israel tokelik. Ak boto ta eo ear konono kake, im ewi wãwen Anij emaroñ likit dren in kemjalal ko an iloan?

Devid ear jela kin boto rot in. Kar juõn nien oil, wain, im men ko eierlok wõt. Dri itoitak ro ilo jikin ko ilo ene jemaren Sahara, einwõt Tuareg, rej kajerbal wõt boto rot in me rej kõmõne jen kilin menin mour ko einwõt got ak s̃ip. Joñõn kobõn boto ak nien dren kein kar wawa ion kain menin mour rot ko rar kõmõni jeni. Nien dren kein rekin kajerbali kinke meñe elukkun bwil ilo ene jemaren ak eban mãnãn dren eo iloan. Ilo ran ko mokta, armij ro rar kajerbal menin mour, einwõt donkey ak kamel ko ñõn inek nien dren kein ñe rej itoitak. Ran kein, kwomaroñ lo kain nien dren rot in ej toto itumanin juõn wa rej kattõre ilo ene jemaren ak ilo birikõt!

Nan ko rekaitoktoklimo an Devid kin nien dren eo emaroñ or tokjeir ñõn kij bareinwõt. Ekijkan? Eokwe, Baibel eo ej kemelele bwe Setan ej iroij ion lõl ilo ran kein im “elap an illu.” Kin men in, lõl in ej ber ilo jorran ko relap. (Reveles̃õn 12:12) Einwõt Devid, elõñ armij ro, im elaptata ro me rekõnan kabuñburuen Anij, rej iñtan ilo eñjake, lemnok, ak ilo kõniek. Eindrein ke kwe? Ilo beran, “im jõñ,” armij rein retiljek rejjab bwijrõk ilo air kate ir ñõn mour ilo tiljek. (Sam 126:⁠6) Remaroñ liki bwe Jemeir ilõñ ejjab lo wõt melejoñ ko rej iioni ak ej lo ewi wãwen an melejoñ kein maroñ jelet ir. Elukkun melele kin iñtan ko rej jelet dri korijer ro an, im ilo tiriamo ej kememej wõt kin dren in kemjalal im iñtan ko air, im ilo kõkkar ej likiti ilo nien dren eo an.