Katakin Ajiri ro Nejõm

Joash Ear Ilok jen Jeova kin Kõmao ko Renana

EAR juõn ien ekanuij nana ilo Jerusalem, jikin kwelok eo me tempel eo an Anij ear ber ie. Ej kab mwij air mõn kiñ Ehazaia. Jejjab maroñ tõmak kin men ko jinen Ehazaia, Atalaia ear kõmõni. Ear kõmõn bwe ren mõn ladrik ro nejin Ehazaia, ajiri ro jibwin mõke! Kwoj jela ke taunin?— * Bwe en maroñ iroij im jab jabrewõt iair.

Bõtab, juõn ian ladrik ro jibwin Atalaia, niñniñ eo etan Joash kar lomoren e im jibwin ear jab jela kake ñõn jidrik. Kwo kõnan ke jela ewi wãwen kar lomoren e?​— Eokwe, lio jãtin jemen Joash etan Jihosheba ear noje ilo tempel eo an Anij. Ear maroñ kõmõn men in kinke leo belen etan Jihoiada ear juõn Pris Elap. Inem irro jimor rar kejbãrok bwe en ejelok jorran en walok ñõn e.

Iomin jiljino yiõ ko, rar noje Joash iloan tempel eo. Ilo ijo kar katakin e kin aolep men ko kin Jeova Anij im kien ko an. Eliktata, ke Joash ear tõbar jiljilimjuõn yiõ ridtõn, Jihoiada ear kõmõn bwe Joash en kiñ. Kwo kõnan ke roñ kin ewi wãwen Jihoiada ear kõmõne men in im ta eo ear walok ñõn jibwin Joash, Leroij eo enana Atalaia?​—

Eokwe, ilo ittino Jihoiada ear kirtok dri lale ro an kar kiñ ro ilo Jerusalem ilo tõre eo. Ear ba ñõn ir kin wãwen irro lio belen rar lomoren niñniñ eo nejin Kiñ Ehazaia. Inem Jihoiada ear kwalok Joash ñõn dri lale ro, im rar kile bwe e eo ej tellokin iroij. Inem rar bebe kin ta eo renaj kar kõmõne.

Jihoiada ear kadrioijtok Joash im likit kraun eo ion bõran. Ilo ien in, armij ro rar kabbokbok im ba: “Kiñ en mour wõt!” Dri lale ro rar kabole Joash bwe ren kejbãrok e. Eokwe, ke Atalaia ear roñ an armij ro lõñliñ, ear kaiurlok ñõn ibeir im lamij im ba bwe rej jumae. Bõtab Jihoiada ear jiroñ dri lale ro bwe ren bõk Atalaia im mõn e.​—2 Kiñ Ro 11:1-​16.

Kwoj lemnok ke bwe Joash ear wõnmanlok wõt im roñjake Jihoiada im kõmõni men ko rejime?​— Ear kõmõn eindrein toõn wõt an kar Jihoiada  mour. Joash ear kõmõn bwe armij ro ren lelok mõnni ko ñõn kõkãl tempel eo an Anij, me Ehazaia, jemen im Joram, jiman, rar kejekrone. Bõtab jen lale ta eo ear walok ke Jihoiada, Pris eo Elap, ear mij.​—2 Kiñ Ro 12:​1-​16.

Ilo tõre in Joash ear 40 yiõ ridtõn. Jen an kar wõnmanlok im kõmao iben ro rej korijer ñõn Jeova, Joash ear jeraik ro me rar kabuñ ñõn anij wan ko. Leo nejin Jihoiada etan Zakeraia, ear pris eo an Jeova ilo tõre in. Ta eo kwoj lemnok Zakeraia ear kõmõne ke ear roñ kin men ko renana Joash ear kiõ kõmõni?​—

Zakeraia ear ba ñõn Joash im armij ro: “Kin ami illok jen Jeova, ear bareinwõt illok jen kom.” Nan kein rar lukkun kaillu Joash im ear kakien bwe ren kare Zakeraia kin dreka ñõn mij. Baj lemnok mõk, kar lomoren Joash jen juõn ear kõnan mõn e, ak kiõ ear kõmõn bwe ren mõn Zakeraia!​—2 Kronikel 24:​1-3, 15-​22.

Kwoj lo ke men ko jemaroñ katak jen bwebwenato in?​— Eokwe, jejjab kõnan einwõt Atalaia, me ear lukkun lej im nana. Ijellokin, jej aikwij yokwe dri kabuñ ro mõtar im bareinwõt dri kijirãt ro ar, einwõt Jisõs ear katakin kij bwe jen kõmõne. (Matu 5:​44; Jon 13:34, 35) Im kememej, elañe jej jino kõmõn emõn, einwõt kar Joash, jej aikwij wõnmanlok wõt im kõmõn emõn im jeraik ro rej yokwe Jeova im rej rejañ kij ñõn korijer ñõn e.

[Kamelele ko itulal]

Kajitõk ko:

○ Ewi wãwen kar lomoren Joash, im kar lomoren e jen wõn?

○ Ewi wãwen Joash ear tellokin bwe en kiñ, im ta men ko remõn ear kõmõni?

○ Etke Joash ear oktõk im nana, im wõn eo ear kakien bwe ren mõne?

○ Ta men ko jemaroñ katak jen bwebwenato in ilo Baibel eo?

[Pija eo ilo peij 9]

Kar lomoren Joash