Bethel eo ilo Brooklyn—Bwebwenato eo Iomin 100 Yiõ Ko
Bethel eo ilo Brooklyn—Bwebwenato eo Iomin 100 Yiõ Ko
YIÕ eo 1909 kar juõn ien elukkun aurõk ilo jikin kwelok in New York. Bũrij eo etan Queensboro ear bellok, im ear kõmõn juõn ial ikõtan bukwon ko an Queens im Manhattan. Ilo ejja ien eo wõt, ear bellok bũrij eo etan Manhattan me ear kõmõn bar juõn ial ikõtan Manhattan im Brooklyn.
Ear bareinwõt juõn yiõ elukkun eaurõk iben Dri Kennan ro an Jeova. Jet yiõ ko lok iman, Charles Taze Russell, eo ear lolorjake rolul eo an Dri Kennan ro an Jeova etan Watch Tower Bible and Tract Society, ear kile bwe jerbal in kwalok nan kin nuuj eo emõn kin Ailiñ in Anij emaroñ laplok im jededlok. (Matu 24:14) Ear tõmak bwe buñten ne eo eaurõk ñõn kõtõbrõk men in kar ñõn kamakit ra eo elap jen Pittsburgh, Pennsylvania, ñõn Brooklyn, New York. Rar jino kapojõk ñõn emmakit ilo yiõ eo 1908, im rar emmakit ilo jinoin yiõ eo tok juõn.
Etke Kar Emmakit ñõn Brooklyn?
Ro rar tel jerbal in kwalok nan ilo ien eo rar jela bwe ilo air likit katak ak ennan ko ilo nuuj peba ko, men in ear juõn wãwen ebolemen ñõn kajededlok katak ko remol rej ber ilo Baibel eo. Ilo mol, ilo yiõ eo 1908, 11 ian imõn kõmõn nuuj peba ko rar likit katak ko Russell ear kwaloki jen Baibel eo kajjojo wik ilo nuuj peba ko air, im oran aolep nuuj peba ko kar 402,000.
Bõtab, Russell ear je: “Ro jeer im jãter me rej melele kin wãwen eo rolul in nuuj peba ko rej kajerbal katak ko an dron . . . rej kalimur bwe elañe katak ko kajjojo wik rej walok jen juõn jikin elap, men in emaroñ kõmõn bwe rolul ko ibelakin Amerika ren kajerbal katak ko ilo nuuj peba ko air, im iloan wõt juõn yiõ emaroñ lõñ buki nuuj peba ko renaj keini ear jeje kaki katak ko.” Kin men in, rar jino bukot jikin eo emõntata ñõn kajededlok jerbal in kwalok nan.
Etke rar kãlet Brooklyn? Russell ear ba: “Elikin am kar jar kake men in, kimar bebe bwe Brooklyn New York, enaj jikin eo emõntata kin jerbal in jonikõn eo kin an lõñ armij ro rej jokwe ie . . . im rejela kake einwõt ‘Jikin Kwelok eo Elõñ Kabuñ ko Ie.’” Tokjen ko rar walok rej kalikar bwe men in ear juõn bebe emeletlet. Ilo juõn ien ekaru, kar or 2,000 nuuj peba ko me rar kwalok kin katak ko an Russell.
Ebar or juõn un emõn unin rar kãlet New York. Ilo 1909, kar kajutõk ra ko ilo Great Britain, Germany, im Australia, im ejjabto tokelik ilo elõñ jikin ko jet. Kin men in, ear juõn men emeletlet ñõn kõmõn bwe ra eo elap en ber ilo juõn jikin kwelok me elõñ jikin bo an tima ko ie im bareinwõt elõñ ial ko relap im ial in train ko ñõn jikin ko jet.
Etke Kar Naetan Bethel?
Ra eo mokta an Dri Kennan ro an Jeova (etan Watch Tower Bible and Tract Society) kar kajutõke ilo yiõ eo 1880, ilo Allegheny (kiõ ej mõtõn Pittsburgh), Pennsylvania. Ilo ien eo, kar naetan ra eo Imõn Baibel. Im ilo 1896, kar or 12 uan ro rar jerbal ilo ra in.
Ak ilo 1909, ke kar kamakit ra eo ñõn Brooklyn, rar ukot etan ñõn Bethel. * Etke kar naetan Bethel? Wãto eo me ra eo (Watch Tower Society) ear wiaiki ilo 13-17 Hicks Street, kar an juõn dri tel in kabuñ ebuñbuñ etan Henry Ward Beecher im ear naetan jikin in Beecher Bethel. Ra eo ear bareinwõt wiaiki mweo kar imõn Beecher mokta, ilo 124 Columbia Heights. Buk eo etan Imõniaroñroñ an Maaj 1, 1909 ear ba: “Ej juõn men ekabwilõñlõñ bwe kimar maroñ wiaik mweo etan Beecher Bethel, im bareinwõt ilo jab kõtmene kake kimar bõk mweo kar imõn mokta. . . . Inem mweo ekãl kimij naetan ‘Bethel,’ ak obij eo ekãl im jikin kwelok eo, kimij naetan ‘Imõn Kwelok eo ilo Brooklyn’; ãt kein renaj bõk jikin ãt in ‘Imõn Baibel.’ ”
Ranin, Bethel ej kitibuj jikin jokwe, jikin kõmõn buk ko, im obij ko ilo Brooklyn, Wallkill, im Patterson ilo New York. Ilo mol, ibelakin lõl in eor moko imõn dri jerbal ro ilo Bethel ilo 113 ailiñ ko. Im ilo jikin kein, elõñlok jen 19,000 armij ro rej jerbal ie ñõn jibõñ kajededlok ennan ko jen Baibel eo.
Juõn Karuwainene Emãnãn ñõn Dri Lotok Ro
Kar aje ra eo ilo Brooklyn ilo Jãnwõde 31, 1909. Im kar karõke Mande, Jeptõmba 6, 1909 ñõn karuwaineneik dri lotok ro ñõn air aluije Bethel. Elõñ buki Dri Kennan ro an Jeova rar aluije ra in. Elõñ iair rar kajju tok jen juõn kwelok elap ear walok ilo Saratoga Springs, enañin 200 mail ettolok jen jikin kwelok in New York. Charles Taze Russell ear karuwaineneik dri lotok ro.
Dri lotok ro rej ruwainene wõt ñõn lotok Bethel. Ilo mol, kajjojo yiõ elõñlok jen 40,000 armij ro rej aluije ra eo ilo Brooklyn. Ra eo ilo Brooklyn ej wõnmanlok wõt im kõmõne juõn jerbal eaurõk ñõn kajededlok aolep men ko rej ekkejellok ñõn Ailiñ eo an Jeova, ñõn tokjen eo an elõñ million armij ro.
[Kamelele ko itulal]
^ Nan eo ilo kajin Hibru “Bethel” ej melelen “Imõn Anij.” Ilo Baibel eo, Bethel kar juõn jikin kwelok ebuñbuñ ilo Israel. Ak ekkã wõt an konono kin jikin kwelok in Jerusalem jene.
[Bo̦o̦k/Pija ko ilo peij 17]
Ta Eo Kwojela Kake kin Watch Tower Bible and Tract Society?
Rolul in naetan Watch Tower Bible and Tract Society of Pennsylvania, ãt eo etan mokta ilo 1884 kar, Zion’s Watch Tower Tract Society. Jerbal eo an rolul in ej kajededlok mol eo kin Baibel eo, ikijen air kõmõni buk ko. Ranin Dri Kennan ro an Jeova ilo belakin lõl in rej wõnmanlok wõt im kajerbal rolul in, Watch Tower Bible and Tract Society. *—Dri Pilippai 1:7.
Watch Tower Bible and Tract Society eo ear kõmõni Baibel ko im buk ko me katak ko ie rej berber ion Baibel eo, ilo 473 kajin ko. Kar ukote aolepen ak jimõtõn in Baibel eo Ukok in Lõl eo Ekãl kin Jeje ko Rekwojarjar ilo 72 kajin ko (ejelok ilo kajin Majõl), im rar kõmõne elõñlok jen 150 million copy ko. Ijellokin Baibel in Ukok in Lõl eo Ekãl (ejelok ilo kajin Majõl) rolul in ear kõmõn copy in buk kein ak ear kamelim jikin kõmõn buk ko jet bwe ren kõmõni Baibel kein, ilo kajin English, einwõt: American Standard Version, The Bible in Living English, The Emphatic Diaglott, Holman’s Linear Parallel Edition, the King James Version (ekoba Bible Students Edition), im The New Testament Newly Translated and Critically Emphasized, Second Edition.
Ijellokin wõt air kõmõni Baibel kein, iomin joñoul yiõ ko remotlok, Dri Kennan ro an Jeova rar bareinwõt kõmõn elõñlok jen 20 billion kein katak ko jet me rej wawa ion Baibel, einwõt buk ko, Imõniaroñroñ, Ruj! (ejelok ilo kajin Majõl), track ko, CD, DVD ko, im buk ko jet me rej berber ion Baibel. * Enañin aolep men kein rej kõmõni ilo ra ko an Dri Kennan ro an Jeova, ilo ailiñ kein, Argentina, Australia, Brazil, Britain, Canada, Colombia, Finland, Germany, India, Italy, Japan, Korea, Mexico, Myanmar, Nigeria, Philippines, South Africa, Spain, im United States.
[Kamelele ko itulal]
^ Ilo 2008, ear or 7,124,443 Dri Kennan ro an Jeova ilo 236 ailiñ ko. Rej ber ilo 103,267 congregation ko.
^ Rejjab wiakake men kein aolep. Jabawõt ko rej jibõñ Dri Kennan ro an Jeova ilo air katakin armij ro kin Baibel eo.
[Jaat]
MEN KO RAR KÕMÕNI JEN
1998-2008
Buk ko
458,230,708
Magazine ko
11,292,413,199
Tract ko
7,996,906,376
Brochure ko
862,050,233
CD/MP3 ko
34,621,130
DVD ko
13,500,125
Men ko jet
129,083,031
Koba Aolep
20,786,804,802
[Pija eo ilo peij 14]
Katak ko an Russell ilo nuuj peba
[Pija eo ilo peij 14]
Mõn jokwe an dri jerbal ro ilo Bethel 122-124 Columbia Heights
[Pija eo ilo peij 14]
13-17 Hicks Street (1909-1918)
[Pija eo ilo peij 15]
18 Concord Street (1922-1927)
[Pija eo ilo peij 15]
117 Adams Street (1927 tok ñõn ranin)
[Pija ko ilo peij 14, 15]
35 Myrtle Avenue (1920-1922)
[Pija ko ilo peij 16]
Jikin kõmõn buk ko ilo Wallkill
[Pija eo ilo peij 16]
Patterson Educational Center
[Pija eo ilo peij 17]
[Pija eo ilo peij 16]
25-30 Columbia Heights