Jemaroñ ke Melele Baibel Eo?

“Baamle eo aõ ekin riit Baibel eo aolep Jabõt, ak ear jab lap aõ mõnõnõ in kõmõne. Iar tõmak bwe Baibel eo ej Nan eo an Anij, ak enañin aolep men ko iar riiti ear bin aõ melele kaki.”​—Steven, Britain.

“Ke ear 17 aõ yiõ, iar kajeoñ in riiti Baibel eo ak iar lo bwe ear bin aõ melele, kin men in iar bwijrõk.”​—Valvanera, Spain.

“Iar riiti Baibel eo juõn alen kinke iar lemnok bwe kin aõ ber ilo kabuñ in Catholic, iar aikwij in riiti. Ear bõk jilu yiõ ko in aõ riiti aolepen Baibel eo! Bõtab kar jidrik wõt aõ kar melele.” —Jo-Anne, Australia.

BAIBEL eo ej buk eo ebuñbuñtata ilo lõl in. Ej wõnmanlok einwõt buk eo elap an armij ro wiaiki jen buk ko jet, ej bellok ñõn elõñlok armij ro, ilo elõñlok kajin ko, im ej walok ilo elõñlok wãwen ko ijellokin baj ilo jeje. Bõtab, elõñ ro me eor air Baibel rej lo bwe ebin ñõn air melele kake. Ej eindrein ke ibõm?

Anij Ekõnan ke bwe Jen Melele kin Nan ko An?

Baibel eo ej ba, “Jeje ko otemjej emwij letok kin kakõrmol an Anij.” (2 Timote 3:​16) Aet, Jeova Anij ear letok ñõn kij Baibel eo. Ekõnan ke bwe aolep ren melele kin Nan ko an? Ak ear ke kõmõne Baibel eo bwe jejjo wõt ren melele kake, einwõt dri tel ro an kabuñ ko im dri meletlet ro kin Baibel eo?

Jen etale eon kein jen Baibel eo:

“Kien in ij jiroñ yuk kake ranin, e jab bin jen kwe, im e jab etolok.”​—Duteronomi 30:11.

“Kebellok Am in nan ej kamaramlok, ej lelok jelalokjen ñõn ro re jab kanuij meletlet.”​—Sam 119:130.

“Ilo auõ eo Jisõs ej lõñliñ ilo Jitõb Kwojarjar, im ba, Kom mol, O Jema, Iroij in lõñ im lõl, bwe Kw’ar noj men kein jen dri meletlet im dri jelalokjen, im Kw’ar kwaloki ñõn niñniñ ro; aet, O Jema, bwe emõn ein drein iman mejõm.”​—Luk 10:21.

Emol, Anij ekõnan bwe kwon melele Nan ko an! Bõtab, meñe Anij ekõnan bwe armij ro ren melele kin Nan ko an, elõñ rej lo bwe ebin ñõn air melele kaki. Ta eo emaroñ jibõñ? Katak ko tok iman renaj kwalok jilu wãwen ko remaroñ jibõñ yuk ñõn melele kin Baibel eo.