Anij Ej ke Ukot An Lemnok?

IKIJEN Anij, Baibel eo ej ba: “Ejjab oktak, im ejjelok marok ilo e.” Im Anij mõke ear kalimur im ba: “Ña ij Iroij im ijjab oktak.” (Jemes 1:​17, UBS; Malkai 3:6) Jeova Anij elap an oktõk jen ro me ebin ñõn ar kabuñburueir im jejjab liki ir kinke ekkã wõt air ukot air lemnok!

Bõtab, jet ian ro rej riit Baibel rej kajitõkin ir mõke elañe Anij ear ukot lemnok eo an. Ñõn wanjoñok, ilo juõn ien Jeova Anij ear kamaroñ dri Kristian ro ñõn kõmõn menin bwilõñ ko, ak kiõ ejjab. Ilo ien ko etto, Anij ear kõtlok an armij ro bõk elõñlok jen juõn beleir, ak kiõ ejoko an kõtlok men in. Iomin Kien Moses, Jeova ear kakien dri Israel ro ñõn kejbãrok ran in Sabat, ak kiõ ejjab. Wãwen kein jilu rejjab kwalok ke bwe Anij ear ukot an lemnok?

Moktata, jemaroñ liki bwe Anij ejamin ukot kien ko an kin yokwe im ekajet jime. Bareinwõt, “bebe eo an jen jinoin” ñõn kejerammõn armij ro ikijen Ailiñ eo an ejañin oktõk. (Dri Epesõs 3:​11) Mekarta, einwõt an maroñ oktõk lemnok eo am kin juõn armij me mwilin ekkã an kaburomõj yuk, eindrein an maroñ oktõk lemnok an Jeova ekkar ñõn wãwen ko rej oktõk.

Anij ej bareinwõt ukot nan in jiroñ ko an ñõn armij ro an ekkar ñõn wãwen ko rej iioni im aikwij ko air. Men in en kar jab kabwilõñ kij. Lemnok mõk kin ta eo juõn dri kaluij emõn enaj kõmõne elañe ej lo juõn men ekauwatata ej ber iman. Enaj kar jiroñ kumi eo an bwe ren bõk bar juõn ial ñõn bõprae ir jen kauwatata eo. Bõtab, ej melelen ke bwe ear ukot lemnok eo an kin jikin eo rej jibareke? Kin men in, jen etale wanjoñok ko jilu kar kwaloki lok iman, me jet rej bwok kaki.

Etke Ejoko Air Kõmõn Menin Bwilõñ Ko?

Etke Anij ear lelok kajur ñõn jet ian dri Kristian ro ilo ran ko an dri jilik ro ñõn kõmõn menin bwilõñ ko? Kwomaroñ jela bwe ke Anij ear kãlet ailiñ in Israel bwe ren armij ro an, ekkã an kar kõmõn menin bwilõñ ko ñõn kalikar bwe ej ber ibeir. Anij ear kajerbal kajur eo an elap ikijen Moses ñõn lomoren dri Israel ro jen Ijipt im tel ir ilujen ene jemaren ñõn jibareklok Enen Kalimur eo. Ekaburomõjmõj bwe elõñ alen dri Israel ro rar jab likit air tõmak ilo E. Ke Jeova ear karmijeteik ailiñ in Israel im kajutõk kumi in dri Kristian ro, ear kamaroñ dri jilik ro im ro jet ñõn kõmõn menin bwilõñ ko. Ñõn wanjoñok, dri jilik Piter im Jon rar kejmour juõn eman eajkupkup an etetal jen ke ear lotak, im Paul ear kemour likao eo ear mij. (Jerbal 3:​2-8; 20:​9-​11) Menin bwilõñ ko rar kõmõni rar jibõñ armij ro ñõn tõmak ilo kabuñ in Kristian ilo elõñ ailiñ ko. Inem etke ejoko air kõmõn menin bwilõñ ko kiõ?

 Dri jilik Paul ear kemelele kin men in ikijen an kajerbal juõn wanjoñok: “Ke I ar ajiri, I ar konono einwõt ajiri, I ar jela einwõt ajiri, I ar lemnok einwõt ajiri: a kiõ bwe I ridto emwij aõ wutik men ko an ajiri.” (1 Dri Korint 13:11) Einwõt an oktõk wãwen eo ro jemen im jinen rej jerbal iben juõn nejiir ajiri edrik jen juõn eo eridto, eindrein an oktõk wãwen eo Jeova ear jerbal iben kumi in dri Kristian ro ke ear joko an “ajiri” ilo kõkkar. Dri jilik Paul ear kemelele bwe menin letok ko rekabwilõñlõñ einwõt maroñ eo ñõn konono ilo kajin ko jet ak ñõn kwalok nan in kanan ko ‘renaj joko.’​—1 Dri Korint 13:8.

Etke Kar Kõtlok an Armij ro Bõk Elõñlok jen Juõn Beleir?

Jisõs ear kwalok bwe Anij ear likit juõn kien kin mour in mare ke Ear jiroñ armij ro ruo jinoin: “Man e naj likit jemen im jinen, im e naj ber iben lio belen: im irro re naj juõn wõt kõniek.” (Matu 19:5) Mour in mare en kar juõn kõtan eto an ber ikõtan leo im lio. Bõtab, ilo ien eo Anij ear karõk bwe dri Israel ro ren erom juõn ailiñ im ear lelok ñõn ir Kien eo ikijen Moses, mõnit eo ñõn bõk elõñlok jen juõn beleir ear erom juõn mõnit ekkã air kõmõne. Kin men in, meñe Anij ear jab kõmõn ak rejañ armij ro ñõn lor mõnit in, ear lelok kien ko ñõn bõprae bwe en jab le jen joñõn air kõmõne. Ke ear jutõk kumi in dri Kristian ro, ilo alikar Nan eo an Anij ear kamoik an armij ro belek elõñlok jen juõn armij.​—1 Timote 3:2.

Ekkar or jet men ko Jeova Anij ear kõtlok bwe ren kõmõni mae ien eo ear jejit ñõn an kajimeiki. (Dri Rom 9:​22-​24) Jisõs ear kwalok bwe iomin jidrik ien Jeova ear kijenmij kin jet mõnit in mare ko rebwir im ‘kamelim’ an dri Israel ro kõmõni, kin an “bin katakin” ir.​—Matu 19:8 UBS; Jabõn Kennan Ko 4:18.

Etke Kien eo kin Ran in Sabat Ear Jab To An Ber?

Anij ear kakien bwe dri Israel ro ren kejbãrok ran in Sabat wik otemjej elikin an kar lomoren ir jen Ijipt. Im tokelik ear kobaiki iben Kien ko jet ear liloki ñõn aolepen ailiñ eo. (Exodus 16:22-​30; 20:​8-​10) Dri jilik Paul ear kemelele bwe Jisõs ear lelok mour eo an mõke einwõt juõn menin katok im “kalotlok . . . kien in kaiñ  eo ilo nan in jiroñ ko” im “jeorilok jeje an kien ko.” (Dri Epesõs 2:​15; Dri Kolosse 2:​14) Men ko kar “kalotlok” im “jeorilok” ear kitibuj kien eo kin ran in Sabat, kinke Baibel eo ej wõnmanlok im ba: “Inem ejelok armij en ekajet kom kin mõña ak irak ak kin ran in kwojkwoj, ak kin aliñ ekal, ak kin ran Sabat.” (Dri Kolosse 2:​16) Inem etke Anij ear kõmõn Kien eo ikijen Moses, ekoba ran in Sabat, ilo jinoin?

Dri jilik Paul ear jeje: “Kien juõn ar dri lale in tel kij ñõn Kraist. . . . A kiõ e mottok tõmak, im emwij ar ber iomin dri lale eo.” (Galetia 3:24, 25) Ijellokin an ukot an lemnok, Anij ear kajerbal ran in Sabat iomin jidrik wõt ien einwõt juõn karõk ñõn katakin armij ro bwe ren bõk ien ñõn kalomõnlokjen kin kien ko an Anij me enaj jelet kõtan eo air iben. Meñe kien eo kin Sabat ear jerbal iomin jidrik wõt ien, ej jitõñlok ñõn ien eo ñe abañ ko armij ro rej jelmae ilo enbwin im tõmak renaj jemlok.​—Dri Hibru 4:10; Reveles̃õn 21:​1-4.

Juõn Anij Jemaroñ Liki im Eor An Yokwe

Wanjoñok ko jen Baibel me kar konono kaki lok iman rej kwalok bwe Jeova Anij ear lelok nan in tel im nan in jiroñ ko reinjuõn jen kar ien ko mokta. Ak ejjab melelen men in bwe ear ukot an lemnok. Jen men in, ear emmakit ekkar ñõn aikwij ko an armij ro an iomin wãwen ko reoktõk rej iioni, im ear kõmõne men in ñõn tokjen eo air. Ejja eindreinlok wõt ranin.

Kinke Jeova ejjab ukot kien ko an, aolep ien jemaroñ jela ta eo jej aikwij kõmõne ñõn kabuñburuen. Bareinwõt, jemaroñ liki bwe aolep kalimur ko an Anij renaj jejit kitieir. Jeova ej ba: “I naj kõmõn aolepen kõnan ko Aõ . . . emwij Aõ bebe kake, I naj bareinwõt kõmõne.”​—Aiseia 46:10, 11.

[Naan ko ilo peij 24]

Anij ejamin ukot kien ko an kin yokwe im ekajet jime

[Naan ko ilo peij 24]

Paul ear kemelele bwe juõn ien, menin letok ko rekabwilõñlõñ renaj “joko”

[Naan ko ilo peij 25]

Mour in mare en kar juõn kõtan eto an ber ikõtan leo im lio