Juõn Dri Karek ilo Baamle Eo

“Mõntin ekarekrek ej kitibuj dri karek ro . . . Meñe eor juõn wõt dri karek ilo baamle eo, men in ejjab jelet wõt e ak ej bareinwõt jelet aolepen baamle eo an.”—Dr. Vernon E. Johnson.

ALICE, lailim yiõ drettan, ear iñtan kin an lukkun metõk neen ke ej babu ilo men eo kinien. Ruo ran moktalok ear walok juõn jorran ñõn e, kin men in kar aikwij in likit kein kabeb ñõn neen. Ak kin an lukkun kankan kein kabeb eo ñõn neen, ear kõmõn an ebbõj neen. Alice ear jõñ im akwelap ñõn jemen im jinen bwe ren bõklok e ñõn taktõ, ak jemen ear jab emõn an mour kin an kar karek, im jinen ejaje wõn eo iairro elap an aikwiji jibõñ.

Jet ran tokelik, Alice ear iñjake an mij neen. Ke ear jino toor dren wan jen arrin neen, jemen im jinen rar mõkõj im bõklok e ñõn hospital. Ke rar tũmi kein kabeb eo, juõn ian nõj ro ear lõtlok ke ear lo joñõn jorran eo ear walok ñõn neen. Rar aikwij mwijiti neen kin an kar kõt.

Dri Karek eo im Eo Rejetan Me Ej Ber Wõt Iben Meñe Ejjab Mõnõnõ

Abañ in ear walok ear jab baj wõt kin an luji neen. Jemen Alice ear juõn dri karek, kin men in ear joko ilo ien ko ke Alice ear lukkun aikwiji. Juõn dri kakabilek etan, Toby Rice Drews, ear ba: “Irak drenin karek le jen joñõn ekkã an kõmõn bwe dri karek eo en likit drenin karek moktata jen baamle eo an.”

Ak ta kin jinen Alice? Meñe ejjab e dri karek ak elap an atartar ion dri karek eo belen. Ekkã an eo ejjab irak drenin karek jolok elap ien ñõn kajeoñ kabwijrõk eo belen jen an karek ak kajeoñ jela kijenmij ilo an mour iben meñe ejjab lukkun jela ta eo leo belen enaj kõmõne. Kin an lap an mar kin abañ ko an dri karek eo, ear jino kwalok ejja karkar ko wõt an juõn dri karek. Kin men in, armij ro einwõt jinen Alice rej lukkun atartar ion dri karek ro beleir meñe rejelã bwe ejjab emõn men ko rej kõmõni.

Dri karek eo im eo rejetan me ej ber wõt iben meñe ejjab mõnõnõ, ilo air jab jela kake rej einwõt dri kamakoko ñõn bar juõn men. Rejjab kõnan kile bwe eor abañ ilo baamle eo. Irro jimor rejjab kile bwe ro nejiir rej aikwiji jibõñ. Elap an kabwokbwok mour eo airro, bwe einwõt an dri karek eo jaje kilen jadõr kin drenin karek, eindrein eo rejetan ejjab maroñ kamarmire dri karek eo belen, im irro jimor rejjab kile ewi joñõn an abañ in maroñ jelet ajiri ro nejiir.

Bõtab eor jibõñ ñõn dri karek eo im baamle eo an. Jenaj etale men in ilo katak kein tok iman. *

[Kamelele eo itulal]