Ij Lo Lõñliñ Meñe Eor Utame ko ilo Enbwiniõ

Ekkar ñõn Paulette Gaspar

Meñe kar jiljino paun erroũ ke iar lotak, taktõ eo ear kile bwe ear or juõn nañinmij elap iba. Ke iar lotak, jet ian dri ko driõ rar bwilok, kinke nañinmij eo iar bõke ear kõmõn bwe en ub dri ko driõ. Kin men in rar mõkõj im bõklok ña bwe in mijmij, bõtab taktõ ro rar jab kõtmene bwe inaj mour, ilo mol rar bõk lemnok eo bwe inaj mij iloan wõt 24 auõ.

IAR lotak ilo capital eo an Australia etan Canberra, ilo Juun 14, 1972. Ilo air jab kõtmene kake, iar maroñ mour manlok ñõn ran eo juõn, bõtab iar bõk nañinmij in pneumonia. Kinke rar lemnok bwe inaj kar mij, taktõ ro rar jab letok jabrewõt uno ak kõmõn jabrewõt men ñõn kaitoklok aõ mour. Meñe eindrein, iar mour wõt.

Ijela bwe emaroñ kar lukkun bin ñõn jinõ im jema ilo ien eo. Kin air lemnok bwe ejamin to aõ mour, dri jerbal ro ilo aujpitõl rar rejañ jinõ im jema bwe en jab lap air yokwe iõ. Ilo mol, iomin aliñ ko jilu elikin wõt aõ lotak, ear jab melim an jinõ im jema jibwe iõ. Ear lukkun kauwatata air jibwe iõ kinke ebiruru an bwilok dri ko driõ. Ke ear alikar bwe inaj mour wõt, taktõ ro rar rejañ jinõ im jema ñõn kadreloñ iõ ilo mweo imõn ajiri ro eor air utame ilo enbwin.

Bõtab, jinõ im jema rar beek ñõn bõklok iõ ñõn mweo. Kinke jinõ ej kab jino katak Baibel iben Dri Kennan ro an Jeova, men ko ear katak kaki rar kalaplok an kile erro eo an ñõn kejbãrok iõ. Bõtab emaroñ kar bin ñõn an druaktok ñõn iõ kinke ear kajerbal aolepen kajur im iñjake ko an ñõn an lale iõ. Ke rar katutu iõ ak elañe ij maje emaroñ bwilok dri ko driõ, eñin unin ear ikutkut air bõklok iõ ñõn aujpitõl.

Iar Jino Bõk Nañinmij in Buromõj

Ke iar ridtolok, ien otemjej iar aikwij kajerbal waan bwilbwil eo aõ (wheelchair) kinke iar jab maroñ etetal. Meñe ear bin, ear emõn an jinõ im jema lale aikwij ko aõ ilo kõniek.

Bareinwõt, jinõ ear kajeoñ joñõn wõt an maroñ ñõn katakin iõ kin ennan ko rekainemõn jen Baibel eo. Ñõn wanjoñok, ear katakin iõ bwe ilo ien ko rej berotok, Anij enaj kõmõn bwe lõl in en erom juõn paredais im aolep armij ro renaj lõñliñ kin ejmour ewãppen ilo enbwin, lemnok, im renaj lõñliñ kin juõn kõtan ewãppen iben Anij. (Sam 37:10, 11; Aiseia 33:24) Bõtab, jinõ ear ba bwe ebin an maroñ pijaik aõ ber ilo juõn wãwen mour emõn mae ien eo Anij enaj kõmõn bwe lõl en erom juõn paredais.

 Ilo jinoin, iar ber ilo juõn jikuul me ej ñõn ajiri ro eor air utame ilo enbwin. Dri kaki ro aõ rar jab likit jabrewõt mejenkajik ko imaõ, im iar jab kõmõne men in bareinwõt. Ilo mol, ear lukkun bin aõ kijenmij im berwõt ilo jikuul. Elõñ ajiri ro rar lukkun lej ñõn iõ. Tokelik, iar dreloñ ilo juõn jikuul me ej ñõn ajiri ro ejelok air utame. Iar lo bwe ñõn an emõn aõ kõmõn ñõn ro jet, men in ear kitibuj aolepen aõ kajur, iñjake, im lemnok. Mekarta, iar beek bwe in kamwij aõ class 12.

Elaptata ilo ien eo iar ber ilo high school, iar lemnok kin joñõn an ejelok tokjen men ko dri jikuul ro rej kõmõni. Iar bareinwõt lemnok kin men ko jinõ ear katakin iõ kaki jen Baibel eo. Ilo lemnok eo aõ, iar jela bwe emol nan ko ear jiroñ iõ kaki. Bõtab ilo ien eo, katak ko rar jab tõbar buruõ. Iomin jet ien, iar bebe ñõn kobrõk mour eo aõ kin men ko re limo im rekamõnõnõ, im ear ejelok aõ lemnok kin ilju im jeklaj.

Ke ear 18 aõ yiõ, iar emmakit jen mweo imõn jinõ im jema ñõn iben juõn kumi in armij ro im eor air utame ilo enbwinir. Iar lo bwe men in ear juõn men ekamõnõnõ im bareinwõt ekamijak. Mour eo aõ ear lap an limo kinke ear lõñlok men ko iar anemkwoj in kõmõni, elõñlok men ko iar maroñ mõke bebe kaki, im elõñ ro mõta iar maroñ kõmao ibeir. Kinke elõñ ian ro mõta emwij air kar mare, ear bareinwõt or juõn kõnan ekajur iba ñõn belele im bwe en or juõn eo ej yokwe iõ. Bõtab kin utame ko ilo enbwiniõ, ear jab biruru ñõn aõ bukot juõn beleiõ, im men in ear kõmõn aõ buromõj.

Bõtab, iar jab naruõn Anij kin men ko rar walok ñõn iõ. Ebwe aõ kar katak kin Anij ñõn jela bwe ejamin kõmõn jabrewõt men ejjab jime. (Job 34:10) Meñe iar kajeoñ in juburu kin wãwen mour eo aõ, iar bõk juõn nañinmij in buromõj elap.

Jidrik kin Jidrik Ear Emõnlok Aõ Mour

Ij kamolol bwe jinõ ear jela kin wãwen eo iar iione im ear kejelaik juõn elder ilo congregation eo me ej jokwe ebak ñõn jikin eo ij jokwe ie. Elder eo ear telephone tok ñõn kir iõ ñõn ber ilo kwelok ko ilo mõn kwelok eo an Dri Kennan ro an Jeova ilo bukwon eo. Bareinwõt, juõn kõra ilo congregation eo ear jino katak Baibel iba kajjojo wik.

Ke iar katak im kememejlok men ko jinõ ear katakin iõ kaki elõñ yiõ ko remotlok, lemnok eo aõ kin mour ear emõnlok. Iar mõnõnõ in kõmao iben dri Kristian ro mõta. Bõtab, iar katak ñõn noj im jab konono kin iñjake ko aõ kinke iar jab kõnan bwe jabrewõt en kõmetak buruõ. Ij lemnok bwe men in ear kõmõn bwe en bin aõ ejaak juõn yokwe emulõl ñõn Anij. Meñe eindrein, iar jela bwe ejime ñõn aõ wujleplok aõ mour ñõn e. Kin men in iar baptais ilo Tijemba 1991 ñõn kalikar bwe iar wujleplok mour eo aõ ñõn Anij.

Iar emmakit jen mweo iar jokwe ie iben dri nañinmij ro mõta im kiõ ij mõke iaõ ilo juõn apartment. Oktõk in ear bõktok elõñ tokjen ko im bareinwõt abañ ko. Ñõn wanjoñok, iar lukkun buromõj kin aõ mõke iaõ im mijõk ñe dri nana ro renaj dreloñtok ñõn mweo. Ejjabto iar bar bõk nañinmij in buromõj elap. Meñe iar ettõñdikdik im mõnõnõ, ilo mol ear jab emõn aõ mour. Iar lukkun aikwij juõn mõta emõn im imaroñ liki.

Ij kile bwe Jeova ear letok juõn mõta einwõt in. Elder ro ilo congregation eo rar karõk bwe juõn kõra dri belele etan, Suzie en wõnmanlok im katak Baibel iba. Suzie ear jab baj juõn eo ej katak Baibel iba ak ear erom juõn mõta ilukkun ebake im elap aõ yokwe.

Suzie ear katakin iõ kilen kwalok kin men ko iar katak kaki ñõn ro jet ilo jerbal in kwalok nan jen mweo ñõn mweo im ilo jabrewõt  ien emõntok. Kiõ elaplok aõ kamolol kin karkar ko karkarin Anij. Bõtab, meñe emwij aõ kar baptais, ijañin kar ejaak juõn yokwe emulõl ñõn Anij. Juõn ien, iar lemnok in bwijrõk jen aõ korijer ñõn e. Iar kwalok lemnok in aõ ñõn Suzie, im ear jibõñ iõ kamarmire abañ in.

Suzie ear bareinwõt jibõñ iõ ñõn kile bwe unin aõ jab mõnõnõ ej kin aõ kobalok iben ro me ejjab lap air yokwe Jeova. Kin men in, iar jino kobalok iben ro rekajur ilo tõmak, elaptata iben ro reridto. Bareinwõt, kõtan eo aõ iben jinõ ear jab lukkun emõn; kin men in, iar jino kakõmõnmõnlok kõtan eo aõ iben im bareinwõt iben leo jeiõ. Iar bwilõñ bwe joñõn mõnõnõ in ij iñjake kiõ ijañin kar iñjake mokta. Ro jeiõ im jãtiõ ilo congregation eo, baamle eo aõ, im elaptata Jeova, rej unjen aõ lo lõñliñ im ñõn bõk kajur.​—Sam 28:7.

Juõn Jerbal Ekãl

Elikin aõ ber ilo juõn kwelok elap ijo iar roñ juõn katak me ear kwalok kin lõñliñ ko ro im rej kajerbal enañin aolepen ien ko air ñõn kwalok nan rej iioni, iar lemnok iba mõke, ‘Imaroñ kõmõne men in!’ Emol, iar kile bwe enaj kar lukkun bin ñõn aõ kõmõne men in. Bõtab elikin aõ jar kin men in, iar bebe ñõn kadreloñ peba eo ej kalikar bwe ikõnan kajerbal enañin aolepen ien ko aõ ñõn katakin armij ro kin Baibel eo, im iar jino kõmõne jerbal in ilo Eprõl 1998.

Ewi wãwen aõ bõk kwonaõ ilo jerbal in kwalok nan ke eor aõ utame ilo enbwin? Kinke ekkã aõ kõnan bwe in mõke kõmõni men ko, ejjab emõn iba ñe ij aikwij atartar ion ro jet ñõn ektak iõ ak jibõñ iõ ilo wãwen ko jet. Kin men in, Suzie im leo iben, Michael, rar rejañ iõ bwe in wiaik juõn wõtbai. Ak ewi wãwen imaroñ uwe ion juõn wõtbai? Einwõt an pija eo kwalok, kar kõmõne wõtbai eo waõ ekkar ñõn aikwij eo aõ inem ijjab aikwij emmakit jen waan bwilbwil eo aõ!

Kinke eor kiõ waõ wõtbai, imaroñ lolok armij ro im katak Baibel ibeir ilo ien ko rebellok ñõn ir im ñõn ña. Elukkun emõn iba kattõre wõtbai eo waõ im aõ iñjake an elarikrik tok!

Ij mõnõnõ in bwebwenato iben armij ro iturin ial ko, me enañin aolepeir rej kwalok air joij im koutiej iõ. Im ij lo lõñliñ ilo aõ jibõñ ro jet ñõn katak Baibel eo. Ij kememej juõn ien ke iar kwalok nan, im eo mõta ear lukkun aitok. Leo mõta ear yokyokwe dri mweo me ear lap an lokjenan kin ña, inem ear kajitõk iben, “Lio ejela ke kennan?” Kimro ar lukkun ettõñ. Ke ear mwij aõ kwalok nan ñõn kõra eo, ear jela bwe emol imaroñ kennan!

Ij mõnõnõ in mour kiõ im iar katak ñõn yokwe Jeova Anij. Elap aõ kamolol jinõ kin an kar katakin iõ mol ko jen Baibel eo, im ilo liki ij reimanlok ñõn ien eo ñe Anij enaj ‘kõmõn men otemjej bwe ren kãl,’ ekoba enbwiniõ.​—Reveles̃õn 21:​4, 5.

[Naan ko ilo peij 19]

“Meñe iar kajeoñ in juburu kin wãwen mour eo aõ, iar bõk juõn nañinmij in buromõj elap”