“Komin Dri Kajeoñwe Anij”
Ruaklok ñõn Anij
“Komin Dri Kajeoñwe Anij”
Dri Epesõs 4:32–5:2
JOIJ. Tiriamo. Jeorlok bwir. Yokwe. Ekaburomõjmõj, bwe ilo ran kein ejeja an armij ro kwalok karkar kein. Ak ta kin kwe? Enañin ke or am eñjake bwe jekron ewi joñõn am kate yuk ñõn jerbali karkar kein ak kwojañin lo tõbrõk? Bwelen jen am kar iminene in kõmõni mõnit ko renana mokta ak am kar iion abañ ko rekaburomõjmõj, emaroñ bin am kwalok karkar kein karkarin Kristian. Ak Baibel eo ej katakin kij bwe dri Kõmõnmõn eo ar eor an liki bwe jemaroñ kadrek karkar kein iber.
Nan in Anij ej rejañ dri Kristian ro: “Inem komin dri kajeoñwe Anij, einwõt ajiri re jitenburu.” (Dri Epesõs 5:1) Nan kein rej kalikar bwe Anij ej liki dri kabuñ ro an. Ilo wãwen it? Jeova Anij ear kõmõnmõn armij ilo nememen wõt E. (Jenesis 1:26, 27) Anij ear kõmõn bwe armij ro ren jolit karkar ko einlok wõt karkar ko an. * Inem, ñe Baibel eo ej rejañ dri Kristian ro bwe ren “dri kajeoñwe Anij,” ej einwõt ñe Jeova ej ba ñõn ir: ‘Ij liki yuk. Meñe kwojjab wãppen, ak imelele bwe eor joñõn am maroñ ñõn kajeoñwe ña.’
Ta jet ian karkar ko an Anij jemaroñ anõki? Uak eo ej ber ilo eon ko ituman im elikin Epesõs 5:1. Lale wãwen Paul ear likit nan in “inem” mokta jen nan in kakabilek eo ñõn kajeoñwe Anij. Nan in ej ekkejellok ñõn eon eo mokta me ej kwalok bwe jen joij ñõn dron, en emõn buruer, im jolok nana jen dron. (Dri Epesõs 4:32; 5:1) Inem, elikin eon eo kin kajeoñwe Anij, Paul ej jiroñ dri Kristian ro bwe ren kwalok yokwe eo emol ilo aolepen wãwen air mour. (Dri Epesõs 5:2) Jej aikwij kajeoñwe Jeova kinke e ej joñok eo emõntata ilo kwalok joij, tiriamo, jeorlok bwir, im yokwe.
Etke jekõnan kajeoñwe Anij? Lale nan kein rekajur an Paul: “Inem komin dri kajeoñwe Anij, einwõt ajiri re jitenburu.” Nan kein rejjab ke lujur yuk? Jeova ej watõk dri korijer ro an einwõt ajiri ro nejin elap an yokwe ir. Einwõt juõn ladrik jidrikdrik ej kajeoñwe Jemen, ejja eindrein lok wõt iben dri Kristian ro remol rej kajeoñ kate ir joñõn wõt air maroñ ñõn anõk Jemeir ilõñ.
Jeova ejjab iun armij ro ñõn kajeoñwe e. Jen an eindrein ej koutiej kij bwe jen kãlet ta eo jekõnan kõmõne. Inem ej bebe eo am mõke ñõn kajeoñwe Anij ak jab. (Duteronomi 30:19, 20) Bõtab, jab meloklok bwe eor am maroñ ñõn kadrek karkar ko karkarin Anij. Emol bwe ñõn kajeoñwe Anij kwoj aikwij jela mokta kin karkar ko im karõk ko an im Baibel eo emaroñ jibõñ yuk ñõn jela kaki. Karkarin Anij ear kamakit elõñ million armij bwe ren kajeoñwe e.
[Kamelele Eo Itulal]
^ Dri Kolosse 3:9, 10 ej kalikar bwe jej nememen karkar ko karkarin Anij. Ro me rekõnan kabuñburuen Anij rej aikwij kõnõk “armij [eo] ekãl,” ekkar ñõn “wãwen Eo [Anij] e ar kõmõnmõne.”