Wãwen Tõmak Eo Aõ ear Jibõñ Iõ ñõn Anjo Ion Men ko Rekaburomõjmõj

Bwebwenato in ej jen Soledad Castillo

Elõñ alen ilo mour eo aõ iar mõke iaõ im men in emaroñ kar kabwer iõ ak iar jab ebwer. Ke iar 34 aõ yiõ, leo beleiõ ear mij. Jiljino yiõ ko tokelik, Jema ear mij. Drualitõk aliñ ko tokelik, elikin an Jema mij, ladrik eo nejiõ ear bõk juõn nañinmij me rejjab maroñ kamarmire.

ETA in Soledad, melelen “Mõke ian.” Meñe emaroñ kabwilõñlõñ melelen eta, ijañin kar mõke iaõ. Meñe iar jelmae buromõj, Iar liki bwe Jeova Anij ear ber iba, im ej ‘kapjere peiõ im jibõñ iõ bwe in jab mijõk.’ (Aiseia 41:⁠13) In kemelele kin wãwen iar anjo jen buromõj im wãwen iar ebakelok Jeova.

Juõn Mour Elemõnõnõ Iben Abañ Jidrik Ko

Iar lotak ilo Barcelona, Spain, ilo Mei 3, 1961, kar ña wõt nejin jinõ im jema, José im Soledad. Ke iar druatimjuõn aõ yiõ, jinõ ear katak mol eo jen Nan in Anij. Ear kabukot uak ñõn kajitõk ko an ilo kabuñ eo an ak ear jab lo uakir. Juõn ran ruo dri Kennan ro an Jeova rar lotok e ilo mweo imwem im rar uaki aolep kajitõk ko an jen Baibel eo. Jen wõt men in, ear kõnan katak Baibel eo.

Ejjab to tokelik, jinõ ear baptais im erom dri Kennan ro an Jeova, im juõn yiõ tokelik, Jema ear lore joñok eo an. Eliana, eo me ear katak iben jinõ, ear kile aõ itoklimo kin Nan in Anij. Meñe iar drik wõt, Eliana ear rejañ iõ bwe en jenolok ien aõ katak iben jen jema im jinõ. Iar baptais ke iar 13 aõ yiõ, kin jibõñ eo an im nan in rejañ ko an jinõ.

Ke iar jodrikdrik, aolep ien ij jar ñõn Jeova elaptata ñe ij kõmõn bebe ko. Ilo mol, ejeja an or abañ ko aõ ke iar jodrikdrik. Elõñ ro mõta rar ber ilo congregation eo aõ, im iar lukkun ebake jema im jinõ. Ilo 1982, iar mareik Felipe eo ear juõn ian dri Kennan ro an Jeova, im mejenkajik ko an rar einwõt mejenkajik ko aõ.

Katakin Ajiri Eo Nejimro ñõn Yokwe Jeova

Lailim yiõ ko tokelik, iar keutak juõn nejim ladrik elukkun wõlio etan in Saúl. Kimro ar lukkun mõnõnõ kin ladrik in nejimro. Kimar kejatrikrik bwe Saúl enaj kar ridtolok im emõn an mour, im or an yokwe ñõn Anij. Kimro Felipe ar jolok elõñ ien ko iben Saúl, im bwebwenato iben kin Jeova, mõña iben dron, im ikkure iben ilo jikin ikkure  ko. Saúl ear lukkun mõnõnõ in etal iben jemen ke rar kwalok nan ko remol jen Baibel eo iben ro jet, im jemen ear kõtlok bwe en bõk kunan meñe ear lukkun drik wõt ilo an lelok peba jidrik ko eor kemelele kin Baibel ie ñõn armij ro ilo moko imwiir.

Saúl ear jerbale nan in kakabilek ko kimar lilok ñõn e ilo yokwe im kamineneik e. Ke ear jiljino an yiõ, ear keini an kwalok nan ibemro. Ekin mõnõnõ in roñjake bwebwenato ko jen Baibel, im ear kijorur in bõk kunan ilo ien katak ko amjil einwõt juõn baamle. Ejjab to tokelik elikin an kar jino jikuul, ear jino kõmõn bebe ko redrik me rej berber ion jelalokjen eo an kin Baibel.

Bõtab, ke Saúl ear jiljilimjuõn an yiõ, mour in baamle eo amjil ear lukkun oktõk. Felipe ear or an nañinmij ilo ãrin. Kin nañinmij eo an, ear iñtan iomin 11 aliñ. Ear jab maroñ jerbal im ekkã wõt an babu. Leo iba ear mij ke ear 36 an yiõ.

Elap aõ buromõj ñe ij kememejtok yiõ eo ear lukkun bin ñõn kim. Iar lo an leo iba lukkun iñtan ke nañinmij eo an ear nanalok wõt, im ejelok men iar maroñ in kõmõne. Aolep ien ij kajeoñ in lelok nan in rejañ ñõn Felipe, ak ilo buruõ, kejatrikrik im mejenkajik ko ñõn baamle eo aõ rar jab tõbrõk. Ñe kimar jab maroñ ber ilo kwelok ko, iar riit ñõn e buk ko rej berber ion Baibel, im men in ear kakajur wõt kimro. Ke ear mij, iar lukkun buromõj.

Bõtab, Jeova ear jibõñ iõ. Aolep ien ij jar ñõn e bwe jitõb kwojarjar en kakajur iõ. Ij kamolol e kin yiõ ko amro Felipe iben dron im kejatrikrik bwe in bar loe ilo ien jerkakbiji. Iar kajitõk iben Anij bwe en jibõñ iõ bwe in mõnõnõ wõt ñe ij kememejtok ien ko amro iben dron im en letok jelalokjen ñõn iõ bwe in katakin ladrik eo nejimro bwe en erom Kristian eo emol. Meñe iar lukkun buromõj ak iar bõk kainemõn.

Jema im jinõ ekoba ro ilo congregation eo rar jibõñ iõ. Meñe eindrein, iar bõk erron katakin Saúl bwe en korijer ñõn Jeova. Boss eo aõ kar mokta ear letok juõn jerbal emõn ñõn iõ ilo jikin jerbal eo an, ak iar kõnan wõt jerbal in karreo bwe en lap ien aõ ber iben Saúl im ñe emwij an jikuul imaroñ ber iben.

Juõn eon jen Baibel eo ear kalikar ñõn iõ kin aurõkin aõ katakin Saúl kin Anij, ej ba: “Kwon kibel juõn ajiri ilo ial eo en etal ie, im ñe e ridto e jamin illok jen e.” (Jabõn Kennan Ko 22:6) Nan kein rej kalikar bwe ñe ij kate iõ joñõn wõt aõ maroñ ñõn katakin Saúl kin ial ko an Jeova inem Enaj kejerammõn iõ. Emol bwe ij aikwij karmijeteik kõnan ko aõ ñõn bõk juõn mour emõnlok, ak iar aikwij kalaplok aõ ien iben ladrik eo nejiõ, im men in elaplok an aurõk jen aõ mweie.

Jema ear mij ke Saúl ear 14 an yiõ. Saúl ear lukkun buromõj, kinke mij eo an jiman  ear kakememej e kin ien eo jemen ear mij. Jema ear bareinwõt likit juõn joñok emõn ñõn yokwe Jeova. Tokelik, Saúl ear bebe bwe ej erro eo an bwe en bõran baamle eo kinke kar e wõt “eman” ilo baamle eo, im kiõ ear aikwij kejbãroke jinen im jibwin.

Kijenmij Iomin Nañinmij in Leukemia

Drualitõk aliñ ko elikin mij eo an jema, taktõ eo ear jiroñtok iõ bwe in bõklok Saúl ñõn hospital kinke ear lukkun mõjino. Elikin air kakõlkõl e, taktõ ro rar jiroñ iõ bwe Saúl ear bõk nañinmij in leukemia. *

Ruo yiõ jimõtõn elikin ien eo ear jela kin nañinmij in an, Saúl ear ber ilo hospital elõñ alen kin nañinmij eo an im rej wãiki ñõn lelok uno in mõn cancer eo (chemotherapy). Elikin an bõk wã iomin jiljino aliñ ko, nañinmij eo an ear joko iomin 18 aliñ ko. Ak nañinmij eo an ear bar walok, im Saúl ear bar wã ak ear kõmõn an mõjino. Nañinmij eo an ear bar joko iomin jidrik wõt ien, ak ilo ien in kein kajilu ke ear bar bõk wã eo, joñõn an kajur uno eo enbwinin ear jab maroñwe. Saúl ear kõnan wujleplok mour eo an ñõn Anij im ear kwalok kõnan eo an bwe en erom juõn ian dri Kennan ro an Jeova, ak ear mij ke ej 17 an yiõ.

Taktõ ro ekkã air kõnan lelok bõtõktõk ñe rej lelok uno in mõn cancer eo. Bõtab, nañinmij in ejjab joko meñe juõn armij ej bõk bõtõktõk. Ke taktõ ro rar lo nañinmij in iben Saúl, kimro kar kalikar ñõn taktõ ro bwe kimro ban bõk kain kamarmir rot in kinke kimro kõnan bokake kien eo an Jeova ñõn “kejbãrok [kim] . . . jen bõtõktõk.” (Jerbal 15:19, 20) Elõñ alen Saúl ear mõke kwalok bebe eo an ñõn taktõ ro kin men in meñe iar jab ber iben. (Lale box eo ilo peij 31.)

Taktõ ro rar bebe bwe meñe ejakkar bwe en kõmõn bebe rot in ekkar ñõn kien ailiñ eo an ak rar kile bwe ear lukkun melele kin kauwatata in nañinmij eo an. Rar rejetak bebe eo amro bwe ren jab lelok bõtõktõk ñõn Saúl meñe kimar iion ijjibed ñõn ukot bebe in amro. Iar lukkun buñburuõ kin Saúl ke iar roñjake an kemelele kin tõmak eo an ñõn taktõ ro. Alikar bwe kõtan eo an iben Jeova ear ebak.

Ilo ien eo jinoin amro jela kin nañinmij eo an Saúl, rej kab kwalok juõn buk ekãl etan Kwon Ruaklok ñan Jehovah (Draw Close to Jehovah) ilo juõn kwelok elap ilo Barcelona. Buk in ar lukkun kakajur kimro bwe kimin kijenmij wõt ke kimar jelmae juõn melejoñ elap. Ilo aolep auõ ko kimro ar ber ilo hospital, kimro ar riiti buk in iben dron. Ilo ien kein rebin ñõn kimro, ekkã amro kalomõnlokjen kin kobõn buk in. Bareinwõt ilo ien kein nan ko ilo Aiseia 41:13, kar kajerbale ñõn nan in kebellok ko ilo buk in im rar lukkun jejit ñõn kimro. Ej ba: “Ña Jeova, am Anij, I naj kapjere anbijmaroñõm, im ba ñõn yuk, Kwon jab mijõk; I naj jibõñ yuk.”

Tõmak eo an Saúl ear Jelet Buruen Armij Ro Jet

Taktõ ro im nõj ro ilo Vall d’Hebron Hospital, rar lukkun bwilõñ kin lemnok im kijejeto eo an Saúl im an makõtkit in ridto. Ir aolep rar lukkun yokwe e. Elikin an kar lale Saúl, taktõ eo ear lale ajiri ro jet nejin dri Kennan ro an Jeova me rar bõk ejja kain nañinmij in wõt im ear kwalok an koutiej im nebar ir. Ej kememej wõt kin bebe eo ebin an Saúl kin tõmak eo an, beran eo an meñe ear ber ilo kauwatata, im kin mõnõnõ eo an kin juõn ilju ekamõnõnõ. Nõj ro rar jiroñ Saúl bwe ej mõke wõt dri nañinmij  eo air emõn ilo hospital eo. Rej ba ejaje kwalok an abnõnõ im ekin kõmõn kejak meñe ebak ien an mij.

Juõn taktõ ear jiroñtok iõ bwe enañin elõñ ajiri ro me rej ber ilo ejja kain nañinmij rot in, ekkã air jumaik taktõ ro im jemeir im jineir kin joñõn air iñtan im abnõnõ. Ak ear kile bwe ear jab eindrein iben Saúl. Ear lukkun bwilõñ kin an Saúl ainemõn wõt. Men in ear kebellok juõn ien ñõn amro Saúl kwalok nan iben kõra in kin tõmak eo amro.

Ij bareinwõt kememejtok kin wãwen an Saúl kar jibõñ juõn eman me ej juõn ian dri Kennan ro an Jeova. Lein ear bõk nañinmij in buromõj iomin jiljino yiõ ak ejelok uno ear maroñ kamarmire. Jet ien ej kouk Saúl in boñ ilo hospital. Ear ba ñõn ña bwe lemnok eo an Saúl kin nañinmij eo an ear lukkun kabwilõñ e. Ear kile bwe meñe Saúl ear mõjino kin nañinmij eo an ak ear kajeoñ rejañ aolep armij ro me rar lolok e. Lein ej ba: “Wanjoñok eo an Saúl ear kaberan iõ ñõn anjo ion nañinmij in buromõj eo aõ.”

Emotlok jilu yiõ jen ien eo ke Saúl ear mij ak ij buromõj wõt. Meñe imõjino ak Anij ear letok ñõn iõ “maroñ eo e kanuij lap.” (2 Dri Korint 4:⁠7) Meñe iar lukkun metõk jen melejoñ ko relap im bin me iar jelmaiki ak iar katak bwe emaroñ bar or tokjeir. Ilo aõ kijenmij kin mij eo an leo iba, jema, im ladrik eo nejiõ, ear jibõñ iõ ñõn jab lemnok kin ña mõke ak in lemnok kin bar ro jet me rej bar iion iñtan. Ilõñin men kein otemjej, men in ear karuaklok iõ ñõn Jeova. Ijjab mijõk kin jabrewõt men kinke Jemeruij ilõñ ej jibõñ wõt iõ. Ej kapjere anbijmaroñiõ.

[Kamelele Eo Itulal]

[Bo̦o̦k/Pija eo ilo peij 31]

KWONAÑIN KE LEMNOK KIN MEN IN?

Bwelen emwij am roñ bwe dri Kennan ro an Jeova rejjab bõk bõtõktõk ilo eke. Kwonañin ke lemnok ta unin?

Ekkã an armij ro jab melele kin jokãlet in me ej berber ion Baibel. Jet ien armij ro rej baj lemnok wõt bwe dri Kennan ro an Jeova rejjab kõnan kamarmire nañinmij ko ilo jabrewõt wãwen ak rej kajitokjen mour. Lemnok in ejjab mol. Dri Kennan ro an Jeova rekõnan bukot wãwen eo emõntata ñõn kamarmire nañinmij ko ñe rej jelet ir im ro nukiir. Bõtab, rej bukot kõl ko me rejjab kajerbal bõtõktõk. Etke?

Bebe eo air ej berber ion kien eo bwe Anij ear lelok mour. Elikin wõt Ibijliplip eo ilo ran ko an Noa, Anij ear kõtlok Noa im baamle eo an bwe ren mõña kõniekin menin mour ko. Anij ear likit wõt kien in: Ren jab mõña bõtõktõk. (Jenesis 9:​3, 4) Armij otemjej rar itok jen Noa, im kin men in, kien in ej jerbal ñõn armij otemjej ñõn ran kein. Rualitõk buki yiõ ko tokelik, Anij ear bar kakememej ailiñ in Israel kin kien in, im kemelele bwe bõtõktõk ekwojarjar, im ej kõkkar kin mour eo an armij. (Livitikõs 17:14) Ilo 1,500 yiõ ko tokelik, dri jilik ro rar kakien aolep dri Kristian bwe ren “kejbãrok [ir] . . . jen bõtõktõk.”​—Jerbal 15:29.

Elukkun alikar iben dri Kennan ro an Jeova bwe rejjab maroñ kejbãrok ir jen bõtõktõk elañe rej bõk bõtõktõk ilo ekeir. Eñin unin rej kabukot kõl ko jet me rejjab kajerbal bõtõktõk ñõn kamarmire nañinmij ko air. Bebe in me ej wawa ion Baibel ekkã an kõmõn bwe taktõ ro ren kamarmire nañinmij ko ilo bar juõn wãwen emõnlok. Eñin unin elõñ armij ro me rejjab dri Kennan ro an Jeova rej kajitõk iben taktõ ro bwe ren jab lelok bõtõktõk ñõn ir ñe rej kamarmire nañinmij ko air.

[Pija eo ilo peij 29]

Iben leo beliõ, Felipe, im ladrik eo nejimro, Saúl

[Pija eo ilo peij 29]

Jema im jinõ, José im Soledad

[Pija eo ilo peij 30]

Juõn aliñ moktalok jen an Saúl mij