Baibel eo Ej Ukot Mour Ko

Ta eo ear kamakit juõn kõra me ekin kwoti taimon ko im wiakaki ilo bar juõn ailiñ im kwot jen jikin jerbal eo an ñõn oktõk im erom juõn armij emol an jerbal? Ta eo ear jibõñ juõn kõra me ruo alen ear kajeoñ bõk mour eo an mõke ñõn lo bwe eor tokjen mour eo an? Ewi wãwen an kar juõn eo me ekkã an karek im bõk uno ko rekajur jolok mõnit kein renana? Jen lale ta eo rein rej ba.

PROFILE

ETAN: MARGARET DEBRUYN

RIDTAN: 45

AILIÑ: BOTSWANA

MOUR EO AN KAR MOKTA: KAR JUÕN DRI KWOT IM EKIN KWOTI MWEIUK KO IM WIAKAKI ILO BAR JUÕN AILIÑ

MOUR EO AÕ KAR MOKTA: Jema ej juõn dri Germany ak tokelik ear erom juõn dri ailiñ in South-West Africa (Namibia kiõ). Jinõ ej juõn dri Africa jen ailiñ in Botswana, jen bwij in Mangologa. Iar lotak ilo Gobabis, ilo ailiñ in Namibia.

Ilo 1970 jima ko, kien eo an South Africa ear bõk elap kajur ion ailiñ in Namibia im ear kõmõne juõn kakien ñõn kajenolok armij ro eoktõk kil ko kiliir jen dron ilo aolep bukwon ko. Jema im jinõ rar mare bõtab kin an kar oktõk ailiñ ko air jen dron rar iuni ir bwe ren jibel. Kin men in, jinõ ear bõk ña im lõmaro im limaro jeiõ im jãtiõ im kimar etal im jokwe ilo Ghansi, ilo ailiñ in Botswana.

Ilo 1979, iar emmakit ñõn juõn bukwon etan Lobatse, ilo Botswana, im iar jokwe iben ro rar lale iõ mae ien iar kamwijlok aõ jikuul. Tokelik, iar ellolo aõ jerbal ilo juõn obij an jikin kõmõn wa. Jen ke iar drik, iar tõmak bwe Anij ejjab kabwe aikwij ko an armij ro, im kwoj aikwij in kõmõn jabrewõt men jekron ejime ak ebwir ñõn kabwe aikwij ko am mõke im baamle eo am.

Kinke kar letok elap erro ñõn ña ilo jikin jerbal, iar kajerbal ien eo ñõn kwote mõtõn in wa ko jen jikin jerbal eo aõ. Jabrewõt ien juõn train ear etõr ñõn bukwon eo ilo boñ, ña im ro mõta kimar uwe ie im kwote jabrewõt men ko kimar maroñ bõki iloan. Iar bareinwõt kwot tiamon, gold, im jinibõrõrõ ko im wiakaki ilo bar juõn ailiñ. Iar jino bõk uno ko rekajur, erom juõn eo elukkun lej, im iar jeraik elõñ eman ro.

Inem, ilo 1993, rar jibwe aõ kwot im iar luji jerbal eo aõ. Ro me iar lemnok bwe rar mõta rar etal jen iõ kin air mijõk bwe renaj bar jibwe ir. Men eo rar kõmõne ear kõmetak iõ, kin men in iar beek bwe in jab liki jabrewõt armij.

WÃWEN AN KAR BAIBEL EO UKÕT MOUR EO AÕ: Ilo 1994, iar iione Tim im Virginia, jet  Dri Kennan ro an Jeova me rar jerbal in mejinede. Rar konono iba ilo jikin jerbal eo aõ ekãl im rar jibõñ iõ katak kin Baibel eo ilo ien aõ mõña in raelip. Tokelik, ke iar kile bwe imaroñ liki ir, iar kõtlok bwe ren itok ñõn imweo imõ im katak iba.

Ejjabto tokelik iar kile bwe elañe iar kõnan kabuñburuen Anij, inaj kar aikwij kõmõn oktõk ko ilo mour eo aõ. Ñõn wanjoñok, iar katak jen 1 Dri Korint 6:9, 10 bwe “ejelok dri lũñ,. . . ak dri kwot, ak dri ankwõnak, ak dri karek, ak dri kajirere, ak dri koaroñ, e naj bõk an jolit ailiñ in Anij.” Jidrik kin jidrik iar bwijrõk jen aõ kõmõni mõnit ko renana. Ear bwijrõk aõ kwot. Ear bwijrõk aõ kõmao iben dri nana ro me iar drik im ridtolok ibeir. Im ikijen kajur eo an Jeova, iar jolok lõmaro jera jen mour eo aõ.

WÃWEN AÕ KAR BÕK TOKJEN: Kin aõ lukkun kate, iar katak ñõn drebij aõ illu im jab buroñe ajiri ro nejiõ elañe eor juõn men enana ej walok. (Dri Epesõs 4:​31) Ij kajeoñ konono iber ilo meanwõr. Aõ konono ilo wãwen in ej bõktok tokjen ko remõn im ej kadruaklok kim ñõn dron einwõt juõn baamle.

Ro mõta kar mokta im ro dri turuõ, rar kile bwe remaroñ liki iõ. Iar erom juõn dri jerbal emol im remaroñ liki ikijen aõ lolorjake mweiuk ko im mõnni ko ilo tiljek. Inem, imaroñ kabwe aikwij ko aõ im ilo ejja ien eo wõt ij lelok elap ien ñõn jibõñ ro jet ñõn katak Baibel eo. Ij kanuij errã ilo nan ko ilo Jabõn Kennan Ko 10:22: “Kejerammõn jen Jeova, ej namweien armij; im E jab kobaik buromõj na iben.”

PROFILE

ETAN: GLORIA ELIZARRARÁS DE CHOPERENA

RIDTAN: 37

AILIÑ: MEXICO

MOUR EO AN KAR MOKTA: EAR KAJEOÑ BÕK MOUR EO AN

MOUR EO AÕ KAR MOKTA: Iar drik im ridtolok ilo juõn jikin emweie etan Naucalpan, ilo ailiñ in Mexico. Jen ke iar drik, iar lukkun bõt im emõn iba etal ñõn ien bade ko. Iar jino kõbatat ke ear 12 aõ yiõ, irak dren in karek ke ear 14 aõ yiõ, im bõk uno ko rekajur ke ear 16 aõ yiõ. Jet yiõ ko tokelik, iar ilok jen mweo. Enañin aolep ro mõta rar itok jen baamle ko elap bwoktak ie me ekkã air buroñe ir im mõn ir. Ear einwõt ñe ejelok tokjen mour eo aõ, kin men in ruo alen iar kajeoñ bõk mour eo aõ.

Ke ear 19 aõ yiõ, iar jino jerbal einwõt juõn dri model. Kin men in, iar kobalok iben ro reutiej ilo kien im iben ro rebuñbuñ einwõt dri al im dri kõmõn pija ro. Ejjabto tokelik iar mare im or nejiõ, bõtab iar kõmõn aolep bebe ko ñõn baamle eo aõ. Iar wõnmanlok wõt im kõbatat im irak dren in karek, im iar lukkun boub kin ien kamõnõnõ ko. Bwebwenato ko aõ rekin obrõk kin kanõjnij im ear emõn iba kwalok kõmõn kejak ko rejakkar. Bareinwõt iar juõn armij elulu.

Enañin aolep armij ro iar kõmao ibeir rar mour ilo ejja wãwen in wõt. Rar lemnok bwe iar mweie im jerammõn. Bõtab iar bõk eñjake eo bwe ejelok tokjen aõ mour.

WÃWEN AN KAR BAIBEL EO UKÕT MOUR EO AÕ: Iar jino katak Baibel iben Dri Kennan  ro an Jeova ilo 1998. Iar katak ilo Baibel bwe eor tokjen mour. Bareinwõt iar katak bwe Jeova Anij enaj kõmõn bwe lõl in en erom juõn paredais, im enaj kejerkakbiji ro remij, im bwe imaroñ mour ilo juõn ilju im jeklaj rot in.

Iar bareinwõt katak bwe wãwen eo ñõn kwalok bwe ij yokwe Anij ej ñõn bokake e. (1 Jon 5:3) Ear bin men in iba kinke iar jab mõnõnõ in bõk tel jen jabrewõt. Bõtab tokelik iar kile bwe ijjab maroñ wõnmanlok im tel mour eo aõ mõke. (Jeremaia 10:23, UBS) Iar jar ñõn Jeova bwe en tel iõ. Iar kajitõk iben bwe en jibõñ iõ bwe in mour ekkar ñõn kien ko an im ñõn katakin ajiri ro nejiõ bwe ren bõk juõn mour eoktõk jen kar wãwen aõ mour.

Ear lukkun bin ñõn aõ kõmõn oktõk ko, ak iar jino jerbali nan in kakabilek ko ilo Dri Epesõs 4:​22-​24: “Komin wutik armij emor ekar ñõn ami etetal mokta, . . . Im bwe komin kõnõk armij ekãl, eo ekar ñõn Anij emwij kõmõne ekãl ilo wãnik im kwojarjar in mol.” Ñõn ña, kõnõk armij eo ekãl ej melelen jolok mõnit ko retton einwõt kõbatat, im iar aikwij katak ñõn jab bar kajerbal nan ko retton. Ear bõk enañin jilu yiõ ko ñõn aõ kõmõn oktõk ko bwe in maroñ baptais einwõt juõn ian Dri Kennan ro an Jeova.

Bareinwõt iar jino kaurõke erro eo aõ einwõt lio belele im juõn jinen. Iar jino jerbale nan in kakabilek eo ilo 1 Piter 3:​1, 2: “Ein drein, limaro, komin kõtãik kom ñõn lõmaro belemi; bwe elañe jabrewõt e jab bokake nan eo, en rel buruen ñe ejelok nan, kin an beleir ber im kõmõn; Ñe rej lo ami etetal ekwojarjar ilo mijõk.”

WÃWEN AÕ KAR BÕK TOKJEN: Elap aõ kamolol Jeova kinke ijela kiõ bwe eor tokjen mour. Ij kile bwe ij juõn armij emõnlok im imaroñ kakajiririk ajiri ro nejiõ ilo wãwen eo emõn. Jet ien, buruõ ej liakelok iõ kin kõmõn ko aõ kar mokta, bõtab Jeova ejela buruõ. (1 Jon 3:​19, 20) Ejelok berre bwe aõ mour ekkar ñõn kien ko ilo Baibel ear kejbãrok iõ jen jorran im ear kainemõn buruõ.

PROFILE

ETAN: JAILSON CORREA DE OLIVEIRA

DRITAN: 33

AILIÑ: BRAZIL

MOUR EO AN KAR MOKTA: JUÕN DRI KAREK IM EO EAR BÕK UNO KO REKAJUR

MOUR EO AÕ KAR MOKTA: Iar lotak ilo Bagé, juõn jikin kwelok ilo Brazil me eor 100,000 armij rej jokwe ie im ej ebak ñõn ailiñ in Uruguay. Mour ko an armij ro ijo rej berber ion air kallip im nejnij cow ko. Iar drik im ridtolok ilo juõn jikin ebin mour ie me dri nana ro rej kowaroñe armij, im ekkã an jodrikdrik ro karek im bõk uno ko rekajur.

Elikin aõ kar kadrioijlok jen jikuul, iar jino irak dren in karek, bok uno ko rekajur einwõt marijuana, im roñjake al ko me relukkun kauwaroñroñ. Iar jab tõmak ilo Anij. Iar lemnok  bwe aolep iñtan im bwoktak ko ilo lõl in rar menin kamol bwe ejelok Anij.

Iar juõn dri kũta im dri kine al ko im ekkã aõ bõk nan ko ilo al ko jen buk in Reveles̃õn ilo Baibel. Kumi in kajõñjõñ eo aõ ear jab lukkun buñbuñ einwõt iar kõtmene kake, inem iar jino kalaplok aõ bõk uno ko rekajur. Iar jab kea elañe iar mij jen aõ bõk uno ko rekajur. Elõñ ian dri al ro me iar koutiej ir rar mij jen air bõk uno ko rekajur.

Iar maroñ wiaik uno ko rekajur jen aõ bõk jããn jen lilap eo jibwũ me ear kakajiriri iõ. Ij riõp ñõn e ñe ej kajitõk kin ta eo iar kõmõne kin jããn eo. Men eo enanalok jen men in ej bwe iar bõk kwonaõ ilo anijnij. Iar reel ilo jerbal in anijnij ko me eor kajur in Devil ie kinke iar lemnok bwe renaj kar jibõñ iõ kõkõmõnmõnlok al ko ij kini.

WÃWEN AN KAR BAIBEL EO UKÕT MOUR EO AÕ: Elikin aõ jino katak Baibel im ber ilo kwelok ko an Dri Kennan ro an Jeova, ear jino oktõk wãwen aõ lemnok im iñjake. Jidrik kin jidrik ear edrek juõn kõnan iba ñõn mour im mõnõnõ. Wãwen lemnok in ekãl ear kamakit iõ ñõn mwijiti kolan bõra kinke ear aitok. Iar kõtlok an aitok ñõn kwalok aõ jumae im jab mõnõnõ. Inem iar kile bwe elañe iar kõnan kabuñburuen Anij, iar aikwij jolok aõ karek, bwijrõk jen aõ bõk uno ko rekajur, im kõbatat. Bareinwõt iar kile aikwij eo ñõn ukot al ko ij roñjaki.

Jinoin aõ etal ñõn juõn ian kwelok ko an Dri Kennan ro an Jeova, iar kile juõn eon ear ber ion kiin mweo. Ear itok jen Jabõn Kennan Ko 3:5, 6: “Kwon liki Jeova kin aolepen buruõm, im kwon jab atartar ion jelalokjen eo am: Kwon kwalok E ilo ial ko am otemjelok, inem E naj bakajen ial ko am.” Aõ lemnok kin eon in ear kakajur liki eo aõ bwe Jeova enaj jibõñ iõ kõmõn oktõk ko ilo mour eo aõ, elañe ij kõtlok bwe en tel iõ.

Meñe eindrein, ear bin aõ kõmõn oktõk ko ilo mour eo aõ im jolok aõ bõk uno ko rekajur einwõt an bin ñõn aõ bukwe im jolok peiõ. (Matu 18:​8,  9) Iar jela bwe aõ kõmõn oktõk ko jidrik kin jidrik eban tõbrõk. Kin men in iar jolok mõnit ko aõ retton ilo ien eo wõt. Bareinwõt iar kejbãrok jen aõ etal ñõn jikin ko im iben armij ro me remaroñ karel iõ ñõn wãwen mour eo aõ kar mokta me enana.

Iar kile bwe iar maroñ juburu kin tõbrõk ko iar kõmõni kajuju ran, im jab lemnok kin men ko rej kabwer iõ. Iar lemnok bwe ej juõn jerammõn ñõn aõ erreo ilo enbwin im ilo mwil, me rej kõmõn aõ bõk juõn ãt emõn iben Jeova. Iar jar im bõk jibõñ jen Jeova bwe in jab lemnok kin mour eo aõ kar mokta ak bwe in lemnok wõt kin ilju im jeklaj. Jet ien, iar bar rol ñõn mõnit ko retton. Bõtab, meñe jet ien ejjab emõn aõ mour kin an kar lap aõ karek, iar kõnan bwe komro eo ear katak iba en wõnmanlok wõt im katak Baibel.

Aõ katak mol eo kin Anij jen Baibel eo ear jibõñ iõ ñõn kile bwe ej kea kin kij kajuju, enaj kokkure kabuñ ko rewan, im ej rejetake jerbal in kwalok nan eo ibelakin lõl. (Matu 7:​21-​23; 24:14; 1 Piter 5:​6, 7) Tokelik iar beek ñõn ajelok mour eo aõ ñõn Anij. Iar kõnan kwalok aõ kamolol kin men ko otemjej ear kõmõni ñõn ña.

WÃWEN AÕ KAR BÕK TOKJEN: Kiõ ij eñjake bwe eor tokjen aõ mour. (Ekklisiastis 12:13) Im jen aõ kar bõk jããn jen baamle eo aõ, kiõ iar maroñ jibõñ ir. Iar kwalok ñõn lilap eo jibwũ men ko remõn iar katak jen Baibel, im kiõ emwij an ajelok mour eo an ñõn Jeova. Elõñ ro uan baamle eo aõ im juõn ian ro ilo kumi in kajõñjõñ eo aõ ear bar kõmõn eindrein.

Kiõ emwij aõ mare, im kimro lio beleiõ ej jolok enañin aolep ien ko amro ñõn jibõñ ro jet katak kin Baibel eo. Iar lemnok bwe iar bõk elap jinekjij kinke iar katak ñõn ‘liki Jeova kin aolepen buruõ.’

[Naan ko ilo peij]

“Jidrik kin jidrik ear edrek juõn kõnan iba ñõn mour im mõnõnõ.”