Jeramel Ej Kakõlen ke an Anij Jab Buñburuen?

ANIJ ear jiroñ dri Israel ro: “E naj ejelok dri jeramel ibõm.” Unin ej kinke ilo Kien eo ear lelok ñõn ir, ear or kakien ko kin wãwen lale ro rejeramel im bareinwõt ñõn jeorlok muri ko. (Duteronomi 15:​1-4, 7-​10) Kin men in, en kar ejelok armij ro rejeramel ibwiljin dri Israel ro kinke Jeova ear kalimur bwe enaj kejerammõn ir. Bõtab, an kejerammõn ir ear wawa wõt ion air bokake Kien eo me dri Israel ro rar likjõp in bokake.

Bõtab, ejjab melelen men in bwe Anij ear jab buñburuen iben ro me ear drik mweiuk ko ibeir, bareinwõt ejjab melelen bwe ear buñburuen iben ro elõñ mweiuk ko ibeir. Elõñ ian dri korijer ro retiljek an Jeova rar jeramel. Dri kanan Emõs ear juõn dri lale s̃ip im dri kallip ejeramel. (Emõs 1:⁠1; 7:​14, UBS) Ilo ran ko an dri kanan Ilaija, ke ear walok juõn ñitta ilo Israel, Ilaija ear aikwij atartar wõt ion joij eo an juõn kõra ejeramel im ejoko belen, me ilo kabwilõñlõñ nien bilawã im oil eo an ear jab driklok kobõn ilo ien ñitta eo. Ilaija im kõra eo ejoko belen jimor rar jab erom ro remweie; Jeova ear kabwe wõt ekkar ñõn aikwij ko air.​—1 Kiñ Ro 17:​8-​16.

Men ko rej walok ilo jidimkij remaroñ kõmõn bwe armij ro ren kajju jeramel ilo ejelok kõtõmene kake. Lanwõtwõt ko im nañinmij ko remaroñ kautameik armij ro bwe ren jerbal iomin jidrik wõt ien ak joko air jerbal. Im mij emaroñ kõmõn bwe ro ratajinemjen im kõra ro ejoko beleir ren jol. Meñe wãwen kein rekaburomõjmõj rej walok, ejjab kakõlen an Anij jab buñburuen. Bwebwenato eo kin Neomai im Rut ej juõn wanjoñok ekõkãtõk kin wãwen Jeova ear wõnake ro dri jeramel ilo yokwe. Meñe Neomai im Rut rar lukkun jerata kin an kar mij lõmaro beleir, Jeova Anij ear kejerammõn ir im kabwe aikwij ko air.​—Rut 1:​1-6; 2:​2-​12; 4:⁠13-​17.

Alikar, jeramel ejjab juõn kakõlen an Anij jab buñburuen. Ro me rej tiljek ñõn Jeova Anij remaroñ liki nan ko an Kiñ Devid: “I kar ajiri im kiõ I lõlap, a I jañin lo dri’mõn ke r’ar illok jen e, ak inen ke r’ar oor kijeir.”​—Sam 37:25.

[Pija eo ilo peij 23]

Meñe Neomai im Rut rar jeramel im jerata, Anij ear kejerammõn im wõnake ir ilo yokwe