Ro Rej Riiti Buk ko Ar Rej Kajitõk

Dri Kennan ro an Jeova rej ke Juõn Kabuñ in Protestant?

Dri Kennan ro an Jeova rejjab watõk ir einwõt juõn kabuñ in Protestant. Etke?

Katak ko an kabuñ eo an Protestant rar jino ejaak enañin 500 yiõ ko remotlok ilo Europe ñõn kajeoñ ukot kabuñ in Catholic. Ilo juõn kwelok elap ilo jikin eo etan Speyer ilo yiõ eo 1529, nan eo “Protestant” kar mokta jitõñlok ñõn ro im rar lor Martin Luther. Jen ien eo mantak, nan in ej jerbal ñõn aolep ro rej lor katak im mejenkajik ko an kumi eo ear kõnan kõmõn oktõk ko ilo kabuñ in Catholic. Kin men in, juõn tikjinere * ej kemelele bwe dri Protestant ro rej ber ilo jabrewõt kabuñ ko me rejjab tõmak bwe eor an Bata eo elap (Pope) maroñ ion aolepen lõl ak rej lor katak ko me rar walok ilo ien eo rar ilok jen kabuñ in Catholic, einwõt katak eo bwe tõmak wõt emaroñ kõmõn bwe juõn en bõk buñburu eo an Anij, bwe aolep dri tõmak ro rej pris ro, im Baibel eo wõt ej unjen mol eo.

Meñe Dri Kennan ro an Jeova rejjab tõmak bwe eor an Bata eo elap maroñ ion aolepen lõl im rej lukkun tõmak bwe Baibel eo ej buk eo eaurõktata, ak rej oktõk jen kabuñ ko an Protestant ilo elõñ wãwen ko relap. Ilo mol, juõn encyclopedia kin kabuñ ej kwalok kin Dri Kennan ro an Jeova einwõt ro me “reinjuõn.” Jen lale jilu wãwen ko rej kalikar air lukkun oktõk.

Ken kajuõn, meñe kabuñ ko an Protestant rar karmijete jet ian tõmak ko an kabuñ in Catholic, dri tel ro me rar kõmõn oktõk ko ilo kabuñ in Catholic rar drebij wõt jet ian katak ko air, einwõt jilu anij ilo juõn (Trinity), kijeek ilo hell, im bwe eor juõn an eban mij. Bõtab, Dri Kennan ro an Jeova rej tõmak bwe katak kein rej jumae Baibel eo im kowõnmanlok juõn lemnok ejjab jime kin Anij.​—Lale peij 4-7 ilo magazine in.

Ken karuo, kabuñ eo me Dri Kennan ro an Jeova rej kowõnmanloke ej juõn eo ej lelok nan in tel ko remõn, im ejjab ñõn baj jumae wõt kabuñ ko. Rej bõk ñõn burueir nan in kakabilek in ilo Baibel: “Dri korijeran Iroij, en jab akwail, a en joij ñõn armij otemjej im pojõk in katakin armij, en meanwõr, ilo inemõn en kajime ro rej jumae.” (2 Timote 2:​24, 25) Emol, Dri Kennan ro an Jeova rej kwalok kin oktõk ko ikõtan ta eo Baibel ej ba im ta eo elõñ kabuñ ko rej katakin kake. Ak, mejenkajik eo air ejjab ñõn kõmõn oktõk ko ilo kabuñ ko jet. Jen men in, mejenkajik eo air ej ñõn jibõñ kajjojo ro emol burueir ñõn air bõk jelalokjen eo emol kin Anij im Nan eo an, Baibel eo. (Dri Kolosse 1:​9, 10) Ñe armij ro me eoktõk tõmak eo air rej wõnmanlok wõt im jab errã ibeir, Dri Kennan ro an Jeova rej kejbãrok bwe ren jab bõk kwonair ilo akwail ko me ejelok tokjeir.​—2 Timote 2:​23.

Ken kajilu, Dri Kennan ro an Jeova rej kejbãrok wõt air burukuk iben dron einwõt juõn rolul in jimjãn jimjãtin ibelakin lõl, im men in ej einjuõn jen kumi in Protestant ro me rar jibel ilo elõñ buki kabuñ ko. Ikijen katak ko ilo Baibel, Dri Kennan ro an Jeova ilo elõñlok jen 230 ailiñ ko rej lor nan in kakabilek eo an dri jilik Paul ñõn ‘rejtak dron ilo nan ko air.’ Ejelok jibel ko ibwiljiir. Jen men in, ej mol air “buru wõt juõn, kin juõn wõt lemnak im juõn wõt un.” (1 Dri Korint 1:​10, UBS) Rej kate ir iben ro jeir im jãtir ñõn “kejbãrok an Jitõb kõmõnmõn buru wõt juõn ilo liab in ainemõn.”​—Dri Epesõs 4:3.

[Kamelele eo itulal]