Druaklok Ñõn Anij

Ekõnan Bwe Jen Lo Jerammõn ilo Mour eo Ar

Joshua 1:​6-9

RO JEMEN im jinen im rej yokwe ro nejiir rej kõnan bwe ro nejiir ren lo mõnõnõ im jerammõn ilo mour ko air. Eindrein bareinwõt Jeova, eo Jemer ilõñ, ekõnan bwe ro nejin ion lõl ren lo jerammõn im mõnõnõ ilo mour ko air. Ej kwalok yokwe eo an ñõn kij ikijen an jiroñ kij kin wãwen jemaroñ lo mõnõnõ. Ñõn wanjoñok, jen lemnok kin nan ko an ñõn Joshua ilo Joshua 1:​6-9.

Jen lale ta eo ej walok ilo pija eo ituanbijmaroñ. Joshua ej dri tel eo ekãl an Israel elikin an Moses mij, im ej tel elõñ million dri Israel ro. Rej pojõk ñõn air dreloñe eneo Anij ear kalimur kake ñõn ro jimair. Anij ej lelok jet nan in kakabilek ñõn Joshua. Elañe enaj lor nan in kakabilek kein, renaj jibõñ e ñõn an lo jerammõn. Ak tokjen nan in kakabilek kein kar jab ñõn Joshua wõt. Kij bareinwõt jemaroñ lo jerammõn, elañe jenaj jerbali.​—Dri Rom 15:4.

Jilu alen, Jeova ej jiroñ Joshua bwe en kajur im beran wõt. (6, 7, 9 eon) Alikar, Joshua enaj aikwij beran im kajur ñõn lo tõbrõk ilo an tel ailiñ in Israel ñõn Enen Kalimur eo. Bõtab, ewi wãwen an maroñ beran im kajur?

Joshua emaroñ beran im bõk kajur jen jeje ko rekwojarjar an Anij. Jeova ej ba: “Kwon lale im kõmõn ekar ñõn aolepen kien eo Moses korijera e ar jiroñ yuk kake.” (7 eon) Ilo ien in, ekar or wõt jet ian buk ko ilo Baibel kar jei im rej ber iben Joshua. * Bõtab, an or iben Nan eo an Anij ejjab melelen bwe enaj lo tõbrõk ak jerammõn. Ñõn an Joshua bõk tokjen jen Nan in Anij, eor ruo men ko ej aikwij kõmõni.

Moktata, Joshua ej aikwij kobrõk buruen kin nan eo an Anij ran otemjej. Jeova ej ba: “Kwon kalomõnlokjen kin e, ran im boñ.” (8 eon) Juõn buk ej kemelele kin eon in ej ba: “Anij ear kakiene Joshua ñõn an kememej Kien eo An ikijen an ‘riit’ ñõn e mõke ilo juõn ainiken ejjab elaj, im ‘kalomõnlokjen’ kake.” Riit im kalomõnlokjen kin Nan eo an Anij kajjojo ran enaj jibõñ Joshua ñõn an anjo ion abañ ko rej ber iman.

Kein karuo, Joshua ej aikwij kajerbal ta ko ej katak jen Nan in Anij. Jeova ej jiroñe: “Kwon lali im kõmõn men ko otemjej emwij jeji iloan: inem kwo naj kõmõn bwe en emõn ial eo am, im kwo naj jerammõn.” (8 eon) Joshua ear lo jerammõn kinke ear kõmõnmõn ankilan Anij. Unin an maroñ lo jerammõn kinke ankilan Anij ej bõktok jerammõn aolep ien.​—Aiseia 55:10, 11.

Joshua ear lor nan in kakabilek eo an Jeova. Tokjen men in, ear aitok an mour im ear lo juburu ilo mour eo an einwõt juõn dri kabuñ etiljek an Jeova.​—Joshua 23:14; 24:15.

Kwokõnan ke mour im lo jerammõn, einwõt kar Joshua? Jeova ekõnan bwe kwon lo jerammõn. Bõtab, ejabwe ñõn an or wõt ar Baibel. Juõn jeer im jãter eto an tiljek ear rejañ im ba: “Kwoj aikwij riiti Baibel eo bwe nan ko an ren tõbar buruõm.” Elañe kwoj kõtlok bwe nan in Anij en tõbar buruõm im jerbale ta ko kwoj katak jene ilo mour eo am ran otemjej, inem kwonaj lo “jerammõn,” einwõt kar Joshua.

[Kamelele eo itulal]