Wãwen ko ñõn Erom juõn Jemen Emõn

“Ro jemeir, komin jab kaillu ro nejimi, bwe ren jab õbwer.”—Dri Kolosse 3:​21.

EWI wãwen juõn jemen emaroñ bõprae an kaillu ro nejin? Eaurõk bwe juõn jemen en kile erro eo an. Ilo juõn buk kin etale ro eor air jorran in kamelij, ej ba nan kein: “Ilo juõn wãwen ejej uan, ro jemen elap air jelete ajiri ro ilo air ridtolok.”

Ta erro eo an juõn jemen? Ilo elõñ baamle ko, leo ekkã an e eo ej lelok kaje. Ñe ajiri ro rej bõt, ekkã an jineir ba: ‘Kõtar an jemõm roltok bwe en dreñõt yuk.’ Bwe ajiri ro ren emõn ñe reridto, jemeir im jineir rej aikwij emõn joñõn air kajeik im katakin ir. Elõñlok men ko juõn jemen ej aikwiji bwe en emõn an lale erro eo an.

Ekaburomõjmõj bwe ejjab aolep ro jemen emõn joñok ko air ñõn jibõñ ro nejir. Jet eman ro jen ke rar drik im ridtolok rar jab lo jemeir. Ak iben bar jet me jemeir ear lukkun bin buruen ñõn ir, remaroñ kõmõn ejja kain wãwen in wõt ñõn ro nejir. Ak ewi wãwen bwe juõn jemen en jab lor mõnit kein ear drik im ridtolok kaki, im en erom juõn jemen emõn?

Eor juõn nan in kakabilek ekeie ñõn erom juõn jemen emõn. Baibel eo ej letok nan in kakabilek eo emõntata kin mour in baamle im elap an jerbal im or tokjen. Nan in kakabilek ko ilo Baibel eo rej kalikar meletlet eo an Jeova Anij, eo im ej unjen mour in baamle. (Dri Epesõs 3:​14, 15) Elañe kwoj juõn jemen, kwon lukkun lemnok kin ta eo Baibel ej ba kin wãwen kilen lale ajiri. *

Elukkun aurõk bwe juõn jemen en lale aikwij ko an ajiri ro nejin ilo eñjake, kõniek im elaptata aikwij eo bwe ren kadrek kõtan eo air iben Anij. Elañe ebak kõtan eo an juõn ajiri iben jemen, enaj biruru an kadrek juõn kõtan ebak iben Anij. Baibel eo ej kwalok bwe Jeova, Dri Kõmanmõn eo ar ej jemer. (Aiseia 64:8) Jen etale aikwij ko jiljino an ajiri ro jen jemeir. Ilo wãwen kein kajuju, jenaj etale ewi wãwen ñe juõn jemen ej etali nan in kaiñi ko ilo Baibel eo emaroñ jibõñ e ñõn kõtõbraki aikwij kein.

1 Ajiri Ro Rej Aikwij Yokwe Jen Jemeir

Jeova ej likit joñok eo emõntata einwõt juõn Jemen. Baibel eo ej kwalok eñjake ko an  Anij kin Jisõs, manji eo Nejin, ej ba: “Jemen ej yokwe Nejin.” (Jon 3:​35; Dri Kolosse 1:​15) Elõñ ien ko Jeova ear kwalok an yokwe Nejin im an buñburuen kake e. Ke Jisõs ear baptais, Jeova ear kennan jen lõñ, im ba: “Kwe Nejiõ, jitenburu iba, Ij mõnõnõ kake Yuk.” (Luk 3:​22) Jisõs ear lukkun liki bwe Jemen ej yokwe e. Ta eo juõn jemen emaroñ katak jen joñok eo an Anij?

Jab ãliklik in ba ñõn ro nejimi bwe kwoj yokwe ir. Kelvin, eo eor nejin lailim ajiri, ej ba: “Ij aolep ien kajeoñ kwalok aõ yokwe ajiri ro nejiõ, ijjab baj ba wõt ñõn ir bwe Ij yokwe ir ak ilo aõ bareinwõt kwalok aõ itoklimo kake ir kajuju. Ij bõk kunaõ im jeniji kal ko air im katutuik ir.” Bareinwõt, ajiri ro nejõm rej aikwij jela elañe kwoj buñburuõm kake ir. Jab mõkõj am illu ñe rej kõmõn bwir ko redrik ak en lap wõt am nebar ir. Donizete, eo eor ruo nejin ledrik jodrikdrik, ej kaiñ, “Juõn jemen ej aikwij kate ñõn bukot ien ko me emaroñ nebar ajiri ro nejin.” Ñe ajiri ro nejõm rejela bwe kwoj buñburuõm kake ir, men in emaroñ kõmõn bwe ren ejaake juõn lemnok emõn kin ir mõke im lemnok bwe eor tokjen men ko rej kõmõni ilo baamle eo. Kin men in, emaroñ jibõñ ir ñõn ebakelok Anij.

2 Ajiri Ro Rej Aikwij Wanjoñok eo Emõn

Ilo Jon 5:​19, ej kwalok bwe Jisõs ej kõmõni wõt “men ko jabrewõt [Jeova] Ej kõmõni.” Lale mõk, nan kein rej kwalok bwe Jisõs ej kõmõni men ko ej lo an Jemen “kõmõni.” Ajiri ro ekkã air naj kõmõne ejja wãwen in wõt. Ñõn wanjoñok, elañe leo ej emõn an kõmõn ñõn lio belen im ej koutiej e, ladrik eo nejin, ñe eridto enaj eindrein bareinwõt an kõmõn ñõn kõra ro. Kõmõn ko an eman ro ejjab baj jelet wõt ladrik ro nejiir ak ej bareinwõt jelet ledrik ro ñe rej lo joñok ko remõn an jemeir. Enaj eindrein air kõmõn ñõn eman ro.

Ajiri ro nejõm, ebin ke air kajitõk jeorlok bwir? Eñin unin joñok ko elap air aurõk. Kelvin ear kememej juõn ien ke ladrik ro ruo nejin rar kejorrane camera eo elukkun lap wõnan. Joñõn an kar lukkun illu ear noe tebel eo kin pein im ear bwilok tebel eo. Ear nana an Kelvin mour tokelik im ear jolok an bwir iben baamle eo, ekoba lio belen, kin an kar jab drebij an lukkun illu. Kelvin ear lemnok bwe an kar kajitõk jeorlok bwir ear jelet ajiri ro nejin ilo juõn wãwen emõn, eñin bwe ajiri ro nejin en biruru air kajitõk jeorlok bwir.

3 Ajiri Ro Rej Aikwij Juõn Mour in Baamle Elemõnõnõ

Jeova ej juõn “Anij e mõnõnõ.” (1 Timote 1:​11) Eñin unin, Nejin, Jisõs ej lo lõñliñ ilo an ber iben Jemen. Jabõn Kennan Ko 8:​30 ej kemelele bwe Anij ear kõmõnmõn Jisõs ilo meletlet im ejaake juõn kõtan ebak iben:  “Ien eo I ar ber iturin [Jema], einwõt juõn dri mejerik, . . . I ar mõnõnõ ien otemjej iman.” Elukkun okmãnãn im ebak kõtan eo an Jemen im Nejin!

Ajiri ro nejõm rej aikwij lo mõnõnõ ilo baamle eo. Bõk am ien ikkure iben ajiri ro nejõm, emaroñ ejaake juõn mejatoto elemõnõnõ ilo baamle eo. An ajiri ro im jineir im jemeir ikkure iben dron enaj kõmõn air ebake dron. Felix eo eor ruo nejin ladrik jodrikdrik ej errã ilo men in, im ej ba: “Aõ kõmõn ien ibeir elukkun aurõk ñõn kõtan eo amjil. Kimjil ej ikkure iben dron, bwebwenato iben ro mõtõm, im etal ñõn jikin ko rekamõnõnõ. Men in ear kõmõn an baamle eo aõ ebake dron einwõt juõn baamle elemõnõnõ.”

4 Ajiri Ro Rej Aikwij Katak ñõn Ebake Anij

Jisõs ear katak jen Jemen. Kin men in ej ba: “Ij konono ñõn ro dri lõl men ko I ar roñ jen E [Jeova].” (Jon 8:⁠26) Iben Anij, ej erro eo an juõn jemen ñõn katakin ajiri ro kin mour erreo im jela kin Anij. Juõn ian erro ko an lõmaro eor nejir ej ñõn katakin ro nejir bwe kien ko an Anij en ber ilo burueir. Rej aikwij jino katakin ir jen ke rej ajiri wõt. (2 Timote 3:​14, 15) Felix ear jino riiti bwebwenato ko jen Baibel eo ñõn ladrik eo nejin jen ke ear drik. Ear kajerbal buk ko an ajiri, ekoba Aõ Buk in Bwebwenato Ko Jen Baibel. * Ke ladrik eo nejin ear ridtolok, kiõ Felix ear kajerbal buk ko jet me ekkar ñõn ridtõn ladrik eo nejin.

Donizete ej ba: “Ejjab juõn men ebiruru ñõn kõmõn bwe ien katak Baibel iben baamle eo en kalõñliñ. Eaurõk bwe ro jinen im jemen ren kamol air kaurõk katak ko kin Anij, kinke emõkõj an ajiri ro kile elañe jineir im jemeir rej kõmõni ak jab.” Carlos, eo eor jilu nejin ladrik ej ba: “Ilo kajuju wik, kimij kwelok iben dron ñõn kennan kin aikwij ko an baamle eo. Kajuju ro uan baamle in ej kãlet ta eo kim naj kennan kake.” Aolep ien Kelvin ej bukot kilen ñõn kennan ñõn ajiri ro nejin kin Anij jekron ia eo rej ber ie im jekron ta eo rej kõmõne. Men in ej kakememej kij kin nan ko an Moses: “Nan kein, ij jiroñ yuk ranin, ren ilo buruõm; im kwon kanuij katakin ro nejõm kaki, im kwon konono kaki ñe kwoj jijõt ilo mweo imõm, im ñe kwoj etetal ilo ial, im ñe kwoj babu, im ñe kwoj jerkak.”​—Duteronomi 6:6, 7.

5 Ajiri Ro Rej Aikwij Kaje im Kajime

Ajiri ro rej aikwij kaje im kajime bwe ilo air ridtolok renaj pojõk in jela inek erro ko air kin mour. Jet jemen im jinen ajiri ro rej lemnok bwe kajeik ajiri ro ej melelen lukkun lej ñõn ir ekoba lelok nan in kamijõk ko ak kajook ir. Bõtab, Baibel eo ejjab ba bwe lelok kaje ej kobaik lej im illu. Jen air kõmõn eindrein, ro jemeir im jineir rej aikwij lelok kaje ilo yokwe einwõt Jeova. (Dri Hibru 12:​4-11) Baibel eo ej ba: “Ro jemeir,  komin jab biuktõke ro nejimi ñõn illu: a komin kakajiririik ir ilo kaje im kowe an Iroij.”​—Dri Epesõs 6:4.

Jet ien, juõn ajiri ej aikwij bõk kaje kin an nana mwilin. Bõtab, ej aikwij lukkun melele kin unin an bõk kaje im kememej bwe eo ej kajeik e ej yokwe wõt e. Baibel eo ejjab errã kin kajeik ajiri ro le jen joñõn ak ilo lej, kinke men in emaroñ kejorran e. (Jabõn Kennan Ko 16:⁠32) Kelvin ej ba: “Ke iar aikwij kajimeik ajiri ro nejiõ kin bwir ko air relap, aolep ien iar kalikar bwe unin aõ kajeik ir kar bwe ij yokwe ir.”

6 Ro Jemen im Jinen Rej Aikwij Kejbãrok Ajiri Ro Nejiir

Ajiri ro nejõm rej aikwij bõk kejbãrok jen kareelel ko rekauwatata im kõmao ko renana. Ekaburomõjmõj, bwe eor “armij renana” rej kokkure ajiri ro. (2 Timote 3:​1-5, 13) Ewi wãwen kwomaroñ kejbãrok ajiri ro nejõm? Baibel eo ej letok nan in kakabilek in ekeie: “Juõn dri meletlet ej lo nana eo, im tilekek; a ro dri bwebwe, rej etal wõt im jorran kake.” (Jabõn Kennan Ko 22:3) Ñõn kejbãrok ajiri ro nejõm jen jorran, kwoj aikwij lale ñõn kejbãrok ir jen kauwatata kein. Lemnoklok iman kin abañ ko me remaroñ walok, im kõmõn jabrewõt men ko rekkar ñõn kejbãrok ir. Ñõn wanjoñok, ñe kwoj kõtlok an ajiri ro nejõm kajerbal Internet, lukkun lale bwe ren kejbãrok air kajerbale. Emõn bwe kwon likit computer eo ilo ijo eor armij ie.

Juõn jemen ej aikwij pojõk im katakin ajiri ro nejin kin kauwatata ko me remaroñ jelmae. Ajiri ro nejõm rejela ke ta eo renaj kõmõne elañe juõn enaj kajeoñ in kokkure ir? * Ajiri ro nejõm rej aikwij jela kajerbal mõtõn enbwinin ilo jime im jab ilo jakkar. Kelvin ej ba: “Iar jab kõtlok bwe ro jet ren katakin ir kin men in ekoba dri kaki ro air. Iar kile bwe ej erro eo aõ ñõn katakin ir kin mour in belele im kauwatata eo jen ro rej kokkure ajiri ro.” Aolep ajiri ro kiõ emwij air mare im rej mõnõnõ.

Bõk Jibõñ Jen Anij

Menin lelok eo elap ñõn juõn ajiri jen jemen ej bwe en jibõñ e ñõn kadrek juõn kõtan emõn iben Anij. Joñok eo an juõn jemen ej men eo eaurõktata. Donizete ej ba: “Ro jemen rej aikwij kwalok joñõn air kaurõk kõtan eo air iben Anij. Men in ej aikwij alikar ñe rej iion melejoñ ak abañ ko. Ilo ien kein, juõn jemen ej kwalok joñõn an lukkun liki Jeova. Jar iben dron einwõt juõn baamle, im air eliji air kwalok kamolol kin Emõn eo an Anij, enaj katakin ajiri ro kin aurõkin air watõk Anij einwõt Jerair.”

Ak, ta eo ej aikwiji bwe en einwõt juõn jemen emõn? Bõk jibõñ jen nan in kakabilek ko jen eo elukkun jela kilen kakajiriri ajiri, ej Jeova Anij. Elañe kwoj katakin ajiri nejõm ekkar ñõn nan in kakabilek ko an Anij, kwonaj lo tõbrõk ko ekkar ñõn Jabõn Kennan 22:6 ej ba: “Ñe e ridto e jamin illok jen e.”

[Kõmel̦el̦e ko itulal̦]

[Pija eo ilo peij 11]

Juõn jemen ej aikwij juõn joñok emõn ñõn ro nejin

[Pija eo ilo peij 12]

Juõn jemen ej aikwij jibõñ ajiri ro nejin ñõn kadrek juõn kõtan emõn iben Anij

[Pija eo ilo peij 13]

Ajiri ro rej aikwij bõk kaje ilo yokwe