Wãwen eo Kwomaroñ Melele Baibel Eo

 1. Kajitõk Iben Anij kin Jibõñ

Ninfa, eo ej jokwe ilo Italy, ej ba: “Ear or juõn ien iar riiti Baibel eo mokta jen aõ kiki. Iar kõmõne men in kinke iar jela bwe ej Nan eo an Anij, im meñe ejjab emõn riit iba, iar kõnan jela ta eo Anij ear je ilo Baibel eo. Iar lemnok in riiti aolepen. Ilo jinoin iar lo bwe ear biruru ñõn aõ melele, ak tokelik iar tõbar bwebwenato ko me rebin, im iar bwijrõk jen aõ riiti.”

ELÕÑ armij remaroñ melele kin iñjake eo an Ninfa kinke rar mõke iione. Bõtab, einwõt ar kar lo ilo katak eo lok juõn, Jeova Anij ekõnan bwe kwon melele Nan eo an. Inem, ewi wãwen kwomaroñ melele kake? Men eo moktata kwoj aikwij kõmõne ej kajitõk iben Anij kin jibõñ.

Kar watõk dri jilik ro an Jisõs einwõt “dri jab katak im dri jab meletlet” kinke rar jab ber ilo jikuul ko ñõn bõk katak kin kabuñ. (Jerbal 4:​13) Bõtab, Jisõs ear kalimur bwe renaj maroñ melele kin Nan eo an Anij. Ewi wãwen? Jisõs ear kemelele: “Dri Kainemõn, E Jitõb Kwojarjar, Eo Jema e naj jilkintok ilo eta, E naj katakin kom men otemjej.” (Jon 14:26) Anij ear kajerbal jitõb kwojarjar in, ak kajur eo ej jerbal, ñõn kõmõnmõn lõl in im aolep men ko remour ion. (Jenesis 1:2) Ear bareinwõt kajerbale ñõn kakõrmole enañin 40 armij ro ñõn air je lemnok ko an ilo Baibel eo. (2 Piter 1:​20, 21) Ej ber ejja jitõb in wõt ñõn jibõñ ro me rekõnan melele Baibel eo.

Ewi wãwen kwomaroñ bõk jitõb kwojarjar eo an Anij? Kwoj aikwij kajitõk kake ilo tõmak. Ilo mol, kwoj aikwij jab bwijrõk jen am kajitõk kake. Jisõs ear ba: “Kajitõk, im naj lewoj ñõn kom.” Im ear wõnmanlok im ba: “Elañe . . . kom jela kijkan lelok men ko remõn ñõn ro nejemi; ta, e jamin lap an Jememiuij i lõñ lelok Jitõb Kwojarjar ñõn ro otemjej rej kajitõk iben ke?” (Luk 11:​9, 13) Jeova ej mõnõnõ in lelok jitõb kwojarjar eo an ñõn ro emol air kajitõk kake. Kajur in ej jerbal emaroñ jibõñ yuk ñõn melele kin ta melelen nan ko rekakõrmol ilo Baibel eo kar je elõñ tausan yiõ ko remotlok. Bareinwõt, jitõb eo an Anij emaroñ jibõñ yuk ñõn jela kin wãwen eo kwomaroñ jerbale ennan ko rekajur ilo Baibel eo ilo mour eo am.​—Dri Hibru 4:​12; Jemes 1:​5, 6.

Inem, kajjojo ien kwoj jijõt im riiti Baibel eo, jar ñõn Anij im kajitõk bwe jitõb kwojarjar eo an en jibõñ yuk ñõn melele kin Nan eo an.