Katakin Ajiri Ro Nejõm

Unin Devid Ear Jab Mijõk

EOR ke ien kwoj mijõk?​— * Enañin kij aolep jej eindrein jet ien. Ñe kwoj mijõk, ta eo kwomaroñ kõmõne?​— Kwomaroñ etal iben juõn eridto im ekajurlok jen yuk. Bwelen jemõm im jinõm remaroñ jibõñ yuk. Emaroñ lap ar katak jen Devid ikijen ia eo jemaroñ bõk jibõñ jene. Ear al ñõn Anij: “I naj liki Yuk. . . . I ar liki Anij, I jamin mijõk.”​—Sam 56:​3, 4.

Ilo am lemnok, wõn eo Devid ear katak jene ñõn an jab mijõk? Jen jemen im jinen ke?​— Ejelok berre bwe aet. Jesse, jemen, ear juõn ian ro jiman Jisõs Kraist, “Iroij in Ainemõn” eo Anij ear kalimur kake. (Aiseia 9:6; 11:1-​3, 10) Obed, leo jemen Jesse, ej jiman Devid. Juõn ian buk ko ilo Baibel ej etan jinen Obed. Kwojela ke etan?​— Ej Rut, juõn kõra etiljek me leo belen ej Boaz.​—Rut 4:​21, 22.

Emol, Rut im Boaz rar mij mokta jen an kar Devid lotak. Bwelen kwojela kajen jinen Boaz, jibwin jemen Devid. Liin ear jokwe ilo Jeriko im ear jibõñ lomoren jet ian dri iaroñroñ ro jen Israel. Ke worwor ko ilo Jeriko rar rup kar lomoren baamle eo an ikijen an kar katotoik to eo ebũrõrõ ilo windo eo an. Ta ãt eo etan?​— Rehab, eo ear erom juõn eo ej kabuñ ñõn Jeova, im ej juõn joñok ñõn dri Kristian ro bwe ren kajeoñwe ikijen an kar kwalok beran.​—Joshua 2:​1-​21; 6:​22-​25; Dri Hibru 11:30, 31.

Jemaroñ liki bwe jemen im jinen Devid rar katakin e kin aolep men ko kin dri korijer ro an Jeova retiljek kinke kar kakien ro jemen im jinen ñõn katakin ajiri ro nejiir kin men kein. (Duteronomi 6:​4-9) Ear jejit ien eo ke Anij ear jiroñ dri kanan Samuel bwe en ilen kãlet Devid, ladrik eo edriktata nejin Jesse, einwõt eo enaj kiñ in Israel.​—1 Samuel 16:​4-​13.

Juõn ran, Jesse ear jilkinlok Devid ñõn bõklok mõña ko kijen lõmaro jilu jein me rej tõrinae iben dri Pilistia ro, dri kijirãt ro an Anij. Ke Devid ear tõkãklok ijo, ear etõrlok iben jar in tõrinae eo im ej roñ an Golaiat kajirere kake “jarin tarinae in an Anij eo emour.” Aolep rej mijõk in jelmaik  Golaiat ñõn ire iben. Kiñ Saul ej roñ bwe Devid ekõnan etal, inem ej kir e. Ak ke Saul ej loe Devid, ej ba: “Kwe kwoj laddrik wõt.”

Devid ej kemelele ñõn Saul bwe ear mõn juõn laion im juõn bãer me rar kajeoñ im kañe s̃ip ko an baamle eo an. Devid ej ba bwe enaj “kõmmõn einwõt” ñõn Golaiat. Saul ej uak: “Eokwe, kwon ilok, im [Jeova] en bed ibbam.” Devid ej bõk lailim dreka ko rematõltil im ãti ilo bõjo in s̃eperd eo an im ej bõk buat eo an im etal im ire iben dri inea eo. Ke Golaiat ej lo an juõn ladrik edrik itok, ej lamij im ba: “Kwon itok im inaj lelok enbwinnũm bwe en kijen bao kan.” Devid ej uak: “Ña ij jumae yuk ilo etan [Jeova],” im ej lamij im ba: “Inaj bõk anjo iom.”

Inem Devid ej etõrlok ñõn Golaiat, im ej kwalok juõn dreka jen loan bõjo eo an im likiti ilo buat eo an im buate dremõn Golaiat. Ke dri Pilistia ro rej lo bwe emij dri inea eo, rej lelñoñ im ko. Dri Israel ro rej lukworkwore ir im rej bõk anjo ilo tõrinae eo. Joij im riiti aolepen bwebwenato in iben baamle eo am ilo 1 Samuel 17:12-​54, UBS.

Einwõt juõn jodrikdrik, jet ien kwomaroñ mijõk ñõn lore kien ko an Anij. Jeremaia ear juõn likao im ilo jinoin ear mijõk, ak Anij ear ba ñõn e: “Kwon jab mijak ir, kinke inaj bed ibbam.” Jeremaia ear kate e bwe en bõk anjo ion mijõk im ear kwalok nan einwõt an kar Anij jiroñ e bwe en kõmõne. Einwõt Devid im Jeremaia, elañe kwoj liki Jeova, kwe bareinwõt kwomaroñ katak ñõn jab mijõk.​—Jeremaia 1:​6-8, UBS.

[Kamelele Eo Itulal]

Kajitõk ko:

○ Ke Golaiat ear kajirere kake jar in tõrinae eo an Anij, ta eo Devid ear kõmõne?

○ Ewi wãwen an kar Devid bõk anjo ion Golaiat?

○ Ewi wãwen kij ranin jemaroñ katak ñõn jab mijõk?