Erreo ilo Enbwin Etke Eaurõk?

Elõñ tausan yiõ ko nañinmij ko relap im kauwatata rar kaiñtan armij ro. Jet armij rar lemnok bwe men kein kar kakõlõn illu eo an Anij im ear jilkintok ñõn kaje dri nana ro. Ro eto air katak kin nañinmij ko iomin buki yiõ ko rej kwalok bwe nañinmij ko ekkã air walok jen menin mour ko redrik rej mour ibelakir.

Taktõ ro rar ekkatak im lo bwe kijidik, kullul, loñ, im nam ko remaroñ bõkto-bõktak nañinmij ko. Bareinwõt rar lo bwe ekkã an biruru an ajeded nañinmij ko kin an armij ro jab karreo. Erreo ej kõmõn bwe en to ar mour, ak etton emaroñ kõmõn bwe jen nañinmij im mij.

Alikar, joñõn erreo ej oktõk ekkar ñõn mõnit im wãwen ko iben armij. Ilo jikin ko me ejelok dren ej toor ak ejjab emõn an jikin brij ko jerbal emaroñ bin ñõn kejbãrok wõt ar erreo. Meñe eindrein, Anij ear lelok ñõn dri Israel ro nan in jiroñ ko kin erreo ilo enbwin ke rar itoitak ilo ene jemaren eo, ijo ear bin wãwen ko ie ñõn kejbãrok erreo!

Etke eaurõk erreo ilo enbwin iben Anij? Ta lemnok eo ejime jemaroñ bõk kin erreo ilo enbwin? Ta eo kwe im baamle eo am kom maroñ kõmõne ñõn kadriklok an walok nañinmij?

EMWIJ jikuul, im ladrik jidrikdrik eo etan Max, * me ej jokwe ilo Cameroon ilo Africa, ej roltok ñõn mweo. Elukkun kwuli im maro im ej dreloñ ilo mweo imõn. Ej jiburlepe kiru eo nejin, im ej likit bããk in jikuul eo an ion tebel in mõña eo. Inem ej jijõt im kõtar mõña eo kijen.

Jinen, eo ej ber ilo jikin kõmat eo, ear roñ an Max dreloñ im ej kanelok juõn kijen pileij in rice im bean. Bõtab ej oktõk turin mejen ke ej lo bããk in jikuul eo ion tebel eo. Ej reilok ñõn ladrik eo nejin im ba “Maaaax!” Ladrik eo nejin ejela ta unin, im emõkõj an bõk bããk eo an, im kaiurlok im kwal pein. Tokelik ej jeblak ñõn mõña eo kijen eto an kar  kõtare. Ej kile bwir eo an ilo an ba: “Jolok bwir mama. Iar meloklok.”

Juõn jinen ej kea emaroñ kõmõn elõñ men ko ñõn kejbãrok ejmour im erreo, bõtab ej aikwij jibõñ jen aolep ro uan baamle eo an. Einwõt bwebwenato eo kar kwalok kake kin Max, katakin ajiri ro jen jinoin eaurõk kinke erreo ej kitibuj elap jerbal im ajiri ro rej aikwij menin kakememej jen ien ñõn ien.

Jinen Max ej kile bwe elõñ wãwen ko remaroñ kõmõn bwe mõña ko ren etton. Inem ejjab baj kwal pein wõt mokta jen an keboje mõña ko ak bareinwõt ej kalibubu mõña ko bwe ren jab loñloñ. Ikijen an kakone mõña ko im kõmõn bwe mweo en karbõp im erreo, men in enaj kadriklok an inebata kin kijidik ko im kullul ko.

Un eo eaurõk unin an jinen Max lukkun kejbãrok ej kinke ekõnan kabuñburuen Anij. Liin ej kemelele: “Baibel eo ej ba bwe ro dron Anij rej aikwij kwojarjar kinke Anij ekwojarjar.” (1 Piter 1:​16) Ej wõnmanlok im ba: “Kwojarjar ej einwõt erreo. Inem ikõnan bwe mweo imõ en erreo, im ikõnan bwe baamle eo aõ en erreo baotokiir. Ilo mol, men in emaroñ walok kin jibõñ eo an aolep ilo baamle eo.”

Eaurõk bwe Baamle ko Ren Jibõñ Dron

Einwõt jinen Max ej kile, karreo ej kunan kajuju ilo baamle eo. Jen ien ñõn ien, jet baamle ko rej jijõt iben dron im bwebwenato kin aikwij ko air im ta men ko remaroñ kakõmõnmõnlok iloan im inabijin mweo. Men in ej bareinwõt kaburukuk baamle eo im kakememej ir kajuju kin ijo kunair ñõn emõn eo an aolep. Ñõn wanjoñok, jinen emaroñ kemelele ñõn ajiri ro reridto etke rej aikwij kwal peir mokta jen air mõña, elikin air kajerbal mõn kapojõk ko, im ñe rej jibwe men ko einwõt jããn ko. Inem remaroñ kõmõn ijo kunair im lale bwe ajiri ro jãtir ren bar kõmõn eindrein.

Remaroñ ajeji jerbal ko ilo mweo ñõn aolep ro uan baamle eo. Bebe eo emaroñ ñõn ekkeini in karreoik mweo kajuju wik im karõk ñõn karreoik aolepen mweo juõn ak ruo alen ilo juõn yiõ. Im ta kin belakin mweo? Stewart L. Udall, juõn eo ej etale erreo eo an melan ko, ear ba ilo an jitõñlok ñõn Amerika:  “Jej jokwe ilo juõn ene ejokolok an aibujuij, elaplok an etton, im obrõk. Bareinwõt jen ran ñõn ran ej jorran men ko ibelakir kin an etton mejatoto im lojit, kauwaroñroñ, im jorranlok men ko ie.”

Eindrein ke am lemnok kin wãwen ko ibelakim? Ilo ien ko etto im bareinwõt ilo jet bukwon ko ilo tuiolapen Africa ranin, juõn dri kejelã ej etetal im kajañ juõn bel bwe armij ro ren roñjake. Ilo juõn ainiken ellaj, ej kakememej armij ro ñõn karreoiki bukwon eo, julok kobij ko jen loan jikin katoor dren ko, jebi wijki ko, rakij ujoij ko, im julok kobij ko.

Jolok kobij ej juõn abañ ibelakin lõl in im ñõn elõñ kien ko ej juõn abañ ebin kamarmire. Jet kumi in ejolok kobij ko rej rumij in bõki kobij ko im kõmõn bwe ren lutõklok itõrerein ial ko. Remaroñ kajitõk iben armij ro ñõn jibõñ. Einwõt armij ro remõn, dri Kristian ro rej uan ro moktata rej emmakit im bokake kien ko an Ailiñ eo ilo air jab aol. (Dri Rom 13:​3, 5-7) Dri Kristian ro remol rej mõnõnõ in kõmõni men ko elaplok jen men ko rej aikwij kõmõni ñõn bõk kunair ilo wãwen in. Rekõnan bwe melan ko ren erreo im rej bõk buñten ne ko ñõn karreoiki, ejjab aolep ien rej aikwiji juõn dri kejelã ñõn kakememej ir. Remelele bwe erreo ej kakõlõn an kar emõn air katakin ir im jela kunair. Ej jino iben kajuju armij im kajuju baamle. Ñe jej karreoiki belakin mweo, men in enaj kejbãrok ejmour, bareinwõt enaj kõmõn bwe melan eo en aibujuij.

Ar Erreo ej Koutiej Anij eo Jej Kabuñ ñõn E

Ñe jej erreo im emõn baotokir men in ej mõtõn kabuñ eo ar im ekkã an armij kile. Juõn kumi in 15 likao im jiroñ ro rar dreloñ ilo juõn jikin mõña elikin air ber ilo kwelok elap eo an dri Kennan ro an Jeova ilo Toulouse ilo ailiñ in France. Ruo dri belele reridto rar jijõt ilo tebel eo ituriir rar lemnok bwe enaj lap air ekeroro im kokkure ainemõn. Bõtab, rar bwilõñ kin mwiliir im bwebwenato ko remõn an jodrikdrik rein emõn baotokiir. Ke kumi eo ear pojõk in emmakit, ridto ro rar nebar ir kin an emõn mwiliir im ba ñõn juõn ian jodrikdrik ro bwe mwil eo mwiliir ejeja ilo ran kein.

Ro rej lotok obij ko, jikin kõmõn buk ko, im jikin jokwe ko ilo ra ko an dri Kennan ro an Jeova ekkã air bwilõñ ke rej lo an erreo jikin kein. Ej menin aikwij bwe ro rej jerbal im jokwe ilo jikin kein ren kõnõk nuknuk ko rerreo im tutu aolep ran. Kein kõmedwañwañ im bõkãñaj ko rejjab maroñ jolok aikwij eo ñõn ar karreoiki kij mõke. Ñe dri jerbal rein rej kwalok nan ñõn dri turiir ilo jota ak ilo Jãdede im Jabõt, an erreo baotokiir ej jelet nan eo rej bõklok.

“Komin Dri Kajeoñwe Anij”

Kar rejañ dri Kristian ro ñõn “kajeoñwe Anij.” (Dri Epesõs 5:⁠1) Dri kanan Aiseia ear je visiõn eo me enjel ro rej kwalok kin Dri Kõmõnmõn eo ilo air ba nan kein “E kwojarjar, E kwojarjar, E kwojarjar.” (Aiseia 6:⁠3) Kemelele in ej kalikar bwe Anij elap an erreo. Elañe eindrein, Anij ekõnan bwe aolep ro rej korijer ñõn e ren kwojarjar im erreo. Ej jiroñ ir: “Komin kwojarjar; bwe Ña I kwojarjar.”​—1 Piter 1:​16.

Baibel eo ej rejañ dri Kristian ro ñõn “kejbarok wãwen air nuknuk.” (1 Timote 2:9, UBS) Ejjab menin bwilõñ bwe ilo buk in Reveles̃õn ej kwalok bwe “nuknuk ko linen kworairik rabõlbõl im erreo” rej jutõk kin jerbal ko rewãnik an ro Anij ej watõk ir rekwojarjar. (Reveles̃õn 19:⁠8) Ilo ijo turãjet, ekkã an Baibel kwalok kin jerawiwi einwõt mãr ak etton.​—Jabõn Kennan Ko 15:26; Aiseia 1:​16; Jemes 1:​27.

Ranin, million armij ro rej jokwe ilo jikin ko me elap an bin ñõn kejbãrok erreo ilo enbwin, mwil, im jitõb. Abañ in enaj jemlok ñe Anij ej “kõmõn men otemjej bwe ren ekãl.” (Reveles̃õn 21:⁠5) Ñe ejejit kitien kalimur in, aolep etton ko renaj joko ñõn in drio.

[Kamelele Eo Itulal]

 [Bo̦o̦k eo ilo peij 25]

Anij Ekõnan bwe Jen Erreo

Ilo ien eo rar itoitak ilo ene jemaren, kar jiroñ dri Israel ro ñõn kejbãrok ñe rej ilok im kapojõk. Ñõn wanjoñok rar aikwij in kapojõk ilikõn kamp eo im kalibubuiki brij ko air. (Duteronomi 23:​12-​14) Kinke enañin jilu million armij rar jokwe ilo kamp eo, men in ear maroñ lukkun kamõkmõk, ak ejelok berre bwe ear kejbãrok jen an nañinmij ko relap walok einwõt bwil im ilok loje.

Kar kakien armij ro ñõn karreoik ak kokkure jabrewõt men ear uñir menin mour ko remij. Meñe remaroñ kar jab melele unin men kein, kar jibõñ dri Israel ro ñõn bõprae nañinmij ko relap im kauwatata.​—Livitikõs 11:​32-​38.

Pris ro rar aikwij kwal peiir im neiir mokta jen air kõmõni jerbal ko air ilo imõn kaber eo. Air kar teiñi jãbi jinibõrõrõ eo kin dren ear jab juõn men ebiruru, bõtab ear juõn kien rar aikwij lukkun bokake.​—Exodus 30:17-​21.

[Bo̦o̦k eo ilo peij 26]

Nan in Kakememej ko Jen juõn Taktõ

Aibij ekanuij aurõk ñõn mour, bõtab dren eo etton emaroñ kõmõn bwe jen nañinmij im mij. Taktõ J. Mbangue Lobe, eo ej jeban jikin taktõ eo ej ber ilo oab eo ilo Douala, ilo Cameroon, ear kwalok nan in rejañ ko rekeie ilo juõn ien rar kajitõkin e.

“Ñe kwojjab jela elañe erreo dren eo, kwoj aikwij kõmate.” Im ej kakkõl: “Emõn ñe kwoj kajerbal jerajko ak wãwen ko jet ñõn mõn kij ko bõtab emaroñ kauwatata elañe ejjab jime am kajerbali.” Aolep ien kwon kwal peim kin joob mokta jen am mõña im elikin am kajerbal imõn kapojõk ko. Juõn joob ejjab lap wõnan, joñõn an drik wõnan ro rejeramel remaroñ wiaiki. Kwon ekkeini am kwal nuknuk ko am kin dren bwil ñe eor nañinmij ak jorran ko ilo kilim.

Taktõ eo ej wõnmanlok im ba: “Ej kunan aolep ro ilo baamle eo bwe ren karreoik iloan im ibelakin mweo. Ekkã ar likjõp in karreoiki jikin kapojõk ko im mõn brij ko inabijin mweo. Men in ej kõmõn bwe en obrõk kin kullul im loñ ko.” Bar juõn men eaurõk lein ej kile kin ajiri ro, im ej kakkõl kake: “Kejbãrok ñe kwoj tutu ilo lwe ko ilo bukwon eo am. Rej obrõk kin kij ko rekauwatata. Tutu aolep boñ ilo mweo mokta jen am kiki, en emõn am bũraje ñiõm ilo boñ, im kiki iloan juõn tainam.” Ennan kein rej ñõn jibõñ kij lemnok lok iman, emmakit, im bõprae an walok jorran ko.

[Pija eo ilo peij 25]

Kwal nuknuk ko am ej jibõñ ñõn bõprae an or jorran ko ilo kil

[Pija eo ilo peij 25]

Dri Kristian ro rej bõk buñten ne ko ñõn karreoik melan ko air

[Pija eo ilo peij 25]

Juõn jinen ej kea emaroñ kõmõn elõñ men ko bwe baamle eo an en erreo